1 Ɔya kpekpesi wʋʋ gama, ɛsʋn fɔ geten wʋʋ gɩkyan-siyeefɛ gaanɩ fɔ, Yahwe ɛ tabʋrʋ ma Eliya alan, <<San, ka koro ma wùlà Egyu-dɩrɛ Ahabi, fɔ nan yɛ ɛsʋn ɛ̀ɛ̀ nʋ̀n gɛtʋnkwaa fɔ gii koro.>> 2 Okoro Eliya ɛ ka koro ɛ ma wùlà Ahabi.

Fɔ dɩkpan fɔ diinyun wʋ mɛ ɔkɛma Samariya. 3 Ɛwʋ gɛ Ahabi e kpèlè Obadiya gɛtɛ ɛɛ nya egyu-dɩrɛ dɩkpaara dii koro fɔ. Obadiya e di ɛnɩ gɛtɛ e to Yahwe e di gepepe. 4 Ɔya gɛtɛ Yesebeli ee wolo Yahwe bɛtabʋrʋlɛ fɔ, Obadiya ɛ ka bɛtabʋrʋlɛ akpilin ton e bubwa ataa-fwe anyɔɔ yaanɩ. Ɛ ka akpilin anyɔɔ ma fwo e bubwa dɩtaa-kamasɛ daanɩ, gɛ ɛ tɛ bɛ anyandilɛ ma butu. 5 Gɛ Ahabi ɛ dɔ̀ Obadiya alan, <<Yɛ taà san-san gɛtʋnkwaa fɔ gaanɩ, fɔ taà gyu atu-bi, ma afobi powu yaanɩ, nkɩfɔ taà wura dɩfa-ŋɔɔ gɛtɛ taà ka ti tɛ taakpɔŋɔ-tɩtɩɩ, ma taabengyi, fɔ tɩ kara be wolo tɩɩ bɛnan fɔ.>> 6 Okoro be yo gɛtʋnkwaa fɔ, gɛ Ahabi ɛ dama ofèn wʋkɩ, gɛ Obadiya mɔ ɛ dama ofèn-do.

7 Gɛtɛ Obadiya ɛ̀ san ɛɛ fɔrɔ fɔ, e tuma Eliya. Obadiya e we wɔ ɛ nyɩnla, okoro ɛ waran e kura gɛtʋnkwaa, gɛ ɛ dɔ̀ alan, <<Miinfonte Eliya wɔ lɛ?>>

8 Gɛ Eliya e tiri wuunyun alan, <<Ɩɩn! San ma dɔ̀ aafonte alɛ, <Eliya ɛ̀ sa nfan.> >>

9 Gɛ Obadiya e lila wɔ alan, <<Anʋn yaade-kpen gɛ na mɛ, gɛ à de nmɩ aasaranyan aa sa Ahabi gʋlɔ èè wolo? 10 Na nya Yahwe, aa Wurubwarɛ gɛtɛ ɛ̀ sa lɛ alɛ, gɩfɩɩ gɩkɩ abɛɛ bugyu bʋkɩ bʋn ma gɛtɛ miinfonte ɛn sa ɛnɩ alɛ bɛ ma bugiti wɔ̀. Gɛ gengyi gɩfɩɩ fɔ abɛɛ bugyu fɔ bʋ̀ dɔ̀ alɛ, an ma dʋkɔ fɔ, Ahabi ɛɛ yɛ bɛ bɛɛ kan ntam alɛ ben we wɔ̀. 11 Gɛ aa dɔ̀ mɩ alɛ n san n ma dɔ̀ miinfonte alan, <Eliya ɛ̀ sa nfan.> 12 Mɩɩn nyɩ̀ ɔkʋn gɛtɛ Yahwe gifiye gaà ka wɔ gɩ san gengyi n kpe n ye aakʋn fɔ. Gengyi ǹ maà dɔ̀ Ahabi alɛ à sa nfan, gɛ en we wɔ̀ fɔ, eè wolo mɩ. Mɔ nmɩ aasaranyan na sʋma Yahwe ye sɩyɛɛ mɩɩn gɛsaranyan gaanɩ. 13 Miinfonte, an nʋn ade gɛtɛ na mɛ, ɔya gɛtɛ Yesebeli ee wolo Yahwe bɛtabʋrʋlɛ fɔ? Na bubwa Yahwe bɛtabʋrʋlɛ akpilin ton ataa-fwe anyɔɔ yaanɩ. Na ka akpilin anyɔɔ ma fwo na bubwa dɩtaa-fwe-kamasɛ daanɩ, gɛ na tɛ bɛ anyan-dɩlɛ ma butu. 14 Gɛ nkele aa dɔ̀ mɩ alɛ n san n ma dɔ̀ miinfonte alan, <Eliya ɛ̀ sa nfan?> Eè wolo mɩ.>>

15 Gɛ Eliya ɛ dɔ̀ alan, <<Na nya Yahwe-Kpatakpɩrɩ gɛtɛ ɛ̀ sa lɛ alɛ, nan nyɩ n tiri koro n wùlà Ahabi ǹdò.>>

16 Okoro Obadiya ɛ ma tuma Ahabi, gɛ ɛ dɔ̀ wɔ ade fɔ, gɛ Ahabi ɛ ma tuma Eliya. 17 Gɛtɛ Ahabi e we Eliya fɔ, ɛ dɔ̀ wɔ alan, <<Awɔ wɔ lɛ, awɔ n te len ade a ba Isareli anɩ fɔ?>>

18 Ɛwʋ gɛ Eliya e tiri wuunyun alan, <<Min len ade ba Isareli, mɔ awɔ, ma aate dɩkpaara na len ade na ba. Yema i kere Yahwe wo-ise fɔ ɩ ya, gɛ ɩ ma tɛrɛma bekpen Baali ɛbɛ. 19 Nkele kpèlè Isareli bete powu, fɔ bàà be tuma mɩ Kameli wodon wuu koro, fɔ àà ka Baali bekpente nkpɩn bʋnyɔɔ ma akpilin anyɔɔ ma fwo (450), ma Asera bekpente nkpɩn bʋnyɔɔ (400), gɛtɛ Yesebeli ɛɛ nya boo koro fɔ ba.>>

20 Okoro Ahabi ɛ yɛ be kpèlè Baali bekpente powu Isareli anɩ, gɛ be tuma Kameli wodon wuu koro. 21 Gɛ Eliya ɛ san ɛ ma yela bɛnɩ fɔ bɔɔ bʋnʋn gɛ ɛ dɔ̀ alan, <<Ka ma sere ɔya-mɔmɔ gɛ yaà kere amɩnlɛ anyɔɔ-anyɔɔ yii gewura ɩ ya? Gengyi Yahwe ǹ di Wurubwarɛ fɔ, ɩ tɛrɛma wɔ, mɔ gengyi Baali ǹ di Wurubwarɛ fɔ, ɩ tɛrɛma wɔ.>>

Mɔ bɛnɩ fɔ ben tiri ade fɔ yiinyun. 22 Gɛ Eliya ɛ dɔ̀ bɛ alan, <<Nmɩ miinko na kuruma gɛtɛ n di Yahwe wɔtabʋrʋlɛ, mɔ Baali bekpente bɛ̀ ba nkpɩn bɩnaa ma akpilin anyɔɔ ma fwo (450). 23 Ɩ tɛ tɩ bɛkwɔ-teni bɛnyɔɔ, fɔ àà yɛ ɛbɛ gbagba bàà tiri ɛkwɔ-teni fɔ ɛkɩ, fɔ bàà kebi wɔ kpeti-kpeti bɛ gyaga bʋtan buu koro, mɔ bɛ kara sa ɔtan. Fɔ nmɩ mɔ nan kebi ɛkwɔ-teni-do fɔ n gyaga bʋtan buu koro, gɛtɛ mɩn nan sa ɔtan. 24 Fɔ yàà kpèlè yiikpen diyere, fɔ nmɩ mɔ nan kpèlè Miinfonte Yahwe diyere, gɛ ɛwɔ gɛtɛ eè yera ɛ̀ɛ̀ yɛ ɔtan wàà ye gatala be kuma bʋtan fɔ, ɛwɔ n di Wurubwarɛ.>>

Ɛwʋ gɛ bɛnɩ fɔ powu bɛ dɔ̀ alan, <<Ade gɛtɛ a dɔ̀ fɔ ɩ̀ kɔlɔ.>>

25 Gɛ Eliya ɛ dɔ̀ Baali bekpente fɔ alan, <<I tiri bɛkwɔ-teni fɔ baanɩ ɛkɩ, fɔ yàà gyegeye kebi wɔ, yema ɛyɩ ǹ sɔ. I kpèlè yiikpen fɔ, mɔ ɩ kara sa bʋtan fɔ ɔtan.>> 26 Okoro bɛ ka ɛkwɔ-teni gɛtɛ bɛ tɛ bɛ fɔ, gɛ bɛ kebi wɔ powu.

Be kpèlè Baali ye gagyɩgyan ma sere ofila-kenken. Bɛ gbɛrɛ afala be kpèlè wɔ alan, <<Oo Baali, yera tɩ!>> Mɔ bɛn nʋn gɩta gɩkɩ, gɛ ɛkɩ en yera bɛ. Gɛ be lèn-lèn be silin gedi gɩɩ gɛtɛ̀kʋn gɛtɛ bɛ mɛ fɔ.

27 Gɛtɛ wʋ nɩma ofila-kenken fɔ, Eliya ɛ sa bɛ dɩkpata alan, <<Ɩ gbɛrɛ afala-kin-kin, yema è di gɛ ekpen, nkɩfɔ wamɩnlɛ ɩ da ɔfɔ, abɛɛ walɔ i de kààrà, abɛɛ ɛ da osele, abɛɛ ɛ fwa bʋda gɛ wʋ̀ di gɛtɛ bàà lama wɔ.>> 28 Okoro bɛ gbɛrɛ afala-kin-kin, gɛ be belen-belen koro bɛtata, ma bɩtʋrʋnyan anlɛ gɛtɛ boodu waanɩ waade-mɛlɛ ii wùlà fɔ, gɛ nkalan wu ye ma ɛbɛ. 29 Gɛtɛ ofila wu yela atele wʋ kààrà fɔ, bɛ sangba bɛɛ gbɛrɛ afala be kpèlè bookpen fɔ ɔnʋn-sɩna waanɩ gɛlɛɛ ma sere gɛtɛ ɔgyɔlɔ wu gedi gɩɩ gɛtɛ̀ wʋ nɩma. Mɔ bɛn nʋn ade ɩkɩ, ɛnɩ ɛkɩ en yera bɛ, gɛ ɛkɩ en nʋn baakʋn.

30 Ɛwʋ gɛ Eliya ɛ dɔ̀ bɛnɩ fɔ powu alan, <<I kpe ɩ gbɛma mɩ!>> Gɛ bɛnɩ fɔ be kpe bɛ gbɛma wɔ, gɛ ɛ pɩna Yahwe gedi gɩɩ gɛtɛ̀kʋn, gɛtɛ gɩ yasɩ fɔ. 31 Eliya ɛ ka ataa fwo anyɔɔ gɛtɛ dɩtaa-kamasɛ dì yela tɛ Yakobu wo-ifoli fɔ yaanɩ wʋkɩ. Yakobu nyawɔ gɛ Yahwe e foma wo diyere alan, <<Isareli>> fɔ. 32 Gɛ Eliya ɛ ka ataa fɔ e sere gedi gɩɩ gɛtɛ̀kʋn Yahwe diyere daanɩ. Gɛ e kunla difwe gɛtɛ daalun daà talɩ di ton butu galɔn besiyee e silin gedi gɩɩ gɛtɛ̀kʋn fɔ. 33 Ɛ pɩna bʋtan fɔ ɛ sa, gɛ e kebi ɛkwɔ fɔ kpeti-kpeti ɛ gyaga bʋtan fɔ buu koro, gɛ ɛ dɔ̀ bɛ alan, <<Ɩ kpà butu ɩ yɔla isun-dɩrɛ-dɩrɛ ɩnaa, fɔ yàà da bʋ i lù gedi gɩɩ gɛtɛ̀ fɔ ma bʋtan fɔ buu koro.>>

34 Gɛ ɛ dɔ̀ alan, <<I biri ɩ mɛ gɛlɛɛ dɩnyɔɔfɛ!>> Gɛ be biri bɛ mɛ.

E biri ɛ dɔ̀ alan, <<Ɩ mɛ gɛlɛɛ disiyeefɛ!>> Gɛ be biri bɛ mɛ gɛlɛ disiyeefɛ. 35 Gɛ butu bʋ yɔn difwe gɛtɛ e kunla fɔ bʋ walɩ bu silin gedi gɩɩ gɛtɛ̀kʋn fɔ.

36 Gɛtɛ ɔya wʋ nɩma gɛtɛ bàà tɛ gedi fɔ, Wurubwarɛ wɔtabʋrʋlɛ Eliya e kpe ɛ gbɛma gedi gɩɩ gɛtɛ̀kʋn fɔ gɛ e tiri onyun ɛ dɔ̀ alan, <<Oo Yahwe, Abraham, ma Isaki, ma Isareli boo Wurubwarɛ, yɛ ǹdò bàà we nyɩnla alɛ, awɔ n di Isareli wo Wurubwarɛ, gɛ nmɩ n di aasaranyan, gɛ na yela gɛ aanyun-gyebi yii koro na mɛ gɛlɛ gaade nyayɩ powu. 37 Oo Yahwe, yera mɩ! Yera mɩ! Fɔ bɛnɩ nyabɛ bàà nyɩnla alɛ, awɔ Yahwe n di Wurubwarɛ gɛ a biri aa fi boo-ituru bàà ba aakʋn.>>

38 Ɛwʋ gɛ Yahwe ɛ yɛ ɔtan wʋ ye gatala wʋ bɛ nʋ̀n, gɛ wu kuma gedi gɩɩ gɛtɛ̀ fɔ, ma bʋtan fɔ, ma ataa fɔ, ma atɩn fɔ, gɛ wʋ yɛ butu fɔ bʋ nyʋn difwe fɔ daanɩ powu. 39 Ɔya gɛtɛ bɛnɩ fɔ powu be we ade nyayɩ fɔ, bɛ nʋ̀n bɛ ka bʋnʋn be tin gɛtʋnkwaa, gɛ bɛ dɔ̀ alan, <<Yahwe n di Wurubwarɛ, Yahwe n di Wurubwarɛ!>>

40 Gɛ Eliya ɛ dɔ̀ bɛ alan, <<I gye Baali bekpente fɔ! I kara yɛ baanɩ-kɩlɩn èè serenti!>> Gɛ be gye bɛ, gɛ Eliya ɛ ka bɛ ɛ san Kison dɩtagba daanɩ, gɛ e belen ɛbɛ powu ayu dʋkɔbɛ.

41 Ɛwʋ gɛ Eliya ɛ dɔ̀ Ahabi alan, <<San ma di, fɔ àà nyʋn, yema na nʋn ɛsʋn-dɩrɛ getura.>> 42 Okoro Ahabi ɛ da ɛ̀ɛ̀ ma di fɔ ɛ̀ɛ̀ nyʋn. Gɛ Eliya ɛ bʋn Kameli wodon fɔ wuu duyu, gɛ ɛ waran e kura gɛtʋnkwaa, gɛ ɛ warama wɔ bʋnʋn ɛ sa wakpin yii getite. 43 Gɛ ɛ dɔ̀ wɔsaranyan alan, <<San, fɔ àà ma nya ɛpʋ gɩlan!>> Gɛ ɛ san ɛ ma nya, gɛ ɛ bɛ dɔ̀ wɔ alan, <<Min we gɩnyankɩ.>>

Disere kwarankɩ gɛtɛ Eliya ɛ dɔ̀ alan, <<San ma nya àà ba!>> 44 Gɛ disere-kwarankɩfɛ, fɔ wɔsaranyan fɔ ɛ bɛ dɔ̀ wɔ alan, <<Na we dɩkpaba bɛrɛɛ gɛtɛ dì we anlɛ ɛnɩ-nyalɛ gʋlɔ gɛtɛ dɩ tɔ dii ye ɛpʋ fɔ anɩ.>> Gɛ Eliya ɛ dɔ̀ alan, <<San ma dɔ̀ Ahabi alan, <Pɩna aa tiiramisan ɛbɛ, fɔ aa san dɩkpaara. Nka gɛlɛ fɔ ɛsʋn ɛɛ̀ bɛ sʋ wɔ̀ ɛ sa.> >>

45 Gɛtɛ wʋ mɛ bɛrɛɛ fɔ, akpaba diya-diya i tin gatala tumm, gɛ gifiye gɩ gbɛrɛ, gɛ ɛsʋn-dɩrɛ e sere. Gɛ Ahabi ɛ gyaga wo tiiramisan wo koro ɛ da Yesirele. 46 Gɛ Yahwe wɔkɛma wʋ waran wʋ ba Eliya wo koro, gɛ Eliya e li wɔ gɛgba gɛtɩɩ, gɛ e serenti ɛ da ɛ yɛ Ahabi ma wotiiramisan fɔ powu gɛlɛɛ ma gyu Yesirele.