1 Begyu-dɩrɛ 21

Naboti wɔ wayɩn woli

1 Ɔya wʋkɩ wʋ bɛ da fɔ, ade ɩkɩ i sere ka dama wayɩn woli gɛtɛ wù di Yesirele-te Naboti woyo fɔ wuu koro. Wayin woli fɔ wʋ̀ sa Yesirele, gbɛma Samariya wogyu Ahabi digyukpaara. 2 Ahabi ɛ dɔ̀ Naboti alan, <<Gɛtɛ aa wayɩn woli fɔ wʋ̀ gbɛma miin digyukpaara okoro, ka wʋ tɛ mɩ, nan fʋn nkwan wanyamanyan waanɩ. Fɔ nan tɛ wɔ wayɩn woli-kpara abɛɛ nan le wɔ wʋʋ gɩyɛ gɛtɛ wʋ kʋtʋma.>>

3 Mɔ Naboti e tiri wuunyun alan, <<Yahwe ɛ ka ɛ san ɔfɔ, gɛtɛ nan ka miintu ɛbɛ baadikurumanyan n tɛ wɔ̀.>>

4 Okoro Ahabi ɛ da dɩkpaara ma koro gɩɩ gɛyɔ ma owurufa, yema Yesirele-te Naboti ɛ dɔ̀ wɔ alan, <<Mɩn nan ka miintu ɛbɛ baadikurumanyan n tɛ wɔ̀.>> Ɛ san ɛ ma waran ɛ dʋrɔ wɔ npa wo koro gɛ e fi wɔ bʋnʋn e ten ɔpɔrɩ gɛ e terema en di.

5 Wɔsɔ Yesebeli ɛ ba wakʋn, gɛ e be lila wɔ alan, <<Anʋn yii koro gɛ à si koro gɩɩ gɛyɔ gaanɩ gɛlɛ? Anʋn yii koro gɛ an di?>>

6 Gɛ e tiri wuunyun alan, <<Yema na dɔ̀ Yesirele-te Naboti alan, <Fu aa wayɩn woli fɔ tɛ mɛ, abɛɛ gengyi aa len fɔ nan ka wayɩn woli-kpara-fon n sere wʋʋ bɩsɩrɩ.> Mɔ ɛ dɔ̀ mɩ alan, <Mɩn nan ka miin wayɩn woli fɔ n tɛ wɔ̀.> >> 7 Wɔsɔ Yesebeli ɛ dɔ̀ wɔ alan, <<Awɔ gɛtɛ à di Isareli wogyu fɔ, anlɛ gɛ aà mɛ? Tɔ, fɔ àà di! Furu koro! Nan to Yesirele-te Naboti wɔ wayɩn woli fɔ n tɛ wɔ̀.>> 8 Okoro ɛ ŋwara akpa Ahabi diyere daanɩ, gɛ ɛ ka Ahabi dɩdawʋ ɛ gyaga yii koro, gɛ ɛ ka yɩ ɛ tɩyɛma bɛndɩrɛbi ma bengyebi, gɛtɛ ɛbɛ ma Naboti bè si ditele fɔ daanɩ fɔ. 9 Ɛ ŋwara akpa fɔ yaanɩ alan, <<I tiri duwi ɩ sɩ̀ ɩ tɛ onyun wuu gɛban, fɔ yàà yɛ Naboti ɛ̀ɛ̀ sara gɛsarakʋn-dɩrɛ bɛnɩ fɔ baanɩ. 10 Mɔ ɩ yɛ bɛnɩ-teni bɛnyɔɔ gɛtɛ bɛn ma tɔnɔ fɔ bàà sara wɔ bʋnʋn ofèn, fɔ bàà belen ade gyaga wo koro alan, <Naboti ɛ fwala Wurubwarɛ ma egyu-dɩrɛ.> Wʋʋ gama fɔ ɩ ka wɔ i ye okòro, fɔ yàà fun wɔ ataa i wolo.>> 11 Okoro bɛndɩrɛbi ma bengyebi gɛtɛ bɛ̀ sa Naboti ditele daanɩ fɔ, bɛ mɛ anlɛ gɛtɛ Yesebeli wakpa gɛtɛ ɛ ŋwara fɔ ii wùlà fɔ. 12 Be tiri duwi bɛ sɩ̀ bɛ tɛ onyun wʋʋ gɛban, gɛ bɛ yɛ Naboti ɛ sara gɛsarakʋn-dɩrɛ bɛnɩ fɔ baanɩ. 13 Ɛwʋ gɛ bɛnɩ-teni bɛnyɔɔ gɛtɛ bɛn ma tɔnɔ fɔ bɛ bɛ sara wofèn, gɛ bɛɛ dɔ̀ ade bɛ gyaga Naboti wo koro alan, <<Naboti ɛ fwala Wurubwarɛ ma egyu-dɩrɛ.>> Okoro bɛ ka wɔ be ye ditele fɔ daanɩ, gɛ be fun wɔ ataa be wolo. 14 Gɛ bɛ sa Yesebeli ɔtʋn alan, <<Be fun Naboti ataa, gɛ e ku.>> 15 Gɛtɛ Yesebeli ɛ bɔ ɛ nʋn alɛ be fun Naboti ataa be wolo fɔ, ɛ dɔ̀ Ahabi alan, <<Tɔ, fɔ àà ma ka Yesirele-te Naboti wɔ wayɩn woli gɛtɛ e terema èè fu tɛ wɔ̀ fɔ. Yema ɛn mɩnɩ ma nkpa anɩ, mɔ e ku.>> 16 Gɛtɛ Ahabi ɛ nʋn alɛ Yesirele-te Naboti e ku fɔ, ɛ tɔ ɛ san ɛ ma ka Naboti wo wayɩn woli fɔ.

17 Gɛ Yahwe ɛ tabʋrʋ ma Tisibi-te Eliya alan, 18 <<San Isareli wogyu Ahabi, gɛtɛ ee di bugyu Samariya fɔ wakʋn. Ɔkʋna nyawʋ, ɛ̀ sa Naboti wɔ wayɩn woli gɛtɛ e to fɔ waanɩ. 19 Dɔ̀ wɔ alɛ, Yahwe alan, <Gɛtɛ a wolo ɛnɩ a were fɔ, à biri aa to wanyan?> Fɔ àà dɔ̀ wɔ alɛ, Yahwe ɛɛ dɔ̀ alan, <<Ɔkʋn gɛtɛ bɛkpɛɛ bɛ nʋnʋn Naboti wɔ nkalan fɔ, dʋkɔ ke gɛ bɛkpɛɛ baà nʋnʋn awɔ mɔ aa nkalan.> >> 20 Ahabi ɛ dɔ̀ Eliya alan, <<Okoro mɩɩnkyʋnlɛ, a we mɩ!>> Gɛ e tiri wuunyun alan, <<Ɩɩn na we wɔ, yema a fu koro a tɛ ade-kpen yɩɩ gɛmɛ Yahwe bʋnʋn. 21 Nan yɛ dɩyɩyɛ dàà ba aa koro. Nan muru aadu waanɩ wʋʋ bɛnɩ, gɛ nan wolo awɔ Ahabi aa dɩkpaara diibi-teni-kamasɛ, bɛdɩ, abɛɛ bɛnɩ gɛtɛ be to koro powu Isareli gɛtʋnkwaa gaanɩ. 22 Nan mɛ aa dɩkpaara anlɛ gɛtɛ na mɛ Nebati wobi Yerobwam, ma Ahiya wobi Baasa booyo fɔ, yema a sa mɩ owurufa, gɛ a yɛ Isareli bete bɛ mɛ ade-kpen.>>

23 Gɛ Yesebeli bɩrɛ, Yahwe ɛ dɔ̀ alan, <Bɛkpɛɛ baà kɔrɔ Yesebeli Yesirele ditele-dɩrɛ fɔ daanɩ.>

24 <<Bɛkpɛɛ baà kɔrɔ ɛkamasɛ gɛtɛ è di Ahabi wɔnɩ, gɛtɛ eè ku ditele daanɩ fɔ, gɛ bɛsɩsɩra baà di ɛbɛ gɛtɛ baà ku dɩfa daanɩ fɔ.>> 25 (Ɛnɩ ɛkɩ ɛn ma anlɛ Ahabi gɛtɛ e fu wo koro ɛ tɛ ade-kpen yɩɩ gɛmɛ Yahwe bʋnʋn, gɛtɛ wɔsɔ Yesebeli ɛ tɛ wɔ amɩnlɛ-kpen. 26 Ɛ mɛ ade-kyʋnlɛ-dɩrɛ, gɛtɛ ɛ sʋma bekpen anlɛ Amori bete gɛtɛ Yahwe e berema bɛ e ye gɛtʋnkwaa fɔ gaanɩ gɛ ɛ ka gɩ ɛ tɛ Isareli bete fɔ.)

27 Gɛtɛ Ahabi ɛ nʋn ade nyayɩ fɔ, ɛ fɛɛran wɔ ngba, gɛ e liba bekotoku gɛ ɛ ban onyun, e liba bekotoku gɛ ɛ sara dɩkpʋkpʋ daanɩ. Gɛtɛ kere gɩ kpa fɔ, ɛ yɛ ɛ̀ san ma amɩnlɛ.

28 Gɛ Yahwe ɛ dɔ̀ Tisibe-te Eliya alan, 29 <<A we anlɛ gɛtɛ Ahabi ɛ warama koro mɩɩn bʋnʋn? Anlɛ gɛtɛ ɛ warama koro mɩɩn bʋnʋn, okoro mɩn nan nɩ ka dɩyɩyɛ fɔ n ba wawi yaanɩ, mɔ nan ka n ba gɛ wobi-teni wawi yaanɩ.>>