1 Samweli 9

Samweli ɛ sʋrʋ Sawulo bʋnɔ

1 Ete gbaa ɛkɩ gɛtɛ e ye Benyamin wofoli waanɩ gɛ bee kpèlè wɔ Kisi fɔ na sara. Kisi wote n di Abile gɛtɛ wobi n di Sero fɔ. Sero wote n di Bekorati, gɛ Bekorati wote n di Afiya. 2 Kisi ɛ̀ ba ebi-tenibi gɛtɛ bee kpele wɔ alɛ Sawulo. Ɛ̀ ba ɔmɩrɩ gɛ e ye gɩnɩ ɛ da ɛnɩ-kamasɛ Isareli gɩfɩɩ gaanɩ.

3 Wʋ bɛ ba gɛtɛ Sawulo wote Kisi wakpɔŋɔ-tɩtɩɩ i lulu, gɛ ɛ dɔ̀ Sawulo alan, <<Ka bɛsaranyan fɔ baanɩ ɛkɩ fɩya ma koro, fɔ yàà ma bugiti akpɔŋɔ-tɩtɩɩ fɔ.>> 4 Okoro bɛ da ma Efarim wodon wʋʋ gɛtʋnkwaa ka ma ye Salisa, mɔ ben we yɩ. Bɛ kyaga wuu koro bɛ san Saalim wɔ ntʋnkwaa baanɩ, mɔ akpɔŋɔ-tɩtɩɩ fɔ ɩn ma dʋkɔ. Ɛwʋ gɛ bɛ da ma Benyamin gɛtʋnkwaa gaanɩ, mɔ ben we yɩ.

5 Gɛtɛ be gyu Sufi gɛtʋnkwaa gaanɩ fɔ, Sawulo ɛ dɔ̀ ɛsaranyan gɛtɛ ɛbɛ ma ɛwɔ bɛ san fɔ alan, <<Yɛ taà biri, nka gɛlɛ fɔ miinte eè kere gɛsa amɩnlɛ akpɔŋɔ-tɩtɩɩ fɔ yii koro ɛ ya, fɔ ɛ̀ɛ̀ sa amɩnlɛ tii koro.>>

6 Gɛ ɛsaranyan fɔ ɛ dɔ̀ wɔ alan, <<Nya, Wurubwarɛ wɔnɩ ɛkɩ ɛ̀ sa ditele nyadɩ daanɩ gɛtɛ bee bù wɔ gepepe, gɛ ade-kamasɛ gɛtɛ ɛ̀ dɔ̀ fɔ, wʋʋ ba waanɩ. Yɛ taà san wakʋn. Nkɩfɔ eè wùlà tɩ osele gɛtɛ taà ka.>>

7 Gɛ Sawulo ɛ dɔ̀ ɛsaranyan fɔ alan, <<Gengyi tɩ̀ san fɔ, anʋn gɛ taà ka tɩ tɛ Wurubwarɛ wɔnɩ fɔ? anyandilɛ gɛtɛ ɩ̀ sa tii bekotoku baanɩ fɔ, i were, gɛ tɩn ma anyan-kyɛlɛ gɛtɛ taà ka tɩ tɛ Wurubwarɛ wɔnɩ fɔ. Abɛɛ gɩnyankɩ gɩ̀ sa?>>

8 Ɛsaranyan fɔ ɛ dɔ̀ Sawulo alan, <<Nya, ǹ bà shekeli diibi dii geyo dikpen-naafɛ dɩkɩ dɩ̀ sa maakʋn. Nan ka dɩ n tɛ Wurubwarɛ wɔnɩ fɔ, fɔ èè wura wùlà tɩ osele gɛtɛ taà ka.>> 9 (Wukukuba waanɩ fɔ, Isareli gɩfɩɩ gaanɩ fɔ, gengyi ɛnɩ ɛkɩ ɛ̀ san ɛ̀ ma lila ade Wurubwarɛ wakʋn fɔ, ɛɛ dɔ̀ alan, <<Ba, taà ma we ewelɛ,>> yema ɛnɩ gɛtɛ bee kpèlè Wurubwarɛ wɔtabʋrʋlɛ ǹdò lɛ, nafɔ bee ti kpèlè wɔ gɛ ewelɛ Hebre ginde gaanɩ.)

10 Gɛ Sawulo alan, <<Wʋ̀ kɔlɔ, yɛ taà san.>> Okoro bɛ tɔ bɛ da ditele gɛtɛ Wurubwarɛ wɔnɩ fɔ ɛ̀ sa daanɩ fɔ.

11 Gɛtɛ bɛɛ bʋn odon fɔ bɛɛ fɔrɔ ditele fɔ daanɩ fɔ, be tuma bɛsʋgʋgyan bɛkɩ gɛtɛ bɛɛ fɔrɔ bɛ ma kpa butu, gɛ be lila bɛ alan, <<Ewelɛ*9:11 ewelɛ ade è di Wurubwarɛ wɔtabʋrʋlɛ ade fɔ ɛ̀ sa nfan?>>

12 Be tiri wuunyun alan, <<Ɩɩn, ɛ̀ sa yɩɩ bʋnʋn. Ɩ kya koro! Nkenkele nyawʋ gɛ e be gyu tii ditele daanɩ, yema bɛnɩ bɛ ba bàà bɛ tɛ gedi gedi gɩɩ gɛtɛ̀kʋn. 13 Gengyi ɩ bɔ i gyu ditele fɔ daanɩ fɔ, yaà we wɔ, pɛ ɛ̀ɛ̀ bʋn san Dɩsʋma-kʋn ma di. Bɛnɩ fɔ bɛn nan di pɛ ɛ̀ɛ̀ ma gyu, yema wù di gɛtɛ èè hira gedi gɩɩ gɛtɛ̀ gaanyan fɔ. Wʋʋ gama fɔ ɛbɛ gɛtɛ be kpèlè fɔ baà talɩ be di. Ɩ bʋn ɩ san, ɔkʋna nyawʋ yaà we wɔ.

14 Bɛ san bɛ ma gyu ditele fɔ daanɩ. Gɛtɛ bee gyu ditele fɔ daanɩ fɔ, be tuma Samweli ɛɛ fɔrɔ Dɩsʋma-kʋn fɔ.

15 Pɛ kere gaà bɛ kpa Sawulo ɛ̀ɛ̀ bɛ san Samweli wakʋn fɔ, Yahwe e tiri e wùlà wɔ alan, 16 <<Gɩsa ɔya nyawʋ wʋʋkʋna fɔ, nan sa ɛnɩ ɛkɩ n ye Benyamin gɛtʋnkwaa gaanɩ n ba aakʋn. Sʋrʋ wɔ bʋnɔ mɛ egyegeyelɛ mɩɩn bɛnɩ Isareli bete boo koro. Eè tiri bɛ e ye Filisiti bete baalɔ yaanɩ. Yema be wula be kpèlè mɩ, gɛ na nʋn boo gewùlà kpèlè fɔ.>>

17 Gɛtɛ Samweli e we Sawulo fɔ, Yahwe ɛ dɔ̀ wɔ alan, <<Ɛnɩ gɛtɛ na dɔ̀ wade na tɛ wɔ̀ fɔ wɔ lɛ. Ɛwɔ nan di bugyu ɛ tɛ mɩɩn bɛnɩ.>>

18 Sawulo e kpe ɛ gbɛma Samweli ditele fɔ diitunu wʋʋpɩ, gɛ e lila wɔ alan, <<Ǹ fɔ wɔ̀ gɛ, aà talɩ a wùlà mɩ ɔkʋn gɛtɛ ewelɛ ade fɔ dɩkpaara dɩ̀ sa?>>

19 Samweli e tiri wuunyun alan, <<Nmɩ ǹ di ewelɛ fɔ. Ɩ bɛ da i gyegeye taà san gedi gɩɩ gɛtɛ̀kʋn, yema wù di gɛtɛ àà di ma nmɩ ǹdò, gɩsa gɛgyɩgyan fɔ nan dɔ̀ ade powu gɛtɛ ɩ̀ sa aaturu waanɩ, fɔ nan tiri wɔ osele. 20 Akpɔŋɔ-tɩtɩɩ gɛtɛ i lulu ǹdò awi asiyee lɛ bɩrɛ, ɩ kara sa yaamɩnlɛ, yema be we yɩ. Gɛ ɛnyan wade gɛ Isareli bete powu bee len? Nka awɔ ma aate dɩkpaara?>>

21 Sawulo e tiri wuunyun alan, <<Na ye gɛ Benyamin wofoli gɛtɛ ɛwʋ n di Isareli wo-ifoli yaanɩ wʋpɩɩ, gɛ mɩɩn dɩkpaara n di dɩkpaara gɛtɛ dɩn taa di gʋnʋn ofoli fɔ waanɩ. Anʋn yii koro gɛ aa dɔ̀ mɩ ade nyayɩ yiidu?>>

22 Ɛwʋ gɛ Samweli ɛ ka Sawulo ma wɔsaranyan fɔ e gyu gedi gɩɩ gɛtɛ̀kʋn fɔ, gɛ ɛ ka bɛ ɛ mɛ bɛndɩrɛ ɛ tɛ bɛnɩ gɛtɛ be kpèlè bàà be di fɔ. Baà mɛ anlɛ bɛnɩ dikpilin ma fwo. 23 Gɛ Samweli ɛ dɔ̀ ekpelelɛ fɔ alan, <<Ka gɩnan gɛtɛ na ka na tɛ wɔ̀ fɔ ba, ɛgɩ gɛtɛ na dɔ̀ alɛ tiri sɩ̀ gɩlan fɔ.>>

24 Okoro ekpelelɛ fɔ e tiri dɩbɛrɛ ma anyan powu gɛtɛ ɩ̀ fɩya fɔ, ɛ bɛ sɩ̀ Sawulo bʋnʋn. Gɛ Samweli ɛ dɔ̀ alan, <<Nya, nyawʋ n di gɩnyan gɛtɛ na tiri na sɩ̀ wɔ̀. Kɔrɔ, yema na tiri yɩ na sɩ̀ wɔ̀ wàà mɛ aayo ade-mɛlɛ nyayɩ yaanɩ, okoro kɔrɔ ma ɛbɛ gɛtɛ na kpèlè fɔ.>> Ɛwʋ gɛ Sawulo e di ɔgyɔlɔ waanyandilɛ ma Samweli duwi dɩtɔkɔ.

25 Gɛtɛ bɛ waran be ye gedi gɩɩ gɛtɛ̀kʋn be be gyu ditele daanɩ fɔ, Samweli e tabʋrʋ ma Sawulo wabansʋrʋ fɔ wo koro. 26 Kere-kpalɛ gɛgyɩgyan-fuu fɔ Samweli e kpèlè Sawulo abansʋrʋ fɔ gatala gɛ e dɔ̀ wɔ alan, <<Pɩna koro, nan ma yela wɔ̀.>> Sawulo ɛ pɩna koro gɛ bɔɔ bɛnyɔɔ be ye okòro disere-kɩlɩn. 27 Gɛtɛ bɛɛ nɩma ditele fɔ daatuma fɔ, Samweli ɛ dɔ̀ Sawulo alan, <<Dɔ̀ aasaranyan fɔ alɛ ɛ bɛ da e gyegeye.>> Gɛ ɛsaranyan fɔ ɛ mɛ gɛlɛ. Gɛ ɛ dɔ̀ Sawulo alan, <<Awɔ yela nfan bɛrɛɛ, nan tɛ wɔ̀ ɔtʋn gɛtɛ wʋ ye Wurubwarɛ wakʋn.>>