2 Begyu-dɩrɛ 8

Sunami-na fɔ e biri ɛ san wɔlɛ

1 Gɛtɛ Elisa ɛ lama ɛna gɛtɛ e ye Sunami fɔ wobi fɔ e were fɔ, ɛ dɔ̀ wɔ alan, <<Awɔ ma aa dɩkpaara dɩɩ bɛnɩ ɩ tɔ ye nfan fɔ yàà ma sara ɔkʋn-fon, yema Yahwe ɛɛ̀ bɛ̀ yɛ dɩkpan dàà nʋ̀n gɛtʋnkwaa fɔ gii koro bɩkyan kwarankɩ. 2 Okoro ɛna fɔ ɛ mɛ anlɛ gɛtɛ Wurubwarɛ wɔnɩ fɔ ɛ dɔ̀ wɔ fɔ. Ɛwɔ ma wɔ dɩkpaara dɩɩ bɛnɩ bɛ tɔ gɛ bɛ ma sara Filisiti bete bɔɔ gɛtʋnkwaa gaanɩ bɩkyan kwarankɩ. 3 Gɛtɛ bɩkyan kwarankɩ fɔ bu were fɔ, e biri e ye Filisiti gɛtʋnkwaa gaanɩ ɛ ba Isareli, gɛ ɛ ma fɔ egyu fɔ gɛtɛ bàà birima wɔ dɩkpaara ma wɔ gɛtʋnkwaa bɛ tɛ wɔ. 4 Gɛtɛ ɛ san fɔ, egyu fɔ ɛɛ tabʋrʋ ma Gehasi gɛtɛ è di Elisa wɔsaranyan fɔ, gɛ ɛ dɔ̀ wɔ alan, <<Dɔ̀ mɩ ade-dɩrɛ gɛtɛ Elisa ɛ mɛ powu.>> 5 Gɛtɛ Gehasi ɛ̀ bɔ ɛɛ dɔ̀ egyu fɔ anlɛ gɛtɛ Elisa ɛ lama ɛna gɛtɛ wobi e ku fɔ ɛ ba nkpa anɩ fɔ, ɛna fɔ gɛtɛ Elisa ɛ lama wobi e ye diku daanɩ fɔ na be ye dʋkɔbɛ, ɛ̀ bɛ fɔ egyu fɔ èè birima wɔ dɩkpaara ma wɔ gɛtʋnkwaa ɛ tɛ wɔ.

Gehasi e tiri wuunyun alan, <<Ɛna fɔ wɔ lɛ, miinfonte egyu, gɛ wobi gɛtɛ Elisa ɛ lama e ye diku daanɩ ɛ ba nkpa waanɩ fɔ wɔ lɛ.>> 6 Egyu fɔ e lila ɛna fɔ ade fɔ, gɛ ɛna fɔ dɔ̀ wɔ.

Ɛwʋ gɛ egyu fɔ e kpèlè wɔndɩrɛbi ɛkɩ gɛ ɛ dɔ̀ wɔ alan, <<Birima gɩnyan-kamasɛ gɛtɛ gì di woyo fɔ tɛ wɔ, ma sɩka-kamasɛ gɛtɛ wu ye woli waanyan yaanɩ wʋ ba, ye duwi gɛtɛ e ye gɛtʋnkwaa nyagɩ gaanɩ bè sere ma ǹdò fɔ powu.>>

Hasayeli e wolo Ben-Hadadi

7 Elisa ɛ san Damasiko, fɔ Aram wogyu Ben-Hadadi ee yeba. Gɛtɛ bɛ dɔ̀ egyu fɔ alan, <<Elisa ɛ ba nfan>> fɔ, 8 ɛ dɔ̀ Hasayeli alan, <<Ka anyan-kyɛlɛ, fɔ àà san màà tama Wurubwarɛ-wɔnɩ, fɔ àà fɔ wɔ, fɔ èè lila Yahwe alan, <Nan tɔ n ye miin geyeba nyagɩ gaanɩ?> >> 9 Ɛwʋ gɛ Hasayeli ɛ ka akpɔŋɔ akpilin anyɔɔ, gɛ ɛ ka anyan-kpara-kpara-kamasɛ gɛtɛ ɩ̀ sa Damasiko fɔ e tola aakpɔŋɔ fɔ, gɛ ɛ san Elisa wakʋn. Gɛtɛ e gyu wakʋn fɔ, ɛ dɔ̀ wɔ alan, <<Aasaranyan Ben-Hadadi, gɛtɛ e di Aram wogyu fɔ na sa mɩ alɛ n be lila wɔ̀ alan, <Nan tɔ n ye miin geyeba nyagɩ gaanɩ?> >>

10 Gɛ Elisa e tiri wuunyun alan, <<Yahwe e tiri e wùlà mɩ alɛ eè ku, mɔ san ma dɔ̀ wɔ alɛ ɛɛ̀ tɔ.>> 11 Ɛwʋ gɛ Elisa e sere bʋnʋn ɛɛ nya Hasayeli gɛlɛɛ, gɛtɛ wʋ yɛ Hasayeli bʋnʋn bu ku. Gɛ Elisa e gbena ɛ sa ee wula. 12 Ɛwʋ gɛ Hasayeli e lila wɔ alan, <<Miinfonte anʋn yii koro gɛ aa wula?>> Gɛ Elisa e tiri wuunyun alan, <<Yema ǹ nyɩ gyerebi gɛtɛ aà yɛ wàà nʋ̀n Isareli bete boo koro. Aà kuma baatele gɛtɛ bɛ mara ɩpɔrɩ bɛ sa yɩ fɔ, aà ka tata a wolo bɔɔ bɛsaranyan, aà fun bɔɔ bɛkyʋkyʋʋ a fɩna gɛtʋnkwaa a wolo, gɛ boo beborona baaboro yaà ye.>>

13 Ɛwʋ gɛ Hasayeli ɛ dɔ̀ alan, <<Waà mɛ lan gɛ nmɩ aasaranyan gɛtɛ miin di gɩnyankɩ lɛ nan talɩ n mɛ gʋtʋn-dɩrɛ nyagɩ gaakɩ?>> Mɔ Elisa e tiri wuunyun alan, <<Yahwe e tiri e wùlà mɩ alɛ awɔ aà bɛ mɛ Aram wogyu,>> 14 Gɛ Hasayeli e ye Elisa wakʋn, gɛ e biri ɛ da wofonte waakʋn. Gɛ Ben-Hadadi e lila alan, <<Lan gɛ Elisa ɛ dɔ̀ wɔ̀?>> Gɛ Hasayeli e tiri wuunyun alan, <<Ɛ dɔ̀ mɩ alɛ aà nyɩ a tɔ a ye geyeba fɔ gaanɩ.>> 15 Mɔ duwi-nyɔɔfɛ fɔ ɛ ka dɩyan ma otin ɛ nyɔ butu, gɛ ɛ ka dɩ ɛ ma yɛrɛba e tin egyu fɔ bʋnʋn, okoro e ku. Gɛ Hasayeli e di bugyu e sere wɔ bɩsɩrɩ. 16 Isareli wogyu Ahabi wobi Yoram gɩkyan-tonfɛ gaanɩ, ɔkʋna gɛtɛ Yehosafati è di Yuda wogyu fɔ, Yehosafati wobi Yehoram e sere ɔpɩ ee di bugyu Yuda gɩfɩɩ gaanɩ. 17 Ɔkʋna gɛtɛ Yehoram e di bugyu fɔ ɛ̀ ba bɩkyan dikpilin ma fwo-bʋnyɔɔ, gɛ e di bugyu Yerusalem bɩkyan nɩyɛ. 18 Yehoram mɔ ɛ mɛ gɛ anlɛ gɛtɛ Isareli begyu bɛ mɛ fɔ. Gɛ ɛ mɛ duyu-kɛma anlɛ egyu Ahabi, yema e to Ahabi wobi-nanɩ ɛkɩ gɩna. Okoro Yehoram ɛ mɛ ade-kpen Yahwe bʋnʋn. 19 Mɔ fɔ, Yahwe ɛn taa len ɛ̀ɛ̀ mɩna Yuda, yema ɛ dɔ̀ ɛ sɩ̀ ɛ tɛ Dafidi alɛ wodu wʋʋ bɛnɩ nan bɔ be di bugyu gakpaakpa. 20 Yehoram wɔya waanɩ fɔ, Edom bete bɛ tɔ be yela Yuda gɩfɩɩ gii koro, gɛ bɛ sɩ̀ ɛbɛ gbagba boogyu. 21 Okoro Yehoram ɛ ka wo tiiramisan ɛbɛ powu bɛ san Sayiri. Gɛ Edom bete bɛ sʋ ɛwɔ ma wotiiramisan ɛbɛ bɔɔ bɛndɩrɛbi fɔ bɛ sa. Mɔ ɛwɔ ma wotiiramisan ɛbɛ bɔɔ bɛndɩrɛbi fɔ bɛ tɔ be serenti odonte, gɛ wɔ bɩtà bʋʋ bɛtàlɛ fɔ bɛ yasɩ bɛ da bɔɔ-ɩlɛ 22 Ye dʋwi dɩtɔkɔ fɔ, Edom bɛnɩ be to koro be ye Yuda gatɩn. Gɛlɛ wʋʋ ya wʋtɔkɔ ke waanɩ gɛ Libina ditele mɔ di to koro di ye Yuda gatɩn. 23 Gɛ bɛ ŋwara Yehoram wade-mɛlɛ kurumakyɛɛ ma wo bugyu buuyo powu bɛ sa Yuda begyu-dɩrɛ bɔɔ gɩkpa-dɩrɛ fɔ gaanɩ. 24 Ɛwʋ gɛ Yehoram e ku gɛ be lò wɔ wotu ɛbɛ bɔɔ bɩsan baanɩ, ɔkʋn gɛtɛ bee kpèlè alɛ Dafidi Ditele fɔ. Gɛ wobi Ahasiya e di bugyu ɛ sere wɔ gɩsɩrɩ.

Ahasiya e di bugyu Yuda

25 Isareli wogyu Ahabi wobi-teni Yoram gɩkyan fwo-nyɔɔfɛ gaanɩ fɔ, Yuda wogyu Yehoram wobi Ahasiya e sere ɔpɩ ee di bugyu. 26 Ɔkʋna gɛtɛ Ahasiya e di bugyu fɔ ɛ̀ ba bɩkyan dikpilin ma bʋnyɔɔ, gɛ e di bugyu Yerusalem gɩkyan-kɩlɩn. Wɔna n di Ataliya gɛtɛ e di Isareli wogyu Omiri wɔnana fɔ. 27 Ahasiya ɛ mɛ wade anlɛ Ahabi dɩkpaara, gɛ ɛ mɛ ade-kpen Yahwe bʋnʋn anlɛ gɛtɛ Ahabi dɩkpaara dɩ mɛ fɔ. Yema e to ɛna e ye Ahabi dɩkpaara daanɩ gɛ ɛ ka koro ɛ fɩya ma ɛbɛ. 28 Ahasiya ɛ ka wo koro ɛ ma fɩya ma Ahabi wobi Yoram bàà ma kpà ma Aram wogyu Haseli, Ramoti-Gileyadi gɛtʋnkwaa gaanɩ, gɛ Aram bete be pira Yoram. 29 Gɛlɛ wuu koro egyu Yoram e biri ɛ san Yesereli ɛ̀ɛ̀ ma nyɩ waakʋn gɛtɛ e wura e ye ɛbɛ ma Ramoti bete baakpà yaanɩ fɔ. Gɛ Yuda wogyu Yehoram wobi Ahasiya ɛ san ɛ ma nya wɔ.