2 Begyu-dɩrɛ 19

Bɛ dɔ̀ Yerusalem getoya gaade

1 Gɛtɛ egyu-dɩrɛ Hesekiya ɛ nʋn gɛlɛ gaade nyayɩ fɔ, e gye wɔ ngba ɛ fɛɛran, gɛ ɛ sa disepekyi daanyan, gɛ ɛ san ɛ da Yahwe Dikwo-dɩrɛ daanɩ. 2 Ɛwʋ gɛ ɛ yɛ ɛndɩrɛbi Eliyakim gɛtɛ ɛɛ nya digyu-kpaara dii koro fɔ, ma gɩkpa gɩɩŋwaralɛ Sebina, ma gedi gɩɩ bɛtɛlɛ bɔɔ bɛndɩrɛ be liba asepekyi yaayan, gɛ ɛ sa bɛ Wurubwarɛ wɔtabʋrʋlɛ Isaya gɛtɛ è di Amosi wobi fɔ wakʋn. 3 Ɛwʋ gɛ bɛ dɔ̀ wɔ alan, <<Hesekiya alɛ ǹdò wuu duwi nyadɩ dì di gɛ koro gii gegye, ma giten-tiira, ma ɩnɩnfa yii duwi. Wʋ̀ bɔ wù we anlɛ gɛtɛ ɛnanɩ ɛɛ dɩma gɛtɛ èè wo, mɔ ɔkɛma wʋn ma wɔ gɛtɛ èè wo fɔ. 4 Nkɩfɔ Yahwe, aa Wurubwarɛ fɔ ɛɛ̀ nʋn egyu bɩtà buugyegeyelɛ nyawɔ wade gɛtɛ wofonte Asiriya wogyu-dɩrɛ ɛ sa wɔ ɛ ba ɛɛ dɔ̀ ɛ sa Nkpa wo Wurubwarɛ fɔ ɩnɩnfa lɛ, fɔ èè tiira wɔ giten wanyun-gyebi gɛtɛ Yahwe, aa Wurubwarɛ ɛ nʋn lɛ yii koro. Okoro tiri onyun tɛ bɛnɩ-kurumakyɛɛ gɛtɛ bɛ̀ sangba bè si nkpa fɔ.>>

5 Gɛtɛ egyu-dɩrɛ Hesekiya bɛndɩrɛbi fɔ be gyu Isaya wakʋn fɔ, 6 Isaya ɛ dɔ̀ bɛ alan, <<Ɩ dɔ̀ yiifonte alɛ, <Yahwe alɛ ɩ kara yɛ gɩsaa gàà ton yɩ ma nbusu ade gɛtɛ ɩ nʋn Asiriya wogyu-dɩrɛ ɛ sa bɛnɩ bɛ ba bɛɛ dɔ̀ yɩ alɛ mɩɩn nan talɩ n to yi n ya lɛ. 7 Ɩ nʋn! Nan yɛ sunsun ɛkɩ èè gyu wanɩ gɛtɛ ɛɛ̀ nʋn ade-nʋnlɛ ɩkɩ, gɛtɛ yaà yɛ wɔ èè serenti da ɛwɔ gbagba wɔ gɩfɩɩ gaanɩ. Dʋkɔ fɔ nan yɛ wɔ èè ku ma edon.> >>

8 Gɛtɛ Asiriya wogyu-dɩrɛ wɔ bɩtà buugyegeyelɛ fɔ ɛ nʋn gɛtɛ Asiriya wogyu e ye Lakisi ɛ san ɛɛ tà Libina bɩtà fɔ, ɛwɔ mɔ ɛ san ɛ ma tàmà wɔ dʋkɔ.

9 Wʋʋ gama fɔ, Asiriya wogyu-dɩrɛ Senakeribi ɛ nʋn alɛ Egyipiti wogyu-dɩrɛ, Kusi-te Tiraka ɛɛ ba ɛ̀ɛ̀ bɛ̀ kpà ma ɛwɔ. Ɛwʋ gɛ ɛ sa bɛnɩ Hesekiya wakʋn alɛ, 10 bɛ ma dɔ̀ Yuda wogyu-dɩrɛ alan, <<Kara yɛ ekpen gɛtɛ aa bʋnʋn bʋ̀ gyaga wo koro gɛtɛ ɛɛ dɔ̀ wɔ̀ alɛ ɛn nan ka Yerusalem ɛ sa Asiriya wogyu gʋlɔ fɔ ɛ̀ɛ̀ gban wɔ̀. 11 Nya nka a nʋn ade gɛtɛ Asiriya begyu-dɩrɛ bɛ mɛ bɩfɩɩ powu, be muru bʋ kɩrɩ-kɩrɩ. Gɛ awɔ aa to a di alɛ aà ye waanɩ? 12 Gɛtɛ miintu ɛbɛ be muru Gosan, ma Haran, ma Resefi yaatele, ma Eden bɛnɩ gɛtɛ bɛ̀ sa Tel-Asari fɔ, boo bekpen be to bɛ bɛ ya? 13 Ganɩ gɛ Hamati wogyu-dɩrɛ ɛ̀ sa? Ganɩ gɛ Aripadi wogyu-dɩrɛ ɛ̀ sa? Ganɩ gɛ Sefarfayim ditele diigyu-dɩrɛ ɛ̀ sa? gɛ Hena ma Ifa boo begyu de?

Hesekiya wonyun-tiri

14 Hesekiya e to gɩkpa fɔ e ye bɛnɩ-salɛ fɔ baakʋn, gɛ ɛ kalan gɩ. Ɛwʋ gɛ ɛ bʋn ɛ san Yahwe dikwo-dɩrɛ fɔ daanɩ, gɛ ɛ yaraba gɩ ɛ sɩ̀ Yahwe bʋnʋn. 15 Gɛ Hesekiya e tiri onyun alan, <<Oo, Yahwe, Isareli wo Wurubwarɛ gɛtɛ à si gigyu-bɩya gii koro Kerubi ɛbɛ boo getite, aako-kwan n di Wurubwarɛ gɛtɛ aa di bugyu, bugyu-bugyu gɛtɛ bʋ̀ sa gɛtʋnkwaa gaanɩ fɔ powu buu koro. Awɔ na mɛ gatala ma gɛtʋnkwaa. 16 Oo, Yahwe, ken giten, fɔ àà nʋn! Tirima bʋnʋn, fɔ àà nya! Nʋn anyun-gyebi gɛtɛ Senakeribi ɛɛ dɔ̀ ɛ ka e toro awɔ Wurubwarɛ gɛtɛ à si nkpa gakpaakpa fɔ.

17 Oo, Yahwe, wʋ̀ sa waanɩ gɛtɛ Asiriya wogyu e muru bɩfɩɩ nyabʋ powu ma bʋʋ ntʋnkwaa. 18 Be fun boo bekpen bɛ sa ɔtan waanɩ, gɛ be muru bɛ, mɔ bè di gɛ bekpen gɛtɛ bɛnɩ-nyalɛ na ka iyon ma ataa nan mɛ bɛ. 19 Okoro, oo Yahwe, tii Wurubwarɛ, tiri tɩ ye Asiriya bete baalɔ yaanɩ, fɔ bugyu-bugyu gɛtɛ bʋ̀ sa gɛtʋnkwaa gaanɩ powu fɔ bàà nyɩnla alɛ awɔ Yahwe aako-kwan n di Wurubwarɛ!>>

Isaya ɛ dɔ̀ ade ka dama Senakeribi gɛnʋ̀n

20 Ɛwʋ gɛ Amosi wobi Isaya ɛ sa Hesekiya ɔtʋn alan, <<Yahwe, Isareli bete boo Wurubwarɛ alan, <Na nʋn aanyun-tiri gɛtɛ a tiri a tɛ mɩ ka da ma Asiriya wogyu-dɩrɛ Saneheribi wo koro fɔ. 21 Ade gɛtɛ Yahwe ɛ dɔ̀ ka dama wo koro fɔ n di alan,

Siyon wobi-nanɩ gɛtɛ ɛɛn nyɩ̀ ete

en bù wɔ̀, gɛ ɛɛ mʋmwa wɔ̀.

Yerusalem wobi-nanɩ

e terema wɔ̀ ɔkʋna gɛtɛ aa serenti fɔ.

22 Ɛnyan gɛ aa toro, gɛ a dɔ̀ nbusu ade a gyaga wo koro?

Ɛnyan gɛ aa bʋma gɩta wo koro,

gɛ aa nya wɔ bʋnʋn baanɩ a bʋma koro?

Isareli wo Wurubwarɛ gɛtɛ ɛwɔ n di Ɛfɩrɩnfɩrɩn fɔ gɛ an taa bù lɛ!

23 A da ma aa bɛnɩ-salɛ boo koro

a firin atuyerebi a lù Efonte.

Gɛ a dɔ̀ alan,

<<Na ka miin tiiramisan ɛbɛ kpekpesi

na bʋn idon yaayu,

na bʋn na san Lebano wo-idon-tɔlɛ yii koro.

Na kebi seda wo-iyon ma abo fɔ,

ma siperesi wo-iyon-kpara fɔ.

Na gyu na san gii getenkʋn,

ma ɔkʋn gɛtɛ gɩkan fɔ gi gyu gɩ kaara fɔ.

24 Na kunla ɩlɔkɔ ntʋnkwaa-fon baanɩ,

gɛ na nyʋn butu dʋkɔ.

Mɩɩn bɩsɩrɩ buu gekyikya-kyikya

wʋ yɛ Egyipiti watu ɩ nyʋn.

25 An nʋn nya gɛtɛ

na fʋrʋma na tɩyɛ ade ɩtɔkɔ na sɩ̀?

Na fʋrʋma na nyɩ̀ gʋlɔ ade nyayɩ yii koro.

Nkele na yɛ wʋ ba waanɩ

gɛtɛ a yɛ atele ma ɔkɛma

i biligi atìngbìlìn.

26 Bɔɔ bɛnɩ fɔ ben wura ɔkɛma,

gɩsaa gi ton bɛ, gɛ ɩnɩnfa i di bɛ.

Bè we anlɛ oli waanɩ wʋʋ dɩfa-ŋɔɔ,

anlɛ dɩfa gɛtɛ dɩɩn ma ɔkɛma,

anlɛ dɩfa gɛtɛ dii ye dikwo dii duyu,

gɛtɛ dii ku pɛ wàà bè dɔ̀ alɛ wʋʋ dan.

27 <<Mɔ ǹ nyɩ̀ aa gɛsara

ma aa gegyu, ma aa geye

ma aawurufa gɛtɛ aa ka miin koro.

28 Gɛtɛ aa ka owurufa miin koro

gɛ aa koro gɩɩ gɛbʋma gaade ɩ bɛ tàmà mɩ okoro,

nan ka miin gitola n sa wɔ̀ dininfere,

gɛ nan ka mɩɩn gɩwɔrɔnyan n sa aanyun,

fɔ nan yɛ wɔ̀ àà biri da

ma osele gɛtɛ a ka a ba fɔ.>

29 Oo, Hesekiya, ade gɛtɛ aà ka a we a nyɩnla fɔ n di gɛtɛ,

<<Gɩkyan nyagɩ, aà di gɛ anyan gɛtɛ ɛyɩ gbagba na ye yaanyan.

Gɩkyan-nyɔɔfɛ fɔ, aà di gɛ abi gɛtɛ ɩ kpʋkpa ɩ nʋ̀n gɩkyan-gyangbasɛ, gɛ i ye fɔ.

Mɔ gɩkyan-siyeefɛ fɔ, ɩ dɔ, fɔ yàà sila,

ɩ dɔ wayɩn wabi, fɔ yàà di yɩ.

30 Yuda bɛnɩ gɛtɛ baà kuruma fɔ,

baà sere ɩkpaa, gɛ baà lʋn abi.

31 Yema bɛnɩ baà kuruma bɛ sara nkpa gɛtɛ be ye Yerusalem,

Ɛbɛ gɛtɛ baà kuruma bɛ sara nkpa fɔ, baà yela be ye Siyon wodon wuu koro.

Yahwe, ɔkɛma powu wuute fɔ wo gelenbi nan mɛ gɛlɛ gaade nyayɩ.

32 Okoro ade gɛtɛ Yahwe ɛɛ dɔ̀ ka dama Asiriya wo koro fɔ n di alan,

<<Ɛn nan gyu ditele nyadɩ daanɩ,

abɛɛ èè fun gɩtà gɩkɩ nfan.

Ɛn nan kpe ɛ gbɛma dɩ ma gɩwɔrɔnyan-dɩyɛlɛ koro

abɛɛ ɛ̀ɛ̀ sʋ dɩ sa.

33 Ma osele gɛtɛ ɛ ka ɛ ba fɔ gɛ ɛɛ̀ ka e biri.

Ɛn nan gyu ditele nyadɩ daanɩ.

Anlɛ gɛ Yahwe ɛɛ dɔ̀.

34 Nan dɩyɛ ditele nyadɩ, fɔ nan to dɩ n ya,

nmɩ gbagba ma mɩɩnsaranyan Dafidi tii koro.>>

35 Odente wʋtɔkɔ, Yahwe wɔsalɛ ɛ ma wolo Asiriya bɩtà bʋʋ bɛtàlɛ asepekyi yɛkɩ ma ɩgbaa ɩnyɔɔ ma nkpɩn ton (185,000) Asiriya bete bɔɔ gɛsarakʋn gaanɩ. Gɛtɛ bɛnɩ fɔ bɛ lama gagyɩgyan fɔ, bɛnɩ na ku bɛ̀ fɩna bɛ̀ fɩna. 36 Okoro Asiriya wogyu-dɩrɛ Senakeribi ɛ tɔ e ye gɛsarakʋn fɔ gaanɩ, gɛ e biri ɛ da Ninefe ɛ ma sara dʋkɔ.

37 Duwi dɩkɩ, gɛtɛ ɛ̀ sa wokpen Nisiro dikwo daanɩ ɛɛ sʋma fɔ, wo bebi Adirameleki ma Shareseri bɛ ma wolo wɔ ma boo bedon, gɛ be serenti bɛ da Ararati gɛtʋnkwaa gaanɩ. Gɛ wobi Esaradon e di bugyu e sere wɔ gɩsɩrɩ.