1 Yehu gɩkyan-kwarankɩfɛ gaanɩ gɛtɛ ee di bugyu Isareli fɔ, gɛ bɛ sɩ̀ Yowasi bugyu Yuda, gɛ e di bugyu fɔ Yerusalem ditele bɩkyan akpilin anyɔɔ. Wɔna diyere n di Sibiya gɛtɛ e ye Beseba fɔ. 2 Yowasi ɛ mɛ ade gɛtɛ ɩ̀ tʋna Yahwe bʋnʋn bɩkyan powu gɛtɛ gedi gɩɩtɛlɛ Yehoyida ee wùlà wɔ ade fɔ. 3 Mɔ bɛn mɩna bekpen baasʋmakʋn fɔ, okoro bɛnɩ bɛ̀ sangba bɛɛ tɛ gedi gɛ bee kuma olifwi dʋkɔ.

4 Ɛwʋ gɛ Yowasi ɛ dɔ̀ gedi gɩɩ bɛtɛlɛ fɔ alan, <<Ɩ kʋla sɩka gɛtɛ bɛɛ ka bɛ bɛ tɛ Yahwe Dikwo-dɩrɛ daanɩ, gɛtɛ wù di bɛnɩ bɔɔ gɛkalan gɩɩ sɩka, ma sɩka bɛnɩ bɛ dɔ̀ bɛ sɩ̀ alɛ baà le fɔ, ma sɩka gɛtɛ bɛnɩ bɛɛ tɛ be ye boo-ituru yaanɩ fɔ. 5 Wù di gɛtɛ gedi gɩɩtɛlɛ-kamasɛ èè to sɩka fɔ e ye sɩka bɛsɩ̀lɛ baakʋn, fɔ bàà ka sɩka fɔ pɩna ɔkʋn-kamasɛ gɛtɛ wʋ mɩna Dikwo-dɩrɛ fɔ daanɩ fɔ.>>

6 Mɔ egyu-dɩrɛ Yowasi bugyu buu gedi bɩkyan dikpilin ma bisiyee powu baanɩ fɔ, gedi gɩɩ bɛtɛlɛ fɔ bɛn tɛ pɩna Dikwo-dɩrɛ fɔ. 7 Okoro egyu-dɩrɛ Yowasi e kpèlè gedi gɩɩtɛlɛ ɛndɩrɛ Yehoyada ma gedi gɩɩ bɛtɛlɛ-do fɔ e tuma, gɛ e lila bɛ alan, <<Anʋn yii koro gɛ ɩɩn taa pɩna Dikwo-dɩrɛ fɔ dɩɩ-ɩkʋn-mɩnalɛkʋn fɔ? Ɩ kara ni to kɔba i ye bɛsɩ̀lɛ fɔ baakʋn, mɔ ɩ ka wʋ ɩ tɛ, fɔ bàà ka wʋ pɩna Dikwo-dɩrɛ fɔ.>> 8 Ɛwʋ gɛ gedi gɩɩ bɛtɛlɛ fɔ be yera gɛtɛ bɛn nan ni to sɩka be ye bɛnɩ baakʋn, gɛ ɛbɛ gbagba bɛn mɩnɩ pɩna Dikwo-dɩrɛ fɔ.

9 Ɛwʋ gɛ gedi gɩɩtɛlɛ Yehoyada ɛ ka dɩdaka, gɛ e duru dii ditinbi fɔ, gɛ ɛ ka dɩ ɛ sɩ̀ gedi gɩɩ gɛtɛ̀kʋn fɔ gɩɩpɩ, Yahwe Dikwo-dɩrɛ fɔ diilogyi-lɔ, gengyi ɛkɩ ee gyu daanɩ fɔ. Gedi gɩɩ bɛtɛlɛ gɛtɛ bɛɛ sara otunu fɔ bɛ ka sɩka powu gɛtɛ bɛnɩ bɛɛ ka bɛ ba Yahwe Dikwo-dɩrɛ daanɩ fɔ bɛ sa dɩdaka fɔ daanɩ. 10 Ɔya-kamasɛ gɛtɛ bè we gɛtɛ sɩka sɩka gɛtɛ bɛnɩ bɛ ka bɛ ba Yahwe Dikwo-dɩrɛ daanɩ fɔ wʋ sɔ fɔ, egyu gɩkpa gɩɩŋwaralɛ ma gedi gɩɩtɛlɛ ɛndɩrɛ bɛɛ bɛ̀ kalan wʋ, fɔ bɛ ka wʋ bɛ sa bekotoku baanɩ. 11 Gengyi bɛ̀ kalan sɩka fɔ be were fɔ, bɛɛ ka wʋ bɛ tɛ bɛnɩ gɛtɛ bɛɛ nya Dikwo-dɩrɛ fɔ dɩɩ gʋtʋn gii koro fɔ. Bɛɛ ka sɩka fɔ be le iyon yɩɩ bɛsalɩlɛ ma bɛmaralɛ gɛtɛ bɛɛ mɛ gʋtʋn Yahwe Dikwo-dɩrɛ fɔ daanɩ fɔ, 12 ma ɩpɔrɩ yii beserelɛ, ma ataa yɩɩ bɛkpalɩlɛ. Be se iyon-serelɛ ma ataa kpalɩlɛ tɛ Yahwe Dikwo-dɩrɛ fɔ dɩɩ gɛpɩna ma anyan gɛtɛ ii hiyan fɔ powu.

13 Bɛn ka sɩka gɛtɛ bɛ ka bɛ ba Dikwo-dɩrɛ daanɩ fɔ mɛ sɩka-fututu bɛtasa, abɛɛ omini-tiiralɛ kandɩya wayenkpen, abɛɛ bɛtasa-ŋwanlɛ anyan, abɛɛ akantan, abɛɛ sɩka-sɩya abɛɛ sɩka-fututu gɩnyankɩ tɛ Yahwe Dikwo-dɩrɛ fɔ. 14 Mɔ fɔ, bɛ ka gɛ sɩka fɔ bɛ tɛ gʋtʋn gɩɩ bɛmɛlɛ fɔ bàà ka pɩna Dikwo-dɩrɛ fɔ. 15 Gɛ bɛn yɛ bɛnɩ gɛtɛ bɛ ka sɩka fɔ bɛ tɛ alɛ be le gʋtʋn gɩɩ bɛmɛlɛ fɔ bàà mɛ akʋnta, yema bɛ ka nʋnkwarɩ bɛ mɛ gʋtʋn fɔ powu. 16 Mɔ sɩka gɛtɛ bɛnɩ be le tɛ dɩpwɛ dii gedi, ma dɩdɩɩ dɩ gɛkpa dɩɩ sɩka fɔ bɩrɛ, bɛn ka wʋ ba Yahwe Dikwo-dɩrɛ daanɩ. Ɛwʋ wù di gedi gɩɩ bɛtɛlɛ booyo. 17 Ɔya wʋtɔkɔ waanɩ fɔ, Aram wogyu-dɩrɛ Hasayeli ɛ san ɛ ma kpà ma Gati ditele, gɛ e gye dɩ bɩtà. Wʋʋ gama fɔ, ɛ mɛ wamɩnlɛ gɛtɛ eè fi ɛ san ɛ ma tà bɩtà ma Yerusalem ditele. 18 Mɔ Yuda wogyu-dɩrɛ Yowasi ɛ ka anyan gɛtɛ wotu ɛbɛ Yehosafati, ma Yehoram, ma Ahasiya gɛtɛ be di bugyu Yuda bɛ nya, gɛ be tiri bɛ sɩ̀ bɛ tɛ Yahwe fɔ, ma anyan gɛtɛ ɛwɔ gbagba e tiri ɛ sɩ̀ ɛ tɛ Yahwe, fɩya ma sɩka-sɩya gɛtɛ wʋ̀ sa ɔkʋn gɛtɛ bɛɛ sɩ̀ anyan gbaa-gbaa Yahwe Dikwo-dɩrɛ daanɩ fɔ, ma digyukpaara fɔ, gɛ ɛ ka yɩ powu ɛ ma tɛ Aram wogyu-dɩrɛ Hasayeli. Gɛlɛ wuu koro, egyu Hasayeli ɛn mɩnɩ tà bɩtà fɔ ma Yerusalem.

19 Bɛ ŋwara ade-kurumakyɛɛ gɛtɛ Yowasi ɛ mɛ wo bugyu buu gedi baanɩ fɔ bɛ sa Yuda begyu-dɩrɛ boo koro gaade waakpa yaanɩ. 20 Yowasi bɛndɩrɛbi bɛ mɛ onyun wo koro, gɛ be wolo wɔ Milo dɩkpaara daanɩ, osele gɛtɛ wʋ waran wʋʋ fɔrɔ Sila wɔlanlan waanɩ fɔ waanɩ. 21 Bɛndɩrɛbi gɛtɛ be wolo wɔ fɔ n di, Simeti wobi Yosabadi, ma Someri wobi Yehosabadi. E ku, gɛ be lò wɔ Dafidi Ditele, wotu ɛbɛ bɔɔ bɩsan baanɩ. Gɛ wobi Amasiya e di bugyu e sere wɔ bɩsɩrɩ.