1 Samweli 26

Dafidi e biri e kere Sawulo ɛ ya gɛtɛ en wolo wɔ

1 Sifi bete bɛ san Sawulo akʋn Gibeya bɛ ma dɔ̀ wɔ alan, <<A nyɩ̀ gɛtɛ Dafidi è bu Hakila wodon gɛtɛ wʋ̀ ten Yesimon wotonkuma fɔ waanɩ?>>

2 Okoro Sawulo e tiri bɛnɩ gbaa ma nkpɩn ton (3,000) e ye Isareli bete baanɩ gɛ bɛ da Sifi wotonkuma waanɩ bàà ma bugiti Dafidi. 3 Sawulo e sere baasarakʋn ɛ gbɛma osele Hakila wodon gɛtɛ wʋ̀ ten Yesimon wotonkuma fɔ, fɔ Dafidi ɛ̀ sa otonkuma fɔ waanɩ. Gɛtɛ e we alɛ Sawulo ɛ tɛrɛma wɔ ɛ ba dʋkɔ fɔ, 4 ɛ sa beyurunyalɛ gɛ bɛ ma we gɛtɛ Sawulo ɛ nyɩ̀ ɛ̀ ba ɛ̀ sa dʋkɔ.

5 Ɛwʋ gɛ Dafidi ɛ tɔ gɛ ɛ da ɔkʋn gɛtɛ Sawulo ɛ̀ sa fɔ. E we ɔkʋn gɛtɛ Sawulo ma bɩtà bʋʋtàlɛ ɛndɩrɛ Neri wobi Abineri bɛ̀ dɔ̀. Sawulo ɛ̀ dɔ̀ gɛsarakʋn fɔ gii getite gɛ bɩtà bʋʋ bɛtàlɛ fɔ bɛ dʋrɔ be silin wɔ be tuma. 6 Gɛ Dafidi e lila Hiti-te Ahimeleki ma Saruwa wobi Abisayi gɛtɛ è di Yowabi wɔdɩrɛ fɔ alan, <<Ɛnyan nan fɩya ma nmɩ taà waran tɩ san Sawulo wakʋn gɛsarakʋn fɔ gaanɩ?>>

Gɛ Abisahi alan, <<Nan fɩya ma awɔ n san.>> 7 Okoro Dafidi ma Abisahi bɛ san bɩtà bʋʋ bɛtàlɛ fɔ baakʋn odente, fɔ Sawulo ɛ dʋrɔ ɛ fwa bʋda gɛsarakʋn fɔ gii getite gɛ wɔ gɩtʋrʋnyan gɩ̀ sere gɛtʋnkwaa gbɛma wo duyu. Abineri ma bɩtà bʋʋ bɛtàlɛ fɔ mɔ bɛ dʋrɔ be silin wɔ.

8 Ɛwʋ gɛ Abisahi ɛ dɔ̀ Dafidi alan, <<Ǹdò Yahwe e tiri aa kyʋnlɛ ɛ tɛ wɔ. Nkele yɛ mɩ nan sere wɔ mɩɩn gɩtʋrʋnyan fɔ n marama gɛtʋnkwaa. Mɩn nan sere wɔ dɩnyɔɔ.>>

9 Mɔ Dafidi ɛ dɔ̀ Abisahi alan, <<Kara wolo wɔ, ɛ nyan nan talɩ ɛ ka gʋlɔ ɛ kya Yahwe wɔnɩ gɛtɛ ɛ sʋrʋ bʋnɔ gɛtɛ ɛn nan di dɩpwɛ?>> 10 Gɛ Dafidi ɛ dɔ̀ alan <<Gɛtɛ Yahwe ɛ̀ nyɩ̀ ɛ sa lɛ, ɛwɔ gbagba nan wolo wɔ, nkɩfɔ ɛwɔ gbagba wawi nan nɩma gɛ eè ku, abɛɛ ɛɛ̀ san bɩtà baanɩ gɛ ɛɛ̀ ma ku. 11 Mɔ Yahwe ɛ ka ɛ san ɔfɔ alɛ nmɩ nan ka gʋlɔ n kya wɔnɩ gɛtɛ ɛ sʋrʋ bʋnɔ. Ka wɔ gɩtʋrʋnyan ma wo butu bʋʋ gɛsakʋn gɛtɛ ɩ̀ dɔ̀ gbɛma wo duyu fɔ taà san.>>

12 Okoro Dafidi ɛ ka gɩtʋrʋnyan ma butu bʋʋ gɛsakʋn gɛtɛ ɩ̀ dɔ̀ gbɛma Sawulo duyu fɔ gɛ bɛ da. Ɛnɩ ɛkɩ en we gɛ ɛn nyɩnla ade nyayɩ abɛɛ ɛnɩ ɛkɩ ɛ̀ɛ̀ lama. Ɛbɛ powu bɛ fwa, yema Yahwe ɛ yɛ bɛ fwa bʋda bɛ kyolon.

13 Ɛwʋ gɛ Dafidi ɛ kààrà ɛ san ofèn-do fɔ gɛ ɛ ma bʋn e yela odon fɔ wuu duyu dii koro, fɔ bɛ ba ɔfɔ ma bɛwɔlɔn. 14 E kpen e kpèlè bɩtà bʋʋ bɛtàlɛ fɔ ma Neri wobi Abineri alan, <<Abineri, aa nʋn maakʋn? Gɛ Abineri e lila alan, Ɛnyan gɛ à di gɛ aa kpen àà lama egyu-dɩrɛ gɛlɛ?>>

15 Gɛ Dafidi e tiri wuunyun alan, <<Nka awɔ n di eteni Isareli fɔ? Gɛ anʋn yii koro gɛ an talɩ dɩyɛ aafonte egyu-dɩrɛ? Ɛnɩ ɛkɩ e gyu yɩɩ gɛsarakʋn fɔ gaanɩ èè wolo aafonte egyu-dɩrɛ. 16 Ade gɛtɛ a mɛ lɛ ɩn kɔlɔ, na nya alɛ gɛtɛ Yahwe ɛ̀ nyɩ̀ ɛ sa lɛ, awɔ ma aa bɛnɩ fɔ yɩ kʋtʋma ma diku, yema ɩɩn dɩyɛ yiifonte, gɛtɛ Yahwe ɛ sʋrʋ bʋnɔ fɔ. Ɩ nya i silin alɛ yaà we wɔ gɩtʋrʋnyan ma womini-salɛ-butu gɛtɛ ɩ̀ dɔ̀ gbɛma wo duyu fɔ?>>

17 Sawulo ɛ nyɩnla Dafidi gɩta gɛ ɛ dɔ̀ alan, <<Nka Miinbi Dafidi gɩta gɩ lɛ?>> Gɛ Dafidi e tiri wuunyun alan, <<Ɩɩn, wù di gɛ nmɩ, miinfonte egyu-dɩrɛ.>> 18 Gɛ e biri ɛ dɔ̀ alan, <<Anʋn yii koro gɛ miinfonte ɛ̀ tɛrɛma nmɩ wɔsaranyan? Anʋn gɛ na mɛ, gɛ ade-kpen mɔmɔ gɛ na mɛ gɛtɛ yii tin mɩ dɩpwɛ? 19 Miinfonte egyu-dɩrɛ, nʋn nmɩ aasaranyan maagyebi. Gengyi wù di gɛ Yahwe na yɛ gɛ aa tɔ a yela miin koro fɔ, e to gedi gɩɩ gɛtɛ̀ nyagɩ fɔ woturu wàà nʋ̀n wɔ. Mɔ gengyi wù di gɛ bɛnɩ n tɛ mɛ fɔ, Yahwe ɛ fwala bɛ, yema be berema mɩ be ye mɩɩn gedikʋn ye gɛtʋnkwaa gɛtɛ Yahwe ɛ tɛ Isareli bete fɔ gaanɩ gɛ bɛ dɔ̀ alan, <San ma sʋma bekpen.> 20 Gɛlɛ wuu koro ɩ kara yɛ mɩɩn nkalan ɛ̀ɛ̀ nʋ̀n gɛtʋnkwaa ma ɔfɔ gaanɩ gɛtɛ wun di gɛ Yahwe bʋnʋn. Awɔ Isareli wogyu a ba aa fan nmɩ gɛtɛ n we anlɛ dɩbaaba, anlɛ gɛtɛ bɛɛ fan efwi idon yii koro fɔ.>>

21 Dʋkɔ gɛ Sawulo ɛ dɔ̀ alan, <<Na mɛ ade-kpen. Biri ba, miinbi Dafidi. Yema ǹdò a we alɛ mɩɩn nkpa wù di ade gbaa. Mɩɩn nan nɩ tɔ n yela aa koro, gbagbaagba fɔ na mɛ anyimapu-de gɛ na mɛ ade-kpen na kààrà.>>

22 Dafidi e tiri wuunyun alan, <<Nya aa gɩtʋrʋnyan fɔ gɩlɛ, yɛ aasaranyan fɔ ɛkɩ èè be to gɩ. 23 Yahwe ee le ɛnɩ-kamasɛ gɛtɛ wade ɩ̀ tʋna gɛ ee di nʋnkwarɩ fɔ gutoro. E tiri wɔ̀ ɛ tɛ mɩ ǹdò, mɔ mɩn ka gʋlɔ kya wɔ̀, yema à di wɔnɩ gɛtɛ ɛ sʋrʋ wɔ bʋnɔ. 24 Gbagbaagba fɔ, anlɛ gɛtɛ ǹdò na we aa nkpa alɛ wù di ade gbaa lɛ, gɛlɛ gɛ Yahwe mɔ ɛɛ̀ nya mɩɩn yo fɔ èè tiri mɩ ye ade-kpen-kamasɛ yaanɩ.>>

25 Ɛwʋ gɛ Sawulo ɛ dɔ̀ Dafidi alan, <<Miinbi Dafidi, Wurubwarɛ e hira wɔ̀. Aà mɛ ade-dɩrɛ gɛ aà di aa bɛkyʋnlɛ boo koro.>>

Gɛ Dafidi ɛ da, gɛ Sawulo e biri ɛ ba ditele.