2 Begyu-dɩrɛ 6

Dɩkyɔɔ dii dibi dɩ bʋn dɩ bɛ gyaga butu buu koro

1 Duwi dɩkɩ Wurubwarɛ bɛtabʋrʋlɛ dikpi fɔ bɛ dɔ̀ Elisa alan, <<Nya, ɔkʋn gɛtɛ tii tuma ma awɔ fɔ, wù we pɩɩ gʋsɔ tɛ tɩ. 2 Yɛ taà san Yodan getu gaanɩ taà ma kebi iyon dʋkɔ, fɔ taà sere taasarakʋn dʋkɔ.

Gɛ ɛ dɔ̀ bɛ alan, <<Ɩ san.>>

3 Ɛwʋ gɛ baanɩ ɛkɩ e lila alan, <<Ǹ fɔ wɔ̀ gɛ, an nan fɩya ma ɛtɩ aa bɛsaranyan a san?

Gɛ Elisa e tiri wuunyun alan, <<Nan fɩya ma ɛyɩ.>> 4 Gɛ ɛ fɩya ma ɛbɛ ɛ san.

Bɛ san bɛ ma gyu Yodan, gɛ bɛ kya iyon yii gekebi. 5 Gɛtɛ baanɩ ɛkɩ ee kebi oyon fɔ, wɔ dɩkyɔɔ dii dibi, gɛtɛ dì di gɩwɔrɔnyan fɔ dɩ kpa di gyu butu baanɩ. Ɛwʋ gɛ ɛ gbɛrɛ afala alan, <<Oo, miinfonte! Na fɔ dɩ gɛ! 6 Gɛ Elisa e lila wɔ alan, <<Ganɩ gɛ dɩ nʋ̀n?>> Gɛtɛ e wùlà wɔ ɔkʋn gɛtɛ dɩ nʋ̀n di gyu fɔ, Elisa e len oyon-bi, gɛ e fun wʋ ɛ sa dʋkɔ, gɛ wʋ yɛ dɩkyɔɔ dii dibi fɔ dɩ bʋn dɩ bɛ gyaga gatala disere-kɩlɩn. 7 Gɛ Elisa ɛ dɔ̀ alan, <<Kukuru dɩ.>> Gɛ ete ɛ sama gʋlɔ e kukuru dɩ.

Elisa ɛ yɛ Aram bɩtà bʋʋ bɛtàlɛ bɔɔ bʋnʋn bu gbena

8 Waanɩ fɔ Aram wogyu-dɩrɛ ɛɛ tà bɩtà ma Isareli. Gengyi ee tuma ma wɔ bɛndɩrɛbi fɔ, ɛɛ dɔ̀ bɛ ɔkʋn gɛtɛ è len gɛtɛ èè sere wɔ gɛsarakʋn.

9 Mɔ Wurubwarɛ wɔtabʋrʋlɛ fɔ ɛ sa Isareli wogyu-dɩrɛ ɔtʋn alan, <<Nya gepe gɛtɛ an nan da ma ɔkʋn wʋtɔkɔ, yema Aram bɩtà bʋʋ bɛtàlɛ bɛɛ waran bɛɛ fɔrɔ dʋkɔ.>> 10 Okoro Isareli wogyu ɛɛ dɩyɛ ɔkʋn gɛtɛ Wurubwarɛ wɔnɩ ɛ dɔ̀ fɔ gepepe. Elisa ɛɛ tɩ̀ yɛ Egyu-dɩrɛ ɛɛ nyɩnla ade nyayɩ disere kpekpesi, gɛtɛ wʋʋ yɛ wɔ ɛɛ dɩyɛ ɩkʋn ɩtɔkɔ.

11 Wʋ yɛ Aram bete boogyu-dɩrɛ wamɩnlɛ i tutu. Okoro e kpèlè wɔ bɛndɩrɛbi fɔ e tuma, gɛ e lila bɛ alan, <<Yaà talɩ ɩ dɔ̀ mɩ taanɩ gɛtɛ è yela Isareli wogyu gama?>>

12 Gɛ bɛndɩrɛbi fɔ baanɩ ɛkɩ e tiri wuunyun alan, <<Nka taanɩ ɛkɩ, miinfonte. Wù di gɛ Wurubwarɛ wɔtabʋrʋlɛ Elisa gɛtɛ ɛ̀ sa Isareli fɔ n tɛ dɔ̀ ade gbagba gɛtɛ a dɔ̀ fɔ ɛ tɛ Isareli wogyu. Gengyi wu terema wù di gɛ aa dikwo-dʋrɔlɛ daanɩ gɛ a dɔ̀ yɩ gba fɔ, ee we yɩ ɛ dɔ̀.>>

13 Gɛ Aram wogyu alan, <<Ɩ san ɩ ma bugiti wɔ, fɔ nan wura n sa bɛnɩ bàà ma gye wɔ. Gɛ ɛnɩ ɛkɩ ɛ dɔ̀ wɔ alɛ ɛ̀ sa Dotan ditele daanɩ. 14 Ɛwʋ gɛ Aram wogyu-dɩrɛ ɛ sa bɩtà bʋʋ bɛtàlɛ ma abengyi ma betiiramisan ditele fɔ daanɩ. Bɛ ma gyu ditele fɔ daanɩ odente, gɛ bɛ sʋ dɩ bɛ sa.

15 Gɛtɛ kere gɩ kpa fɔ, Wurubwarɛ wɔnɩ fɔ wɔsaranyan ɛ tɔ gagyɩgyan-fuu e ye okòro, gɛ e we bɩtà bʋʋ bɛtàlɛ ma abengyi, ma tiiramisan ɛbɛ gɛtɛ be silin ditele fɔ be tuma. Gɛ wɔsaranyan fɔ e lila alan, <<Oo, miinfonte, lan gɛ taà mɛ?>>

16 Gɛ Wurubwarɛ wɔtabʋrʋlɛ fɔ alan, <<Kara yɛ gɩsaa gàà ton wɔ̀! Ɛbɛ gɛtɛ bɛ̀ fɩya ma ɛtɩ fɔ bɛ̀ sɔ da ɛbɛ gɛtɛ bɛ̀ fɩya ma ɛbɛ.>>

17 Gɛ Elisa e tiri onyun alan, <<Oo Yahwe, tirima wɔ bʋnʋn, fɔ ɛ̀ɛ̀ talɩ we! Ɛwʋ gɛ Yahwe e tirima wɔsaranyan fɔ bʋnʋn, gɛ ɛ nya, gɛ e we gɛtɛ idon gɛtɛ i silin Elisa fɔ i to ma abengyi, ma betiiramisan gɛtɛ ɔtan wuu gye ma ɛyɩ.

18 Gɛtɛ Aram bɩtà bʋʋ bɛtàlɛ bɛ ka osele bɛɛ ba Elisa wakʋn fɔ, Elisa e tiri onyun alan, <<Oo Yahwe, yɛ bɛnɩ nyabɛ bɔɔ bʋnʋn bàà gbena.>> Okoro Yahwe ɛ yɛ bɔɔ bʋnʋn bu gbena, anlɛ gɛtɛ Elisa e lila fɔ.

19 Gɛ Elisa ɛ dɔ̀ bɩtà bʋʋ bɛtàlɛ fɔ alan, <<Nka osele wʋ lɛ, gɛ nka ditele fɔ dɩ lɛ. I tɛrɛma mɩ, fɔ nan ka yɩ n san ɛnɩ gɛtɛ ii bugiti fɔ wakʋn.>> Gɛ ɛ ka bɛ ɛ san Samariya.

20 Gɛtɛ be gyu ditele fɔ daanɩ fɔ, Elisa e tiri onyun alan, <<Yahwe, tirima bɛnɩ nyabɛ bɔɔ bʋnʋn, fɔ bàà we!>> Gɛ Yahwe ɛ yɛ bɔɔ bʋnʋn bu tirima, gɛ be we gɛtɛ bɛ̀ sa Samariya ditele daanɩ.

21 Gɛtɛ Isareli wogyu-dɩrɛ e we bɛ fɔ, e lila Elisa alan, <<Miinte, n wolo bɛ abɛɛ?>>

22 Gɛ Elisa e tiri wuunyun alan, <<Kwa! Aà wolo bɛnɩ gɛtɛ a ka awɔ gbagba aadon ma aa gɩsɩnta a gye bɛ bɩtà fɔ? Tɛ bɛ anyandilɛ ma butu bàà di, fɔ bàà nyʋn, fɔ bàà biri san boofonte wakʋn.>> 23 Okoro Isareli wogyu ɛ yɛ be di ɔsɛ-dɩrɛ. Gɛ gɛtɛ be di, gɛ bɛ nyʋn be were fɔ, e tiri bɛ osele. Ye dʋkɔ fɔ, Aram bɩtà bʋʋ bɛtàlɛ be ten anyan yii gekpila ye Isareli gɛtʋnkwaa gaanɩ.

Bɩtà bʋʋ bɛtàlɛ be len be silin Samariya ditele

24 Ɔya wʋkɩ wʋʋ gama fɔ, Aram wogyu-dɩrɛ Ben-Hadadi ɛ kʋla wɔ bɩtà bʋʋ bɛtàlɛ powu, gɛ bɛ san bɛ ma sʋ Samariya ditele bɛ sa. 25 Dɩkpan dɩ nʋ̀n ditele fɔ daanɩ. Ditele fɔ dɩɩ gɛsʋ-sa gɩ kyɛrɩ gɛtɛ dɩkpɔŋɔ-tɩtɩɩ gba dii duyu dɩɩ gɩyɛ gɩ̀ ba sɩka-fututu abi dikpilin ma anaa (80). Gɛ ɛlɔpɔ wapʋn kɔpʋ yɩɩ gɩyɛ n di sɩka-fututu wabi ton.

26 Duwi dɩkɩ, gɛtɛ Isareli wogyu-dɩrɛ ɛ̀ san ɔpɔrɩ wuu koro ɛɛ da fɔ, ɛna ɛkɩ ɛ gbɛrɛ afala e kpèlè wɔ alan, <<Miinfonte egyu-dɩrɛ, kpà mɩ>>

27 Gɛ egyu-dɩrɛ e tiri wuunyun alan, <<Gengyi Yahwe ɛn kpà wɔ̀ fɔ, gaanɩ gɛ nmɩ nan wura gɛkpà n ye alɛ ntɛ kpà wɔ̀? Nan wura gɩ n ye amɔrɔ yii getibakʋn abɛɛ wayɩn gɛnyɩmakʋn? 28 Gɛ Egyu-dɩrɛ e lila ɛna fɔ alan, <<Anʋn n de wɔ̀?>>

Gɛ ɛna fɔ alan, <<Ɛna nyawɔ ɛ dɔ̀ mɩ alan, <Ka aabi-teni fɔ ba tàà kɔrɔ wɔ ǹdò, fɔ tàà kɔrɔ miinyo gɩsa.> 29 Okoro tɩ gyaga miinbi-teni fɔ tɩ kɔrɔ. Wuu kere gɩ kpa fɔ, na dɔ̀ wɔ alan, <Ka aabi-teni fɔ ba tàà kɔrɔ.> Mɔ ɛ ka wɔ e bubwa.>> 30 Gɛtɛ egyu-dɩrɛ ɛ nʋn ɛna fɔ wanyun-gyebi e were fɔ, e gye wɔ ngba ɛ fɛɛran. Gɛtɛ ɛ̀ san ɔpɔrɩ wuu koro fɔ, bɛnɩ bɛ nya, gɛ be we gɛtɛ ɛ̀ sa disepekyi dɩɩ gɛgba wɔ ngba fɔ bʋʋ gatɩn. 31 Ɛwʋ gɛ egyu fɔ alan, <<Gengyi min belen Safati wobi Elisa duyu ǹdò fɔ, Wurubwarɛ ɛ gbɛrɛ mɩ e wolo!>>

32 Waanɩ fɔ, Elisa è si wo dikwo daanɩ ma wɔ bɛndɩrɛbi. Ɛwʋ gɛ egyu-dɩrɛ ɛ sa ɛnɩ ɛkɩ e gyegeye wɔ, mɔ pɛ ɛnɩ fɔ èè be gyu Elisa wakʋn fɔ, Elisa ɛ dɔ̀ wɔ bɛndɩrɛbi fɔ alan, bɛnɩ boowololɛ nyawɔ ɛ sa ɛnɩ alɛ e be belen mɩ duyu. Ɩ nya, gengyi è bè gyu fɔ, ɩ tan ɔpʋnʋ fɔ gɛtɛ ɛ kara wura e gyu. Yaà nʋn wɔ bɩsɩrɩ baagingin gɛtɛ ɛ̀ tɛrɛma wɔsalɛ fɔ ɛɛ ba.

33 Gɛtɛ Elisa ɛ̀ sangba ɛɛ tabʋrʋ ɛ tɛ bɛnɩ fɔ, ɛsalɛ fɔ e be gyu wakʋn. Gɛ egyu-dɩrɛ alan, <<Gyerebi nyawɔ e ye gɛ Yahwe wakʋn. Wù di tuntun gɛtɛ nan ka bʋnʋn n gyaga wo koro alɛ n te so wɔ.