1 Ahabi ɛ dɔ̀ Yesebeli ade-kamasɛ gɛtɛ Eliya ɛ mɛ, ma anlɛ gɛtɛ ɛ ka tata e wolo Baali bekpente powu fɔ. 2 Okoro Yesebeli ɛ sa Eliya ɔtʋn alan, <<Gɩsa ɔya nyawʋ wʋʋkʋna, gengyi mɩn mɛ wɔ̀ anlɛ gɛtɛ a mɛ Baali bekpente fɔ, bekpen be wolo mɩ.>>

3 Gɛtɛ gɩsaa gi ton Eliya okoro, ɛ tɔ e serenti, èè to wɔ nkpa. Gɛtɛ ɛ ma gyu Beeseba, gɛtɛ wʋ̀ sa Yuda anɩ fɔ, e kere wɔsaranyan ɛ ya dʋkɔ. 4 Mɔ ɛwɔ gbagba bɩrɛ ɛ san duwi-kɩlɩn diisele ɛ san otonkuma waanɩ. Ɛ ma sara oyon gɛtɛ bee kpèlè alɛ ɔfɩya wuuyon fɔ wʋʋ gatɩn gɛ ee tiri onyun diku daà bɛ ka wɔ. Ɛ dɔ̀ alan, <<Wʋ kʋtɩ gɛlɛ! Oo, Yahwe, nkele to mɩɩn nkpa, mɩɩn kɔlɔ da miintu ɛbɛ.>> 5 Ɛwʋ gɛ ɛ waran ɛ dʋrɔ oyon fɔ wʋʋ gatɩn gɛ ɛ fwa bʋda.

Disere-kɩlɩn fɔ, Wurubwarɛ wɔsalɛ ɛ kya wɔ, gɛ ɛ dɔ̀ wɔ alan, <<Tɔ sara àà di!>> 6 Ɛ nya fɔ, e we boroboro ma ɔtan, ma butu gubun gɛtɛ ɩ̀ dɔ wayu yaanɩ. E di, gɛ ɛ nyʋn, gɛ e biri ɛ waran ɛ dʋrɔ.

7 Yahwe wɔsalɛ fɔ e biri ɛ ba dɩnyɔɔfɛ, gɛ ɛ kya wɔ ɛ dɔ̀ alan, <<Tɔ sara fɔ àà di, yema osele wʋ̀ sangba wʋ̀ dɔ tɛ wɔ.>> 8 Okoro ɛ tɔ ɛ sara, gɛ e di, gɛ ɛ nyʋn. Anyan-dilɛ fɔ ɩ tɛ wɔ ɔkɛma gɛ ɛ san osele fɔ awi akpilin anyɔɔ, odon ma ofilibon gɛlɛɛ ma gyu Horebi, Wurubwarɛ wodon fɔ wuu koro.

9 Dʋkɔ gɛ ɛ dʋrɔ dɩtaa-fwe dɩkɩ daanɩ e kpa kere.

Ɛwʋ gɛ Yahwe ɛ tabʋrʋ ma ɛwɔ e lila wɔ alan, <<Eliya, anʋn gɛ aa mɛ nfan?>>

10 Gɛ Eliya e tiri wuunyun alan, <<Na kpà na tɛ Yahwe, Wurubwarɛ-Kpatakpɩrɩ. Mɔ Isareli bete be furu dikola gɛtɛ a tà ma ɛbɛ fɔ gɛ be gbena aa gedi gɩɩ gaatɛ̀kʋn fɔ. Be wolo aa bɛtabʋrʋlɛ fɔ powu, miinko na kuruma, gɛ nkele bee bugiti bàà wolo nmɩ mɔ.>>

11 Ɛwʋ gɛ Yahwe ɛ dɔ̀ alan, <<Ye dɩtaa-fwe fɔ daanɩ, àà ma yela odon fɔ wuu koro, mɩɩn bʋnʋn, yema nmɩ, Yahwe ǹ bɛ̀ da ma dʋkɔ.>>

Gɛ gifiye-dɩrɛ ma ɔkɛma gɩkɩ gɩ gbɛrɛ idon fɔ yii koro, gɛ ɩ tɛrɛ-tɛrɛ idon fɔ, gɛ gi gbena ataa buru-buru. Mɔ Yahwe ɛn ma gifiye-dɩrɛ fɔ gaanɩ. Gifiye fɔ gɩɩ gama fɔ, gɛtʋnkwaa gi kpenti, mɔ Yahwe ɛn ma gɛtʋnkwaa gii gekpenti fɔ gaanɩ. 12 Gɛtʋnkwaa gii gekpenti fɔ gɩɩ gama fɔ, ɔtan na ba, mɔ Yahwe ɛn ma ɔtan fɔ waanɩ. Ɔtan fɔ wʋʋ gama fɔ gɩta pɩɩ gɩkɩ gɩ ba. 13 Gɛtɛ Eliya ɛ nʋn gɩta fɔ, e gye wɔ gɛgba e tin wɔ bʋnʋn, gɛ e ye e be yela difwe fɔ diinyun.

Gɛ gɩta gɩkɩ gɩ dɔ̀ wɔ alan, <<Eliya, anʋn gɛ aa mɛ nfan?>>

14 Eliya e tiri wuunyun alan, <<Na kpà na tɛ Yahwe, Wurubwarɛ-Kpatakpɩrɩ fɔ. Mɔ Isareli bete be furu dikola gɛtɛ a tà ma ɛbɛ fɔ, gɛ be gbena aa gedi gɩɩ gaatɛ̀kʋn fɔ, gɛ be wolo aa bɛtabʋrʋlɛ fɔ powu, miinko nan kuruma, gɛ nkele bee buguti bàà wolo nmɩ mɔ.>>

15 Ɛwʋ gɛ Yahwe ɛ dɔ̀ wɔ alan,<<Biri aa gama, ka osele gɛtɛ a ka a ba fɔ, fɔ àà san Damasiko wotonkuma waanɩ. Gengyi à gyu dʋkɔ fɔ, sʋrʋ Hasayeli bʋnɔ, fɔ èè di bugyu ɛ tɛ Aram bete. 16 Sʋrʋ Nimisi wobi Yehu mɔ bʋnɔ, fɔ èè di bugyu Isareli gɩfɩɩ gaanɩ. Fɔ àà sʋrʋ Safati wobi gɛtɛ e ye Abeli-Mehola fɔ bʋnɔ, fɔ ɛ̀ɛ̀ mɛ mɩɩntabʋrʋlɛ e sere aa gɩsɩrɩ. 17 Yehu eè wolo ɛnɩ-kamasɛ gɛtɛ eè serenti e ye Haseli wakʋn fɔ, gɛ Elisa mɔ eè wolo ɛwɔ gɛtɛ eè serenti e ye Yehu wakʋn fɔ. 18 Mɔ nan kere bɛnɩ ɩgbaa isiyee ma nkpɩn ton (7,000) n ya Isareli gɩfɩɩ gaanɩ. Bɛnɩ powu gɛtɛ ben kura ekpen Baali, gɛ bɛn kyʋkyʋ wɔ fɔ.>>

19 Okoro Eliya e ye dʋkɔ, gɛ ɛ ma we Safati wobi Elisa gɛtɛ ɛ sa bɛkwɔ-teni gigyen ɩŋʋʋ bɛnyɔɔ-bɛnyɔɔ akpen fwo anyɔɔ bè de bɛɛ mɛ gʋtʋn. Gɛ ɛwɔ gbagba è de dikpen fwo-nyɔɔfɛ fɔ. Eliya ɛ bʋn ɛ san wakʋn, gɛ e fun wɔ gɛgba ɛ gyaga Elisa wo koro.

20 Okoro Elisa e kere wɔ bɛkwɔ-teni fɔ ɛ ya, gɛ e serenti ɛ tɛrɛma Eliya, gɛ ɛ dɔ̀ wɔ alan, <<Yɛ mɩ nan ma mù miinte, ma mɩɩnna n kala, fɔ nan bɛ tɛrɛma wɔ̀.>>

Gɛ Eliya e tiri wuunyun ɛ tɛ wɔ alan, <<Yoo! Biri san, Mɩn sʋn wɔ̀!>>

21 Ɛwʋ gɛ Elisa e kpe e ye wakʋn ɛ da, ɛ ma wolo bɛkwɔ-teni fɔ. Ɛ ka iyonbi gɛtɛ ɛ ka sa bɛkwɔ fɔ gigyen gɛ bè de bɛɛ mɛ gʋtʋn fɔ ɛ sa ɔtan ɛ gyaga gɩnan fɔ, gɛ ɛ ka gɩ e yo bɛnɩ fɔ, gɛ bɛ kɔrɔ. Gɛ ɛ tɔ ɛ tɛrɛma Eliya, gɛ ɛ mɛ wɔsaranyan.