Esira 9

Esira wonyun-tiri

1 Ade nyayɩ yɩɩ gama fɔ, begyegeyelɛ fɔ bɛ ba maakʋn gɛ bɛ dɔ̀ alan, "Isareli bɛnɩ, fɩya ma gedi gɩɩ bɛtɛlɛ, ma Lefi bete fɔ ben tiri koro ye bɛnɩ gɛtɛ bè si ma ɛbɛ fɔ baade-kyʋnlɛ gɛtɛ bɛɛ mɛ, anlɛ gɛtɛ Kana bete, ma Hiti bete, ma Perisi bete, ma Yebusi bete, ma Amon bete, ma Mowabi bete, ma Egyipiti bete, ma Amori bete bɛɛ mɛ fɔ yaanɩ. 2 Ɛbɛ ma boo bebi-teni bɛ ka boo bebi-nanɩ be to gɩna gɛ wʋ yɛ bɛnɩ fɩrɩnfɩrɩn fɔ be sugba ma bɛnɩ gɛtɛ bè si silin bɛ fɔ. Boo begyegeyelɛ ma bɔɔ bɛndɩrɛbi na gyegeye bɔɔ bʋnʋn gɛ bɛ mɛ ade nyayɩ gɛtɛ ɩn kʋtʋma lɛ."

3 Gɛtɛ na nʋn ade nyayɩ fɔ, nan fɛɛran mɩɩn gɛgba ma mɩɩn gɛgba serelɛ, gɛ na wɔrɔ miin duyu ma miin bukpiri gɛ nan yɛ n si koro gɩɩ gɛyɔ ma amɩnlɛ yɩɩ gɛsa yaanɩ. 4 Ɛwʋ gɛ ɛnɩ-kamasɛ gɛtɛ gɩsaa gi ton wɔ kadama Wurubwarɛ wade gɛtɛ ɛ dɔ̀ fɔ, e be tuma maakʋn yema ɛbɛ gɛtɛ be ye gisela bɛ ba fɔ, bɔɔ nʋnkwarɩ gɛtɛ ben di wuu koro. Gɛ na sara dʋkɔ kʋtʋma gɛtɛ ɔgyɔlɔ wuu gedi gɩɩ gɛtɛ̀ gɩ nɩma.

5 Gɛtɛ ɔgyɔlɔ wuu gedi gɩɩ gɛtɛ̀ gɩɩya wʋ nɩma fɔ, na tɔ na ye ɔkʋn gɛtɛ na sara dɩkpʋkpʋ daanɩ fɔ. Fɔ n sa mɩɩn gɛgba ma mɩɩn gɛgba serelɛ gɛtɛ nan fɛɛran bʋ fɔ gɛ na waran na kura na yaraba maalɔ na wùlà Yahwe, miin Wurubwarɛ, 6 gɛ na tiri onyun alan,

"Oo, miin Wurubwarɛ, mɩɩn bʋnʋn bu ku gʋsɔ gɛ wʋ ba mɩ ɩnɩnfa gɛtɛ nan bʋma mɩɩn bʋnʋn n nya wɔ̀, yema taade-kpen ɩ lɩ da taayu gɛ tɩɩ dɩpwɛ dii gedi dɩ bʋn dɩ san gatala. 7 Ye tiitu ɛbɛ bɔɔya waanɩ bè ye ma ǹdò fɔ, tɩɩ dɩpwɛ dii gedi dɩ sɔ. Taade-kpen yii koro fɔ, gɩfɩɩ-fon gii begyu bee wolo, gɛ bee gye ɛtɩ ma tii begyu, ma tii gedi gɩɩ bɛtɛlɛ bɩtà bɛ da bɔɔlɛ. Be kpila taanyan bɛ da, gɛ bɛ̀ sa tɩ ɩnɩnfa anlɛ gɛtɛ wù we ǹdò lɛ.

8 "Mɔ nkele, ɔya-pɩɩ wʋkɩ waanɩ fɔ, Yahwe tii Wurubwarɛ a wula ti gutunkoro gɛ a yɛ ɛbɛ gɛtɛ be kuruma fɔ, be biri bɛ ba, gɛ bɛ bɛ sara aa gɛsarakʋn fɩrɩnfɩrɩn fɔ gaanɩ, gɛ awɔ tii Wurubwarɛ a tɛ tɩ gɛŋmaŋɩ gɛ a yɛ tɩ ti wura getuna bɛrɛɛ ti ye tɩɩ gɩdɩ gaanɩ. 9 Ma gɛtɛ tì di gɛ bɛdɩ gba fɔ, tii Wurubwarɛ en kere ti ya gɩdɩ gaanɩ. E tiri gɩnɩ-kpara e wùlà tɩ Perisiya begyu bʋnʋn. Ɛ tɛ tɩ nkpa-fon gɛtɛ tàà biri ti sere Wurubwarɛ Dikwo gɛtɛ nafɔ dɩ gbena fɔ, gɛ ɛ dɩyɛ tɩ Yuda ma Yerusalem baanɩ.

10 "Nkele tii Wurubwarɛ, ade-mɔmɔ gɛ taà nɩ dɔ̀ nyawʋ wʋʋ gama? Yema tɩn san aa-ise 11 gɛtɛ a dama aa aasaranyan gɛtɛ è di ɛtabʋrʋlɛ fɔ wo koro a tɛ fɔ yii koro. A dɔ̀ alan, <Gɛtʋnkwaa gɛtɛ ii len yàà gyu gaanɩ yàà to lɛ, gì di gɛtʋnkwaa gɛtɛ bɛnɩ gɛtɛ bè si gii koro fɔ bɛ sa gɩ dɩdɩɩ. Bɛ ka baade-mɛlɛ karan-karan fɔ bɛ sa gɛtʋnkwaa fɔ powu dɩdɩɩ. 12 Gɛlɛ wuu koro ɩ kara ka yii bebi-nanɩ ɩ tɛ boo bebi-teni gɩna, gɛ ɩ kara to boo bebi-nanɩ ɩ tɛ boo bebi. Ɩ kara mɛ onyun-kɩlɩn ma ɛbɛ ade-ɩkɩ yaanɩ, gɛ ɩ kara di bɛ awɔlɔn. Gɛlɛ fɔ yaà wura ɔkɛma gɛ yaà di anyan-kpara gɛtɛ ɩ̀ sa gɛtʋnkwaa fɔ gaanɩ gɛ yaà di yɩ i kuruma yii bebi anlɛ adikurumanyan gɛtɛ yaà sara gakpaakpa.

13 "Taade-kpen ma dɩpwɛ gɛtɛ ti di fɔ na yɛ gɛ ade nyayɩ powu ɩ tama tɩ lɛ. Mɔ awɔ tii Wurubwarɛ an tiira tɩ giten wàà nɩma anlɛ gɛtɛ taade-kpen ì we, gɛ a biri a yɛ ɛtɩ nyabɛ ti kuruma lɛ." 14 Nkele taà biri ti kere aa-ise fɔ tɩ ya taà biri tɩ ma to bɛnɩ nyabɛ gɛtɛ bɛɛ mɛ ade-kyʋnlɛ lɛ boo bebi gɩna? Gengyi tɩ̀ mɛ gɛlɛ fɔ, an nan ka owurufa tii koro a kààrà, fɔ àà muru ɛtɩ powu gɛtɛ ɛnɩ-kɩlɩn gba e nan kuruma? 15 Oo Yahwe, Isareli wo Wurubwarɛ, aade ɩ̀ tʋna gɛ a yɛ ɛtɩ ti kuruma. Ma gɛtɛ ti di dɩpwɛ gɛ taanɩ ɛkɩ ɛn kʋtʋma gɛtɛ èè yela aa bʋnʋn gba fɔ, tì yela aa bʋnʋn.