1 Sedekiya bugyu buu gedi wʋʋ gɩkyan-nɩyɛfɛ giibon-fwofɛ wo duwi-fwofɛ daanɩ fɔ, Babilon wogyu Nebukadinesa ɛ ka wɔ bɩtà bʋʋ bɛtàlɛ ɛ san bàà ma kpà ma Yerusalem ditele. Bɛ sara ditele fɔ daatuma, gɛ ɛ yɛ be silin ditele fɔ be tuma. 2 Bɛ sʋ ditele fɔ gɛlɛɛ ma ye egyu-dɩrɛ Sedekiya gɩkyan fwo-gɩkɩfɛ gaanɩ. 3 Ebon-naafɛ duwi yɛkɩfɛ daanɩ fɔ, dɩkpan gɛtɛ dɩ nʋ̀n ditele fɔ daanɩ fɔ diinyun wʋ mɛ ɔkɛma gɛtɛ bɛnɩ fɔ bɛn taa wura anyandilɛ bàà di. 4 Ɛwʋ gɛ be duru ditele fɔ dɩɩpɔrɩ, gbɛma egyu-dɩrɛ wolibi, gɛ odente wʋtɔkɔ be serenti be ye ditele fɔ daanɩ, ma gɛtɛ Babilon bɩtà bʋʋ bɛtàlɛ be silin ditele fɔ be tuma gba fɔ. Gɛ be serenti bɛ ka ma Yodan dɩtagba dɩɩ gɩlan. 5 Mɔ Babilon bɩtà bʋʋ bɛtàlɛ be serenti be berema egyu fɔ gɛ bɛ ma tama wɔ Yeriko wɔtalɩ waanɩ. Gɛ wɔ bɩtà bʋʋ bɛtàlɛ fɔ powu bɛ yasɩ bɛ yɛ wɔ, 6 gɛ be gye wɔ. Bɛ ka wɔ bɛ sama Babilon wogyu Ribila ditele daanɩ, dʋkɔ gɛ bɛ dɔ̀ wɔ gɔdɔ gɛ be tin wɔ dɩpwɛ. 7 Be wolo Sedekiya bebi-teni wɔ bʋnʋn baanɩ, gɛ bɛ kyɔlɔ wɔ bʋnʋn baabi. Bɛ ban wɔ gɩwɔrɔnyan-sɩya gaagbarɩgbarɩ gɛ bɛ ka wɔ bɛ da Babilon.

8 Babilon wogyu Nebukadinesa wo bugyu buu gedi bʋʋ gɩkyan fwo-yɛkɩfɛ, wuubon-tonfɛ wo duwi kwarankɩfɛ daanɩ fɔ, Nebusaradan gɛtɛ è di ɛdɩyɛlɛ ɛndɩrɛ, gɛ è biri è di Babilon wogyu wɔndɩrɛbi fɔ e be gyu Yerusalem. 9 Ɛ sa Yahwe Dikwo-dɩrɛ fɔ, ma digyukpaara, ma akpaara powu gɛtɛ ɩ̀ sa Yerusalem fɔ ɔtan. E kuma dɩkpaara-kpara-kamasɛ muruyo. 10 Ɛwʋ gɛ Babilon bɩtà bʋʋ bɛtàlɛ fɔ powu gɛtɛ bɛ̀ sa ɛndɩrɛ-bi Nebusaradan gatɩn fɔ be gbena Yerusalem wɔ-ɩpɔrɩ fɔ powu be tin. 11 Nebusaradan gɛtɛ è di egyu bɩtà bʋʋ bɛtàlɛ bɔɔndɩrɛ fɔ e gye bɛnɩ gɛtɛ be kuruma ditele fɔ daanɩ, ma ditele fɔ dɩɩ bɛnɩ-kurumakyɛɛ gɛtɛ bɛ̀ sa gɩlan dʋkɔ fɔ ɛ san Babilon, ma ɛbɛ gɛtɛ bɛ wɛrɛ ka koro bɛ tɛ Babilon wogyu fɔ. 12 Mɔ bɩtà bʋʋ bɛtàlɛ bɔɔndɩrɛ fɔ e kere bɛnɩ gɛtɛ bee we ayenpu-de bɛ kààrà fɔ ɛ ya gɛtʋnkwaa fɔ gaanɩ fɔ bàà tɩ mɛ gʋtʋn wayɩn wo-ili ma ili kurumakyɛɛ yaanɩ.

13 Babilon bete be gbena gɩwɔrɔnyan-sɩya gii bepila fɔ, ma gɩwɔrɔnyan-sɩya gii tiiramisan ɛbɛ ma baaka, ma gɩwɔrɔnyan-sɩya gɩɩ tasa-dɩrɛ gɛtɛ ɩ̀ sa Yahwe Dikwo-dɩrɛ fɔ daanɩ fɔ powu, gɛ be kpila yɩ bɛ da Babilon. 14 Gɛ be biri bɛ ka isun, ma bɛsɔfɩ, ma omini-tiiralɛ kandɩya wayenkpen, ma bɛtasa, ma bɩtɩyɛ, ma gɩwɔrɔnyan-sɩya gaanyan powu gɛtɛ bɛ ka bɛ mɛ dɩsʋma daade Dikwo-dɩrɛ daanɩ fɔ. 15 Egyu bɛdɩyɛlɛ bɔɔndɩrɛ fɔ ɛ ka olifwi wʋʋ tasa ma bɛtasabi, ma gɩnyan-kamasɛ gɛtɛ bɛ ka sɩka-sɩya-kpara abɛɛ sɩka-fututu bɛ mɛ fɔ ɛ da.

16 Anyan gɛtɛ egyu Solomon ɛ ka gɩwɔrɔnyan-sɩya ɛ mɛ ɛ sɩ̀ Yahwe Dikwo-dɩrɛ fɔ daanɩ n di bepila bɛnyɔɔ, ma tasa-dɩrɛ fɔ, ma abʋn-yelakʋn fɔ, ì di anyan gɛtɛ bɛn talɩ kɛrɛ yɩ. 17 Pila-kamasɛ watɔ ɩ̀ ba bɩsɩrɩ dikpilin ma kwarankɩ. Gɩwɔrɔnyan-sɩya giimini gɛtɛ wʋ̀ gyaga pila-kamasɛ duyu fɔ waatɔ waà mɛ bɩsɩrɩ bɩnaa ma ɔfan gɛ bɛ ka gɩwɔrɔnyan-sɩya bɛ mɛ agbarɩgbarɩ ma pomegraniti abi bɛ sa wʋ adawʋ be silin. Pila-kurumakyɛɛ fɔ ma waagbarɩgbarɩ powu ɛ̀ bɔ è we gɛ anlɛ bepila-do fɔ.

18 Digyu-kpara dɩɩ bɩtà bʋʋ bɛtàlɛ ɛndɩrɛ e gye gedi gɩɩ bɛtɛlɛ bɔɔndɩrɛ Seraya, ma Sefaniya gɛtɛ è di gedi gɩɩtɛlɛ wɔmalɛ, ma bɛnɩ besiyee gɛtɛ bɛɛ dɩyɛ itunu yii koro fɔ ɛ ma tan. 19 Ditele fɔ daanɩ fɔ, e gye bɩtà bʋʋtàlɛ ɛndɩrɛ gɛtɛ ɛɛ nya bɩtà bʋʋ bɛtàlɛ boo koro ma digyukpaara daamɩnlɛ yɩɩ bɛtɛlɛ. E biri e gye egyu gɩkpa gɩɩ ŋwaralɛ gɛtɛ è di egyu wɔndɩrɛ-bi gɛtɛ ɛwɔ n tɛ nya bɩtà bʋʋ bɛtàlɛ baayere gɛtʋnkwaa fɔ gaanɩ, ma wɔ bɛnɩ akpilin asiyee gɛtɛ e we ditele fɔ daanɩ. 20 Egyu bɛdɩyɛlɛ bɔɔndɩrɛ Nebusaradan ɛ ka ɛbɛ powu ɛ san Babilon wogyu wakʋn Ribila ditele daanɩ. 21 Ribila dʋkɔ gɛ Egyu-dɩrɛ e wolo ɛbɛ powu Hamati gɛtʋnkwaa gaanɩ.

Okoro anlɛ gɛ be gye Yuda bɛnɩ bɩtà gɛ bɛ ka bɛ be ye bɔɔ gɛtʋnkwaa gaanɩ bɛ da.

22 Ɛwʋ gɛ Babilon wogyu Nebukadinesa e tiri Ahikam wobi-teni Gedaliya gɛtɛ wotu n di Safan fɔ ɛ sɩ̀ gɛtɛ ɛ̀ɛ̀ nya bɛnɩ gɛtɛ be kuruma Yuda gɛtʋnkwaa gaanɩ fɔ boo koro. 23 Ɔya gɛtɛ bɩtà bʋʋ bɛtàlɛ bɔɔ bɛndɩrɛ fɔ powu ma bɔɔ bɩtà bʋʋ bɛtàlɛ bɛ nʋn alɛ Babilon wogyu ɛ sɩ̀ Gedaliya bɛndɩrɛ fɔ, bɛ ba Gedaliya wakʋn Misipa ditele daanɩ. Bɩtà bʋʋ bɛtàlɛ bɔɔ bɛndɩrɛ gɛtɛ bɛ ba fɔ n di, Netaniya wobi Isimayeli, ma Kareya wobi Yohanan, ma Tanhumeti-te Netofati wobi Seraya, ma Maakati-te wobi Yaasaniya ma bɔɔ bɛnɩ. 24 Gedaliya ɛ kan ntam ɛ dɔ̀ ɛ nyɩ ɛ tɛ ɛbɛ ma bɔɔ bɛnɩ alan, <<Ɩ kara serenti Babilon bɩtà bʋʋ bɛndɩrɛbi fɔ. Ɩ sara gɛtʋnkwaa fɔ gaanɩ fɔ yàà sʋma Babilon wogyu-dɩrɛ, gɛlɛ fɔ, ade powu yaà san gepe ɩ tɛ yɩ.>>

25 Mɔ gɩkyan fɔ giibon kwarankɩfɛ anɩ fɔ, Netaniya wobi Isimayeli gɛtɛ wotu n di Elisama gɛ è di digyukpaara diidu waanɩ wʋʋnɩ ɛkɩ fɔ, ɛ ba ma bɛnɩ fwo gɛ be be wolo Gedaliya ma Yuda bɛnɩ ma Babilon bɛnɩ gɛtɛ bɛ̀ fɩya ma Gedaliya powu Misipa ditele daanɩ fɔ. 26 Okoro ditele fɔ dɩɩ bɛnɩ powu, bɛkyɩnyɩn oo, beyenpu oo, fɩya ma bɩtà bʋʋ bɛtàlɛ bɔɔ bɛndɩrɛbi powu be serenti bɛ san Egyipiti yema bè serenti Babilon bete.

27 Yuda wogyu Yehoyakin wo gegye-an gisela wʋʋ gɩkyan dikpilin ma fwo-kwarankɩfɛ gaanɩ fɔ, Babilon wogyu Efili-Merodaki ɛ bɛ mɛ Babilon wogyu. Ebon fwo-nyɔɔfɛ wo duwi dikpilin ma kwarankɩfɛ daanɩ fɔ, e tiri Yehoyakin e ye gegye-tankʋn. 28 Babilon wogyu ɛɛ tɩ̀ tabʋrʋ ma Yehoyakin gelen gaanɩ gɛ ɛ tɛ wɔ gebù ɛ da begyu-kurumakyɛɛ gɛtɛ bɛ̀ fɩya ma ɛwɔ Babilon fɔ. 29 Okoro Yehoyakin e tiri wo gegye-tan wʋʋ ngba fɔ ɛ sɩ̀ gɩlan gɛ wɔ nkpa awi powu yaanɩ fɔ, e di gɩtɩyɛ-kɩlɩn gaanɩ ma egyu-dɩrɛ fɔ. 30 Gɛ Babilon wogyu ɛɛ tɛ wɔ kɔba duwi n di duwi èè se gɩnyan-kamasɛ gɛtɛ ee hiyan wɔ nkpa awi powu yaanɩ.