Nehemiya 13

Gefoma gaade-kurumakyɛɛ gɛtɛ Nehemiya ɛ ka ɛ ba

1 Duwi dɩtɔkɔ ke gɛtɛ bɛ kalan Mose Gɩkpa fɔ bɛ tɛ bɛnɩ fɔ, be we gɛtɛ bɛ ŋwara alɛ Amoni-te ɛkɩ abɛɛ Moba-te ɛkɩ ɛ kara fɩya ma Wurubwarɛ bɛnɩ fɔ kpakpaakpa. 2 Yema bɛn tɛ Isareli bete anyandilɛ abɛɛ butu, ɔkʋna gɛtɛ be ye Egyipiti fɔ, mɔ fɔ, bɛ hayɩ gɛ Balaam gɛtɛ ɛ̀ɛ̀ fwala bɛ. Mɔ Tii Wurubwarɛ e fi gɛfwala fɔ ɛ mɛ gehira. 3 Gɛtɛ Isareli bete fɔ bɛ nʋn ose nyawʋ fɔ, be berema bendeni powu gɛtɛ bɛ̀ sa baanɩ fɔ.

4 Pɛ ade nyayɩ yàà bɛ̀ ba fɔ, bɛ ka gedi gɩɩtɛlɛ Eliyasibi bɛ sɩ̀ gɛtɛ ɛ̀ɛ̀ nya Wurubwarɛ dɩkpaara daakwo-sɩ̀lɛ anyan fɔ yii koro. Gɛtɛ ɛbɛ ma Tobiya boo getite gɩ̀ ba ɔsɛ okoro, 5 ɛ ka dikwo-yɛrɛlɛ gɛtɛ nafɔ bɛɛ tɩ̀ sɩ̀ gedi gɩɩ gɛtɛ̀ gaanyan yaabi fɔ, ma olifwi, ma bɛtasa ma bɛkɔpʋ, ma anyan yaabi yii dikpen-fwofɛ daanyan-tɛlɛ, ma wayɩn bʋkan-fon, ma bʋnɔ gɛtɛ ì di Lefi bete, ma ɩnʋn yɩɩ bɛnʋmalɛ, ma otunu wʋʋ bɛdɩyɛlɛ booyo fɔ, fɩya ma gedi gɩɩ bɛtɛlɛ boo gedikʋn fɔ ɛ tɛ wɔ.

6 Ɔkʋna gɛtɛ nyayɩ ii sere fɔ, nn ma Yerusalem, yema Babilon wogyu-dɩrɛ Aritaserisi gɩkyan dikpilin ma fwo-nyɔɔfɛ gaanɩ fɔ, na biri na san wakʋn. Ɔya bɛrɛɛ wʋkɩ wʋʋ gama fɔ, na lila wɔ osele, 7 gɛ na biri na ba Yerusalem. Ɛwʋ gɛ na nʋn ade-karan-karan gɛtɛ Eliyasibi ɛ mɛ. Ɛ pɩna Wurubwarɛ dɩkpaara fɔ dii dikwo dɩkɩ ɛ tɛ Tobiya ɛ̀ sa daanɩ. 8 Na ka owurufa na kààrà, gɛ na tiri Tobiya gɩnyan-kamasɛ na fun na fɩna okòro. 9 Ɛwʋ gɛ na yɛ bɛ kpa akwo fɔ dɩdɩɩ, gɛ na birima Wurubwarɛ dɩkpaara daanyamanyan, ma oli waanyan yaabi, ma olifwi fɔ na sɩ̀ yaanɩ.

10 Na biri na nʋn ke gɛtɛ Lefi bete boo gedikʋn gɩn taa kya bɛ gʋlɔ, gɛlɛ wuu koro Lefi bete fɔ, ma ɩnʋn yɩɩ bɛnʋmalɛ boo begyegeyelɛ gɛtɛ bɛɛ mɛ gʋtʋn fɔ baanɩ-kamasɛ ɛ ma gyu woli wʋʋ bʋfʋn. 11 Okoro na tabʋrʋ na sere bɛndɩrɛbi fɔ alan, <<Anʋn yii koro gɛ ɩ gbɛlɩ Wurubwarɛ Dɩkpaara fɔ?>> Ɛwʋ gɛ na kpèlè bɛ powu na tuma, gɛ na birima ɛkamasɛ na ba wɔ gʋtʋn gaanɩ.

12 Nyawʋ wʋʋ gama fɔ, Yuda-nɩ-kamasɛ ee tiri wanyan yaabi yii dikpen-fwofɛ, ma bʋkan-fon buu dikpen fwofɛ, ma bʋnɔ buu dikpen-fwofɛ ɛ ba anyan yɩɩ gɛsɩ̀kʋn yaakwo fɔ yaanɩ. 13 Na ka anyan yɩɩ gɛsɩ̀kʋn yaakwo fɔ na sa gedi gɩɩtɛlɛ Selemiya, ma ewùlàlɛ Sadoki, ma Lefi-te ɛkɩ gɛtɛ bee kpèlè wɔ Pedaya fɔ bɔɔ gʋlɔ. Na tiri Hanan gɛtɛ wote n di Sakuri, gɛ wotu n di Mataniya fɔ gɛtɛ ɛ̀ɛ̀ tɩ̀ kpà bɛ, yema bɛ̀ ba nʋnkwarɩ. Bɔɔ gʋtʋn n di gɛtɛ bàà tì yo anyan-tɛlɛ fɔ bɛ tɛ bɔɔwɔlɔn ɛbɛ.

14 Oo miin Wurubwarɛ, kʋna ade nyayɩ gɛtɛ na mɛ lɛ, gɛ kara finla ade-kpara gɛtɛ na mɛ na tɛ awɔ miin Wurubwarɛ aa dɩkpaara ma aa dɩsʋma dɩɩ gʋtʋn fɔ.

15 Awi ɩtɔkɔ yaanɩ fɔ, na we bɛnɩ Yuda gɩfɩɩ gaanɩ gɛtɛ bɛɛ nyɩma wayɩn wabi Ditunawi daanɩ, gɛ bɛɛ ban-ban anyan yaabi bɛ gyaga akpɔŋɔ-tɩtɩɩ yii koro, fɩya ma wayɩn wabi, ma figi wabi, ma atola kperen-kperen gɛtɛ bɛɛ ka bɛ ba Yerusalem Dituna-wi daanɩ. Gɛ na sʋ bɛ gɛtɛ bɛ kara fu anyandilɛ duwi dɩtɔkɔ daanɩ. 16 Tire bete gɛtɛ bɛ sara Yerusalem fɔ mɔ bɛɛ ka bɛsʋ̀n ma anyan kpekpesi be be fu bɛ tɛ Yuda bete gɛtɛ bɛ̀ sa Yerusalem ditele daanɩ fɔ, Dituna-wi daanɩ. 17 Na tabʋrʋ na tù Yuda bɛnɩ gɛtɛ bɛ̀ ba gebù fɔ alan, <<Anʋn yii duyu-kɛma daade gɛ ɩɩ mɛ lɛ? Ɩɩ sa Duwi-tunalɛ fɔ dɩdɩɩ! 18 Nka ade-kɩlɩn nyayɩ gɛ tiitu ɛbɛ bɛ mɛ, gɛ tii Wurubwarɛ ɛ yɛ dɩyɩyɛ dɩ ba ɛtɩ ma ditele nyadɩ tii koro fɔ? Gɛtɛ ɩ sa dɩ dɩdɩɩ lɛ, ɩɩ yɛ Wurubwarɛ wowurufa wʋʋ tɔ Isareli bete boo koro wʋ fɩya.>>

19 Gɛtɛ Duwi-tunalɛ fɔ dɩɩya wʋʋ nɩma fɔ, n tɛ yɛ bɛɛ tan ɩpʋnʋ fɔ, bɛn nan tana yɩ ma sere ɔkʋna gɛtɛ duwi-tunalɛ fɔ daà were. Na tiri mɩɩn bɛnɩ gɛtɛ ɛtɩ ma ɛbɛ tɩɩ mɛ dɩsʋma daade fɔ baanɩ bɛkɩ na sɩ̀ otunu gɛtɛ ɛnɩ ɛkɩ ɛ kara ka ditola dɩkɩ e gyu ditele fɔ daanɩ duwi-tunalɛ fɔ daanɩ. 20 Gɩyɛ gii bedilɛ ma anyan kperen-kperen yii befulɛ bɛɛ wɔ bɛ sara Yerusalem wokòro odente dɩkɩlɩn dɩkɩ abɛɛ dɩnyɔɔ dɩkɩ. 21 Mɔ na tabʋrʋ na sʋ bɛ, gɛ na lila bɛ alan, <<Anʋn yii koro gɛ ɩɩ wɔ ɩ sara ɔpɔrɩ fɔ wʋʋpɩ odente? Gengyi ì biri ɩ mɛ gɛlɛ fɔ, nan gye yɩ n tan!>> Ye duwi dɩtɔkɔ san fɔ, ben mini biri sara ɔpɔrɩ fɔ wʋʋpɩ duwi-tunalɛ daanɩ. 22 Ɛwʋ gɛ na yɛ Lefi bete fɔ bɛ ma kpa koro dɩdɩɩ, fɔ bàà ma dɩyɛ itunu fɔ, gɛtɛ wàà yɛ duwi-tunalɛ fɔ dàà mɛ fɩrɩnfɩrɩn.

Oo mɩɩn Wurubwarɛ, kʋna miin koro ade nyayɩ mɔ ke yaanɩ, fɔ àà ka aa gelen-dɩrɛ fɔ we miin gutunkoro!

23 Ɛwʋ gɛtɛ wʋ̀ biri wʋ̀ fɩya fɔ, na we Yuda bete gɛtɛ be to bɛna be ye Asidodi, ma Amon, ma Mowabi bɛnanɩ baanɩ. 24 Boo bebi ɔfan bilin bɛɛ dɔ̀ gɛ Asidodi bete boo ginde, abɛɛ bɛnɩ-fon boo ginde. Bɛn taa talɩ bɛ dɔ̀ Yuda ginde. 25 Na tabʋrʋ na tù bɛ, gɛ na fwala bɛ. Na tiba beteni fɔ baanɩ bɛkɩ, gɛ na wɔrɔ bɛ ayu kɔnɩ-kɔnɩ. Na yɛ bɛ bɛ kan ntam Wurubwarɛ diyere daanɩ alan, <<Wun di gɛtɛ yàà ka yii bebi-nanɩbi ɩ tɛ boo bebi-tenibi bàà to gɩna, gɛ wun di gɛtɛ yàà to boobi-nanɩbi gɩna ɩ tɛ yii bebi abɛɛ ɛyɩ gbagba! 26 Nka bɛnanɩ-kɩlɩn nyabɛ boo geto na yɛ gɛ Isareli wogyu Solomon ɛ nʋ̀n ade-kpen yaanɩ fɔ? Bɩfɩɩ powu baanɩ fɔ, egyu-dɩrɛ ɛkɩ ɛn nɩma wɔ. Wo Wurubwarɛ e len wade, gɛ ɛ mɛ wɔ egyu-dɩrɛ ɛ tɛ Isareli powu. Mɔ bendeni-nanɩ fɔ bɛ yɛ wɔ ɛ mɛ ade-kpen. 27 Wù di gɛtɛ tàà sara tɩ nya yɩ gɛtɛ yàà mɛ duyu-kɛma-dɩrɛ daade nyayɩ alɛ ii to bendeni bɔɔ bɛnanɩ gɩna?>>

28 Na berema Yoyada wobi-tenibi ɛkɩ gɛtɛ wotu n di Eliyasibi gɛtɛ ɛwɔ n di gedi gɩɩtɛlɛ ɛndɩrɛ, gɛ wolete n di Horon-te gɛtɛ bee kpèlè Sanibalati fɔ na ye maakʋn.

29 Oo miin Wurubwarɛ, we bɛnɩ nyabɛ gɛtɛ bɛ sa gedi gɩɩ bɛtɛlɛ fɔ bɔɔ gʋtʋn dɩdɩɩ, gɛ bɛ sa gedi gɩɩ bɛtɛlɛ ma Lefi bete boo dikola gɛtɛ a tà ma ɛbɛ fɔ dɩdɩɩ lɛ.

30 Okoro na kpa gedi gɩɩ bɛtɛlɛ fɔ, ma Lefi bete fɔ dɩdɩɩ-kamasɛ gɛtɛ di ye gɩlan, gɛ dɩ kya bɛ fɔ, gɛ na tɛ bɛ gʋtʋn, ɛkamasɛ ma wɔ gʋtʋn-mɛlɛ. 31 Gɛlɛ ke gɛ na pɩna koro gɛtɛ n tɛ tɩ tɛ bʋtan ma oli waanyan-gyangbasɛlɛ ɔya gɛtɛ bɛ sɩ̀ fɔ.

Oo miin Wurubwarɛ, kʋna miin koro, wàà san gepe tɛ mɩ.