Esira 10

Bɛnɩ fɔ be tiri baade-kpen bɛ dɔ̀

1 Gɛtɛ Esira ee tiri onyun gɛ ee tiri wade-kpen, gɛ ɛ̀ dɔ̀ ee wula gɛ ee fun koro ɛ fɩna dɩkpaara daanɩ fɔ, Isareli bɛnɩ dɩtɩnpan, beteni, ma bɛnanɩ, ma bebi be be tuma wakʋn. Gɛ ɛbɛ mɔ be wula gepepe. 2 Ɛwʋ gɛ Yetiyeli wobi Sekaniya gɛtɛ e ye Elam wodu waanɩ fɔ ɛ dɔ̀ Esira alan, "Tin di nʋnkwarɩ tii Wurubwarɛ bʋnʋn, yema ti to bendeni gɛtɛ bè sì ma ɛtɩ fɔ bɔɔ bɛnanɩ gɩna. Mɔ nyawʋ powu wʋʋ gama fɔ, Isareli è biri ɛ̀ ba bʋnʋn bʋʋ gɛgyagakʋn. 3 Nkele ɩ yɛ taà ta dikola ma tii Wurubwarɛ, fɔ taà berema bɛnanɩ nyabɛ ma boo bebi powu anlɛ gɛtɛ miinfonte ma ɛbɛ gɛtɛ bee di Wurubwarɛ ise fɔ yii koro fɔ bɛ dɔ̀ fɔ. Ɩ yɛ wàà mɛ anlɛ gɛtɛ Ose fɔ wuu wùlà fɔ. 4 Tɔ yela, yema ade nyayɩ ɩ̀ sa gɛ aa gʋlɔ gaanɩ, taà yela aa gama. Okoro sa koro ɔkɛma fɔ àà wʋ."

5 Okoro Esira ɛ tɔ gɛ ɛ yɛ gedi gii bɛtɛlɛ gɩɩ bɛndɩrɛ, ma Lefi bete, ma Isareli powu bɛ kan ntam alɛ baà mɛ anlɛ gɛtɛ Sekaniya ɛ dɔ̀ fɔ. Gɛ ɛbɛ powu bɛ kan ntam. 6 Gɛ Esira e kpe e ye Wurubwarɛ dɩkpaara fɔ daanɩ gɛ ɛ da Eliyasibi wobi Yohohanan wakʋn. Ɔkʋna gɛtɛ ɛ̀ sa dʋkɔ fɔ en di gɛ ɛn nyʋn yema ɛ̀ bɔ ɛ̀ sa gɛ dɩkpʋkpʋ daanɩ, nʋnkwarɩ gɛtɛ ɛbɛ gɛtɛ be ye gisela gaanɩ fɔ ben di fɔ wu koro.

7 Ɛwʋ gɛ bɛ sa ɔtʋn Yerusalem ma Yuda powu anɩ alɛ ɛbɛ gɛtɛ be ye gisela gaanɩ bɛ ba fɔ, be be tuma Yerusalem. 8 Gɛ begyegeyelɛ ma bɛndɩrɛbi fɔ bɛ dɔ̀ bɛ sɩ alɛ ɛnɩ-kamasɛ gɛtɛ ɛn nan ba awi asiyee yaanɩ fɔ baà to wanyan powu gɛ baà berema wɔ be ye bɛnɩ gɛtɛ be ye gisela gaanɩ bɛ ba fɔ baanɩ.

9 Awi asiyee ɩtɔkɔ yaanɩ fɔ, Yuda bɛnɩ ma Benyamin bɛnɩ fɔ powu be be tuma Yerusalem. Gɛ ebon-yɛkɩfɛ duwi-dikpilinfɛ daanɩ fɔ, bɛnɩ fɔ powu bɛ bɛ sara Wurubwarɛ-dikwo-dɩrɛ fɔ dɩɩ bʋnʋn. Fɔ koro gɩɩ gbɛrɛ bɛ yema ɛsʋn ɛɛ nʋ̀n ma ade gɛtɛ bee len bàà dɔ̀ fɔ yii koro. 10 Ɛwʋ gɛ Esira gɛtɛ è di gedi gɩɩtɛlɛ fɔ ɛ tɔ e yela gɛ ɛ dɔ̀ alan, "In di nʋnkwarɩ, i to bendeni gɩna gɛ wʋ yɛ Isareli dɩpwɛ dii gedi fɔ dɩ sɔ dɩ fɩya. 11 Nkele i tiri yaade-kpen ɩ dɔ̀ ɩ tɛ Yahwe, yiitu ɛbɛ boo Wurubwarɛ fɔ, fɔ yàà mɛ wo gelenbi. I tiri koro i ye bɛnɩ gɛtɛ bè sì ma ɛyɩ fɛ baanɩ, fɔ yàà terema yɩɩ bendeni-sɔ fɔ." 12 Ɛwʋ gɛ dikpi fɔ powu dɩ ka gɩta-dɩrɛ dɩ dɔ̀ alan,"aade ɩ̀ dɔ, wù di gɛtɛ tàà mɛ anlɛ gɛtɛ a dɔ̀ fɔ. 13 Mɔ bɛnɩ kpekpesi n yela nfan lɛ, gɛ tɩ̀ sa gɛ ɛsʋn gɛnʋ̀n gɩɩya waanɩ okoro tɩn nan talɩ ti yela okòro gɛlɛ. Yema tɩ nan talɩ tɩ ka duwi-kɩlɩn abɛɛ awi anyɔɔ tɩ mɛ yɩɩ gʋtʋn, yema tɩ mɛ ade-kpen-dɩrɛ ade nyayɩ yaanɩ." 14 Gɛlɛ wuu koro ɩ yɛ tɩɩ bɛndɩrɛbi fɔ, bàà sara Yerusalem fɔ bàà nya ade fɔ yii koro. Ɩ yɛ bɛnɩ powu gɛtɛ be to bendeni-sɔ gɩna fɔ bàà ba ma bɔɔ ditele dɩɩ bɛndɩrɛ ma dɩɩ gɔdɔ gɩɩ bɛdɔ̀lɛ ka ma sere gɛtɛ Wurubwarɛ èè kere wowurufa-dɩrɛ fɔ ya." 15 Asaheli wobi Yonatan, ma Tikifa wobi Yasiya fɩya ma Mesulam, ma Lefi-te Sabetayi mɩnɩ to ade fɔ sa.

16 Okoro ɛbɛ gɛtɛ be gye gisela gaanɩ fɔ, bɛ mɛ anlɛ gɛtɛ bɛ dɔ̀ bɛ fɔ. Gedi gɩɩtɛlɛ Esira e tiri bɛnɩ gɛtɛ bè di akpaara yɩɩ bɛndɩrɛ fɔ ɛkɩ-ɛkɩ e ye dɩkpaara-kamasɛ daanɩ gɛ bɛ ŋwara baayere. Ebon fwofɛ wo duwi gyangbasɛlɛ daanɩ fɔ, bɛ sara gɛ bɛ kya gegyu ade fɔ yaanɩ, 17 gɛ ebon-gyangbasɛlɛ wo duwi gyangbasɛlɛ daanɩ fɔ, be werema bɛnɩ gɛtɛ be to bendeni gɩna fɔ baade fɔ.

Beteni gɛtɛ be to bendeni gɩna

18 Gedi gɩɩ bɛtɛlɛ boodu waanɩ fɔ, ɛbɛ gɛtɛ be to bendeni gɩna fɔ baayere n di:

Yosadaki wobi Yosuwa ma wɔdɩrɛ ɛbɛ boodu waanɩ fɔ, ɛbɛ gɛtɛ be to bendeni gɩna fɔ n di

Maaseya, ma Eliyeseri, ma Yaribi ma Gedaliya. 19 (Ɛbɛ powu bɛ kan ntam alɛ baà kere bɔɔsɔ ɛbɛ bɛ ya, baà tiri ɛyɛran-teni be ye bɔɔ bɛnan baanɩ bàà ka tɛ dɩpwɛ dii gedi.)

20 Imeri wodu waanɩ fɔ,

Hanani, ma Sebadiya.

21 Harim wodu waanɩ fɔ,

Maaseya, ma Eliya, ma Semaya, ma Yehiyeli ma Usiya.

22 Pasuri wodu waanɩ fɔ,

Eliyonayi, ma Maaseya, ma Isimayeli, ma Netaneli, ma Yosabadi ma Elasa.

23 Lefi bete fɔ baanɩ fɔ,

Yosabadi, ma Simeyi, ma Kelaya gɛtɛ bè biri bee kpele alɛ Kelita fɔ, ma Petahiya, ma Yuda ma Eliyesa.

24 Ɩnʋn yɩɩ bɛnʋmalɛ baanɩ fɔ,

Eliyasibi

Dikwo-dɩrɛ dɩɩ bɛdɩyɛlɛ baanɩ fɔ,

Salum, ma Telem, ma Wuri.

25 Isareli bɛnɩ-kurumakyɛɛ baanɩ,

ye Parosi wodu waanɩ fɔ,

Ramiya, ma Isiya, ma Malikiya, ma Miyamin, ma Eleyasa, ma Malikiya, ma Benaya.

26 Elam wodu waanɩ fɔ,

Mataniya, ma Sekariya, ma Yehiyeli, ma Abidi, ma Yeremoti, ma Eliya.

27 Satu wodu waanɩ fɔ,

Eliyonayi, ma Eliyasibi, ma Mataniya, ma Yeremoti, ma Sabedi, ma Asisa.

28 Bebayi wodu waanɩ fɔ,

Yehohanan, ma Hananiya, ma Sabayi, ma Atilayi.

29 Bani wodu waanɩ fɔ,

Mesulam, ma maluki, ma Adaya, ma Yasubi, ma Seyali, ma Yeremoti.

30 Patati-Mowabi wodu waanɩ fɔ,

Adina, ma Kelali, ma Benaya, ma Maaseya, ma Mataniya, ma Besaleli, ma Binuwi, ma Manase.

31 Harim wodu waanɩ fɔ,

Eliyesa, ma Isiya, ma Malikiya, ma Kemaya, ma Kimon,

32 ma Benyamin, ma Maluki, ma Semariya.

33 Hasum wodu waanɩ fɔ,

Matenayi, ma Matata, ma Sabedi, ma Elifeleti, ma Yeremayi, ma Manase, ma Simeyi.

34 Bani wodu waanɩ fɔ,

Maadayi, ma Amiram, ma Wuweli,

35 ma Benaya, ma Bedeya, ma Keluhi, 36 ma Faniya, ma Meremoti, ma Eliyasibi, 37 ma Mataniya, ma Matenayi, ma Yasu.

38 Binuwi wodu waanɩ fɔ,

Simeyi, 39 ma Selemiya, ma Natan, ma Adaya, 40 ma Makinadebayi, ma Sasayi, ma Sarayi, 41 ma Asareli, ma Selemiya, ma Semariya, 42 ma Salum, ma Amariya, ma Yosefu.

43 Nebo wodu waanɩ fɔ,

Yeyeli, ma Matitiya, ma Sabedi, ma Sebina, ma Yadayi, ma Yoweli, ma Benaya.

44 Gɛlɛ wʋʋ bɛnɩ nyabɛ powu be to bendeni gɩna gɛ be wo bebi bɛ tɛ bɛ. Mɔ be kere bɛ bɛ ya ma boobi fɔ powu.