Esira 6

Ose gɛtɛ egyu Dariwusi ɛ tɛ

1 Egyu Dariwusi ɛ yɛ bɛ ma bugiti Babilon wakpa-dɩrɛ yaanɩ, anyan gbagba yɩɩ gɛsɩ̀kʋn. 2 Gɛ bɛ ma ye gɩkpa gɩkɩ koro Ekibatana ditele gɛtɛ dɩ̀ sa Mediya gɩlan fɔ daanɩ. Bɛ ŋwara bɛ sa gaanɩ alan,

"Gɛtabʋrʋ ka dama gɩkpa fɔ gii koro."

3 Egyu Sirusi wo bugyu buu gedi wʋʋ gɩkyan gyangbasɛlɛ gaanɩ fɔ, ɛ ŋwara ose ɛ dama Wurubwarɛ Dikwo-dɩrɛ gɛtɛ dɩ̀ sa Yerusalem fɔ dii koro alan,

<Wù di gɛtɛ bàà biri sere Dikwo-dɩrɛ fɔ, fɔ wàà mɛ ɔkʋn gɛtɛ baà tɩ tɛ gedi, okoro ɩ yɛ bàà kya dii gesere-gyagakʋn wuu gesere. Wù di gɛtɛ daatɔ dàà mɛ bɩsɩrɩ akpilin anaa ma fwo fɔ daayɛrɛ dàà mɛ bɩsɩrɩ akpilin anaa ma fwo. 4 Baà sere ataa ɩgba isiyee fɔ bɛ be sere timba ɔgba wʋkɩ. Egyu dɩdaka daanɩ gɛ kɔba fɔ eè ye bàà ka nya gʋtʋn fɔ gii koro. 5 Gɛlɛ ke gɛ wù di gɛtɛ egyu Nebukadinesa ɛ̀ birima Wurubwarɛ Dikwo-dɩrɛ dɩɩ sɩka-sɩya ma dɩɩ sɩka-fututu wanyan gɛtɛ ɛ ka e ye Yerusalem ɛ san Babilon fɔ ɛ bɛ sɩ̀ yɩɩ gɛdʋrɔkʋn Wurubwarɛ Dikwo-dɩrɛ fɔ daanɩ. Wù di gɛtɛ yàà dʋrʋ Wurubwarɛ dɩkpaara fɔ daanɩ.

6 Gɛlɛ wuu koro, ye ǹdò ka san fɔ, awɔ Tatenayi gɛtɛ aa nya Efrati getu-fèn ka san fɔ, ma Seta-Bosenayi fɩya ma aa bɛndɩrɛbi, ɩ ta nɩ gbɛma Dikwo-dɩrɛ fɔ. 7 I tiri yaalɔ i ye Wurubwarɛ Dikwo-dɩrɛ dii gʋtʋn fɔ gaanɩ. Ɩ yɛ Yuda gɛtʋnkwaa gɩɩnyalɛ ma gɩɩ bɛndɩrɛbi bàà biri sere Wurubwarɛ Dikwo-dɩrɛ fɔ dii dìtìngbilìn daanɩ.

8 Ɛwʋ gɛtɛ wù biri wʋ̀ fɩya fɔ, n di alɛ, n tɛ tɛ yɩ ose alɛ, ɩ kpà Yuda bɛndɩrɛbi fɔ, fɔ bàà sere Wurubwarɛ Dikwo-dɩkpaara fɔ.

I tiri kɔba i ye egyu gɛtɛ ɛɛ nya Efrati getu giifèn-do fɔ wɔ gɛbɩya gaanɩ yàà ka nya bɛnɩ gɛtɛ bɛɛ bɛ mɛ gʋtʋn fɔ boo koro, fɔ gʋtʋn fɔ gɩ kara bè ten. 9 Anyan gɛtɛ ii hiyan bàà ka tɛ Gatala gii Wurubwarɛ gekuma gii gedi fɔ n di, ɛkwɔ-teni, ma ɛyɛran-teni, ma bɛyɛran-nanɩ, ma afɩnaa, ma bʋbɔlɛ, ma wayɩn ma bʋnɔ anlɛ gɛtɛ Yerusalem gedi gɩɩ bɛtɛlɛ be lila bàà tɩ tɛ bɛ duwi n di duwi fɔ. 10 Ɩ mɛ gɛlɛ gaade nyayɩ ɩ tɛ bɛ fɔ bàà talɩ bɛ tɛ Gatala gɩɩ Wurubwarɛ gedi gɛtɛ gaà di wɔ gʋnʋn, fɔ bàà tiri onyun egyu ma wo bebi-teni bɔɔ nkpa wo koro.

11 Ǹ biri n tɛ sɩ̀ ose alɛ, gengyi ɛnɩ ɛkɩ en di ose nyawʋ wuu koro fɔ, baà dugba wo dikwo diiyon wʋkɩ gɛ baà salɩ wʋ fɔ bàà ka ɛnɩ fɔ tʋlʋn ma ɛwʋ. Gɛ baà gbena ɛnɩ fɔ dikwo dʋgʋ-dʋgʋ. 12 Egyu-dɩrɛ-kamasɛ abɛɛ gɩfɩɩ gɛtɛ gaà dɔ̀ alɛ gii foma ose nyawʋ abɛɛ gàà mɩna Dikwo-dɩrɛ nyadɩ Yerusalem fɔ, Wurubwarɛ gɛtɛ e tiri dʋkɔbɛ gɛtɛ bɛnɩ bàà tɩ sʋma wɔ fɔ ɛ yɛ gɩ gàà nʋ̀n.

Nmɩ Dariwusi na sɩ̀ ose nyawʋ. Wù di gɛtɛ ɛnɩ-kamasɛ èè di wuu koro kyɛkyɛ.

Be sere Dikwo-dɩrɛ fɔ be were gɛ bɛ ka dɩ bɛ sa Wurubwarɛ gʋlɔ

13 Ose gɛtɛ egyu Dariwusi ɛ tɛ fɔ, Efrati getu-fèn-do gɩɩnyalɛ Tatenayi ma Setari-Bosanayi ma bɔɔwɔlɔn ɛbɛ be di wuu koro kyɛkyɛ. 14 Gɛlɛ wuu koro Yuda bɛndɩrɛbi bɛ kyaga dikwo fɔ dii gesere, gɛ dɩɩ san bʋnʋn. Fɔ Wurubwarɛ bɛtabʋrʋlɛ Hagayi ma Sekariya gɛtɛ e ye Ido wodu waanɩ fɔ bɛ tabʋrʋ bɛ sa bɛ ɔkɛma. Gɛ be werema dikwo fɔ dii gesere anlɛ gɛtɛ Isareli wo Wurubwarɛ ɛ dɔ̀, gɛ Perisiya begyu Sirusi, ma Dariwusi, ma Aritaserisi bɛ tɛ ose fɔ. 15 Egyu-dɩrɛ Dariwusi bugyu buu gedi wʋʋ gɩkyan-kooronfɛ, Ada wobon duwi-siyefɛ daanɩ gɛ be werema Dikwo-dɩrɛ fɔ.

16 Ɛwʋ gɛ Isareli bɛnɩ fɔ powu (gedi gɩɩ bɛtɛlɛ, ma Lefi bete ma ɛbɛ powu gɛtɛ be gye bɛ san gisela fɔ), bɛ mɛ Wurubwarɛ Dikwo fɔ fɩrɩnfɩrɩn gɛ be di ɔsɛ. 17 Bɛ ka bɛkwɔ-teni akpilin ton (100), ma ayɛran-gbʋgbʋ gɛkpɩn (200), ma bɛyɛran atan-teni nkpɩn bʋnyɔɔ (400) bɛ ka be tiri Dikwo-dɩrɛ fɔ okòro. Bɛ ka begbebi-teni fwo bɛnyɔɔ bɛ tɛ ade-kpen yɩɩ gɛkakyɛ yii gedi tɛ Isareli powu, ɛkamasɛ è yela ɛ tɛ Isareli wo-ifoli fwo ɩnyɔɔ waanɩ wʋkɩ fɔ. 18 Ɛwʋ gɛ be yo gedi gɩɩ bɛtɛlɛ bɛ sa baakpen-akpen yaanɩ, gɛ be yo Lefi bete mɔ bɛ sa baakpen-akpen yaanɩ tɛ Wurubwarɛ gʋtʋn fɔ gɩɩ gɛmɛ Yerusalem anlɛ gɛtɛ bɛ ŋwara bɛ sa Mose gɩkpa gaanɩ fɔ.

Gɛkààrà-da

19 Ebon gyangbasɛlɛ wo duwi fwo-naafɛ daanɩ fɔ, bɛnɩ gɛtɛ be gye gisela fɔ, be di Gɛkààrà-da gɩɩsɛ. 20 Gedi gɩɩ bɛtɛlɛ ma Lefi bete fɔ powu bɛ kpa koro dɩdɩɩ bɛ mɛ fɩrɩnfɩrɩn. Gɛ gedi gɩɩ bɛtɛlɛ fɔ be belen Gɛkààrà-da gɩɩyɛran fɔ duyu bɛ tɛ bɛnɩ powu gɛtɛ be gye gisela fɔ, ma bɔɔdɩrɛ ɛbɛ gɛtɛ bè di gedi gɩɩ bɛtɛlɛ fɔ, ma ɛbɛ gbagba boo koro. 21 Ɛwʋ gɛ bɛnɩ gɛtɛ be gye gisela fɔ, be di anyan fɔ, ma ɛbɛ gɛtɛ be tiri koro be ye bɔɔwɔlɔn ɛbɛ gɛtɛ bɛn nyɩ̀ Wurubwarɛ fɔ, bɔɔ dɩdɩɩ daade-mɛlɛ fɔ. Fɔ bàà talɩ sʋma Yahwe, Isareli wo Wurubwarɛ. 22 Bɛ ka awi kwarankɩ be di Boroboro gɛtɛ bɛn sa gɩfa-ŋanlɛ Wɔsɛ wuu Gedi, yema Yahwe ɛ yɛ be di ɔsɛ dɩrɛ gɛtɛ e foma Asiriya wogyu wamɩnlɛ gɛ ɛ kpà bɛ Isareli wo Wurubwarɛ Dikwo-dɩrɛ fɔ dɩɩ gʋtʋn gaanɩ fɔ.