2 Begyu-dɩrɛ 18

Yuda wogyu-dɩrɛ Hesekiya

1 Isareli wogyu-dɩrɛ Ela wobi Hoseya gɩkyan-siyeefɛ gaanɩ gɛ Yuda wogyu-dɩrɛ Ahasi wobi Hesekiya e sere bugyu buu gedi. 2 Ɔkʋna gɛtɛ e sere bugyu buu gedi fɔ, ɛ̀ ba bɩkyan dikpilin ma ton, gɛ e di bugyu fɔ Yerusalem bɩkyan dikpilin ma yɛkɩ. Wɔna diyere n di Abiya, gɛtɛ è di Sekariya wobi-nanɩbi fɔ. 3 Ɛ mɛ ade gɛtɛ ɩ̀ tʋna Yahwe bʋnʋn anlɛ gɛtɛ wotu Dafidi ɛ bɔ ɛ mɛ fɔ. 4 E gbena asʋmakʋn fɔ, gɛ e gbena akpen-taa fɔ, gɛ e sila Asera wo-iyon fɔ ɛ fɩna. E gbena gɩwɔrɔnyan-sɩya gɩɩwa gɛtɛ Mose ɛ mɛ gɛ bee kpèlè wɔ alɛ Nehusitan fɔ buruburu, yema bè sere ma ɔya wʋtɔkɔ fɔ, Isareli bete bɛ̀ sangba bee kuma olifwi bɛ tɛ wɔ.

5 Hesekiya e to Yahwe, Isareli wo Wurubwarɛ fɔ e di. Yuda begyu powu gɛtɛ bɛ sara pɛgɛ ɛ ba, ma ɛbɛ gɛtɛ baà bɛ ba wɔ gama powu baanɩ fɔ, ɛkɩ en to di anlɛ ɛwɔ. 6 Ɛ bɔ ɛ kpà ɛ marama Yahwe, gɛtɛ en kere wɔ gɛtɛrɛma ya. E ton ise gɛtɛ Yahwe ɛ tɛ Mose fɔ yaanɩ. 7 Okoro Yahwe ɛ̀ fɩya ma ɛwɔ, gɛ ade-kamasɛ gɛtɛ ɛ mɛ fɔ i pe ɩ tɛ wɔ. E tɔ e yela Asiriya wogyu-dɩrɛ wo koro gɛtɛ ɛn mɩnɩ sʋma wɔ. 8 Ɛ kpà e di Filisiti bete boo koro. E di Gasa ma watele gɛtɛ i silin wɔ i tuma fɔ yii koro. E di atele-dɩrɛ-dɩrɛ ma atele-buru-buru fɔ yii koro.

9 Egyu-dɩrɛ Hesekiya bugyu buu gedi wʋʋ gɩkyan-naafɛ gaanɩ, gɛtɛ wù di Isareli wogyu-dɩrɛ Ela wobi Hoseya, gɩkyan-kwarankɩ fɛ fɔ, Asiriya wogyu Salimaneseri ɛ tɔ e yela Samariya wo koro gɛ ɛ ma sʋ wɔ ɛ sa. 10 Bɩkyan busiyee buu gewere gaanɩ fɔ, Asiriya e to Samariya. Okoro be gye Samariya bɩtà Hesekiya gɩkyan-kooronfɛ gaanɩ, gɛtɛ wù di Isareli wogyu-dɩrɛ Hoseya gɩkyan yɛkɩfɛ fɔ gaanɩ. 11 Gɛ Asiriya wogyu-dɩrɛ ɛ yɛ bɛ ka Isareli bete bɛkɩ bɛ san Asiriya, gɛ bɛ ka bɛkɩ bɛ ma sɩ̀ Hala ditele daanɩ, bɛ ka bɛkɩ bɛ ma sɩ Gosan wɔlanlan gɛtɛ wʋ̀ sa Habo getu gɩɩpɩ fɔ, ma Medesi watele yaanɩ. 12 Ade nyayɩ i sere boo koro yema bɛn nʋn Yahwe, boo Wurubwarɛ ginde, ben di dikola gɛtɛ ɛ tà ma ɛbɛ fɔ dii koro. Ise powu gɛtɛ Yahwe wɔsaranyan Mose ɛ tɛ bɛ fɔ, bɛn ka yɩ bɩta, gɛ ben di yii koro.

13 Hesekiya bugyu buu gedi wʋʋ gɩkyan fwo-naafɛ gaanɩ fɔ, Asiriya wogyu-dɩrɛ Senakeribii ɛ ma tà bɩtà ma Yuda watele ma ɔkɛma fɔ, gɛ e gye yɩ bɩtà. 14 Ɛwʋ gɛ Yuda wogyu-dɩrɛ Hesekiya ɛ tɩyɛma Asiriya wogyu-dɩrɛ ɔtʋn alan, <<Na mɛ ade-kpen. Kere mɩ gɛnyanla ya, nan le wɔ̀ gɩnyan-kamasɛ gɛtɛ aà lila fɔ.>> Ɛwʋ gɛ Asiriya wogyu e belen gutoro ɛ sɩ̀ wɔ gɛtɛ èè le sɩka-fututu gɛtɛ wɔdʋrʋ wù ba siminti bɛbagɩ gɛkpɩn ma dikpilin bɔɔdʋrʋ, ma sɩka-sɩya gɛtɛ wɔdʋrʋ wù di siminti bɛbagɩ dikpilin bɔɔdʋrʋ. 15 Okoro Hesekiya ɛ ka sɩka-fututu powu gɛtɛ be wura Wurubwarɛ Dikwo-dɩrɛ daanɩ, ma digyu-kpaara dɩɩ dɩdaka daanɩ fɔ ɛ tɛ wɔ.

16 Ɔya wʋtɔkɔ waanɩ fɔ, Yuda wogyu-dɩrɛ Hesekiya ɛ magɩ sɩka-sɩya gɛtɛ ɛ̀ marama ɩpʋnʋn fɔ, ma sɩka-sɩya gɛtɛ ɛ tɩ̀ ka ɛ bɔlɩ Yahwe Dikwo-dɩrɛ dii-itunu-yon fɔ, gɛ ɛ ka wɔ ɛ tɛ Asiriya wogyu-dɩrɛ.

Senakeribi ɛ nyanla Yerusalem

17 Wʋʋ gama fɔ, Asiriya wogyu-dɩrɛ ɛ sa wɔ bɩtà bʋʋ bɛtàlɛ boo duyu, ma wɔ bɩtà bʋʋ bɛtàlɛ bʋʋndɩrɛ, ma akpà yiigyegeyelɛ fɩya ma bɩtà bʋʋ bɛtàlɛ kpekpesi e ye Lakisi bɛ san Hesekiya wakʋn Yerusalem ditele daanɩ. Gɛtɛ be gyu Yerusalem fɔ, be to ɔkʋn gɛtɛ butu bʋʋ kyalɩ, ngba buuferelɛ woli-sele ɔkʋn gɛtɛ bɛnanɩ bee fere anyan fɔ. 18 Gɛtɛ bɛ sa bɛnɩ bɛ ma kpèlè egyu fɔ, Hilikiya wobi Eliyakim gɛtɛ è di digyu-kpaara dɩɩnyalɛ fɔ, ma Sebina gɛtɛ è di gɩkpa gɩɩŋwarɛlɛ fɔ, ma egyu wɔtabʋrʋlɛ Yowa gɛtɛ è di Asafi wobi fɔ na ma tuma bɛ.

19 Ɛwʋ gɛ bɩtà bʋʋ bɛtàlɛ bɔɔndɩrɛ fɔ alan, <<Asiriya bete boogyu-dɩrɛ-kpatakpɩrɩ ee lila alan, <Anʋn gbagba yii koro gɛ aa bʋnʋn bʋ̀ gyaga? 20 Aa dɔ̀ gɛtɛ à nyɩ̀ isele gɛtɛ bɛɛ ka bɛ kpà, gɛ à ba bɩtà bʋʋ bɛtàlɛ gɛtɛ bɛ̀ ba ɔkɛma. Mɔ aanyun-gyebi ì di gɛ onyun-foli waade. Ɛnyan gɛ aa bʋnʋn bʋ̀ gyaga wo koro gɛtɛ ɛɛ̀ kpà wɔ̀ àà tɔ yela miin koro? 21 Nya! À de bʋnʋn aa gyaga Egyipiti wogyu wo koro. Egyipiti wogyu è we gɛ anlɛ gɛkyɛrɛbayɩ gɛtɛ gengyi ɛnɩ ɛkɩ ɛ̀ ka ɛ mɛ oyon-tonlɛ fɔ, gaà tu wɔ aalɔ. Anlɛ gɛ Egyipiti wogyu Farawo ɛɛ mɛ ɛnɩ-kamasɛ gɛtɛ ee len gɛkpà e ye wakʋn fɔ. 22 Gɛ gengyi à dɔ̀ mɩ alɛ aa bʋnʋn bʋ̀ gyaga Yahwe, aa Wurubwarɛ wo koro fɔ, nka wasʋmakʋn ma wo gedi gaatɛkʋn gɛ Hesekiya e gbena, gɛ ɛ dɔ̀ Yuda ma Yerusalem bete alan, <<Yerusalem gedi gɩɩ gɛtɛ̀kʋn giiko gɛ yaà sʋma>> fɔ?

23 Awɔ ba, fɔ awɔ ma miinfonte Asiriya wogyu yàà dɔ̀ i yera bɛwɔlɔn. Gengyi awɔ aà nyɩ̀ a wura abengyi yɩɩ bɛsaralɛ fɔ, nan tɛ wɔ̀ abengyi gbaa (2,000). 24 Ma gɛtɛ aa bʋnʋn bʋ̀ gyaga Egyipiti wo koro gɛtɛ ɛɛ̀ tɛ wɔ̀ tiiramisan ɛbɛ, ma abengyi yɩɩ bɛsaralɛ gba fɔ, an nan talɩ a yela ma miinfonte wɔ bɩtà bʋʋ bɛtàlɛ baanɩ ɛpɩɩ fɔ gba. 25 À nyɩ̀ alɛ Yahwe ɛn fɩya ma nmɩ, gɛ na ba nan bɛ̀ tà aa gɩfɩɩ bɩtà, fɔ nan muru gɩ? Yahwe gbagba na dɔ̀ mɩ alɛ n bɛ tà gɩfɩɩ fɔ bɩtà, fɔ nan muru gɩ.> >>

26 Ɛwʋ gɛ Hilikiya wobi Eliyakim ma Sebina ma Yowa bɛ dɔ̀ egyu-dɩrɛ wɔkpàlɛ ɛndɩrɛ fɔ alan, <<Tɩɩ fɔ wɔ̀ gɛ, tabʋrʋ ma ɛtɩ aa bɛsaranyan Aram bete boo ginde gaanɩ, yema tɩɩ nʋn gɩ. Kara tabʋrʋ ma ɛtɩ Hebere ginde gaanɩ gɛtɛ wàà bɛ̀ yɛ bɛnɩ gɛtɛ bɛ̀ gyaga ɔpɔrɩ wuu koro fɔ bàà bɛ̀ nʋn.>>

27 Mɔ egyu wɔkpàlɛ ɛndɩrɛ fɔ e tiri wuunyun alan, <<À nyɩ̀ alɛ ɛyɩ ma yiifonte yiiko gɛ miinfonte ɛ sa mɩ alɛ ǹ bɛ dɔ̀ ade nyayɩ n tɛ? N tɛ tabʋrʋ n tɛ ɛbɛ gɛtɛ bè si ɔpɔrɩ wuu koro fɔ ke. Ɛbɛ mɔ ke baà di baapʋn, fɔ bàà nyʋn baalɩla anlɛ ɛyɩ mɔ ke.>>

28 Ɛwʋ gɛ ɛkpàlɛ ɛndɩrɛ fɔ e kpe ɛ san bʋnʋn, gɛ ɛ gbɛrɛ afala hebre bete boo ginde gaanɩ alan, <<Ɩ nʋn Asiriya wogyu-dɩrɛ, egyu-dɩrɛ-kpatakpɩrɩ wanyun-gyebi! 29 Egyu-dɩrɛ ɛɛ dɔ̀ alɛ ɩ kara yɛ Hesekiya ɛ̀ɛ̀ gban yɩ. Ɛn nan talɩ e to yɩ e ye maalɔ yaanɩ. 30 Ɩ kara yɛ Hesekiya ɛ̀ɛ̀ yɛ yɩɩ bʋnʋn bàà gyaga Yahwe wo koro. Ɩ kara mɛ amɩnlɛ alɛ, <Yahwe eè to yɩ ɛ ya, fɔ yàà dɔ̀ alɛ Asiriya bete bɛn nan talɩ be gye ditele nyadɩ.>

31 Ɩ kara nʋn Hesekiya wakʋn! Asiriya wogyu-dɩrɛ ɛɛ dɔ̀ alɛ, i ye ditele fɔ daanɩ ɩ ba, fɔ yàà bɛ̀ ka koro tɛ. Ɛwʋ fɔ, yaanɩ-kamasɛ eè di e ye wɔ wayɩn ma wo figi yii-ili yaanɩ gɛ ɛɛ̀ nyʋn ɛwɔ gbagba wo ditiribun dii butu. 32 ma sere gɛtɛ egyu-dɩrɛ ɛ̀ɛ̀ ka yɩ ɛ san gɛtʋnkwaa gɩkɩ gɛtɛ gì we anlɛ yiiyo nyagɩ lɛ gaanɩ. Wayin, ma anyandilɛ ma wayɩn wo-ili, ma olife wo-iyon ma ɛŋɔɔ ɩ̀ sa gaanɩ. I tiri nkpa, fɔ ɩ kara ku.

Ɩ kara nʋn Hesekiya wakʋn yema gengyi ɛɛ dɔ̀ yɩ alɛ Yahwe eè to yɩ ɛ ya fɔ, yaà lulu osele. 33 Gɩfɩɩ gɩkɩ giikpen e were to gɩ e ye Asiriya wogyu-dɩrɛ gʋlɔ gaanɩ ɛ nya? 34 Hamati ma Aripadi boo bekpen bɛ̀ sa gaanɩ? Sefarifayim, ma Hena ma Ifa boo bekpen de? Ekpen ɛkɩ e to Samariya e ye mɩɩn gʋlɔ gaanɩ ɛ nya? 35 Bɩfɩɩ nyabʋ powu buu bekpen baanɩ fɔ, ekpen-mɔmɔ na talɩ ɛ kpà e to wɔ gɩfɩɩ e ye miin gʋlɔ gaanɩ ɛ nya? Gɛ lan gɛ Yahwe ɛɛ̀ talɩ e to Yerusalem e ye miin gʋlɔ gaanɩ ɛ nya?>>

36 Mɔ bɛnɩ fɔ bɛ kʋn yiridi gɛtɛ bɛn dɔ ade ɩkɩ, yema egyu-dɩrɛ Hesekiya ɛ tɛ bɛ ose alɛ bɛ kara tiri wuunyun.

37 Ɛwʋ gɛ Hilikiya wobi Eliyakim gɛtɛ è di digyu-kpaara dɩɩndɩrɛ fɔ, ma egyu gɩkpa gɩɩŋwaralɛ Sebina, ma Asafi wobi Yowa gɛtɛ è di egyu wɔtabʋrʋlɛ fɔ, be gye bɔɔ-ngba bɛ fɛɛran, gɛ bɛ ma kasɩ ade gɛtɛ Asiriya wogyu-dɩrɛ wɔkpàlɛ ɛndɩrɛ fɔ ɛ dɔ̀ bɛ fɔ bɛ tɛ egyu-dɩrɛ Hesekiya.