1 Gɛtɛ Solomon e sere Yahwe Dikwo-dɩrɛ fɔ, ma digyukpaara fɔ, ma anyan powu gɛtɛ ee len ɛ̀ɛ̀ mɛ fɔ e were fɔ, 2 Yahwe e tiri koro e wùlà wɔ dɩnyɔɔfɛ anlɛ gɛtɛ e ti tiri koro e wùlà wɔ Gibeyon fɔ. 3 Gɛ Yahwe ɛ dɔ̀ wɔ alan, <<Na nʋn aanyun-tiri, ma aa gɛfɔ gɛtɛ a fɔ mɩ fɔ. Na mɛ Dikwo-dɩrɛ nyadɩ gɛtɛ a sere bàà tɩ̀ sʋma mɩ daanɩ gakpaakpa lɛ fɩrɩnfɩrɩn. Mɩɩn bʋnʋn ma miinturu yaà gyaga dii koro ɔya-kamasɛ.

4 Mɔ awɔ bɩrɛ, gengyi à tɛrɛma mɩ nʋnkwarɩ anɩ, gɛ aade ɩ̀ tʋna anlɛ gɛtɛ aate Dafidi ɛ mɛ fɔ, gɛ à mɛ ade powu gɛtɛ na dɔ̀ wɔ̀, gɛ aa di maade-wùlàlɛ, ma mii-ise yii koro fɔ, 5 nan yɛ aa gigyu-bɩya gàà sere Isareli anɩ gakpaakpa anlɛ gɛtɛ na dɔ̀ na sɩ̀ aate Dafidi alan, <Ɔya wʋkɩ wʋn nan ba gɛtɛ nka aadu waanɩ wuu bebi nan di bugyu Isareli> fɔ.

6 Mɔ gengyi ɛyɩ ma yii bebi ì kere mɩɩn gɛsʋma ɩ ya, gɛ in di mii-ise, ma maade-wùlàlɛ gɛtɛ na tɛ yɩ fɔ yii koro, gɛ ɩ̀ san ɩ ma sʋma bekpen fɔ, 7 nan kpa Isareli n ye gɛtʋnkwaa, gɛtɛ na tɛ bɛ fɔ gaanɩ gɛ nan terema Dikwo-dɩrɛ gɛtɛ na mɛ fɩrɩnfɩrɩn miin diyere dii koro fɔ. Gɛ bɛnɩ powu baà tɩ ka Isareli be di giforo, fɔ bàà sa wɔ dɩkpàtà. 8 Dikwo nyadɩ daà biligi Dikwo-gbenalɛ. Gɛ ɛnɩ-kamasɛ gɛtɛ ɛɛ̀ bɛ dama dɩɩpɩ fɔ, ɔmɩrɩ waà ku wɔ gɛ ɛɛ̀ yɩyɛ eè lila alan, <Anʋn yii koro gɛ Yahwe ɛ yɛ ade nyayɩ ɩ ba gɛtʋnkwaa nyagɩ ma Dikwo-dɩrɛ nyadɩ yii koro?> 9 Fɔ bɛnɩ baà tiri wuunyun alan, <Yema be terema Yahwe, boo Wurubwarɛ, gɛtɛ e tiri bootu ɛbɛ e ye Egyipiti gɛtʋnkwaa gaanɩ, gɛ bɛ ka koro bɛ tɛ bekpen bɔɔ gɛsʋma. Gɛlɛ wuu koro gɛ Yahwe ɛ yɛ gyerebi-dɩrɛ nyawɔ ɛ ba boo koro.> >>

10 Solomon ɛ ka gɛ bɩkyan dikpilin e sere akpaara anyɔɔ fɔ e were, Yahwe Dikwo-dɩrɛ fɔ, ma digyu-kpaara fɔ. 11 Egyu-dɩrɛ Solomon ɛ tɛ Tiro wogyu Hiram atele dikpilin Galilee gɛtʋnkwaa gaanɩ, yema Hiram ɛ tɛ wɔ seda iyon, ma oloko, ma sɩka-sɩya powu gɛtɛ e hiya fɔ. 12 Mɔ gɛtɛ Hiram e ye Tiro ɛ ma nya atele gɛtɛ Solomon ɛ tɛ wɔ fɔ, wʋn di wɔ gʋnʋn. 13 Ɛwʋ gɛ e lila Solomon alan, <<Miinnobi, atele mɔmɔ n di nyayɩ gɛtɛ a tɛ mɩ lɛ?>> Okoro ɛ sa atele fɔ diyere alɛ Kabuli* gɛtʋnkwaa, gɛ diyere fɔ dɩ wɔ be ye ma ǹdò. 14 Fɔ sɩka-sɩya gɛtɛ Hiram ɛ ka ɛ tɩyɛma Solomon fɔ waà mɛ anlɛ siminti bɛbagɩ akpilin anaa ma fwo wʋʋdʋrʋ.

15 Dɩkpankpasan daanɩ gɛ Solomon ɛ yɛ bɛ mɛ bɛ ka be sere Yahwe Dikwo-dɩrɛ fɔ, ma wo digyukpaara, ma kpata gɛtɛ ɛ̀ sa Dafidi ditele dɩɩ gatɩn gɩɩ gɩlan fɔ, ma dɩkpaara fɔ powu, ma Yerusalem wɔpɔrɩ, ma Hasori, ma Megido ditele, ma Gese ditele. 16 (Fɔ Egyipiti wogyu Farawo ɛ tà bɩtà ma Gese ditele gɛ e gye dɩ bɩtà, gɛ ɛ sa dɩ ɔtan, e wolo Kanaan bete gɛtɛ bɛ̀ sa Gese ditele fɔ daanɩ fɔ. Ɛwʋ gɛ ɛ ka dɩ ɛ kyɛ wobi-nanɩbi gɛtɛ è di Solomon wɔsɔ fɔ anlɛ gɩnyan-kyɛlɛ ɛsanfɔn. 17 Ɛwʋ gɛ Solomon e biri ɛ sere Gese ditele.) E biri ɛ pɩna e sere Gatala gɩɩ Beti-Horon ma Gɩlan Beti-Horon, 18 ma Baalati, ma Tadimo gɛtɛ ɩ̀ sa Yuda wotonkuma waanɩ fɔ, 19 ma atele powu gɛtɛ bɛɛ pɩna anyandilɛ bɛ sɩ̀ fɔ, ma wo tiiramisan ɛbɛ, ma baabengyi yɩɩ bɛsaralɛ, ma gɩnyan-kamasɛ gɛtɛ Solomon ee len èè sere Yerusalem ditele daanɩ fɔ, ma Lebanon, ma gɛtʋnkwaa powu gɛtɛ ee di bugyu gaanɩ fɔ.

20 Bɛnɩ bɛkɩ be gyegeye bɛ sara Kanaan gɛtʋnkwaa gaanɩ pɛgɛ Isareli bete bɛ bɛ ba. Ɛbɛ n di Amori bete, ma Hiti bete, ma Perisi bete, ma Hiwi bete, ma Yebusi bete. Gɛlɛ gɩɩ bɛnɩ nyabɛ ben di Isareli bete, 21 bè di gɛ bɛnɩ gɛtɛ Isareli bete ben wolo, gɛ bè kuruma fɔ boodu waanɩ wʋʋ bɛnɩ. Ɛbɛ gɛ Solomon ɛ mɛ bɛ bɛdɩ̀, gɛ bɛ mɛ gʋtʋn ma ɔkɛma anlɛ gɛtɛ wù we be ye ma ǹdò lɛ. 22 Mɔ Solomon ɛn ka Isareli bete fɔ baanɩ ɛkɩ ɛ mɛ ɛdɩ. Ɛbɛ n di wɔ bɩtà bʋʋ bɛtàlɛ, ma wɔ bɛndɩrɛbi, ma begyegeyelɛ, ma wɔ bɩtà bʋʋ bɛndɩrɛbi, ma wo tiiramisan ɛbɛ bɔɔ bɛndɩrɛ, ma wabengyi yɩɩ bɛsaralɛ. 23 Ɛbɛ ke n di bɛndɩrɛ gɛtɛ bɛɛ nya Solomon gʋtʋn, ma gɩɩ bɛmɛlɛ fɔ powu boo koro. Bɛ ba nkpɩn bʋnyɔɔ ma akpilin kwarankɩ ma fwo (550).

24 Gɛtɛ Farawo wobi-nanɩbi fɔ ɛ karama e ye Dafidi Ditele daanɩ ɛ san digyukpaara gɛtɛ Solomon e sere ɛ tɛ wɔ fɔ daanɩ fɔ, e sere okòro wʋʋ kpata fɔ.

25 Gɩkyan-kamasɛ gaanɩ fɔ, Solomon ɛɛ tɛ gekuma gii gedi, ma olila wuu gedi disere disiyee, gedi gɩɩ gɛtɛ̀kʋn gɛtɛ e sere ɛ tɛ Yahwe fɔ gii koro. Ee kuma olifwi mɔ, Yahwe bʋnʋn. Okoro Solomon e sere Dikwo-dɩrɛ fɔ e were.

26 Gɛ egyu-dɩrɛ Solomon ɛ nɩ mɛ ɩkʋlɩ-dɩrɛ kpekpesi Esiyon-Gebe, gɛtɛ wʋ̀ gbɛma Elati, Ɛpʋ-sɩya wokere, Edom gɛtʋnkwaa gaanɩ fɔ. 27 Ɛwʋ gɛ Hiram ɛ sa wɔ bɛnɩ gɛtɛ bɛ nyɩ̀ ɛpʋ ade yaanɩ fɔ, alɛ bɛ ma mɛ gʋtʋn ma Solomon bɛnɩ. 28 Bɛ ka ɩkʋlɩ bɛ san Ofiri, gɛ be biri bɛ ba ma sɩka-sɩya bekotoku nkpɩn bʋnyɔɔ ma dikpilin (420) bɛ bɛ tɛ egyu-dɩrɛ Solomon.