2 Begyu-dɩrɛ 7

1 Ɛwʋ gɛ Elisa ɛ dɔ̀ wɔ alan, <<Nʋn Yahwe wanyun-gyebi. Yahwe ɛɛ dɔ̀ alan, <<Gɩsa gagyɩgyan, ɔkʋna nyawʋ anlɛ, baà fu ɔnʋmʋ mudu bɛnyɔɔ sɩka-fututu dibi-kɩlɩn. Gɛ baà fu amɔrɔ yɩɩnʋmʋ mudu bɛnyɔɔ sɩka-fututu dibi-kɩlɩn Samariya ditele dii getumakʋn.>>

2 Ɛwʋ gɛ egyu-dɩrɛ wɔndɩrɛbi gɛtɛ ɛɛ kpà wɔ fɔ e lila alan, <<Nya! Gengyi Wurubwarɛ e terema ɛ tana gatala gba, gɛ anyan yaabi i ye gatala ɩ bɛ nʋ̀n fɔ, ade nyayɩ gɛtɛ aa dɔ̀ lɛ yaà talɩ ɩ ba waanɩ?>>

Elisa e tiri wuunyun alan, <<Awɔ gbagba aà ka aa gʋnʋn a we, mɔ an nan di yɩ.>>

Be kere ditele fɔ dɩɩ gɛsʋ-sa bɛ ya

3 Waanɩ fɔ, beteni bɛnaa bɛkɩ gɛtɛ bee yeba geyeba-sɩya fɔ bè sì ditele fɔ diitunu okòro. Bɛ dɔ̀ bɛ tɛ bɛwɔlɔn alan, anʋn yii koro gɛ taà sara nfan gɛlɛɛ ka ma sere gɛtɛ taà ka ti ku? 4 Gengyi tɩ̀ dɔ̀ alɛ, <Taà gyu ditele fɔ daanɩ oo, dɩkpan fɔ dɩ̀ sa dʋkɔ okoro taà ku.> Gɛ gengyi tɩ̀ dɔ̀ alɛ taà kʋn tɩ sara nfan fɔ, taà ku. Okoro taà san Aram bete bɔɔ gɛsarakʋn gaanɩ, fɔ taà ma ka koro tɩ tɛ bɛ. Gengyi bè kere tɩ bɛ ya fɔ, taà sara nkpa. Mɔ gengyi bè wolo tɩ fɔ, ti ku, fɔ wu were.>>

5 Okoro, gɛtɛ ofila wuu gyu fɔ, bɛ tɔ bɛ bʋn bɛ da Aram bete bɔ gɛsarakʋn gaanɩ. Gɛtɛ be gyu gɛsarakʋn fɔ giikere fɔ, ɛnɩ n di ɛnɩ ɛn ma dʋkɔ. 6 Yema Efonte ɛ yɛ Aram bete bɛ nʋn ade ɩkɩ baaten yaanɩ anlɛ tiiramisan ɛbɛ, ma abengyi, ma bɩtà bʋʋ bɛtàlɛ-dɩrɛ baagingin. Okoro bɛ dɔ̀ bɛwɔlɔn alan, <<Ɩ nya, Isareli wogyu-dɩrɛ ɛ ma hayɩ Hiti bete, ma Egyipiti bete boo begyu gɛtɛ bàà bɛ̀ tà tɩ bɩtà!>> 7 Be kere baasarakʋn bɛ ya anlɛ gɛtɛ wʋ̀ fʋrʋma wù we, gɛ be serenti bɛ da bàà ka wura nkpa. Be serenti be kere bàà baabengyi, ma baakpɔŋɔ-tɩtɩɩ bɛ ya.

8 Gɛtɛ geyeba-sɩya gii bete bɛnaa fɔ be gyu gɛsarakʋn fɔ giikere fɔ, be gyu dɩyan-kwo fɔ dɩkɩ daanɩ, be di, gɛ bɛ nyʋn, ge be tola sɩka-fututu, ma sɩka-sɩya, ma ngba bɛ ma bubwa. Be biri bɛ san bɛ ma gyu dɩyan-kwo-do daanɩ, gɛ bɛ ka anyɩmɩnyan ɩkɩ be ye daanɩ bɛ ma bubwa ke.

9 Dʋkɔ fɔ, bɛ dɔ̀ bɛwɔlɔn alan, <<Ade gɛtɛ tɩɩ mɛ lɛ ɩn kɔlɔ. Ǹdò wuu duwi nyadɩ dì di gɛ ade-kpara yii duwi, okoro wuun di gɛtɛ taà ka tɩ mɛ tiiko taade. Gengyi tì so ma ye gɛgyɩgyan pɛgɛ tɩ̀ dɔ̀ ade nyayɩ fɔ, taà wura giten-tiira. Ɩ yɛ tàà san digyu-kpaara taà ma dɔ̀ bɛ nkenkele nyawʋ. 10 Ɛwʋ gɛ bɛ ma dɔ̀ otunu wʋʋ bɛdɩyɛlɛ fɔ alan, <<Tɩ san Aram bete bɔɔ gɛsarakʋn gaanɩ, mɔ tin we ɛnɩ ɛkɩ, gɛ tɩn nʋn ɛnɩ ɛkɩ wo koro. Abengyi ma akpɔŋɔ-tɩtɩɩ ì yela gɛtɛ ben furu yɩ, gɛ ayan-kwo fɔ ɩ̀ bɔ ì we anlɛ bɛnɩ fɔ bɛ tɔ yaanɩ.>>

11 Ɛwʋ gɛ otunu wʋʋ bɛdɩyɛlɛ fɔ bɛ yasɩ ade fɔ, bɛ ma dɔ̀ yɩ digyu-kpaara.

12 Ɛwʋ gɛ egyu-dɩrɛ ɛ tɔ odente, gɛ ɛ dɔ̀ wɔ bɛndɩrɛbi alan, <<Nan dɔ̀ yɩ ade gɛtɛ Aram bete bee len bàà mɛ tɩ. Gɛtɛ bɛ̀ nyɩ̀ gɛtɛ tii ku dɩkpan okoro, be ye bɔɔ gɛsarakʋn fɔ bàà ma bu dɩfa daanɩ ɔkankɩ. Bɛɛ nya gɛtɛ gengyi tì ye tii ditele daanɩ tɩ ma bugiti anyandilɛ fɔ, baà gye tɩ gʋnʋn-ŋɔrɔ fɔ bàà gyu tii ditele daanɩ. 13 Mɔ wɔ bɛndɩrɛbi fɔ baanɩ ɛkɩ ɛ dɔ̀ alan, <<Ɩ yɛ tàà sa bɛnɩ bɛkɩ bàà ka abengyi ton gɛtɛ i kuruma ditele daanɩ fɔ bàà ma nya alɛ anʋn na sere. Gengyi bɛ san gɛ be wura nkpa fɔ, bɛ bɔ be we anlɛ Isareli bɛnɩ gɛtɛ be si nkpa fɔ. Gɛ gengyi bè ku mɔ fɔ, bɛn da ɛbɛ gɛtɛ be were ku fɔ.>> 14 Ɛwʋ gɛ be tiri bɛnɩ bɛkɩ, gɛ egyu ɛ yɛ ka tiiramisan ɛbɛ bɛnyɔɔ ma baabengyi, gɛ ɛ sa bɛ alɛ bɛ san bɛ ma nya alɛ anʋn na sere Aram bete boo koro. 15 Okoro bɛ san gɛlɛɛ bɛ ma gyu Yodan. Gɛtɛ bɛ̀ san osele waanɩ powu fɔ, be we gɛtɛ Aram bete bɔɔ ngba ma anyan i ye ɩ nʋ̀n-nʋ̀n ɔkʋna gɛtɛ bee serenti fɔ. Okoro bɛnɩ gɛtɛ bɛ sa fɔ be biri bɛ bɛ dɔ̀ egyu fɔ. 16 Ɛwʋ gɛ Samariya bete bɛ san Aram bete bɔɔ gɛsarakʋn bɛ ma kpila baanyɩmɩnyan. Gɛ be fu ɔnʋmʋ mudu bɛnyɔɔ sɩka-fututu dibi-kɩlɩn. Gɛ be fu amɔrɔ yɩɩnʋmʋ mudu bɛnyɔɔ sɩka-fututu dibi-kɩlɩn anlɛ gɛtɛ Yahwe ɛ dɔ̀ fɔ. 17 Gɛ Isareli wogyu e tiri wɔndɩrɛbi gɛtɛ ɛɛ kpà wɔ fɔ ɛ sɩ̀ gɛtɛ èè yela ditele fɔ diitunu. Mɔ bɛnɩ be kyikya wɔ otunu fɔ dʋkɔ be wolo anlɛ gɛtɛ egyu fɔ ɛ ba Elisa wakʋn gɛ ɛ bɔ ɛ dɔ̀ wɔ fɔ. 18 Wʋ ba waanɩ anlɛ gɛtɛ Elisa ɛ tɩ̀ dɔ̀ egyu fɔ alan, <<Gɩsa ɔkʋna nyawʋ anlɛ, baà fu ɔnʋmʋ mudu bɛnyɔɔ sɩka-fututu dibi-kɩlɩn, gɛ baà fu amɔrɔ yɩɩnʋmʋ mudu bɛnyɔɔ sɩka-fututu dibi-kɩlɩn Samariya getumakʋn.>>fɔ. 19 Ɛndɩrɛbi fɔ ɛ dɔ̀ Wurubwarɛ wɔnɩ alan, <<Nya! Gengyi Wurubwarɛ e terema ɛ tana gatala gba, gɛ anyan yaabi i ye gatala ɩ bɛ nʋ̀n fɔ, ade nyayɩ gɛtɛ aa dɔ̀ lɛ yaà talɩ ɩ ba waanɩ?>> Ɛwʋ gɛ Wurubwarɛ wɔnɩ fɔ e tiri wuunyun alan, <<Awɔ gbagba aà ka aa gʋnʋn a we, mɔ an nan di yɩ. 20 Gɛ anlɛ gɛtɛ ɛ bɔ ɛ dɔ̀ fɔ, gɛlɛ gɛ wʋ mɛ wɔ, bɛnɩ bɛ kyikya wɔ ditele fɔ diitunu be wolo.