1 Yehwahasi wobi Yehwasi gɛtɛ è di Isareli bete boogyu-dɩrɛ fɔ bugyu buu gedi wʋʋ gɩkyan-nyɔɔfɛ gaanɩ fɔ, Yowasi wobi Amasiya e di bugyu Yuda. 2 Ɔkʋna gɛtɛ Amasiya e di bugyu fɔ, ɛ̀ ba bɩkyan dikpilin ma ton. Gɛ e di bugyu Yerusalem bɩkyan dikpilin ma yɛkɩ. Wɔna diyere n di Yehwadin, gɛ e ye Yerusalem. 3 Ɛ mɛ ade gɛtɛ ii di Yahwe gʋnʋn, mɔ wʋn nɩma anlɛ gɛtɛ wotu Dafidi ɛ mɛ fɔ. Ɛ tɛrɛma gɛ wote Yowasi, ade-mɛlɛ powu yaanɩ. 4 Mɔ en gbena asʋmakʋn fɔ, gɛ bɛnɩ fɔ bɛ̀ sangba bɛɛ tɛ gedi, gɛ bee kuma ilifwi dʋkɔ. 5 Gɛtɛ Amasiya bugyu buu gedi fɔ bu sere ɩkpaa fɔ, e wolo bɛndɩrɛbi gɛtɛ be wolo wote egyu fɔ. 6 Mɔ en wolo bɛnɩ gɛtɛ e wolo fɔ boo bebi, anlɛ gɛtɛ bɛ ŋwara Mose Ise yɩɩ Gɩkpa gaanɩ alɛ Yahwe ɛ dɔ̀ alan, <<Ɩ kara wolo bɛtaawe bebi baade-kpen yii koro, gɛ ɩ kara wolo bebi bɛtaawe baade-kpen yii koro, ɛkamasɛ wade-kpen gɛtɛ ɛ mɛ fɔ yii diku gɛ eè ku>> fɔ.

7 Amasiya e wolo Edom bɩtà bʋʋ bɛtàlɛ akpilin ton Bʋbɔlɛ bʋʋ Dɩtagba daanɩ gɛ e to Sela ditele gɛ ɛ sa dɩ diyere alɛ Yokiteli, gɛ gɛlɛ gɛ bee kpèlè dɩ bè ye ma ǹdò.

8 Ɛwʋ gɛ Amasiya ɛ sa bɛnɩ bɛ ma dɔ̀ Yehu wɔnana Yehwasi gɛtɛ è di Yehwahasi wobi fɔ alan, <<Bè tuma mɩ, fɔ tàà kpà.>>

9 Mɔ Isareli wogyu Yehowasi e birima ɔtʋn ɛ tɩyɛma Yuda wogyu Amasiya alan, <<Dɩfa ma iwiya gɛtɛ dɩ̀ sa Lebanon wo-idon yaanɩ fɔ, dɩ sa seda wo-iyon ɔtʋn alɛ, <Ka aabi-nanɩ tɛ miinbi-tenɩi èè to gɩna.> Ɛwʋ gɛ dɩfa dɩɩnan ɛkɩ e be kyɩkya dɩfa ma iwiya fɔ ɛ mɩna. 10 Wʋ̀ sa waanɩ alɛ a di Edom bete boo koro, gɛ wʋ yɛ wɔ̀ aa bʋma koro gatala. Yɛ wàà di wɔ̀ gʋnʋn alɛ a di boo koro, mɔ waran sara aalɛ! Anʋn yii koro gɛ aa len ade gɛtɛ yaà ka gyerebi ɩ mɔma awɔ ma Yuda bɛnɩ powu?>>

11 Mɔ Amasiya e terema, ɛn nʋn. Okoro Isareli wogyu Yehwasi ɛ ka wɔ bɩtà bʋʋ bɛtàlɛ gɛ bɛ ma kpà ma egyu Yuda wogyu Amasiya, Beti-Semesi ditele gɛtɛ dɩ sa Yuda fɔ daanɩ. 12 Isareli bɩtà bʋʋ bɛtàlɛ be di Yuda bɩtà bʋʋ bɛtàlɛ fɔ boo koro, gɛ wʋ yɛ Yuda bɩtà bʋʋ bɛtàlɛ fɔ be serenti bɛ da baatele yaanɩ. 13 Isareli wogyu Yehowasi e gye Yuda wogyu Amasiya gɛtɛ è di Yowasi wobi, gɛ è di Ahasiya wɔnana fɔ bɩtà Beti-Semesi. Gɛ Yehowasi ɛ san Yerusalem ɛ ma sila Yerusalem wɔpɔrɩ fɔ ɛ fɩna, ye Efrayim wotunu ka ma sere otunu gɛtɛ bee kpèlè Kɔna Wotunu fɔ. Ɔpɔrɩ gɛtɛ e sila fɔ waà mɛ bɩsɩrɩ nkpɩn bisiyee (600). 14 Gɛ ɛ ka sɩka-sɩya ma sɩka-fututu powu, ma anyɩmɩnyan gɛtɛ ɩ̀ sa Yahwe Dikwo-dɩrɛ daanɩ, ma digyu-kpaara daanyan-kpara fɔ powu. E gye bɛnɩ fɔ, gɛ ɛ ka bɛ ɛ da Samariya.

15 Ade-kurumakyɛɛ gɛtɛ Yehwasi ɛ mɛ, ma ɛyɩ gɛtɛ ɛ mɛ wo bugyu buu gedi gaanɩ, ma wakpa gɛtɛ ɛ kpà ma Yuda wogyu Amasiya powu fɔ, bɛ ŋwara yɩ bɛ sa Isareli begyu-dɩrɛ boo koro gaade yɩɩ gɩkpa gaanɩ. 16 Yehwasi e ku gɛ be lò wɔ Samariya Isareli begyu boo gelòkʋn. Gɛ wobi Yerobwam e di bugyu e sere wɔ bɩsɩrɩ.

17 Yowasi wobi Amasiya gɛtɛ è di Yuda wogyu fɔ ɛ sara bɩkyan fwo ton Yehwahasi wobi Yehwasi gɛtɛ è di Isareli wogyu fɔ diku dɩɩ gama. 18 Ade-kurumakyɛɛ gɛtɛ Amasiya ɛ mɛ, ma ɛyɩ gɛtɛ ɛ mɛ wo bugyu buu gedi baanɩ fɔ, bɛ ŋwara yɩ bɛ sa Yuda begyu-dɩrɛ boo koro gaade yɩɩ gɩkpa-dɩrɛ fɔ gaanɩ.

19 Yerusalem bɛnɩ bɛkɩ bɛ mɛ onyun bàà wolo Amasiya Yerusalem, gɛ e serenti ɛ san Lakisi. Mɔ bɛ sa bɛnɩ bɛ tɛrɛma wɔ bɛ san dʋkɔ bɛ ma wolo wɔ. 20 Gɛ bɛ ka wo gikpena fɔ bɛ gyaga dibengyi dii koro bɛ ba Yerusalem, gɛ be lò wɔ wotu ɛbɛ boo gelòkʋn, ɔkʋn gɛtɛ bee kpèlè Dafidi Ditele fɔ.

21 Ɛwʋ gɛ Yuda bɛnɩ powu be gye Asariya bɛ sɩ̀ bugyu be sere wote Amasiya bɩsɩrɩ. Waanɩ fɔ Asariya e di bɩkyan fwo-kooron. 22 Wote diku dɩɩ gama fɔ, Asariya na biri e sere Elati ditele ɛ tɛ Yuda.

23 Yowasi wobi Amasiya bugyu buu gedi wʋʋ gɩkyan fwo-tonfɛ gaanɩ fɔ, Isareli wogyu Yehwasi wobi Yerobwam e sere Isereli bugyu buu gedi Samariya ditele, gɛ e di bugyu fɔ bɩkyan akpilin anyɔɔ ma gɩkɩ. 24 Ɛ mɛ ade-kpen Yahwe bʋnʋn baanɩ, gɛ en tiri koro ye ade-kpen gɛtɛ Nebati wobi Yerobwam ɛ yɛ Isareli bete be gyu yaanɩ fɔ ya. 25 Yerobwam-nyɔɔfɛ fɔ na to-to Isareli ntʋnkwaa gɛtɛ ɩ̀ dɔ ye Lebo-Hamati ma sere Bʋbɔlɛ Bʋʋpʋ wʋʋpɩ, anlɛ gɛtɛ Yahwe, Isareli wo Wurubwarɛ ɛ da ma Amitayi wobi Yona, gɛtɛ è di Wurubwarɛ wɔtabʋrʋlɛ gɛtɛ e ye Gati-Hefa fɔ ɛ dɔ̀ ɛ sɩ̀ fɔ.

26 Yahwe e we anlɛ gɛtɛ ɛnɩ-kamasɛ gɛtɛ ɛ sa Isareli fɔ ɛ̀ sa dɩfana-dɩrɛ daanɩ. Wù di ɛdɩ̀ oo, ɛnɩ gɛtɛ e to koro oo, ɛkamasɛ ɛ̀ sa dɩfana daanɩ. Gɛ ɛnɩ ɛkɩ ɛn ma gɛtɛ ɛɛ kpà bɛ. 27 Gɛ gɛtɛ Yahwe ɛn dɔ alɛ ɛɛ̀ kpa Isareli diyere e ye gɛtʋnkwaa gaanɩ gakpaakpa okoro, ɛ da ma Yehwasi wobi Yerobwam wo koro e to bɛ ɛ ya.

28 Bɛ ŋwara ade-kurumakyɛɛ gɛtɛ Yerobwam-nyɔɔfɛ ɛ mɛ, ma ɛyɩ gɛtɛ ɛ mɛ wo bugyu buu gedi gaanɩ, ma wakpa gɛtɛ ɛ kpà e to ntʋnkwaa ɛ tɛ Isareli gɛtɛ Damasiko ma Hamati ɩ fɩya powu fɔ, gɛtɛ nafɔ ì di gɛ Yewodi woyo fɔ, bɛ sa Isareli begyu-dɩrɛ boo koro gaade yɩɩ gɩkpa gaanɩ. 29 Yerobwam-nyɔɔfɛ e ku gɛ be lò wɔ Isareli begyu-dɩrɛ boo gelòkʋn. Gɛ wobi Sekariya e di bugyu e sere wɔ bɩsɩrɩ.