2 Begyu-dɩrɛ 10

Yehu e wolo-wolo Ahabi wodu wʋʋ bɛnɩ

1 Ahabi ɛ̀ ba beteni akpilin asiyee ma fwo (70) Samariya ditele. Okoro Yehu ɛ ŋwara gɩkpa gɛ ɛ tɛ ditele fɔ dɩɩ bɛndɩrɛbi, ma bɛndɩrɛ gɛtɛ bɛ̀ dɔ ade yiinyun, ma ɛbɛ gɛtɛ bɛɛ nya Ahabi dɩkpaara dii koro fɔ. Gɩkpa fɔ gaanyungyebi yii wùlà alan, 2 <<Gɛtɛ yiifonte bebi bɛ̀ sa yaakʋn, gɛ tiiramisan ɛbɛ, ma abengyi, ma ditele gɛtɛ bɛ mara ɩpɔrɩ be silin di, ma akpanyan powu ɩ̀ sa yaakʋn lɛ, gɩkpa nyagɩ gɩ̀ bɔ gi gyu yaakʋn fɔ, 3 i gye yiifonte bebi fɔ baanɩ gɛtɛ ɛ̀ kɔlɔ, gɛ ɛ kʋtʋma fɔ ɩ sɩ̀ wote gigyu-bɩya fɔ gii koro. Fɔ yàà kpà tɛ yiifonte dɩkpaara.>> 4 Mɔ Gɩsaa-dɩrɛ gi gyu bɛ gɛ bɛ dɔ̀ alan, <<Begyu bɛnyɔɔ gba bɛn talɩ yela wɔ bʋnʋn, anʋn gɛ ɛtɩ tɩ̀ talɩ tɩ mɛ?>> 5 Gɛlɛ wuu koro bɛndɩrɛ gɛtɛ bɛɛ nya digyu-kpaara fɔ dii koro, ma bɛndɩrɛ gɛtɛ bɛ̀ dɔ ade yiinyun, ma ɛbɛ gɛtɛ bɛɛ nya egyu bebi fɔ boo koro fɔ bɛ sa Yehu ɔtʋn alan, <<Tì di aa bɛsaranyan, gɛ ade-kamasɛ gɛtɛ aà dɔ̀ tɩ fɔ gɛ taà mɛ. Tɩ nan sere ɛkɩ bugyu. Awɔ mɛ gɩnyan kamasɛ gɛtɛ wʋ̀ kɔlɔ tɛ wɔ̀.>> 6 Ɛwʋ gɛ Yehu ɛ ŋwara bɛ gɩkpa nyɔɔfɛ alan, <<Gengyi ì yela mɩɩn gama, gɛ ì len yàà bù mɩ fɔ, gɩsa ɔkʋna nyawʋ anlɛ, i kebi Ahabi bebi baayu fɔ yàà ka mɔmɔ mɩ Yesereli.>>

Egyu Ahabi bebi akpilin asiyee ma fwo fɔ bɛ̀ sa gɛ Samariya bɛndɩrɛ gɛtɛ bɛɛ nya boo koro fɔ baakʋn. 7 Gɩkpa fɔ gi gyu baakʋn pɛ, gɛ bɛndɩrɛ fɔ be wolo Ahabi dɩkpaara dii bebi akpilin asiyee ma fwo fɔ powu. Bɛ ka baayu fɔ bɛ sa dituya daanɩ, gɛ bɛ ka bɛ ma tɛ Yehu Yesereli. 8 Gɛtɛ ɛwɔ gɛtɛ bɛ sa fɔ ɛ ma gyu fɔ, ɛ dɔ̀ Yehu alan, <<Bɛ ka Ahabi bebi baayu fɔ bɛ ba.>>

Ɛwʋ gɛ Yehu ɛ dɔ̀ bɛ alan, <<Ɩ ma kʋla yɩ akpen anyɔɔ ditele fɔ diitunu, ɩ yɛ yàà dʋrɔ dʋkɔ kpa kere.>> 9 Kere gɩkpa fɔ, Yehu e ye e yela bɛnɩ fɔ powu bɔɔ bʋnʋn okòro gɛ ɛ dɔ̀ alan, <<Ɩn nyɩ ade ɩkɩ yaanɩ. Nmɩ na ka amɩnlɛ-kpe miinfonte wo koro gɛ na wolo wɔ, mɔ ɛnyan na wolo nyabɛ powu lɛ? 10 Ade nyayɩ yii wùlà alɛ digyebi dɩkɩ dɩ̀ ma gɛtɛ Yahwe ɛ dɔ̀ alɛ daà ba Ahabi dɩkpaara dii koro gɛ dɩn ba waanɩ. Yahwe ɛ mɛ ade gɛtɛ ɛ dama wɔsaranyan Eliya wo koro ɛ dɔ̀ ɛ sɩ̀ fɔ.>> 11 Okoro Yehu e wolo ɛnɩ-kamasɛ gɛtɛ e kuruma Ahabi dɩkpaara daanɩ Yesereli ditele daanɩ fɔ, gɛlɛ ke gɛ e wolo Ahabi wɔ bɛndɩrɛbi, ma wɔwɔlɔn ɛbɛ gɛtɛ bɛ̀ gbɛma wɔ, ma wo gedi gɩɩ bɛtàlɛ powu gɛ ɛkɩ en kuruma. 12 Gɛ Yehu ɛ tɔ ɛ da Samariya gɩlan. Gɛtɛ ɛɛ fɔrɔ fɔ, ɛ ma dʋrɔ Beti-Ekedi bɛnan bɔɔ bɛnyalɛ bɔɔ gɛyakʋn. 13 E tuma Yuda wogyu Ahasiya bɛfʋrɩ bɛkɩ dʋkɔ gɛ e lila bɛ alan, <<Ì di gaanɩ?>> Be tiri wuunyun alan, <<Tì di egyu Ahasiya bɛfʋrɩ, gɛ tɩɩ fɔrɔ tɩ ma sa egyu Ahabi bɛfʋrɩ ma egyu-nanɩ fɔ onyun.>> 14 Gɛ Yehu ɛ fa wɔ bɛsaranyan alan, <<I gye bɛ gʋnʋn-ŋɔrɔ!>> Okoro be gye bɛnɩ akpilin-anyɔɔ ma bɛnyɔɔ fɔ powu, gɛ be belen bɛ ayu ditiribun gɛtɛ dɩ̀ sa Beti-Ekedi fɔ dɩɩ pɩ. En kere baanɩ ɛkɩ ya. 15 Gɛtɛ Yehu e ye dʋkɔ fɔ, e tuma Rekabi wobi Yehonadabi. Yehu ɛ sa wɔ onyun gɛ e lila wɔ alan, <<À ba dɩmɩnlɛ-kɩlɩn ma nmɩ anlɛ gɛtɛ n ba tɛ wɔ fɔ?>> Gɛ Yehonadabi e tiri wuunyun alan, <<Ɩɩn>> Gɛ Yehu ɛ dɔ̀ wɔ alan, <<Gengyi wʋ̀ dɔ gɛlɛ fɔ ka aa gʋlɔ ba.>>Okoro Yehonadabi ɛ tʋna gʋlɔ ɛ tɛ wɔ, gɛ Yehu e ton wɔ e gyu tiiramisan fɔ waanɩ. 16 Gɛ Yehu ɛ dɔ̀ wɔ alan, <<Ba taà san fɔ àà ma nya anlɛ gɛtɛ na ka miin koro na tɛ Yahwe.>> Okoro Yehonadabi ma ɛwɔ ba sara wotiiramisan fɔ waanɩ bɛ da. 17 Gɛtɛ Yehu e gyu Samariya fɔ, e wolo Ahabi wɔ fʋrɩ-kamasɛ gɛtɛ e kuruma ɛ̀ sa dʋkɔbɛ fɔ. E muru bɛ anlɛ gɛtɛ Yahwe ɛ tabʋrʋ ɛ tɛ Eliya fɔ.

Yehu e wolo Baali bekpente

18 Gɛ Yehu e kpèlè bɛnɩ gɛtɛ bɛ̀ sa ditele fɔ daanɩ e tuma, gɛ ɛ dɔ̀ bɛ alan, <<Ahabi ɛ sʋma Baali bɛrɛɛ lɛ, mɔ nmɩ nan sʋma wɔ gepepe. 19 I kpèlè Baali bɛtabʋrʋlɛ, ma wo bekpente, ma wɔ bɛsʋmalɛ powu ɩ ba. Ɩ nya ɛkamasɛ ɛɛ̀ ba, yema ǹ bɛ tɛ Baali gedi-dɩrɛ gɩkɩ. Ɛnɩ-kamasɛ gɛtɛ ɛɛ sʋna Baali, gɛ ɛn ba fɔ, baà wolo wɔ.>> Yehu dɩmɩnlɛ n di gɛtɛ eè muru Baali bɛsʋmalɛ powu. 20 Gɛ Yehu ɛ dɔ̀ alan, <<Ɩ dɔ̀ bɛnɩ alɛ, ɩ yɛ taà nya duwi dɩkɩ tɩ sɩ̀ fɔ tàà tuma tɩ sʋma ti tiri Baali diyere.>>Okoro bɛ mɛ gɛlɛ. 21 Ɛwʋ gɛ Yehu ɛ sa bɛnɩ bɛ san Isareli, bɛ ma dɔ̀ ɛbɛ gɛtɛ bɛɛ sʋma Baali fɔ powu gɛ bɛ ba gɛtɛ ɛnɩ-kɩlɩn gba en terema. Be gyu bɛ yɔn Baali dikwo daanɩ ofèn ma ofèn. 22 Gɛ Yehu ɛ dɔ̀ ɛwɔ gɛtɛ ɛɛ nya ngba yɩɩ dɩdaka dii koro fɔ alan, <<Tɛ ɛkamasɛ gɛtɛ ɛɛ sʋma Baali fɔ gɛgba fɔ gɩkɩ ɛ̀ɛ̀ sa.>> Okoro ɛ ka ngba fɔ ɛ bɛ tɛ bɛ.

23 Ɛwʋ gɛ Yehu ma Rekabi wobi Yehonadabi bɛ da be gyu Baali dikwo fɔ daanɩ. Gɛ Yehu ɛ dɔ̀ Baali bɛsʋmalɛ fɔ alan, <<Ɩ nya gepe gɛtɛ Yahwe wɔsʋmalɛ ɛkɩ ɛn fɩya yaanɩ, wù di gɛ Baali bɛsʋmalɛ booko booko boo ge tuma.>> 24 Gɛ Yehu ma Yehonadabi be gyu gɛtɛ bàà tɛ Baali gedi ma gekuma gii gedi. Fɔ Yehu ɛ yɛ wɔ bɩtà bʋʋ bɛtàlɛ akpilin anaa be silin dikwo fɔ, gɛ ɛ dɔ̀ bɛ alan, <<Gengyi yaanɩ ɛkɩ ɛ yɛ bɛnɩ fɔ baanɩ ɛkɩ e serenti fɔ, ɛɛ̀ ka wɔnkpa e le gutoro.>>

25 Gɛtɛ Yehu ɛ bɔ ɛ tɛ gedi fɔ e were fɔ, ɛ fa ɛ sa wɔ bɩtà bʋʋ bɛtàlɛ ma bɛndɩrɛbi fɔ alan, <<Oke, I gyu i wolo bɛ. Ɩ kara yɛ baanɩ ɛkɩ èè ye.>> Okoro bɛ ka bɔɔ bɛ bɛtata be wolo bɛ powu. Gɛ bɩtà bʋʋ bɛtàlɛ ma bɛndɩrɛbi fɔ be tiira boo gikpena bɛ bɛ sɩ̀ okòro. Gɛ Yehu bɩtà bʋʋ bɛtàlɛ ma bɛndɩrɛbi fɔ be gyu Baali dikwo fɔ daanɩ. 26 Be tiri Baali dikpenta fɔ be ye okòro gɛ be kuma dɩ. 27 Be gbena Baali wakpenta gɛ bɛ mɩna wo dikwo fɔ, gɛ bɛ ka dʋkɔ be bilingi ɔkpan be ye ma ǹdò. 28 Anlɛ gɛ Yehu ɛ ka ɛ mɩna Baali dɩsʋma Isareli. 29 Mɔ, Yehu en kere ade-kpen gɛtɛ Nebati wobi Yerobowam ɛ mɛ, gɛ ɛ yɛ Isareli bete mɔ bɛ mɛ fɔ yɩɩ gɛ mɛ ya. Ɛ yɛ bɛ sʋma sɩka-sɩya akwɔbi gɛtɛ ɛ mɛ ɛ sɩ̀ Beteli ma Dan fɔ. 30 Gɛ Yahwe ɛ dɔ̀ Yehu alan, <<A mɛ ade gɛtɛ ii dì mɩ gʋnʋn yema a muru Ahabi ma wɔ dɩkpaara dɩɩ bɛnɩ. Gɛlɛ wuu koro nan yɛ aadu waanɩ wʋʋ bɛnɩ baà dì bugyu Isareli ka ma sere gewo-tama-naafɛ.>> 31 Mɔ Yehu ɛn ka woturu powu ton Yahwe, Isareli wo Wurubwarɛ wo-ise fɔ. En kere ade-kpen gɛtɛ Yerobowam ɛ mɛ, gɛ ɛ yɛ Isareli bete mɔ bɛ mɛ fɔ ya. 32 Awi ɩtɔkɔ yaanɩ, Yahwe e sere ɔpɩ ɛɛ tɩyɛra Isareli gɛtʋnkwaa pɩɩ pɩɩ. Egyu Haseli e to Isareli gɛtʋnkwaa fɔ kpekpesi. 33 Yodan wofila wʋʋ gɛtakʋn wʋʋ gɩlan, fɩya ma Gileyadi powu, ma Gadi, ma Ruben, ma Manase. Bɛ ka gɛtʋnkwaa fɔ be ye Arore ditele ma ye Arinon dɩtagba daanɩ ka ma sere Gileyadi ma Basan 34 Ade-kurumakyɛɛ gɛtɛ Yehu ɛ mɛ wo bugyu buu gedi gaanɩ, ma ade powu gɛtɛ ɛ mɛ fɔ bɛ ŋwara yɩ bɛ sa begyu-dɩrɛ bɔɔ gɩkpa-dɩrɛ fɔ gaanɩ. 35 Wʋʋ gama fɔ, Yehu e ku, gɛ be lò wɔ Samariya. Gɛ wobi Yehohasi e di bugyu e sere wɔ gɩsɩrɩ. 36 Yehu ɛ sara Samariya e di Isareli bugyu bɩkyan dikpilin ma nɩyɛ.