2 Begyu-dɩrɛ 21

Yuda wogyu Manase

1 Ɔkʋna gɛtɛ Manase e sere bugyu buu bugyu fɔ, ɛ̀ ba bɩkyan fwo-bʋnyɔɔ, gɛ e di bugyu Yerusalem bɩkyan akpilin anyɔɔ ma fwo ton. Wɔna diyere n di Hefisiba. 2 Manase ɛ mɛ ade-kpen Yahwe bʋnʋn. Ɛ tɛrɛma ade kyʋnlɛ gɛtɛ bɛnɩ gɛtɛ Yahwe e berema e ye Isareli bete bɔɔ bʋnʋn fɔ bɛɛ mɛ fɔ. 3 E biri e sere asʋmakʋn gɛtɛ wote Hesekiya e gbena fɔ, gɛ e biri e sere Baali gedi gaatɛ̀kʋn ma Asera wo-iyon anlɛ gɛtɛ Isareli wogyu Ahabi ɛ mɛ fɔ. Ɛ sʋma gatala gaanyan. 4 E sere bekpen baadi yɩɩ gɛtɛ̀kʋn Yahwe Dikwo-dɩrɛ gɛtɛ Yahwe ɛ dɔ̀ alan, <<Yerusalem nan mɛ mɩɩn gɛsʋmakʋn>> fɔ. 5 E sere gedi gaatɛ̀kʋn ɛ tɛ gatala gaanyan yɩɩ gɛsʋma Yahwe Dikwo-dɩrɛ fɔ daakpaara anyɔɔ fɔ powu yaanɩ. 6 E kuma ɛwɔ gbagba wobi-teni ɛ tɛ gedi. Ɛ mɛ asɔlɔ-de, ɛ sɔma gɛ ɛ san bɛbwɔ, ma bɛfa-te baakʋn, e kpèlè bekpena, gɛ ɛ dɔ̀ ɛnɩ gefuraba gaade. Ɛ mɛ ade-kpen Yahwe bʋnʋn baanɩ ɛ ka ɛ sa wɔ owurufa.

7 Ɛ ka oyon salɩlɛ gɛtɛ wʋ̀ yela tɛ Asera fɔ ɛ sɩ̀ Dikwo-dɩrɛ gɛtɛ Yahwe ɛ dɔ̀ Dafidi ma wobi Solomon alan, <<Dikwo-dɩrɛ nyadɩ ma Yerusalem gɛtɛ na tiri na ye Isareli wo-ifoli powu yaanɩ lɛ nan mɛ ɔkʋn gɛtɛ baà tɩ sʋma mɩ gakpaakpa fɔ daanɩ. 8 Gɛ gengyi Isareli bete baà mɛ ade-kamasɛ gɛtɛ na dɔ̀ bɛ, gɛ baà di miin-ise powu gɛtɛ mɩɩnsaranyan Mose ɛ tɛ bɛ fɔ yii koro fɔ, mɩn nan yɛ bɛ bàà ye gɛtʋnkwaa gɛtɛ na ka na tɛ bootu ɛbɛ fɔ gaanɩ.>> 9 Mɔ Yuda bete bɛn nʋn Yahwe wakʋn. Manase ɛ yɛ bɛ mɛ ade-kpen gɛtɛ ɩ kààrà bɩfɩɩ gɛtɛ Yahwe e muru Isareli bete bɔɔ bʋnʋn fɔ.

10 Yahwe ɛ da ma wɔ bɛsaranyan gɛtɛ bè di wɔ bɛtabʋrʋlɛ fɔ boo koro ɛ dɔ̀ alan, 11 <<Yuda wogyu Manase ɛ mɛ ade-kyʋnlɛ. Ɛ mɛ ade-kpen gɛtɛ ɩ kààrà Amori bete booyo gɛtɛ be gyegeye bɛ mɛ fɔ, gɛ wʋ yɛ Yuda bete bɛ mɛ ade-kpen gɛtɛ bɛ sʋma bekpen fɔ. 12 Gɛlɛ wuu koro Yahwe, Isareli wo Wurubwarɛ alan,<<Nan yɛ gyerebi ɛ̀ɛ̀ ba Yerusalem ma Yuda ntʋnkwaa powu boo koro gɛ ɛnɩ-kamasɛ gɛtɛ ɛɛ̀ nʋn ade nyayɩ fɔ waà dʋrɔ wɔ onyun. 13 Nan tiira Yerusalem giten anlɛ gɛtɛ na tiira Samariya giten fɔ, anlɛ gɛtɛ nan tiira Isareli wogyu-dɩrɛ Ahabi ma wodu waanɩ wʋʋ bɛnɩ fɔ. Nan kpa Yerusalem bɛnɩ anlɛ gɩtɩyɛ gɛ be fere gɛ be fi gi be tin. 14 Gɛ nan tiri bʋnʋn n ye mɩɩn bɛnɩ gɛtɛ baà kuruma fɔ boo koro, gɛ nan ka bɛ n sa bɔɔ bɛkyʋnlɛ baalɔ yaanɩ. Bɔɔ bɛkyʋnlɛ baà kpila gɩnyan-kpara-kamasɛ be ye bɔɔ gɛtʋnkwaa gaanɩ. 15 Yema bɛ mɛ ade-kpen mɩɩ bʋnʋn gɛtɛ wʋ sa mɩ owurufa ye duwi gɛtɛ bootu ɛbɛ be ye Egyipiti bè ye ma ǹdò.>>

16 Ɛwʋ gɛtɛ wʋ̀ biri wʋ̀ fɩya fɔ n di alɛ, Manase e wolo bɛnɩ kpekpesi gɛtɛ bɛn nyɩ̀ ade ɩkɩ yaanɩ, gɛ nkalan wʋ yɛ wʋʋ da ma isele gɛtɛ ɩ̀ sa Yerusalem fɔ. Ɛ mɛ nyayɩ ɛ fɩya ma ɛyɩ gɛtɛ ɛ gban Yuda bete ɛ sa dikpen-sʋma daanɩ, gɛ wʋ yɛ bɛ mɛ ade-kpen Yahwe bʋnʋn fɔ.

17 Bɛ ŋwara Manase wade-kurumakyɛɛ gɛtɛ ɛ mɛ wo bugyu buu gedi gaanɩ, ma wade gɛtɛ ɛ mɛ fɔ powu, ma ade-kpen gɛtɛ ɛ mɛ fɔ bɛ sa Yuda begyu-dɩrɛ boo koro gaade yɩɩ gɩkpa-dɩrɛ fɔ gaanɩ. 18 Manase e ku gɛ be lò wɔ wo digyukpaara diilibi gɛtɛ bee kpèlè alɛ Usa wolibi fɔ waanɩ. Gɛ wobi-teni Amon e di bugyu e sere wɔ gɩsɩrɩ.

Yuda wogyu-dɩrɛ Amon

19 Bɛ sɩ̀ Amon bugyu fɔ ɛ̀ ba bɩkyan dikpilin ma bʋnyɔɔ, gɛ e di bugyu Yerusalem bɩkyan-bʋnyɔɔ. Wɔna diyere n di Mesulemeti, Harusi wobi-nanɩ gɛtɛ e ye Yotiba fɔ. 20 Ɛ mɛ ade-kpen Yahwe bʋnʋn anlɛ gɛtɛ wote Manase ɛ mɛ fɔ. 21 Ɛ tɛrɛma gɛ wote wo-isele powu. Ɛ sʋma bekpen gɛtɛ wote ɛ sʋma fɔ gɛ ɛ waran e kura bɛ. 22 E terema Yahwe, wotu ɛbɛ boo Wurubwarɛ gɛ ɛn san Yahwe wosele waanɩ. 23 Amon bɛndɩrɛbi bɛ tɔ be yela wo koro gɛ be wolo wɔ wo digyukpaara daanɩ. 24 Ɛwʋ gɛ Yuda bɛnɩ be wolo ɛbɛ gɛtɛ bɛ tɔ be yela egyu-dɩrɛ Amon wo koro fɔ powu, gɛ bɛ ka wobi Yosiya bɛ sɩ bugyu be sere wote bɩsɩrɩ.

25 Bɛ ŋwara Amon wade-kurumakyɛɛ gɛtɛ ɛ mɛ wo bugyu buu gedi gaanɩ fɔ powu, ma wade gɛtɛ ɛ mɛ bɛ sa Yuda begyu-dɩrɛ boo koro gaade yɩɩ gɩkpa-dɩrɛ fɔ gaanɩ. 26 Be lò Amon wɔ gɩsàn gɛtɛ gɩ̀ sa Usa wolibi waanɩ fɔ gaanɩ, gɛ wobi Yosiya e di bugyu e sere wɔ gɩsɩrɩ.