1 Begyu-dɩrɛ 5

Solomon ɛɛ pɩna koro èè sere dikwo-dɩrɛ fɔ

1 Gɛtɛ Tire wogyu Hiram ɛ nʋn gɛtɛ bɛ sʋrʋ Solomon bʋnɔ be sere bugyu èè sere wote Dafidi gɩsɩrɩ fɔ, ɛ sa wɔ bɛsalɛ Solomon wakʋn, yema Hiram è di gɛ Dafidi wɔwɔlɔn-kanlɛ. 2 Gɛ Solomon e birima ɔtʋn nyawʋ ɛ sa Hiram alan, 3 <<À nyɩ̀ gɛtɛ miinte Dafidi ɛn talɩ sere Dikwo-dɩrɛ tɛ Yahwe wo Wurubwarɛ diyere, yema bɛkyʋnlɛ gɛtɛ be silin wɔ be tuma gɛ bɛɛ kpà ma ɛwɔ fɔ wuu koro, ka ma sere gɛtɛ Yahwe ɛ ka bɛ ɛ sa Dafidi bɩsɩrɩ bʋʋ gatɩn. 4 Nkenkele Yahwe, miin Wurubwarɛ ɛ tɛ mɩ olila mɩɩ-ɩbalan fɔ powu yaanɩ, gɛ nn ma ɛkyʋnlɛ ɛkɩ, gɛ dɩyɩyɛ dɩkɩ dɩn taa tama mɩ. 5 Okoro na mɛ gɛtɛ nan sere dikwo-dɩrɛ Yahwe, miin Wurubwarɛ diyere dii koro. Anlɛ gɛtɛ Yahwe ɛ dɔ̀ ɛ sɩ̀ ɛ tɛ miinte Dafidi alan, <Aabi gɛtɛ nan sere bugyu n sere aa gɩsɩrɩ fɔ, eè sere dikwo-dɩrɛ miin diyere daanɩ.> fɔ.

6 <<Okoro sa bɛnɩ Lebanon bàà ma kebi seda wo-iyon bɛ bɛ tɛ mɩ. Mɩɩn bɛnɩ baà mɛ gʋtʋn ma aa bɛnɩ, fɔ nan le aa bɛnɩ fɔ gutoro anlɛ gɛtɛ aà lila fɔ. Yema à nyɩ̀ gɛtɛ tɩn ma ɛnɩ ɛkɩ gɛtɛ ɛ̀ ba adawʋ-kebilɛ iyon anlɛ aa bɛnɩ Sidon bete.>>

7 Gɛtɛ Hiram ɛ nʋn Solomon wɔtʋn fɔ, wʋ mɛ wɔ ɔsɛ gɛ ɛ dɔ alan, <<N te sila Yahwe ǹdò, yema ɛ tɛ Dafidi ebi-sɛyɩlɛ gɛtɛ ɛɛ̀ talɩ ɛ kpakya gɩfɩɩ-dɩrɛ nyagɩ.>> 8 Okoro Hiram ɛ sa Solomon ɔtʋn alan,<<Na to aatʋn gɛtɛ a sa mɩ fɔ. Gɛ nan mɛ aa gelenbi ka dama seda ma sipiresi iyon fɔ yii koro ǹ tɛ wɔ̀. 9 Mɩɩn bɛnɩ baà ka yɩ be ye Lebanon wodon wuu koro bɛ waran bɛ ba Meditereniya wɔpʋ wɔpɩ. Fɔ bàà ban yɩ be bo anlɛ ɩkʋlɩ, bàà ka yɩ bɛ kààrà bɛ bɛ sɩ̀ ɔkʋn gɛtɛ aà wùlà fɔ. Dʋkɔbɛ fɔ baà furu yɩ bɛ tɛ wɔ̀ fɔ aa bɛnɩ bàà ka yɩ mɔma wɔ̀. Gɩnyan gɛtɛ n te len àà mɛ tɛ mɩ fɔ n di gɛtɛ, àà ka anyandilɛ mɔma miin digyukpaara dɩɩ bɛnɩ. 10 Okoro Hiram ɛ tɛ Solomon seda ma sipiresi iyon powu gɛtɛ è len. 11 Gɛ Solomon mɔ ɛ tɛ Hiram afɩnaa kotoku asepekyi anyɔɔ (44,000), fɩya ma bʋnɔ-kpara bɛgarawa disepekyi dɩkɩ ma gbaa (22,000). Solomon ɛ̀ bɔ ɛɛ mɛ gɛlɛ ɛ tɛ Hiram gɩkyan n di gɩkyan. 12 Yahwe ɛ tɛ Solomon gɛsɛyɩ anlɛ gɛtɛ ɛ dɔ̀ wɔ ɛ sɩ̀ fɔ. Olila wʋ sara Hiram ma Solomon boo getite, gɛ ɛbɛ ma ɛwɔ bɛ tà dikola.

13 Gɛ egyu-dɩrɛ Solomon e tiira bɛnɩ disepekyi ma ɩgbaa ton (30,000) Isareli gɛtʋnkwaa gaanɩ powu ɛ sa dɩkpankpasan dɩɩ gʋtʋn gaanɩ. 14 E yo bɛ akpen asiyee, gɛ ɛɛ sa baanɩ ɩgbaa ton (10,000) Lebanon e foma ebon-kamasɛ. Nyawʋ wuu wùlà alɛ dikpen-kamasɛ dɩɩ bɛnɩ bɛɛ ma sara Lebanon ebon ɛkɩ, fɔ bɛ ma sara bɔɔlɛ bebon bɛnyɔɔ. Adoniram n tɛ nya boo koro. 15 Solomon ɛ̀ ba atola yii betolalɛ asepekyi asiyee ma ɩgbaa ton (70,000), ma ataa yɩɩ begbenalɛ asepekyi anaa (80,000) idon yaanɩ, 16 fɩya ma bɛndɩrɛ gɛtɛ bɛ̀ ba gebù ɔgbaa wʋkɩ ma nkpɩn kooron, ma akpilin ton (3,300) gɛtɛ bɛɛ nya gʋtʋn fɔ gɩɩ gɛmɛbi ma gʋtʋn gɩɩ bɛmɛlɛ fɔ boo koro. 17 Egyu fɔ ɛ yɛ be gbena ataa-dɩrɛ ma ɔyɛkɛma, gɛtɛ bàà ka sere ɔpɔrɩ fɔ wuu gesere-ɔpɩ. 18 Gɛ Solomon wadawʋ yɩɩ bɛsalɛ, ma Hiram woyo ɛbɛ, ma Gebali bete be gbena ataa, gɛ bɛ pɩna iyon ma ataa fɔ bɛ tɛ dikwo-dɩrɛ fɔ dii gesere.