2 Begyu-dɩrɛ 3

Akpa i sere Isareli ma Mowabi boo getite

1 Yuda wogyu-dɩrɛ Yehosafati bugyu buu gedi wʋʋ gɩkyan fwo-nɩyɛfɛ gaanɩ fɔ, Ahabi wobi Yoram e be di bugyu Isareli. Ɛ sara Samariya ditele daanɩ. E di bugyu fɔ bɩkyan fwo bʋnyɔɔ. 2 Ɛ mɛ ade-kpen Yahwe bʋnʋn, mɔ nka anlɛ gɛtɛ wote ma wɔna bɛ mɛ fɔ. E gbena Baali dɩtaa gɛtɛ wote e sere fɔ. 3 Mɔ ɛ bɔ ɛ mɛ ade-kpen gɛtɛ Nebati wobi Yerobowam ɛ mɛ, gɛtɛ wʋ yɛ Isareli e gyu ade-kpen yaanɩ fɔ. En kere ade-kpen fɔ yɩɩ gɛmɛ ya.

4 Waanɩ fɔ Mowabi wogyu-dɩrɛ Mesa è de bɛnan, gɛ wù di gɛtɛ èè le bɛyɛran atan asepekyi ton (100,000) ma bɛyɛran baanu asepekyi ton (100,000) ɛ tɛ Isareli wogyu-dɩrɛ. 5 Mɔ egyu-dɩrɛ Ahabi diku dɩɩ gama fɔ, Mowabi wogyu-dɩrɛ ɛ tɔ e yela Isareli wogyu-dɩrɛ wo koro. 6 Okoro egyu-dɩrɛ Yoram ɛ tɔ e ye Samariya ɛ san ɛ ma kʋla wɔ bɩtà bʋʋ bɛtàlɛ gɛtɛ bɛ̀ sa Isareli fɔ. 7 Gɛ ɛ sa Yuda wogyu-dɩrɛ Yehosafati ɔtʋn alan, <<Mowabi wogyu-dɩrɛ ɛ tɔ e yela miin koro. Okoro aà yɛ aa bɩtà bʋʋ bɛtàlɛ bàà fɩya ma mɩɩn bɩtà bʋʋ bɛtàlɛ fɔ tàà ma kpà ma Mowabi bete?

Gɛ Yehosafati e tiri wuunyun alan, <<Ɩɩn, nan san. Ǹ sa tɛ wɔ̀, mɩɩn bɛnɩ bè di gɛ aayo, gɛ maabengyi ì di gɛ aayo.>>

8 Gɛ Yehosafati e lila alan, <<Ma osele-mɔmɔ gɛ taà da tɩ ma kpà ma ɛbɛ? Gɛ Yoram e tiri wuunyun alan,

<<Ma Edom wotonkuma waanɩ.>>

9 Okoro Isareli wogyu-dɩrɛ, ma Yuda wogyu-dɩrɛ, ma Edom wogyu-dɩrɛ bɛ tɔ. Gɛtɛ bɛ san gɛlɛɛ awi kwarankɩ fɔ, bɛn mɩnɩ ma butu gɛtɛ bɩtà bʋʋ bɛtàlɛ fɔ ma bɛnan gɛtɛ bɛ̀ fɩya ma ɛbɛ fɔ bàà nyʋn.

10 Ɛwʋ gɛ Isareli wogyu-dɩrɛ ɛ gbɛrɛ afala alan, <<Anʋʋn! Yahwe ɛ ka ɛtɩ begyu-dɩrɛ besiyee nyabɛ ɛ ba gɛtɛ ɛ̀ɛ̀ bɛ ka tɩ sa gɛ Mowabi walɔ yaanɩ?>>

11 Ɛwʋ gɛ Yehosafati e lila alan, <<Wurubwarɛ wɔtabʋrʋlɛ ɛkɩ ɛn ma nfan gɛtɛ tàà da ma wo koro ti lila Yahwe ade gɛtɛ wù di gɛtɛ tàà mɛ?>>

Ɛwʋ gɛ Yoram bɩtà bʋʋtàlɛ ɛndɩrɛ ɛkɩ ɛ dɔ̀ alan, Safati wobi Elisa ɛ̀ sa nfan. Ɛ tɛrɛma Eliya.>>

12 Gɛ Egyu-dɩrɛ Yehosafati alan, <<È di gɛ Wurubwarɛ wɔtabʋrʋlɛ gbagba.>> Okoro begyu-dɩrɛ besiyee fɔ bɛ san Elisa wakʋn.

13 Ɛwʋ gɛ Elisa e lila Isareli wogyu alan, <<Anʋn n sa ɛtɩ ma awɔ tii getite? San aate bɛtabʋrʋlɛ ma aana bɛtabʋrʋlɛ baakʋn.

Gɛ Isareli wogyu-dɩrɛ fɔ alan, <<Kwa, yema Yahwe na kpèlè ɛtɩ begyu-dɩrɛ besiyee nyabɛ e bom gɛtɛ ɛ̀ɛ̀ ka tɩ sa Mowabi walɔ yaanɩ.>>

14 Gɛ Elisa alan, <<Na nya Yahwe, ɔkɛma powu wuute gɛtɛ ntɛ sʋma fɔ alɛ, gengyi nka Yuda wogyu-dɩrɛ Yehosafati gɛ ntɛ tɛ gebù fɔ, mɩn daà fi n nya yɩ gba, gɛ mɩn daà ka yɩ bɩta gba. 15 Mɔ kpèlè adʋlɛ wɔtàlɛ ɛkɩ mɔma mɩ.>> Gɛ gɛtɛ adʋlɛ wɔtàlɛ fɔ ɛɛ tà adʋlɛ fɔ, Yahwe wɔkɛma wʋ ba Elisa wo koro. 16 Ɛwʋ gɛ ɛ dɔ̀ alan, <<Yahwe alɛ i kunla afwe yàà sɔ kpekpesi dɩtagba nyadɩ gɛtɛ dɩ nyʋn butu lɛ daanɩ. 17 Yema Yahwe ɛɛ dɔ̀ alɛ gifiye gɩ nan gbɛrɛ yàà nʋn, gɛ ɩn nan we ɛsʋn ɛ̀ɛ̀ nʋ̀n, mɔ dɩtagba nyadɩ daà yɔn ma butu, fɔ ɛyɩ ma yɩɩ bɛkwɔ, ma yɩɩ bɛnan-kurumakyɛɛ yàà nyʋn. 18 Ade nyayɩ in di ade-kɛmalɛ ɩkɩ tɛ Yahwe ɛ̀ɛ̀ mɛ. Ɛɛ̀ nɩ ka Mowabi ɛ sa yaalɔ yaanɩ. 19 Yaà muru baatele gɛtɛ bɛ mara ɩpɔrɩ bɛ sa fɔ ma baatele gbaa-gbaa-kamasɛ. Yaà kebi oyon-kpara-kamasɛ, yàà sʋ boo butu, fɔ yàà fun ataa mɩna bɔɔ gɛtʋnkwaa-kpara-kamasɛ.

20 Gɛtɛ kere gɩkpa gagyɩgyan, baà tɛ gedi fɔ, butu ntɛ da ye Edom gɩlan. Gɛ gɛtʋnkwaa fɔ powu gi to ma butu.

21 Gɛtɛ Mowabi bete powu bɛ nʋn gɛtɛ begyu-dɩrɛ fɔ bɛɛ ba akpa ma ɛbɛ fɔ, be kpèlè eteni-kamasɛ, bɛsaranyan ma bɛndɩrɛ gɛtɛ baà talɩ bɛ san akpa fɔ be tuma ɔbalan waanɩ. 22 Gɛtɛ Mowabi bɩtà bʋʋ bɛtàlɛ bɛ tɔ gagyɩgyan, gɛ ofila wʋʋ gbɛrɛ butu fɔ buu koro fɔ, be we gɛtɛ butu gɛtɛ bʋ̀ dɔ̀ bɔɔ bʋnʋn fɔ bʋ̀ sɩna anlɛ nkalan. 23 Ɛwʋ gɛ bɛ gbɛrɛ afala alan, <<Ɩ nya nkalan! Waà mɛ begyu-dɩrɛ fɔ booko-booko bɛ kpà gɛ be wolo bɛwɔlɔn. Okoro, Mowabi bete, ɩ yɛ tàà san tɩ ma kpila baanyɩmɩnyan!>>

24 Mɔ gɛtɛ Mowabi bɩtà bʋʋ bɛtàlɛ be gyu Isareli bɩtà bʋ bɛtàlɛ bɔɔ gɛsarakʋn gaanɩ fɔ, Isareli bɩtà bʋʋ bɛtàlɛ fɔ bɛ tɔ, gɛ bɛ kpà ma Mowabi bete fɔ, kʋtʋmaa Mowabi bete fɔ be serenti. Gɛ Isareli bete be gyu gɛtʋnkwaa fɔ gaanɩ be to gɩ, gɛ be wolo Mowabi bete fɔ baanɩ kpekpesi. 25 Isareli bete fɔ be muru Mowabi bete fɔ baatele, gɛ baanɩ-kamasɛ e fun dɩtaa ɛ sa gɛtʋnkwaa-kpara-kamasɛ gaanɩ kʋtʋmaa ataa fɔ i tin ntʋnkwaa fɔ. Bɛ sʋ Mowabi bete fɔ baatu, gɛ be kebi oyon-kpara-kamasɛ. Kiri-Haraseti ditele diiko gɛ be kere bɛ ya gɛtɛ bɛn kya daataa. Mɔ bɩtà bʋʋ bɛtàlɛ gɛtɛ bè de bɛtaya fɔ bɛ sʋ dɩ bɛ sa, gɛ be gye dɩ bɩtà.

26 Gɛtɛ Mowabi wogyu-dɩrɛ e we gɛtɛ akpa fɔ ɩɩ da wɔ fɔ, ɛ ka bɩtà bʋʋ bɛtàlɛ nkpɩn busiyee ma akpilin ton (700) ɛ fɩya ma koro gɛtɛ bàà duru ye ma Edom wogyu-dɩrɛ wakʋn, mɔ bɛn talɩ. 27 Ɛwʋ gɛ Mowabi wogyu-dɩrɛ ɛ ka wobi-teni-gyangbasɛlɛ gɛtɛ nafɔ eè bè di bugyu e sere wɔ gɩsɩrɩ wo diku dɩɩ gama fɔ ɛ tɛ gedi, ditele fɔ dɩɩpɔrɩ wuu koro. Ade fɔ ɩ mɛ Isareli bete gɩsaa ɩ kààrà, gɛ be ye ditele fɔ daanɩ bɛ da ɛbɛ gbagba bɔɔlɛ.