1 Samweli 2

Hana wonyun-tiri

1 Hana e tiri onyun gɛ ɛ dɔ̀ alan,

<<Yahwe, awɔ na yɛ gɛ n te di ɔsɛ,

gɛ awɔ Yahwe na yɛ gɛ ǹ ba ɔkɛma.

Na mʋmwa mɩɩn bɛkyʋnlɛ bɔɔ bʋnʋn,

yema a to mɩ a ya.

2 Ɛkɩ ɛn ma gɛtɛ è we fɩrɩn-fɩrɩn anlɛ Yahwe,

Ɛkɩ ɛn ma fɩya ma awɔ.

Dɩtaa dɩkɩ dɩn ma anlɛ awɔ tii Wurubwarɛ.

3 <<Kara tɩ̀ tabʋrʋ bʋma koro,

abɛɛ àà tabʋrʋ kɩntɩn.

Yema Yahwe è di gɛ Wurubwarɛ gɛtɛ ɛ̀ nyɩ̀ ade powu.

Gɛ ɛwɔ n tɛ kɛrɛ bɛnɩ baade mɛlɛ powu.

4 Bɩtà bʋʋ bɛtàlɛ baagyatʋrʋ ɛbɛ be sila,

mɔ, ɛbɛ gɛtɛ nafɔ bè di bɛfɔbɩlɩlɛ fɔ be wura ɔkɛma.

5 Bɛnɩ gɛtɛ nafɔ bɛ̀ ba anyandilɛ kpekpesi fɔ, bɛ̀ san bee fu boo koro pɛ bàà wura anyandilɛ,

mɔ ɛbɛ gɛtɛ nafɔ dɩkpan dì de bɛ fɔ, nkele bɛn mɩnɩ taa ni ku dɩkpan.

Ɛlamanbʋ e wo bebi kwarankɩ,

mɔ ɛna gɛtɛ nafɔ ɛ̀ ba bebi kpekpesi fɔ, ɛn mɩnɩ ma ɛkɩlɩn.

6 Yahwe ee wolo, gɛ ɛɛ lama,

ɛɛ sama ɛnɩ diku daanɩ, gɛ ɛɛ lama wɔ ɛ ba nkpa anɩ.

7 Yahwe ɛɛ mɛ bɛkɩ bɛkyɩnyɩn gɛ ɛɛ mɛ bedo beyenpu,

ɛɛ warama bɛkɩ gɛ ɛɛ bʋma bedo mɔ.

8 Yahwe ɛɛ tɔ̀là eyenpu e ye atɩn yaanɩ,

gɛ ɛɛ tɔ̀là ehiyanlɛ e ye ditonton daanɩ.

Ɛɛ sɩ̀ bɛ e bon ma begyu-dɩrɛ boo bebi

gɛ ɛɛ yɛ bee wura gedikʋn gigyu-bɩya fɔ gii koro.

Yema gɛtʋnkwaa gii gesere ɔpɩ gi ye Yahwe wakʋn,

gɛ ɔpɩ fɔ wuu koro gɛ e sere owi-yasɩ powu.

9 Ɛɛ dɩyɛ wɔ bɛnɩ bɔɔ bɩsɩrɩ,

mɔ duyu-kɛma dɩɩ bɛnɩ bɩrɛ, baà muru dibilin daanɩ.

<<Ɛnɩ ɛn nan talɩ ɛ ka ɔkɛma e di diyere.

10 Yahwe bɛkyʋnlɛ baà muru,

Ɛɛ̀ fa bɛ dɩkpaaba e ye gatala,

Yahwe ɛɛ̀ dɔ̀ gɛtʋnkwaa powu gɩɩ gɔdɔ.

Ɛɛ̀ tɛ wogyu ɔkɛma,

ɛɛ̀ bʋma wogyu gɛtɛ ɛ sʋrʋ bʋnɔ fɔ.>>

11 Wʋʋ gama fɔ, Elikana e biri ɛ da wɔlɛ Rama ditele, mɔ Samweli ɛ sara gedi gɩɩtɛlɛ Eli gatɩn ɛ sʋma Yahwe.

Eli bebi-teni

12 Eli bebi-teni bɛ̀ ba gibi-kpen, gɛ bɛn taa bù Yahwe. 13 Fɔ wù di odu waade-mɛlɛ tɛ gedi gɩɩ bɛtɛlɛ fɔ ma bɛnɩ fɔ gɛtɛ gengyi ɛnɩ ɛkɩ ɛ̀ tɛ gedi, gɛ gɩnan fɔ gɩ̀ gyaga gɩɩ fara fɔ, gedi gɩɩtɛlɛ wɔkpàlɛ ɛɛ̀ ka gɩnyanɩ-dɩrɛ gɛtɛ gɩ̀ ba alobi asiyee fɔ e ton, 14 fɔ ɛ̀ɛ̀ ka gɩ ɛ sa dikere abɛɛ danseyi abɛɛ gikunbi abɛɛ osun fɔ waanɩ ɛ kyɔlɔ gɩnan-kamasɛ gɛtɛ gɩnyanɩ fɔ gaà gye fɔ ɛɛ̀ ka ɛ tɛ gedi gɩɩtɛlɛ fɔ. Anlɛ gɛ bɛ mɛ Isareli bete powu gɛtɛ bɛ bɛ tɛ gedi Silo fɔ. 15 Nkele mɔ, pɛgɛ ayo fɔ yàà be kpin gba fɔ, gedi gɩɩtɛlɛ wɔkpàlɛ fɔ ɛɛ bɛ dɔ̀ ɛnɩ gɛtɛ ɛ tɛ gedi fɔ alan, <<Tɛ gedi gɩɩtɛlɛ fɔ gɩnan fɔ akɩ èè kuma, yema ɛn taa len gɩnan-gyagalɛ e ye aakʋn, mɔ ee len gɛ gɩnan-ŋɔɔ.>>

16 Gengyi ɛnɩ gɛtɛ ɛɛ tɛ gedi fɔ ɛ̀ dɔ̀ alan, <<Yɛ ayo fɔ yàà kpin pɛ, fɔ àà tiri gɩnan fɔ anlɛ gɛtɛ à len,>> fɔ, ɛkpàlɛ fɔ ɛɛ dɔ̀ alan, <<Kwa, ka gɩ tɛ mɩ nkenkele, nka gɛlɛ fɔ, nan ka gɩ dɩkpatɩ daanɩ.>>

17 Eli bebi-saranyan fɔ baade-mɛlɛ fɔ ì di ade-kpen-dɩrɛ Yahwe bʋnʋn, yema alɛ bɛn ka gebù tɛ Yahwe gedi gɩɩ gɛtɛ̀ fɔ.

18 Mɔ Samweli bɩrɛ ɛ bɔ ɛɛ sʋma Yahwe. È di ebi gɛtɛ ɛɛ sa gɛgba tinlɛ diboro fututu. 19 Gɩkyan n di gɩkyan, gengyi Samweli wɔna ma wote ma tɛ Wurubwarɛ gedi fɔ, wɔna ɛɛ baa gɛgba-serelɛ-bi ɛ san ma wɔ. 20 Gɛ Eli e hira Elikana ma wɔsɔ alan, <<Yahwe ɛ dama ɛnanɩ nyawɔ wo koro ɛ̀ɛ̀ tɛ wɔ̀ bebi ka sere ɛwɔ gɛtɛ e tiri onyun e lila, gɛ ɛ ka ɛ tɛ Yahwe fɔ didin.>> Wʋʋ gama fɔ be biri bɛ da bɔɔlɛ. 21 Gɛ Yahwe ɛ kʋna Hana wo koro, gɛ e wo bebi-tenibi besiyee, ma bɛnanɩbi bɛnyɔɔ. Samweli bɩrɛ ɛ̀ bɔ ɛɛ dan gɛ ɛɛ sʋma Yahwe.

Eli ma wo bebi baade-mɛlɛ

22 Nkele Eli ɛ dan gepepe. Gɛ ɛ nʋn ade gɛtɛ wo bebi bɛ mɛ Isareli bɛnɩ powu, ma anlɛ gɛtɛ bɛɛ dʋrɔ ma bɛnanɩ gɛtɛ bɛɛ mɛ gʋtʋn Dɩyan dii Dikwo-dɩrɛ diitunu fɔ powu. 23 Okoro Eli e lila bɛ alan, <<Anʋn yii koro gɛ ɩɩ mɛ gɛlɛ gaade nyayɩ? Na nʋn gɛtɛ bɛnɩ powu bɛɛ dɔ̀ gɛlɛ gaade-kpen gɛtɛ ɩɩ mɛ lɛ. 24 Kpakpaakpa miin bebi, ade gɛtɛ na nʋn ɩɩ yasɩ Yahwe bɛnɩ baanɩ lɛ in di gɛ ade-kpara. 25 Gengyi ɛnɩ ɛkɩ ɛ̀ mɛ wɔwɔlɔn ade-kpen fɔ, Yahwe ɛɛ̀ talɩ ɛ fɔ ɛ tɛ wɔ. Mɔ gengyi ɛnɩ ɛ̀ mɛ gɛ Yahwe ade-kpen fɔ, ɛnyan nan talɩ ɛ fɔ ɛ tɛ wɔ?>> Mɔ bebi fɔ bɛn nʋn boote wakʋn, yema wù di Yahwe gelenbi gɛtɛ èè wolo bɛ.

26 Gɛ Samweli ɛ̀ bɔ ɛɛ dan gɛ, gɛ ee di Yahwe ma bɛnɩ gʋnʋn.

Ade-tirilɛ-wùlàlɛ ka dama giten-tiira tɛ Eli dɩkpaara

27 Gɛ Wurubwarɛ wɔtabʋrʋlɛ ɛkɩ ɛ ba Eli wakʋn ɛ bɛ dɔ̀ wɔ alan, <<Yahwe alan, <Ɔya gɛtɛ aatu ɛbɛ bɛ̀ sa Egyipiti, Farawo gatɩn fɔ, mɩn tiri koro wùlà bɛ kanyɩ? 28 Na tiri aatu na ye Isareli wo-ifoli fɔ powu yaanɩ gɛtɛ ɛ̀ɛ̀ mɛ miin gedi gɩɩtɛlɛ, fɔ ɛ̀ɛ̀ san miin gedi gii gɛtɛ̀kʋn fɔ, èè kuma olifwi fɔ, ɛ̀ɛ̀ sa gɛgba tinlɛ diboro mɩɩn bʋnʋn. Na nɩ tɛ aatu ɛbɛ bɔɔ dɩkpaara dɩɩ bɛnɩ gekuma gii gedi gɩɩ gɛtɛ̀ gaanyan powu gɛtɛ Isareli bete bɛɛ tɛ fɔ. 29 Anʋn yii koro gɛ ɩn taa ka gebù ɩ tɛ miin gedi gɩɩ gɛtɛ̀ ganyan gɛtɛ bɛɛ tɛ mɩ fɔ? Anʋn yii koro gɛ awɔ Eli aa ka gebù a tɛ aa bebi a da mɩ gɛtɛ aa yɛ bɛ bee tiri gekuma gii gedi gɩɩ gɛtɛ̀ gɩɩ gɩnan ma ayo fɔ gɛtɛ mɩɩn bɛnɩ Isareli bete bɛɛ tɛ mɩ fɔ ɩ ka i di ɩ sa koro alɩ, ɩ kere nmɩ ɩ ya?

30 Gɛlɛ wuu koro nmɩ Yahwe, Isareli wo Wurubwarɛ na dɔ̀ na sɩ̀ alan, <Awɔ aa dɩkpaara ma aa aatu dɩkpaara dɩɩ bɛnɩ yaà sʋma mɩ gakpaakpa.> Mɔ Nmɩ Yahwe ntɛ dɔ̀ alan, <Mɔ nkele, wʋ san ɔfɔ, ɛbɛ gɛtɛ baà sa mɩ gebu fɔ, nmɩ mɔ nan sa bɛ gebu, mɔ ɛbɛ gɛtɛ baà terema mɩ fɔ, nmɩ mɔ nan terema bɛ. 31 Ɩ nya, ɔya wʋ nɩma gɛtɛ nan wolo wɔ̀, ma bɛsaranyanbi gɛtɛ bɛ̀ sa aate dɩkpaara daanɩ fɔ powu, gɛtɛ ditenikwaa dɩ nan sara yɩɩ dɩkpaara daanɩ, 32 gɛ yaà we dɩfana mɩɩn gɛsarakʋn fɔ gaanɩ. Ma gɛtɛ nan mɛ ade-kpara n tɛ Isareli bɛnɩ-kurumakyɛɛ gba fɔ, aa dɩkpaara daanɩ bɩrɛ, ditenikwaa dɩkɩ dɩ nan sara dɩ nya. 33 Mɔ nan kere Yaanɩ ɛkɩ n ya ɛ̀ɛ̀ mɛ mɩɩn gedi gɩɩtɛlɛ sʋma mɩ, mɔ wɔ bʋnʋn baà gbena gɛ ɛn nan wura bʋnʋn bɔɔ gɛgyagakʋn bʋkɩ. Gɛ aadu waanɩ wʋʋ bɛnɩ powu baà belen be ku bɔɔ gɩsaranyan gaanɩ.

34 <<Gengyi aa bebi bɛnyɔɔ, Hofini ma Finehasi bè ku duwi-kɩlɩn fɔ, waà yɛ wɔ̀ àà nyɩnla alɛ ade gɛtɛ na dɔ̀ fɔ yaà ba waanɩ. 35 Nan tiri gedi gɩɩtɛlɛ-fon gɛtɛ eè di nʋnkwarɩ, gɛ ɛɛ̀ mɛ miinturu ma maamɩnlɛ yaade-lenlɛ. Nan yɛ wɔ èè wura odu-dɩrɛ gɛtɛ waà yela kin-kin, gɛ ɛɛ̀ mɛ gʋtʋn ma egyu-dɩrɛ gɛtɛ nan sʋrʋ bʋnɔ fɔ ɔya-kamasɛ. 36 Gɛ ɛnɩ-kamasɛ gɛtɛ eè kuruma aa dɩkpaara daanɩ fɔ, eè be kura gedi gɩɩtɛlɛ fɔ ɛ fɔ sɩka-sɩya ma boroboro ɛ dɔ̀ alan, <<Tɛ mɩ gedi gɩɩ gɛtɛ̀ gɩɩ gʋtʋn gɩkɩ nan mɛ, fɔ nan ti wura anyandilɛ n di.>>