1 Begyu-dɩrɛ 16

1 Yahwe ɛ dama Hanani wobi Yehu wo koro ɛ tabʋrʋ ɛ tɛ Baasa alan, 2 <<Na tiri wɔ̀ na ye gɛ apututu yaanɩ, gɛ na mɛ wɔ̀ egyegeyelɛ na tɛ mɩɩn bɛnɩ Isareli, mɔ a san gɛ Yerobwam wo-isele yaanɩ, gɛ a yɛ mɩɩn bɛnɩ, Isareli bete, bɛ mɛ ade-kpen, gɛtɛ wʋ sa mɩ owurufa. 3 Gɛlɛ wuu koro nan muru awɔ Baasa, ma aa dɩkpaara, gɛ nan mɛ aa dɩkpaara anlɛ Nebati wobi Yerobwam. 4 Bɛkpɛɛ nan kɔrɔ Baasa dɩkpaara dɩɩnɩ-kamasɛ gɛtɛ eè ku ditele-dɩrɛ daanɩ fɔ, gɛ ɛbɛ gɛtɛ baà ku dɩfa daanɩ fɔ, bɛsɩsɩra nan di bɛ.>>

5 Ade-kurumakyɛɛ gɛtɛ Baasa ɛ mɛ wo bugyu buu gedi gaanɩ, ma wɔkɛma wade powu gɛtɛ ɛ mɛ fɔ, bɛ ŋwara yɩ bɛ sa Isareli begyu-dɩrɛ bɔɔ gɩkpa-dɩrɛ fɔ gaanɩ. 6 Baasa e ku gɛ be lò wɔ Tirisa, gɛ wobi Ela e di bugyu e sere wɔ gɩsɩrɩ.

7 Yahwe ɛ da ma Hanani wobi Yehu gɛtɛ è di wɔtabʋrʋlɛ fɔ wo koro ɛ dɔ̀ Baasa ma wɔ dɩkpaara daade ade-kpen gɛtɛ ɛ mɛ Yahwe gɛ wʋ sa wɔ owurufa fɔ wuu koro. Nka gɛtɛ ɛ mɛ Yahwe ade-kpen fɔ wuuko, mɔ gɛtɛ e wolo Yerobwam dɩkpaara dɩɩ bɛnɩ powu fɔ wuu koro.

Isareli wogyu Ela

8 Yuda wogyu Asa gɩkyan dikpilin ma kooronfɛ gaanɩ fɔ Baasa wobi Ela e di bugyu Isareli gɩfɩɩ gaanɩ. Ɛ sara Tirisa ditele daanɩ e di bugyu fɔ bɩkyan bʋnyɔɔ.

9 Mɔ Simiri gɛtɛ è di wɔ bɛndɩrɛbi fɔ baanɩ ɛkɩ gɛtɛ ɛɛ nya wɔ tiiramisan ɛbɛ ɔfan boo koro fɔ, ɛ ka amɩnlɛ-kpen wo koro. Ɔkʋna wʋtɔkɔ fɔ, Ela ɛ̀ sa Tirisa ditele, Arisa dɩkpaara daanɩ gɛtɛ ɛ nyʋn bʋkan e suu. Fɔ Arisa nyawɔ ntɛ nya Tirisa digyukpaara dii koro. 10 Ɛwʋ gɛ Simiri e wolo wɔ, Yuda wogyu-dɩrɛ Asa gɩkyan dikpilin ma kwarankɩfɛ gaanɩ. Gɛ e di bugyu.

11 Gɛtɛ ɛ bɔ e di bugyu, gɛ ɛ sara gigyu-bɩya gii koro fɔ, e wolo Baasa dɩkpaara dɩɩ bɛnɩ powu. En kere eteni-kɩlɩn gba ya gɛtɛ è di wɔfʋrɩ, abɛɛ wɔwɔlɔn. 12 Okoro Simiri e muru Baasa dɩkpaara dɩɩ bɛnɩ powu, anlɛ gɛtɛ Yahwe ɛ dama wɔtabʋrʋlɛ Yehu wo koro ɛ tabʋrʋ kadama Baasa wo koro fɔ. 13 Baasa ma wobi Ela bɛ mɛ ade-kpen, gɛ wʋ yɛ Isareli bɛnɩ mɔ bɛ mɛ ade-kpen. Bɛ yɛ Yahwe, Isareli wo Wurubwarɛ fɔ, ɛ ka owurufa yema bɛ yɛ bɛnɩ fɔ bɛ sʋma bekpen. 14 Ade-kurumakyɛɛ gɛtɛ Ela ɛ mɛ wo bugyu buu gedi gaanɩ, ma ade powu gɛtɛ ɛ mɛ fɔ, bɛ ŋwara yɩ bɛ sa Isareli begyu-dɩrɛ bɔɔ gɩkpa-dɩrɛ fɔ gaanɩ.

Isareli wogyu Simiri

15 Yuda wogyu-dɩrɛ Asa gɩkyan dikpilin ma kwarankɩfɛ gaanɩ fɔ, Simiri e di bugyu awi kwarankɩ Tirisa ditele daanɩ. Bɩtà bʋʋ bɛtàlɛ be be len be silin Gibeton ditele, gɛtɛ dì di Filisiti bete boo ditele fɔ. 16 Gɛtɛ Isareli bɩtà bʋʋ bɛtàlɛ gɛtɛ be tuma fɔ, bɛ nʋn alɛ Simiri ɛ ka amɩnlɛ-kpen egyu-dɩrɛ wo koro gɛ e wolo wɔ fɔ, Isareli bete powu bɛ ka Omiri gɛtɛ è di bɩtà bʋʋndɩrɛ fɔ bɛ sɩ̀ bugyu bɛ tɛ Isareli bete duwi dɩtɔkɔ boo getuma fɔ gaanɩ. 17 Ɛwʋ gɛ Omiri ma Isareli bete powu be ye Gibeton, gɛ bɛ ma sʋ Tirisa ditele bɛ sa. 18 Gɛtɛ Simiri e we gɛtɛ be to ditele fɔ, ɛ ma gyu digyu-dɩkpaara fɔ dɩɩ gamɩ gɛ ɛ sa dɩ ɔtan e silin koro gɛ e ku. 19 Yema ade-kpen gɛtɛ ɛ mɛ Yahwe, gɛtɛ ɛ tɛrɛma Yerobwam wosele ma wade-kpen gɛtɛ ɛ mɛ, gɛ ɛ yɛ Isareli bete mɔ ke bɛ mɛ yɩ fɔ yii koro.

20 Ade-kurumakyɛɛ gɛtɛ Simiri ɛ mɛ, ma wo bugyu buu gedi gaanɩ, ma wɔ gɛtɔ-yela bɛnɩ boo koro waade powu bɛ ŋwara yɩ bɛ sa Isareli begyu-dɩrɛ bɔɔ gɩkpa-dɩrɛ fɔ gaanɩ.

Isareli wogyu Omiri

21 Simiri diku dɩɩ gama fɔ, Isareli bete be yo akpen anyɔɔ. Dikpen dɩkɩ dɩ̀ tɛrɛma Ginati wobi Tibini, gɛtɛ ɛ̀ɛ̀ mɛ egyu, gɛ dikpen-do mɔ dɩ̀ tɛrɛma Omiri. 22 Gamama fɔ, bɛnɩ gɛtɛ bɛ̀ tɛrɛma Omiri fɔ be di ɛbɛ gɛtɛ bɛ̀ tɛrɛma Ginati wobi Tibini fɔ boo koro. Tibini e ku, gɛ Omiri e di bugyu.

23 Yuda wogyu Asa wɔ gɩkyan dikpilin ma fwo-dɩkɩfɛ gaanɩ fɔ, Omiri e di bugyu Isareli bɩkyan fwo bʋnyɔɔ. Bɩkyan kooron gɛtɛ bù gyegeye wo bugyu buu gedi gaanɩ fɔ, ɛ sara gɛ Tirisa. 24 E se Samariya wodon fɔ, sɩka-fututu abi dikpilin e ye Semeri wakʋn, gɛ e sere ditele-dɩrɛ odon fɔ wuu koro, gɛ ɛ ka ɛnɩ gɛtɛ e fu odon fɔ ɛ tɛ wɔ fɔ diyere Semeri ɛ sa dɩ alɛ Samariya.

25 Mɔ Omiri ɛ mɛ ade-kpen Yahwe bʋnʋn, gɛ ɛ mɛ ade-kpen gɛtɛ ɩ kààrà ɛbɛ powu gɛtɛ be gyegeye wɔ fɔ. 26 Ɛ bɔ ɛ tɛrɛma gɛ Nebati wobi Yerobwam wo-isele powu, gɛtɛ wʋ yɛ Isareli bete bɛ mɛ ade-kpen bɛ sa Yahwe, Isareli wo Wurubwarɛ fɔ owurufa yema bɛ sʋma bekpen.

27 Ade-kurumakyɛɛ gɛtɛ Omiri ɛ mɛ wo bugyu buu gedi gaanɩ, ma ɔkɛma wade powu gɛtɛ ɛ mɛ fɔ, bɛ ŋwara yɩ bɛ sa Isareli begyu-dɩrɛ boo koro gaade wʋ̀ gɩkpa fɔ yaanɩ. 28 Omiri e ku, gɛ be lò wɔ Samariya, gɛ wobi Ahabi e di bugyu e sere wɔ gɩsɩrɩ.

Isareli wogyu Ahabi

29 Yuda wogyu-dɩrɛ Asa gɩkyan dikpilin ma fwo-nɩyɛfɛ gaanɩ fɔ, Omiri wobi Ahabi e di bugyu Isareli. Ɛ sara Samariya ditele daanɩ e di bugyu fɔ bɩkyan dikpilin ma bʋnyɔɔ. 30 Omiri wobi Ahabi ɛ mɛ ade-kpen Yahwe bʋnʋn gɛ ɛ mɛ ade-kpen gɛtɛ ɩ kààrà ɛbɛ gɛtɛ be gyegeye wɔ fɔ powu. 31 Nka alɛ ɛ mɛ gɛ Nebati wobi Yerobwam wade-mɛlɛ fɔ yiiko, mɔ fɔ e biri e to Sidon bete boogyu Etibaali wobi-nanɩ Yesebeli gɩna ɛ fɩya. Gɛ ɛ sʋma ekpen Baali gɛ e kura wɔ. 32 E sere dikpen-kwo ɛ tɛ ekpen Baali Samariya ditele daanɩ. Gɛ e sere gedi gɩɩ gɛtɛ̀kʋn dikpen-kwo fɔ daanɩ ɛ tɛ wɔ. 33 Ahabi e biri e sere ekpen Asera woyon gɛ ɛ mɛ ade-kpen kpekpesi gɛtɛ ɩ sa Yahwe, Isareli wo Wurubwarɛ fɔ owurufa da Isareli begyu gɛtɛ be gyegeye wɔ bɛ sara fɔ powu.

34 Ahabi bugyu buu gedi gɩɩya waanɩ fɔ, Hiyeli gɛtɛ e ye Beteli fɔ, e biri ɛ pɩna e sere Yeriko. Gɛtɛ Hiyeli ee sere ditele fɔ geseregyagakʋn fɔ, wobi-teni ɛndɩrɛ Abiram e ku, gɛ ɔkʋna gɛtɛ ɛɛ sa ditele fɔ dɩɩ-ɩpʋnʋ èè were fɔ, wobi-teni, getu-gɔnɔ Segubi mɔ e ku, anlɛ gɛtɛ Yahwe ɛ dama Nun wobi Yosuwa wo koro ɛ dɔ̀ fɔ.