2 Begyu-dɩrɛ 13

Yehwahasi e di bugyu Isareli

1 Ahasiya wobi Yowasi gɛtɛ è di Yuda wogyu-dɩrɛ gɩkyan dikpilin ma siyeefɛ gaanɩ fɔ, Yehu wobi Yehwahasi e be di bugyu Isareli, gɛ ɛ sara Samariya. Gɛ e di bugyu bɩkyan fwo kwarankɩ. 2 Ɛ mɛ ade-kpen Yahwe bʋnʋn. Ɛ tɛrɛma Nebati wobi egyu-dɩrɛ Yerobwam wo-isele, gɛ wʋ yɛ Isareli bete be gyu ade-kpen yaanɩ fɔ, gɛ en kere ade-kpen yɩɩ gɛmɛ ya. 3 Okoro Yahwe ɛ ka owurufa Isareli bete boo koro, gɛ ɛ ka bɛ ɛ sa Aram wogyu-dɩrɛ Hasayeli ma wobi Ben-Hadadi baalɔ yaanɩ.

4 Ɛwʋ gɛ Yehwahasi e wula e kpèlè Yahwe, gɛ Yahwe ɛ nʋn wo gewula-kpèlè fɔ, yema e we anlɛ gɛtɛ Aram wogyu-dɩrɛ ɛɛ nyanla Isareli bete fɔ. 5 Okoro Yahwe e tiri etolɛ-yalɛ ɛkɩ ɛ tɛ Isareli bete, gɛ wʋ yɛ be ye Aram bete baalɔ yaanɩ. Gɛlɛ wuu koro Isareli bete be biri bɛ ma sara bɔɔ-ɩlɛ olila waanɩ anlɛ gɛtɛ bɛ fʋrʋma bɛ sara fɔ. 6 Mɔ ben kere ade-kpen gɛtɛ Yerobwam dɩkpaara dɩɩ bɛnɩ bɛɛ mɛ, gɛ wʋ yɛ Isareli bete mɔ be gyu ade-kpen yaanɩ fɔ ya. Bɛ̀ bɔ bɛɛ mɛ gɛ ade-kpe fɔ. Gɛ ekpen Asera woyon fɔ mɔ wʋ̀ bɔ wù yela Samariya.

7 Yehohasi bɩtà bʋʋ bɛtàlɛ gɛtɛ be kuruma fɔ n di abengyi yɩɩ bɛsaralɛ akpilin anyɔɔ ma fwo, ma tiiramisan ɛbɛ bɔɔ bɛsaralɛ fwo, ma bɩtà bʋʋ bɛtàlɛ gɛtɛ bɛ̀ san gɛtʋnkwaa gii koro ɩgbaa ton (10,000). Yema Aram wogyu e wolo bekurumakyɛɛ. E kyikya bɛ ma bɩsɩrɩ ɛ mɛ anlɛ itinbu.

8 Bɛ ŋwara ade-kurumakyɛɛ gɛtɛ Yehwahasi ɛ mɛ wo bugyu buu gedi gaanɩ, ma wakpa gɛtɛ ɛ kpà powu fɔ bɛ sa Isareli begyu-dɩrɛ boo koro gaade yɩɩ gɩkpa fɔ gaanɩ. 9 Yehwahasi e ku, gɛ be lò wɔ Samariya ditele. Gɛ wobi Yehowasi e di bugyu e sere wɔ bɩsɩrɩ.

Yehwasi e di bugyu Isareli

10 Yuda wogyu-dɩrɛ Yowasi gɩkyan dikpilin ma fwo-kwarankɩfɛ gaanɩ fɔ, Yehwahasi wobi Yehwasi e sere bugyu buu gedi Isareli. E di bugyu Samariya bɩkyan fwo kooron. 11 Ɛ mɛ ade-kpen Yahwe Bʋnʋn, gɛ en kere ade-kpen gɛtɛ Nebati wobi Yerobwam ɛ mɛ gɛ wʋ yɛ Isareli bete mɔ be gyu ade-kpen yaanɩ fɔ ya.

12 Bɛ ŋwara ade-kurumakyɛɛ gɛtɛ Yehwasi ɛ mɛ wo bugyu buu gedi baanɩ, ma wakpa gɛtɛ ɛ kpà ma Amasiya fɔ powu yaade bɛ sa Yuda begyu-dɩrɛ boo koro gaade yɩɩ gɩkpa fɔ gaanɩ. 13 Wʋʋ gama fɔ, Yehwasi e ku, gɛ be lò wɔ begyu-dɩrɛ boo gelòkʋn Samariya ditele daanɩ. Gɛ Yerobwam e di bugyu e sere wɔ bɩsɩrɩ.

14 Pɛ Yehwasi èè be ku fɔ, Elisa e yeba geyeba gɩkɩ gɛtɛ gi wolo wɔ fɔ. Wo geyeba fɔ gaanɩ fɔ, egyu-dɩrɛ Yehwasi ɛ san wakʋn ɛ̀ɛ̀ ma sa wɔ onyun. Gɛtɛ e gyu wakʋn fɔ, e wula ɛ dɔ̀ alan, <<Miinte! Miinte! Awɔ n di Isareli wo betitiiramisan bɛsaralɛ ma wakpɔŋɔ yɩɩ bɛsaralɛ fɔ bɔɔkɛma!>>

15 Gɛ Elisa alan, <<Len Gyangarɩ ma gɩsɩnta ba!>> Gɛ ɛ mɛ gɛlɛ. 16 Ɛwʋ gɛ Elisa ɛ dɔ̀ Isareli wogyu-dɩrɛ alan, <<Ka gyangarɩ fɔ ton.>> Gɛtɛ ɛ ka gyangarɩ fɔ e ton fɔ, Elisa ɛ ka walɔ ɛ sa egyu-dɩrɛ walɔ yaanɩ.

17 Ɛwʋ gɛ Elisa ɛ dɔ̀ wɔ alan, <<Tana nfansɩrɩ gɛtɛ wʋ̀ sa ofila wʋʋ gɛtàkʋn wʋʋ gɩlan fɔ!>> Gɛ ɛ tana wʋ. Gɛ Elisa ɛ dɔ̀ wɔ alan, <<Tà gɩtà fɔ!>> Gɛ ɛ tà gɩ. Gɩsɩnta nyagɩ gì yela tɛ gedi gɛtɛ Yahwe ɛɛ̀ yɛ wɔ̀ àà di Aram bete boo koro. Aà muru Aram bete powu Afeki ditele daanɩ.

18 Ɛwʋ gɛ Elisa ɛ dɔ̀ egyu-dɩrɛ fɔ alan, <<Ka bɩsɩnta fɔ!> Gɛ egyu-dɩrɛ fɔ ɛ ka bʋ e ton. Gɛ Elisa ɛ dɔ̀ wɔ alan, <<Tà sere gɛtʋnkwaa!>> Gɛ ɛ tà e sere gɛtʋnkwaa disere disiyee gɛ e kere ɛ ya. 19 Ɛwʋ gɛ Elisa ɛ ka owurufa, gɛ ɛ dɔ̀ alan, <<Wù di gɛtɛ nafɔ àà tà gɩtà fɔ sere gɛtʋnkwaa disere ton abɛɛ disere kooron. Gɛlɛ fɔ, nafɔ aà di Aram wo koro, fɔ àà muru wɔ kɩrɩkɩrɩ. Mɔ aà yɛ a di gɛ wo koro disere disiyee.>>

20 Wʋʋ gama fɔ, Elisa e ku, gɛ be lò wɔ.

Waanɩ fɔ, Mowabi beyukurulɛ bɛɛ tɩ̀ ma gyu Isareli gɛtʋnkwaa gaanɩ okene-fila waanɩ. 21 Duwi dɩkɩ, gɛtɛ Isareli bete bɛ san bàà ma lò ete ɛkɩ fɔ, disere-kɩlɩn fɔ, be we beyukurulɛ boo dikpi dɩkɩ. Okoro be fun ete fɔ gikpena fɔ bɛ sa Elisa gɩsàn gaanɩ. Gɛtɛ ete fɔ gikpena fɔ gɩ kya Elisa wanankʋba fɔ, ete fɔ ɛ lama ɛ ba nkpa anɩ, gɛ ɛ tɔ e yela wɔ bɩsɩrɩ buu koro.

Isareli ma Aram baakpa

22 Aram wogyu-dɩrɛ Hasayeli ɛ nyanla Isareli bete Yehwahasi bugyu buu gedi bʋʋya powu waanɩ. 23 Mɔ Yahwe e len baade, gɛ e we boo gutunkoro, gɛ ɛ̀ fɛ ma baade, yema dikola gɛtɛ ɛ tà ma Abraham, ma Isaki, ma Yakobu fɔ dii koro. Bè ye ma ǹdò, en len gɛtɛ èè muru bɛ, gɛ en len gɛtɛ èè tiri bʋnʋn yɛ bɛ.

24 Wʋʋ gama fɔ, Aram wogyu-dɩrɛ Hasayeli e ku, gɛ wobi Ben-Hadadi e di bugyu e sere wɔ gɩsɩrɩ. 25 Ɛwʋ gɛ Yehwahasi wobi Yehwasi e biri ɛ kpà e to atele gɛtɛ Hasayeli wobi Ben-Hadadi e tì to e ye wote Yehwahasi wakʋn akpa yaanɩ fɔ. Yehwasi e di wo koro disere disiyee, okoro e to Isareli watele fɔ.