Nehemiya 1

Nehemiya wonyun-tiri

1 Hakaliya wobi Nehemiya wanyun-gyebi n tɛ ba lɛ.

Duwi dɩkɩ, Kisilefi wobon anɩ*1:1 Kisilefi wù di Babilon bete boobon yɛkɩfɛ, gɛtɛ gengyi à ka a ba nfan fɔ, ebon ɛtɔkɔ ɛ̀ sa ebon fwo-ɛkɩfɛ ma ebon fwo-ɛnyɔɔfɛ boo getite. fɔ, Perisiya wogyu-dɩrɛ gɩkyan dikpilinfɛ gaanɩ, gɛtɛ nmɩ Nehemiya ǹ sa ditele-dɩrɛ Susa daanɩ fɔ, 2 Hanani gɛtɛ è di mɩɩndɩrɛ ɛbɛ baanɩ ɛkɩ fɔ, ma bɛnɩ bɛkɩ be ye Yuda bɛ ba, gɛ na lila bɛ Yuda bɛnɩ gɛtɛ be kuruma ben gye bɛ da gisela fɔ boo koro. Gɛ na biri na lila bɛ na dama Yerusalem ditele dii koro.

3 Gɛ bɛ dɔ̀ mɩ alan, <<Yuda bete gɛtɛ be kuruma, gɛ be biri bɛ ba fɔ, bɛ̀ sa dɩyɩyɛ-dɩrɛ ma ɩnɩnfa-dɩrɛ yaanɩ. Yerusalem wɔpɔrɩ fɔ wu sila wʋ nʋ̀n, gɛ ditele fɔ dɩɩ-ɩpʋnʋ i kpin.>>

4 Gɛtɛ na nʋn ade nyayɩ fɔ, na waran na sara, gɛ na wula, gɛ na sara dɩkpʋkpʋ daanɩ awi kpekpesi. Na ban onyun, gɛ na tiri onyun na tɛ Wurubwarɛ gɛtɛ ɛ̀ sa gatala fɔ. 5 Gɛ na dɔ̀ alan,

<<Oo! Yahwe, gatala gii Wurubwarɛ, Wurubwarɛ-kpatakpɩrɩ, aade ɩ̀ ba gɩsaa. Aa di aa gelen gii dikola dii koro, aa len ɛbɛ gɛtɛ bee di aa-ise yii koro fɔ. 6 Ken giten maakʋn gepepe, fɔ àà tirima bʋnʋn nya mɩ, fɔ àà nʋn nmɩ aasaranyan gɛtɛ ǹ te tiri onyun n kpèlè wɔ̀ odòn ma ofilibon n tɛ aa bɛnɩ, Isareli bete lɛ maakʋn. Ǹ te tiri ade-kpen gɛtɛ ɛtɩ Isareli bete, fɩya ma nmɩ, ma miinte dɩkpaara tɩ mɛ wɔ̀ fɔ n dɔ̀. 7 Tɩ mɛ wɔ̀ duyu-kɛma daade. Tin di aa-ise, ma aade-wùlàlɛ, ma aade-tɩyɛlɛ-sɩ̀lɛ gɛtɛ a ka a tɛ aasaranyan Mose fɔ yii koro.

8 Oo Wurubwarɛ, kʋna aanyun-gyebi gɛtɛ a dɔ̀ a tɛ Mose alan, <Gengyi in di nʋnkwarɩ fɔ, nan yasɩ yɩ n sa bɩfɩɩ-bɩfɩɩ baanɩ, 9 mɔ gengyi ì biri ɩ ba maakʋn, gɛ ì di mii-ise yii koro fɔ, yɩɩ bɛnɩ gɛtɛ bɛ yasɩ, gɛ bɛ ka bɛ bɛ da gisela sɩyɛɛ ɔfɔ gɛtʋnkwaa gii getenkʋn gba fɔ, nan biri n kʋla bɛ n ye dʋkɔ, fɔ nan birima bɛ n ba ɔkʋn gɛtɛ na tiri gɛtɛ wàà mɛ mɩɩn gɛsarakʋn fɔ gaanɩ.>

10 Yema bè di gɛ aa bɛsʋmalɛ ma aa bɛnɩ gɛtɛ a ka aakɛma-dɩrɛ, ma aa gʋlɔ-dɩrɛ a to bɛ a ya. 11 Oo Efonte, nʋn nmɩ aasaranyan miinyun-tiri. Nʋn aa bɛsʋmalɛ gɛtɛ bè serenti wɔ̀ lɛ boonyun-tiri. Yɛ ade yàà san gepe tɛ nmɩ aasaranyan ǹdò fɔ ete nyawɔ èè we miin gutunkoro.>>

Ɔya wʋtɔkɔ waanɩ fɔ, nmɩ Nehemiya n di egyu wɔ bʋkan bʋʋyaranlɛ.