Esira 5

Tatenayi ɛ ŋwara gɩkpa ɛ tɩyɛma egyu Dariwusi

1 Wʋ bɛ ba gɛtɛ Wurubwarɛ ɛ da ma wɔ bɛtabʋrʋlɛ Hagayi ma Ido wodu wʋʋnɩ Sekariya boo koro ɛ tabʋrʋ ɛ tɛ Yuda bete gɛtɛ bɛ̀ sa Yuda ma Yerusalem fɔ, Isareli wo Wurubwarɛ gɛtɛ è yela bɔɔ gama fɔ wo diyere daanɩ. 2 Gɛ Sewalitiyeli wobi Serubabeli ma Yasadaki wobi Yesuwa be biri bɛ san Wurubwarɛ dɩkpaara fɔ daanɩ gɛtɛ dɩ̀ sa Yerusalem fɔ, fɔ bàà biri kya dii gesere. Fɔ Wurubwarɛ bɛtabʋrʋlɛ fɔ bɛ̀ fɩya ma ɛbɛ bɛɛ kpà bɛ.

3 Ɔkʋna wʋtɔkɔ fɔ, Tatenayi gɛtɛ è di Efrati getu giifèn-do wʋʋnyalɛ fɔ, ma Setari-Bosenayi ma bɔɔwɔlɔn ɛbɛ fɔ, bɛ san baakʋn gɛ be lila bɛ alɛ, "Ɛnyan na tɛ yɩ osele gɛ i biri ii sere Dikwo-dɩrɛ fɔ yàà pɩna dɩ?" 4 Be biri be lila alɛ, ɛbɛ gɛtɛ bee sere dikwo fɔ baayere de? 5 Mɔ Wurubwarɛ ɛɛ nya Yuda bɛndɩrɛbi fɔ boo koro, okoro ben kere gʋtʋn fɔ gɩɩ gɛmɛ ya ka ma sere gɛtɛ bɛ ŋwara gɩkpa bɛ sama egyu Dariwusi gɛ e tiri wuunyun ɛ tɛ bɛ.

6 Gɩkpa gɛtɛ Tatenayi wɔ gɩfɩɩ gɩɩnyalɛ gɛtɛ ɛɛ nya Efrati, ma Setari-Bosenayi ma bɔɔwɔlɔn ɛbɛ, ma bɛndɩrɛbi gɛtɛ bè si gbɛma Efrati fɔ bɛ ŋwara bɛ tɩyɛma egyu Dariwusi fɔ n tɛ ba lɛ. 7 Gɩkpa fɔ gaade n di alan,

Gɩkpa nyagɩ gɩɩ fɔrɔ gɩ tɛ egyu Dariwusi,

Olila wʋ sara ma egyu Dariwusi.

8 Tii len egyu-dɩrɛ àà nyɩnla alɛ tɩ san Yuda wɔlanlan waanɩ gɛ ti ma we gɛtɛ bee sere Wurubwarɛ-Kpatakpɩrɩ Dikwo-dɩrɛ fɔ ma ataa dɩrɛ-dɩrɛ, ma iyon atoo-atoo gɛtɛ bɛ ka bɛ gyaga ɩpɔrɩ yɩɩ koro. Bɛ ka koro bɛ tɛ gʋtʋn fɔ, gɛ gʋtʋn fɔ gɩɩ san bilen-bilen, yema bɛndɩrɛ bɛɛ nya gʋtʋn fɔ gii koro gepe.

9 Ti lila bɛndɩrɛbi gɛtɛ bɛɛ nya gʋtʋn fɔ gii koro fɔ alan, "Ɛnyan na tɛ yɩ osele gɛ ɩ pɩna ii sere Dikwo-dɩrɛ fɔ?" 10 Ti ni lila baayere, fɔ tàà wura ŋwara boo begyegeyelɛ baayere tɩ tɛ wɔ fɔ àà nyɩnla bɛ.

11 Be tiri wuunyun alan,

" Tì di gɛ gatala ma gɛtʋnkwaa gii Wurubwarɛ fɔ bɛsaranyan, gɛ tɩ pɩna tii sere Dikwo-dɩrɛ gɛtɛ Isareli wogyu-dɩrɛ ɛkɩ e sere dɩ e were bɩkyan kpekpesi bʋkɩ bʋ lɛ. 12 Mɔ gɛtɛ tiitu ɛbɛ bɛ sa Wurubwarɛ gɛtɛ ɛ̀ sa gatala fɔ owurufa okoro, e tiri bɛ ɛ tɛ Babilon wogyu Kalide-te Nebukadinesa gɛ e gbena Dikwo-dɩrɛ nyadɩ gɛ e gye dɩɩ bɛnɩ ɛ da Babilon.

13 Mɔ Babilon wogyu-dɩrɛ Sirusi bugyu buu gedi wʋʋ gɩkyan-gyangbasɛlɛ gaanɩ fɔ, ɛ tɛ ose gɛtɛ bàà biri sere Wurubwarɛ dikwo fɔ. 14 Gɛ e birima sɩka-sɩya, ma sɩka-fututu, ma Dikwo-dɩrɛ fɔ daanyan gɛtɛ Nebukadinesa ɛ ka e ye Yerusalem Dikwo-dɩrɛ daanɩ ɛ ma sɩ̀ Babilon dikpen-kwo daanɩ, fɔ ɛ tɛ̀ ete gɛtɛ bee kpèlè alɛ, Sesibasa gɛtɛ e tiri wɔ ɛ̀ɛ̀ mɛ ɔlanlan wʋkɩ wʋʋnyalɛ fɔ. 15 Gɛ ɛ dɔ̀ wɔ alan, "To anyan nyayɩ fɔ àà ka yɩ ma sɩ̀ Yerusalem Dikwo-dɩrɛ fɔ daanɩ. Fɔ yàà biri sere Wurubwarɛ dikwo fɔ dii dìtìngbìlìn fɔ daanɩ.

16 Okoro Sesibasa ɛ ba, gɛ ɛ bɛ kya Yerusalem Dikwo-dɩrɛ fɔ dii gesere-gyagakʋn. Ye duwi dɩtɔkɔ bè sere ma ǹdò fɔ bɛ̀ sa dii gesere gaanɩ mɔ din te were."

17 Okoro gengyi awɔ egyu aà yera fɔ, ɛ yɛ bàà ma buguti Babilon bugyu baakpa yaanɩ bɛ nya alɛ egyu Sirusi ɛn ŋwara gɩkpa gɛtɛ gii wùlà alɛ bàà sere Wurubwarɛ Dikwo-dɩrɛ fɔ? Fɔ awɔ egyu àà yɛ tɩ taà nyɩnla aamɩnlɛ ade nyayɩ yaanɩ.