1 Yuda wogyu-dɩrɛ Ahasi bugyu buu gedi bʋʋ gɩkyan-fwo-nyɔɔfɛ gaanɩ fɔ, Ela wobi Hoseya e be di bugyu ɛ tɛ Isareli gɛ ɛ sara Samariya. E di bugyu fɔ bɩkyan yɛkɩ. 2 Ɛ mɛ ade-kpen Yahwe bʋnʋn, mɔ nka kpekpesi anlɛ begyu gɛtɛ be gyegeye wɔ bɛ sara bɛ mɛ fɔ.

3 Waanɩ fɔ, Asiriya wogyu-dɩrɛ Salimaneseri ɛ ma tà Hoseya bɩtà, gɛ e di Hoseya wo koro. Okoro Hoseya ee tì le gutoro ɛ tɛ Salimaneseri gɩkyan-kamasɛ. 4 Mɔ duwi dɩkɩ, Hoseya ɛ sa bɛsalɛ Egyipiti wogyu So wakʋn alɛ ee bugiti gɛkpà. Gɛ e kere gɩkyan gii gutoro gɛtɛ ee tì le ɛ tɛ Asiriya fɔ ɛ ya. Gɛtɛ Salimanaseri ɛ nʋn gɛlɛ gaade fɔ, ɛ yɛ bɛ ma gye Hoseya, gɛ bɛ tan wɔ dikwo. 5 Ɛwʋ gɛ Asiriya wogyu ɛ yɛ wɔ bɩtà bʋʋ bɛtàlɛ be to Isareli gɛtʋnkwaa powu, gɛ bɛ sʋ Samariya bɛ sa bɩkyan bisiyee. 6 Hoseya gɩkyan-yɛkɩfɛ gaanɩ gɛ Asiriya wogyu-dɩrɛ e gye Samariya bɩtà, gɛ ɛ ka Isareli bete ɛ san Asiriya. Ɛ ka bɛ ɛ ma sɩ̀ Hala ditele daanɩ, ma Gosan gɛtʋnkwaa gaanɩ, gbɛma Habori getu, ma Mede bete baatele yaanɩ.

7 Isareli bete bɛ mɛ Yahwe, boo Wurubwarɛ gɛtɛ e tiri bɛ e ye Egyipiti, ma Egyipiti wogyu-dɩrɛ Farawo gɛnyanla gaanɩ fɔ ade-kpen. Okoro gɛ ade nyayɩ powu ɩ ba boo koro lɛ. Bɛ sʋma bekpen, 8 gɛ bɛ tɛrɛma bɩfɩɩ gɛtɛ Yahwe e berema e ye bɔɔ bʋnʋn fɔ baade-mɛlɛ. Gɛlɛ ke gɛ bɛ mɛ ade-mɛlɛ gɛtɛ Isareli begyu-dɩrɛ bɛ ka bɛ ba fɔ. 9 Isareli bete bɛ mɛ Yahwe, boo Wurubwarɛ ade-kpen dibilin daanɩ, gɛtɛ wʋn mɛ wɔ ɔsɛ. Be sere asʋmakʋn baatele-buru-buru ma baatele-dɩrɛ-dɩrɛ powu yaanɩ. 10 Be sere akpen-taa ma Asera wo-iyon odon-kamasɛ wuu koro, ma oyon-kusaa-kamasɛ wʋʋ gatɩn. 11 Be kuma olifwi dɩsʋmakʋn-kamasɛ daanɩ anlɛ bɩfɩɩ gɛtɛ Yahwe e berema e ye bɔɔ bʋnʋn fɔ bɛ mɛ fɔ. Bɛ mɛ duyu-kɛma, gɛ wʋ sa Yahwe owurufa. 12 Ma gɛtɛ Yahwe ɛ sʋ bɛ ɛ sa alɛ bɛ kara sʋma bekpen gba fɔ, bɛ sʋma bekpen. 13 Yahwe ɛ da ma wɔ bɛtabʋrʋlɛ ma bewelɛ ade boo koro ɛ sʋ Isareli ma Yuda ɛ sa alan, <<I kere ade-kpen yɩɩ gɛmɛ ɩ ya! I tɛrɛma mii-ise ma maade-wùlàlɛ gɛtɛ ɩ̀ sa Ose wʋʋ gɩkpa, gɛtɛ na da ma mɩɩn bɛsaranyan ma bɛtabʋrʋlɛ fɔ boo koro na ka na tɛ yiitu ɛbɛ alɛ be di yii koro fɔ gaanɩ fɔ.>>

14 Mɔ bɛn nʋn wakʋn, gɛ bɛ bɔ bɛ mɛ gɛ duyu-kɛma anlɛ gɛtɛ bootu ɛbɛ gɛtɛ ben to Yahwe, boo Wurubwarɛ di fɔ bɛ mɛ fɔ. 15 Be terema wade-wùlàlɛ fɔ, ma dikola gɛtɛ ɛ tà ma bootu ɛbɛ fɔ, ma gɛsʋ gɛtɛ ɛ sʋ bɛ ɛ sa fɔ. Bɛ tɛrɛma bekpen gɛtɛ bɛn ma tɔnɔ, gɛ ɛbɛ mɔ be biligi bɛnɩ gɛtɛ bɛn ma tɔnɔ. Ma gɛtɛ Yahwe ɛ dɔ̀ bɛ alɛ bɛ kara mɛ ade gɛtɛ bɩfɩɩ gɛtɛ bu silin bɛ bu tuma fɔ bʋʋ mɛ gba fɔ, bɛ mɛ yɩ.

16 Be kere Yahwe, boo Wurubwarɛ fɔ wo-ise fɔ bɛ ya, gɛ bɛ mara akwɔbi anyɔɔ bɛ mɛ bekpen bɛ tɛ koro, gɛ be sere Asera woyon. Be kura anyan gɛtɛ ɩ̀ sa gatala fɔ, gɛ bɛ sʋma Baali. 17 Be kuma boo bebi-teni ma bɛnanɩ bɛ tɛ gedi. Bɛ mɛ gɛsɔma ma asɔlɔ-de, gɛ be fu koro bɛ tɛ ade-kpen yɩɩ gɛmɛ Yahwe bʋnʋn baanɩ bɛ ka bɛ sa wɔ owurufa.

18 Okoro Yahwe ɛ ka owurufa Isareli bete boo koro, gɛ e tiri bʋnʋn ɛ yɛ bɛ, gɛ wʋ yɛ wu kuruma gɛ Yuda bete booko. 19 Gɛ Yuda bete gba ben ton Yahwe, boo Wurubwarɛ fɔ wo-ise fɔ yaanɩ. Bɛ tɛrɛma ade-mɛlɛ gɛtɛ Isareli ɛ ka ɛ ba fɔ. 20 Okoro Yahwe e terema Isareli bete powu. E tiira bɛ giten, gɛ ɛ ka bɛ ɛ sa bɔɔ bɛkyʋnlɛ baalɔ yaanɩ, ka ma sere gɛtɛ e berema bɛ e ye wɔ bʋnʋn.

21 Ɔkʋna wʋkɩ gɛtɛ Yahwe ɛ lanla Isareli e ye Dafidi wodu waanɩ fɔ, Isareli bete bɛ ka Nebati wobi Yerobwam be sɩ̀ bugyu. Gɛ Yerobwam ɛ gban bɛ be kere Yahwe dɩsʋma bɛ ya gɛtɛ wʋ yɛ bɛ mɛ ade-kpen-dɩrɛ. 22 Isareli bete fɔ bɛ tɛrɛma Yerobwam, gɛ be ton baade-kpen powu gɛtɛ ɛ dɔ̀ bɛ alɛ bɛ mɛ fɔ yaanɩ 23 ma sere gamama gɛtɛ Yahwe ɛ yɛ bɛ bɛ ka bɛ be ye wɔ bʋnʋn baanɩ anlɛ gɛtɛ ɛ bɔ ɛ da ma wɔ bɛtabʋrʋlɛ boo koro ɛ dɔ̀ fɔ. Okoro bɛ ka Isareli bete be ye ɛbɛ gbagba bɔɔ gɛtʋnkwaa gaanɩ bɛ bɛ ma sɩ̀ gisela Asiriya gɛtʋnkwaa gaanɩ, gɛtɛ bɛ̀ sangba bɛ̀ sa dʋkɔ.

24 Wʋʋ gama fɔ, Asiriya wogyu-dɩrɛ ɛ ka bɛnɩ e ye Babilon, ma Kuta, ma Afa, ma Hamati, ma Sefarifayim atele yaanɩ ɛ bɛ sɩ̀ Samariya watele yaanɩ ɛ ka e sere Isareli bete bɔɔ gɩsɩrɩ. Be to Samariya gɛtʋnkwaa, gɛ bɛ sara watele yaanɩ. 25 Ɔkʋna gɛtɛ bɛnɩ fɔ bɛ dàà gyu dʋkɔ fɔ, bɛn sʋma Yahwe, okoro Yahwe ɛ sa bɛdɩrɛ bɛnɩ fɔ baanɩ, gɛ be wolo baanɩ bɛkɩ. 26 Okoro bɛnɩ fɔ bɛ yɛ Asiriya wogyu-dɩrɛ ɛ nʋn ade fɔ alan, <<Bɛnɩ gɛtɛ a tɔ̀là bɛ a ma sɩ̀ Samariya watele yaanɩ fɔ bɛɛn nyɩ gɛtʋnkwaa fɔ giikpen wade-lenlɛ. Okoro ekpen fɔ ɛ sa bɛdɩrɛ bɛ ba baanɩ, gɛ bee wolo bɛ yema bɛnɩ fɔ bɛɛn nyɩ̀ ekpen fɔ wade-lenlɛ.>>

27 Ɛwʋ gɛ Asiriya wogyu-dɩrɛ ɛ dɔ̀ alan, <<Ɩ ma ka gedi gɩɩ bɛtɛlɛ gɛtɛ i gye bɩtà i ye Samariya fɔ baanɩ ɛkɩ, i birima ɩ san ɛ̀ɛ̀ ma sara dʋkɔ, fɔ èè wùlà bɛnɩ fɔ bookpen fɔ dɩsʋma daade.>> 28 Okoro gedi gɩɩ bɛtɛlɛ gɛtɛ be gye be ye Samariya bɛ ma sɩ̀ gisela fɔ baanɩ ɛkɩ ɛ ma sara Beteli, gɛ e wùlà bɛ anlɛ gɛtɛ baà ka bɛ sʋma Yahwe.

29 Mɔ ginde-kamasɛ gɩɩ bɛnɩ bɛ mɛ ɛbɛ gbagba boo bekpen atele gɛtɛ bè si fɔ yaanɩ. Bɛ mɛ-mɛ bekpen bɛ sa akpen-kwo gɛtɛ ɩ̀ fʋrʋma ɩ̀ sa Samariya wasʋmakʋn fɔ yaanɩ. 30 Babilon bɛnɩ bɛ mɛ ekpen Sukoti-Benoti, gɛ Kuta bɛnɩ bɛ mɛ ekpen Nerigali, gɛ Hamati bɛnɩ bɛ mɛ ekpen Asima. 31 Afa bete bɛ mɛ bekpen Nibihasi ma Taritaki, gɛ Sefarifi bete be kuma boo bebi ɔtan waanɩ bɛ tɛ Sefarifi bete boo bekpen Adarameliki ma Anameleki gedi. 32 Gɛtɛ bɛɛ sʋma Yahwe fɔ, be ni tiri ɛbɛ gbagba bɔɔ bɛnɩ bɛkɩ bɛɛ mɛ gʋtʋn bɛ tɛ bɛ akpen-kwo yaanɩ anlɛ bekpente asʋmakʋn fɔ yaanɩ. 33 Gɛtɛ bɛɛ sʋma Yahwe fɔ, bɛɛ nɩ sʋma boo bekpen anlɛ gɛtɛ boo geyekʋn giidu waade-mɛlɛ ii wùlà fɔ.

34 Bɛ̀ sangba bè de baade-mɛlɛ-kuba ɩtɔkɔ bè ye ma ǹdò. Bɛn taa sʋma Yahwe, gɛ bɛn taa tɛrɛma wade-mɛlɛ ma wade-wùlàlɛ, ma ade-tɩyɛlɛ-sɩ̀lɛ, ma ise gɛtɛ ɛ ka ɛ tɛ Yakobu gɛtɛ ɛ sa diyere alɛ Isareli wodu wʋʋ bɛnɩ fɔ. 35 Ɔkʋna gɛtɛ Yahwe ɛ tà dikola ma Isareli bete fɔ, ɛ dɔ̀ bɛ alan, <<Ɩ kara sʋma bekpen, abɛɛ yàà kura bɛ, abɛɛ yàà tɛ bɛ gedi. 36 Mɔ Yahwe gɛtɛ ɛ ka wɔkɛma-dɩrɛ ma wɔ gʋlɔ ma ɔkɛma e tiri yɩ e ye Egyipiti fɔ gɛ wù di gɛtɛ yàà sʋma. Ɛwɔ gɛ yaà kura, gɛ ɛwɔ gɛ yaà tɛ gedi. 37 Wù gɛtɛ yàà ton ade-wùlàlɛ, ma ade-tɩyɛlɛ-sɩ̀lɛ, ma ade-wùlàlɛ, ma ise gɛtɛ ɛ ŋwara ɛ tɛ yɩ fɔ yaanɩ ɔya-kamasɛ. Ɩ kara sʋma bekpen! 38 Ɩ kara finla dikola gɛtɛ na tà ma ɛyɩ fɔ, gɛ ɩ kara sʋma bekpen. 39 Mɔ fɔ ɩ sʋma gɛ nmɩ Yahwe, yii Wurubwarɛ fɔ! Wù di gɛ nmɩ nan tiri yɩ n ye yɩɩ bɛkyʋnlɛ baalɔ yaanɩ.>>

40 Mɔ bɛn nʋn wakʋn, be ton gɛ bɔɔ dɩsarabi-kuba fɔ daade-mɛlɛ. 41 Ma gɛtɛ bɛnɩ fɔ bɛɛ sʋma Yahwe gba fɔ, bɛɛ nɩ sʋma boo bekpen mɔ. bè ye ma ǹdò, boo bebi ma bɔɔ bɛnana bɛ̀ sangba bɛɛ sʋma bekpen anlɛ gɛtɛ bootu ɛbɛ bɛ sʋma fɔ.