1 Begyu-dɩrɛ 14

Yerobwam wobi-tenibi diku

1 Ɔya wʋtɔkɔ waanɩ fɔ, Yerobwam wobi Abiya e gyu geyeba. 2 Ɛwʋ gɛ Yerobwam ɛ dɔ̀ wɔsɔ alan, <<Tɔ fɔ, àà foma koro gɛtɛ bɛnɩ bɛ kara nyɩnla alɛ, à di gɛ nmɩ, Yerobwam mɩɩnsɔ, fɔ àà san Silo. Nya, Wurubwarɛ wɔtabʋrʋlɛ Ahiya, gɛtɛ ɛ dɔ̀ mɩ alɛ, nan bɛ mɛ bɛnɩ nyabɛ boogyu fɔ, ɛ̀ sa dʋkɔ. 3 Ka boroboro fwo, ma kyakpɛrɛ, ma ɛŋɔɔ parantwa ton, fɔ àà san wakʋn. Ɛɛ̀ dɔ̀ wɔ̀ ɛwʋ gɛtɛ waà sere ebi fɔ wo koro.>>

4 Okoro Yerobwam wɔsɔ ɛ mɛ anlɛ gɛtɛ wɔsan ɛ dɔ̀ wɔ fɔ, gɛ ɛ san Ahiya dɩkpaara Silo ditele daanɩ.

Fɔ Ahiya ɛn mɩnɩ taa ni we, wɔ bʋnʋn bʋ gbena, yema wɔ bɩkyan bɩ san bʋnʋn. 5 Mɔ Yahwe ɛ dɔ̀ Ahiya alan, <<Nya, Yerobwam wɔsɔ ɛɛ ba èè bè lila wɔ̀ ade ka dama wobi-tenibi wo koro, yema wobi fɔ ee yeba. Anlɛ ma anlɛ gɛ aà dɔ̀ wɔ. Gɛtɛ egyu-dɩrɛ wɔsɔ e be gyu fɔ, ɛ mɛ koro anlɛ è di gɛ ɛna-fon ɛkɩ.>>

6 Okoro gɛtɛ Ahiya ɛ nʋn wɔ bɩsɩrɩ buu gekyikya wotunu fɔ, ɛ dɔ̀ alan, <<Gyu ba, Yerobwam wɔsɔ, anʋn yii koro gɛ a foma koro a mɛ ɛnɩ-fon? Bɛ sa mɩ ɔtʋn-kpen aakʋn. 7 San fɔ àà ma dɔ̀ Yerobwam alɛ anlɛ gɛ Yahwe, Isareli wo Wurubwarɛ fɔ ɛ dɔ̀, <Na bʋma wɔ̀ na ye bɛnɩ fɔ baanɩ, gɛ na mɛ wɔ̀ Isareli bɛnɩ boogyegeyelɛ, 8 na lanla bugyu fɔ na ye Dafidi dɩkpaara daanɩ, gɛ na ka bʋ na tɛ wɔ̀. Mɔ an mɛ anlɛ mɩɩnsaranyan Dafidi, gɛtɛ e di mii-ise yii koro, gɛ ɛ ka woturu powu ɛ tɛrɛma mɩ, gɛ ɛ bɔ ɛ mɛ ade gɛtɛ ɩ̀ tʋna mɩɩn bʋnʋn baanɩ fɔ. 9 Mɔ awɔ, a mɛ ade-kpen a kààrà ɛbɛ gɛtɛ be gyegeye wɔ̀ fɔ. A wura bekpen. A sʋma bekpen gɛtɛ bɛ ka gɩwɔrɔnyan bɛ mɛ fɔ. A fi gama a ten mɩ gɛ wʋ sa mɩ owurufa.

10 <<<Gɛlɛ wuu koro, nan yɛ ade-kpen yàà ba Yerobwam dɩkpaara daanɩ. Nan wolo Yerobwam dɩkpaara diibi-teni-kamasɛ. Ye bɛdɩ ma sere bengyebi powu. Gɛ nan muru Yerobwam dɩkpaara muruyo, anlɛ gɛtɛ bɛɛ sa ditonton ɔtan gɛ dii kpin muruyo fɔ ma sere gɛtɛ ɛyɩ powu yaà kpin. 11 Gɛ Yerobwam wɔnɩ-kamasɛ gɛtɛ eè ku ditele-dɩrɛ daanɩ fɔ, bɛkpɛɛ nan kɔrɔ wɔ, gɛ gatala gɩɩ bɛsɩsɩra baà di ɛbɛ gɛtɛ baà ku akuraa ɛbɛ baanɩ fɔ. Yahwe na tabʋrʋ lɛ.>

12 <<Awɔ tɔ fɔ àà biri san dɩkpaara. Mɔ à bɔ aa gyu ditele fɔ daanɩ fɔ, ebi fɔ eè ku. 13 Isareli bete powu baà wula wɔ, bàà lò wɔ. Woko n di Yerobwam dɩkpaara dɩɩnɩ gɛtɛ baà lò, yema woko n di ɛnɩ gɛtɛ Yahwe, Isareli wo Wurubwarɛ e we gɛtɛ ɛ̀ kɔlɔ ye Yerobwam dɩkpaara daanɩ. 14 <<Yahwe ɛɛ̀ sɩ̀ egyu-dɩrɛ ɛ tɛ koro Isareli gɩfɩɩ gaanɩ, gɛtɛ eè wolo Yerobwam dɩkpaara dɩɩ bɛnɩ powu. Ade fɔ ɩ kya i ye ǹdò. 15 Gɛ Yahwe eè tiira Isareli bete giten èè kpenti bɛ anlɛ gɛtɛ gifiye gii kpenti gɛkyɛrɛbayɩ getu-kere fɔ. Ɛɛ̀ tɔla Isareli bete e ye gɛtʋnkwaa-kpara nyagɩ gɛtɛ ɛ ka ɛ tɛ bootu ɛbɛ fɔ gaanɩ, gɛ ɛɛ̀ yasɩ bɛ ɛ san Efurate getu giifèn, yema be sere ekpen Asera wo-iyon bɛ sa wɔ owurufa. 16 Gɛ eè tiri bʋnʋn e ye Isareli wo koro, yema Yerobwam wade-kpen gɛtɛ ɛ mɛ, gɛ ɛ yɛ Isareli bete mɔ bɛ mɛ fɔ yii koro.>>

17 Gɛ Yerobwam wɔsɔ ɛ tɔ ɛ da, gɛ ɛ ma gyu Tirisa. Gɛtɛ ɛ̀ bɔ ee sere gɩsɩrɩ wɔ dɩkpaara diitunu fɔ, ebi fɔ e ku. 18 Be lò wɔ, gɛ Isareli bebi powu be wula wɔ, anlɛ gɛtɛ Yahwe ɛ dama wɔsaranyan Ahiya gɛtɛ è di wɔtabʋrʋlɛ wo koro ɛ dɔ̀ fɔ.

19 Yerobwam bugyu baade, ma ade-kurumakyɛɛ gɛtɛ ɛ mɛ powu fɔ, bɛ ŋwara yɩ bɛ sa Isareli begyu-dɩrɛ bɔɔ gɩkpa fɔ gaanɩ.

20 Yerobwam e di bugyu bɩkyan dɩkpɩlɩn ma bʋnyɔɔ, gɛ e ku. Gɛ wobi Nadabi e di bugyu e sere wote gɩsɩrɩ.

Yuda wogyu-dɩrɛ Rehobwam

21 Solomon wobi Rehobwam e di bugyu Yuda gɩfɩɩ gaanɩ. E di bɩkyan akpilin anyɔɔ ma gɩkɩ pɛgɛ bɛ sɩ̀ wɔ bugyu, gɛ e di bugyu bɩkyan fwo-kwarankɩ Yerusalem, ditele-dɩrɛ gɛtɛ Yahwe e tiri e ye Isareli wo-ifoli fɔ powu yaanɩ, gɛtɛ bàà tɩ sʋma wɔ daanɩ fɔ. Wɔna è di Amon-na gɛ bee kpèlè wɔ alɛ Naama.

22 Yuda bɛnɩ bɛ mɛ ade-kpen Yahwe bʋnʋn, gɛ baade-kpen ɩ sa wɔ owurufa wʋ kààrà ɛyɩ gɛtɛ bootu ɛbɛ bɛ mɛ fɔ. 23 Yema ɛbɛ mɔ be sere bekpen baasʋmakʋn, ma akpen-taa, ma ekpen Asera wo-iyon odon-kamasɛ wuu koro, ma oyon kusuu-kamasɛ wʋʋ gatɩn. 24 Gɛ Isareli beteni ma bɛnanɩ powu be gyu fotoli gɛmɛ gɛtʋnkwaa fɔ gaanɩ. Gɛ bɛɛ mɛ ade-kyʋnlɛ powu gɛtɛ bɛnɩ-tuntun gɛtɛ bɛɛ sʋma bekpen bɛɛ mɛ, gɛ Yahwe e berema bɛ e ye gɛtʋnkwaa fɔ gaanɩ, gɛ ɛ ka gɩ ɛ tɛ Isareli bete fɔ.

25 Egyu-dɩrɛ Rehobwam gɩkyan-tonfɛ gaanɩ fɔ, Egyipiti wogyu-dɩrɛ Sisaki ɛ tɔ e yela Yerusalem wo koro. 26 Gɛ e kpila agyu-nyan ma ɔyɛkɛma gɛtɛ ɩ̀ sa Yahwe Dikwo-dɩrɛ, ma digyukpaara fɔ yaanɩ. Ɛ ka gɩnyan-kamasɛ, fɩya ma sɩka-sɩya awɔrɔnyan panpasan gɛtɛ Solomon ɛ mɛ fɔ powu. 27 Okoro egyu-dɩrɛ Rehobwam ɛ ka sɩka-fututu ɛ mɛ awɔrɔnyan panpasan-dɩyɛlɛ koro gɛtɛ ɛ̀ɛ̀ ka yɩ sere sɩka sɩya woyo fɔ yɩɩ bɩsɩrɩ. Gɛ ɛ ka yɩ ɛ sa bɛndɩrɛbi gɛtɛ bɛɛ dɩyɛ egyu-dɩrɛ dɩkpaara diitunu fɔ baalɔ. 28 Ɔya-kamasɛ gɛtɛ egyu-dɩrɛ ɛ̀ san Yahwe Dikwo-dɩrɛ fɔ, bɛndɩrɛbi fɔ bɛɛ ka yɩ be ton, gɛ gengyi be were fɔ, bee birima yɩ bɛ ma sɩ̀ bɛdɩyɛlɛ boo dikwo fɔ daanɩ.

29 Ade-kurumakyɛɛ gɛtɛ Rehobwam ɛ mɛ, ma wade-mɛlɛ powu fɔ, bɛ ŋwara yɩ bɛ sa Yuda begyu-dɩrɛ bɔɔ gɩkpa fɔ gaanɩ. 30 Bɩtà buuko, buuko, na sara Rehobwam ma Yerobwam boo getite ɔya-kamasɛ. 31 Ɛwʋ gɛ Rehobwam e ku, gɛ be lò wɔ wotu ɛbɛ boo gelòkʋn ɔkʋn gɛtɛ bee kpèlè Dafidi Ditele-dɩrɛ fɔ daanɩ. Rehobwam wɔna diyere n di Naama, è di gɛ Amon-na. Ɛwʋ gɛ wobi-tenibi Abiya e di bugyu e sere wɔ gɩsɩrɩ.