Nehemiya 5

Nehemiya ɛ kpà beyen-welɛ

1 Wʋ bɛ ba gɛtɛ beteni ma bɔɔsɔ ɛbɛ be gyu gɛtʋrʋn bɔɔ bɛnɩ Yuda bete fɔ boo koro. 2 Bɛkɩ bɛ dɔ̀ alan, <<Ɛtɩ ma tii bebi-tenibi ma bɛnanɩbi tɩ̀ sɔ. Wù di gɛtɛ tàà wura afɩnaa, fɔ taà wura anyandilɛ ti di, fɔ taà wura nkpa.>>

3 Bedo bɛ dɔ̀ alan, <<Tɩ ka tii-ili yɩɩ ntʋnkwaa, ma tɩɩ wayɩn wo-ili, ma taakpaara tɩ sɩ̀ awʋba pɛgɛ ti wura afɩnaa dɩkpan dɩɩya nyawʋ waanɩ.>>

4 Gɛ bedo mɔ bɛ dɔ̀ alan, <<Tɩ lwa gɛ sɩka gba tɩ ka ti le tɩɩ ntʋnkwaa ma tɩɩ wayɩn wo-ili yii gutoro tɩ tɛ egyu-dɩrɛ. 5 Nkele, ma gɛtɛ ɛtɩ ma ɛbɛ tì di gɛ nkalan-kɩlɩn gba, gɛ tii bebi mɔ bè we anlɛ ɛbɛ mɔ booyo ɛbɛ gba fɔ, wù di gɛtɛ tàà ka tii bebi tɩ mɛ bɛdɩ̀. Tɩɩ bebi-nanɩbi bɛkɩ gba be were gyu gɩdɩ̀ gaanɩ, mɔ tɩn ma ɔkɛma wʋkɩ, yema tii-ili yɩɩ ntʋnkwaa, ma tɩɩ wayɩn wo-ili i biligi bɛkɩ booyo.>>

6 Gɛtɛ na nʋn bɔɔ gɛtʋrʋn, ma baade-tùlɛ nyayɩ fɔ, na ka owurufa na kààrà. 7 Gɛtɛ na sa amɩnlɛ gɛlɛ gaade nyayɩ yii koro na were fɔ, na tin bengyebi fɔ ma bɛndɩrɛbi fɔ dɩpwɛ, gɛ na dɔ̀ bɛ alan, <<Ɩ nyɩ ɛyɩ gbagba yɩɩ bɛnɩ alɛ be le butu bɛ gyaga anyan-lwalɛ fɔ yii koro!>> Okoro na kpèlè getuma-dɩrɛ gɛtɛ nan ka n tabʋrʋ gɛlɛ gaade fɔ, 8 gɛ na dɔ̀ alan, <<Tɩ sa aniya ti to tɩɩ bɛnɩ Yuda bete gɛtɛ bɩfɩɩ-fon bʋ se fɔ ti ye baakʋn. Gɛ nkele ɛyɩ ii fu yɩɩ bɛnɩ ɩ tɛ tɩ tàà biri ti se!>> Gɛ be tin boo-inyun, yema ben we ade gɛtɛ baà dɔ̀.

9 Gɛ na dɔ̀ bɛ alan, <<Ade gɛtɛ ɩɩ mɛ lɛ ɩɩn kɔlɔ. Anʋn yii koro gɛ in serenti Wurubwarɛ, fɔ tɩɩ bɛkyʋnlɛ bɛ kara wura osele wʋkɩ bɛ mʋmwa tɩ? 10 Nmɩ, ma mɩɩn bɛnɩ, ma mɩɩn bɛsaranyan mɔ tɩɩ lwa bɛnɩ fɔ kɔba ma anyandilɛ de! Ɩ yɛ tàà kere butu bʋʋ gɛgyaga baade fɔ tɩ ya! 11 I birima bɔɔ ntʋnkwaa, ma bɔɔ wayɩn wo-ili, ma boo-ilife yii-ili, ma baakpaara, ma butu gɛtɛ ɩ gyaga baanyan-lwalɛ yii koro fɔ, ma anyan yaabi, ma wayɩn-fon, ma bʋnɔ fɔ ɩ tɛ bɛ bilenten!>>

12 Gɛ bengyebi fɔ ma bɛndɩrɛbi fɔ alan, <<Taà birima baanyan tɩ tɛ bɛ, gɛ tɩn nan ni lila gɩnyankɩ ti ye baakʋn. Taà mɛ anlɛ gɛtɛ a dɔ̀ fɔ.>>

Gɛ na kpèlè gedi gɩɩ bɛtɛlɛ fɔ na tuma, gɛ na yɛ bengyebi ma bɛndɩrɛbi fɔ bɛ kan ntam alɛ baà di ade gɛtɛ bɛ dɔ̀ bɛ sɩ̀ fɔ yii koro. 13 Nmɩ mɔ ke na kpʋkpa ayanbi gɛtɛ ɩ̀ kyaga ma mɩɩn gɛgba fɔ, gɛ na dɔ̀ alan, <<Gengyi ɛnɩ ɛkɩ en di ade-dɔ̀lɛ-sɩ̀lɛ nyayɩ yii koro fɔ, anlɛ gɛ Wurubwarɛ ɛɛ̀ kpʋkpa wɔ dɩkpaara ma wanyan gɛtɛ ɛ̀ ba fɔ. Wurubwarɛ ɛ kpʋkpa gɛlɛ gɩɩnɩ ɛtɔkɔ, fɔ ɛ̀ɛ̀ sara alɔ-kwaa!>>

Ɛwʋ gɛ bɛnɩ dikpi fɔ powu be yera alan, <<Wàà ba gɛlɛ! Gɛ be sila Yahwe.>> Gɛ be di baade gɛtɛ bɛ dɔ̀ bɛ sɩ̀ fɔ yii koro.

14 Nkele mɔ, ye egyu-dɩrɛ Aritaserisi gɩkyan dikpilinfɛ gɛtɛ bɛ ka mɩ bɛ sɩ̀ Yuda gɩfɩɩ gɩɩnyalɛ ma sere gɩkyan dikpilin ma fwo-nyɔɔfɛ, gɛtɛ wù di mɩɩn gɩkyan fwo gɩnyɔɔfɛ fɔ, nmɩ oo, mɩɩndɩrɛ ɛbɛ oo, taanɩ ɛkɩ en di anyandilɛ gɛtɛ be yo bɛ tɛ gɩfɩɩ gɩɩnyalɛ fɔ. 15 Mɔ Gɩfɩɩ gɩɩnyalɛ-kamasɛ gɛtɛ ɛ sara pɛgɛ na sara fɔ, ɛ ka ditola-dɩrɛ e tola gɩfɩɩ fɔ. Bee to sɩka-fututu wabi akpilin anyɔɔ (40), fɩya ma anyandilɛ ma bʋkan be ye bɛnɩ fɔ baakʋn. Bɔɔ bɛndɩrɛbi gba bee di bɛnɩ fɔ boo koro. Mɔ Wurubwarɛ geserenti gii koro, nmɩ bɩrɛ mɩn mɛ gɛlɛ. 16 Mɔ fɔ, na ka koro na tɛ ɔpɔrɩ fɔ wuu gebiri-sere. Mɩɩn bɛnɩ fɔ powu be tuma dʋkɔ bɛɛ mɛ ɔpɔrɩ fɔ wʋʋ gʋtʋn. Gɛ tin gye gɛtʋnkwaa gɩkɩ sɩ̀ tɛ koro.

17 Ɛwʋ gɛtɛ wù biri wʋ fɩya fɔ, na tɛ Yuda bete ma bɔɔ bɛndɩrɛbi akpilin kwarankɩ ma fwo (150) anyandilɛ, fɩya ma bendeni gɛtɛ be ye bɩfɩɩ-bɩfɩɩ gɛtɛ bu silin tɩ bu tuma, gɛ bɛ ba taakʋn fɔ. 18 Ɛkwɔ-teni ɛkɩ, ma bɛyɛran ma ayo, ma bɛkɔrɔkɔ gɛ bɛɛ ka be kpele anyandilɛ mɩɩn dɩkpaara daanɩ duwi-kamasɛ. Gɛ awi fwo-kamasɛ fɔ, n te se bʋkan kperen-kperen kpekpesi. Ma nyayɩ powu gba fɔ, min lila anyandilɛ gɛtɛ bee yo bɛ tɛ gɩfɩɩ gɩɩnyalɛ fɔ gba, yema na we gɛtɛ ditola-dɩrɛ dɩ̀ gyaga bɛnɩ fɔ boo koro.

19 Oo miin Wurubwarɛ, hira mɩ maade-kpara powu gɛtɛ na mɛ na tɛ bɛnɩ nyabɛ lɛ yii koro.