1 Bɛnɩ fɔ powu be tuma anlɛ ɛnɩ-kɩlɩn, dɩkpaara gɛtɛ dɩ̀ sa Butu Buutunu wʋʋpɩ fɔ daanɩ. Ɛwʋ gɛ bɛ dɔ̀ ɛŋwaralɛ Esira alɛ ɛ ka Mose Wose wʋʋ Gɩkpa gɛtɛ Yahwe ɛ ŋwara ɛ tɛ Isareli bete fɔ ɛ ba.

2 Okoro ebon-kwarankɩfɛ wo duwi-gyangbasɛlɛ daanɩ fɔ, gedi gɩɩtɛlɛ Esira ɛ ka Ose wʋʋ Gɩkpa fɔ ɛ ba bɛnɩ dɩtɩnpan fɔ bɔɔ bʋnʋn. Beteni, ma bɛnanɩ, ma bebi powu gɛtɛ baà talɩ bɛ nʋn ade yaanɩ fɔ be tuma dʋkɔ. 3 E yela dɩkpaara fɔ daanɩ, Otunu gɛtɛ bee kpèlè Butu Buutunu fɔ wʋʋ bʋnʋn ɛ kalan Ose fɔ ye gagyɩgyan ma sere ofila-kenken beteni, ma bɛnanɩ, ma ɛbɛ gɛtɛ baà talɩ bɛ nʋn ade yaanɩ fɔ bɔɔ bʋnʋn. Gɛ bɛnɩ fɔ powu be ken aten gepepe bɛɛ nʋn ade gɛtɛ Ose wʋʋ Gɩkpa fɔ gɩɩ dɔ̀ fɔ.

4 Ewùlàlɛ Esira ɛ ma yela omini-tɔlɛ wʋkɩ gɛtɛ bɛ ka iyon bɛ gbɛrɛ tɛ gɛlɛ gaade ɩtɔkɔ duwi dɩtɔkɔ fɔ wuu koro. Matitiya, ma Sema, ma Anaya, ma Uriya, ma Hilikiya ma Maaseya bè yela wologyi-lɔ. Gɛ Pedaya, ma Misayeli, ma Malikiya, ma Hasum, ma Hasibadana, ma Sekariya, ma Mesulam mɔ bè yela wɔ dɩbɩyan-lɔ.

5 Esira e tirima gɩkpa fɔ gɛtɛ ɛkamasɛ ee we wɔ, yema ɛwɔ è yela gatala da ɛbɛ powu. Gɛtɛ e tirima gɩkpa fɔ, bɛnɩ dɩtɩnpan fɔ powu bɛ tɔ be yela. 6 Ɛwʋ gɛ Esira e sila Yahwe, Wurubwarɛ-kpatakpɩrɩ fɔ. Gɛ bɛnɩ dɩtɩnpan fɔ powu bɛ bʋma baalɔ gatala, gɛ be yera alan, <<Wʋ ba gɛlɛ! Wʋ ba gɛlɛ!>> Ɛwʋ gɛ bɛ waran be kura, gɛ bɛ ka bʋnʋn be tin gɛtʋnkwaa, gɛ bɛ sʋma Yahwe.

7 Ɛnɩ-kamasɛ e yela wo geyelakʋn, gɛ gedi gɩɩ bɛtɛlɛ Yesuwa, ma Bani, ma Serebiya, ma Yamin, ma Akubi, ma Sabetayi, ma Hodiya, ma Maaseya, ma Kelita, ma Asariya, ma Yosabadi, ma Hanan, ma Pelaya be tiri Ose fɔ waanɩ bɛ tɛ bɛnɩ fɔ. 8 Bɛ kalan Wurubwarɛ Wose fɔ be ye gɩkpa gaanɩ, gɛ be biri be tiri waanɩ gepepe*, gɛtɛ bɛnɩ fɔ powu bàà wura nʋn waanɩ gepe.

9 Ɛwʋ gɛ gɩfɩɩ gɩɩnyalɛ Nehemiya, ma gedi gɩɩtɛlɛ ma gɩkpa gɩɩŋwaralɛ Esira, ma Lefi bete gɛtɛ bee wùlà bɛnɩ fɔ ade fɔ bɛ dɔ̀ bɛnɩ fɔ powu alan, <<Duwi nyadɩ dì di fɩrɩnfɩrɩn tɛ Yahwe, yii Wurubwarɛ fɔ. Ɩ kara tʋrʋn, gɛ ɩ kara wula.>> Yema ɔkʋna gɛtɛ bɛnɩ fɔ powu bɛ nʋn Ose fɔ waade-dɔ̀lɛ fɔ, be gyu gewula. 10 Ɛwʋ gɛ Nehemiya ɛ dɔ̀ ɛ sa bɛnɩ fɔ alan, <<Ɩ san fɔ yàà ma len anyandilɛ-kpara i di, fɔ yàà nyʋn wayɩn bʋkan ma ɔsɛ, fɔ yàà tɛ ɛbɛ gɛtɛ ben kpele gɩnyankɩ fɔ. Duwi nyadɩ dì di gɛ Tiifonte duwi-fɩrɩnfɩrɩn. Ɩ kara bɔnkyɔn, yema ɔsɛ gɛtɛ ii wura i ye Yahwe wakʋn fɔ n di yɩɩkɛma.>>

11 Lefi bete fɔ bɛ dɔ̀ bɛ sa bɛnɩ fɔ powu alan, <<Ɩ kʋn, yema duwi nyadɩ dì di duwi-fɩrɩnfɩrɩn. Ɩ kara sara dɩkpʋkpʋ daanɩ.>>

12 Ɛwʋ gɛ bɛnɩ fɔ powu bɛ da, gɛ bɛ ma di gɛ bɛ nyʋn, gɛ bɛ tɛ ɛbɛ gɛtɛ ben kpele fɔ, gɛ be di ɔsɛ-dɩrɛ. Yema bɛ nʋn anyʋn-gyebi gɛtɛ be tiri be wùlà bɛ fɔ yaanɩ gepepe.

13 Ebon fɔ duwi-nyɔɔfɛ daanɩ fɔ, akpaara-akpaara yɩɩ bɛndɩrɛ ma gedi gɩɩ bɛtɛlɛ ma Lefi bete fɔ bɛ ma tuma ewùlàlɛ Esira wakʋn gɛtɛ bàà kasɩ Ose fɔ waade-wùlàlɛ fɔ. 14 Ɛwʋ gɛ be we Ose gɛtɛ Wurubwarɛ ɛ dama Mose wo koro ɛ tɛ bɛ fɔ waanɩ gɛtɛ wù di gɛtɛ Isareli bete bàà tɔ bɛ san bɛ ma sara ɩpanpan yaanɩ, ɩpanpan yɩɩsɛ wuu gedi wuu duwi fɔ daanɩ, ebon kwarankɩfɛ wanɩ, ɔya gɛtɛ bee di ɩpanpan yaawi fɔ. 15 ✝Fɔ bàà dɔ̀, fɔ bàà yasɩ atele yaanɩ ma Yerusalem alan, <<I ye ɩ san idon yaanɩ, fɔ yàà ma ka Olife wo-iyon gɛtɛ bɛ dɔ fɔ yaafa, abɛɛ ɛyɩ gɛtɛ i ye gɛ yaanyan fɔ, yii-itenbi ma afa, ma Miritilesi wafa, ma ibilifa, ma iyon kperen-kperen yaafa ɩ ba, fɔ tàà ka ti sere ɩpanpan, anlɛ gɛtɛ bɛ ŋwara bɛ sa Ose fɔ waanɩ fɔ.>>

16 Ɛwʋ gɛ bɛnɩ fɔ bɛ ma len itenbi fɔ bɛ bɛ mɛ ɩpanpan fɔ bɛ gyaga baakwo yaayu yii koro, ma baakpaara yaanɩ, ma Yahwe Dikwo fɔ daakpaara yaanɩ, ma dɩkpaara gɛtɛ dɩ̀ gbɛma Butu Buutunu fɔ daanɩ, ma ɛdɩ gɛtɛ dɩ̀ gbɛma Efrayim wotunu fɔ. 17 Bɛnɩ dikpi fɔ powu gɛtɛ be ye gisela gaanɩ bɛ ba fɔ, be sere ɩpanpan gɛ bɛ ma sara yaanɩ. Ye Nun wobi Yosuwa wawi yaanɩ bè sere duwi dɩtɔkɔ fɔ, Isareli bete ben di duwi-dɩrɛ anlɛ nya, gɛ wʋ mɛ ɛnɩ-kamasɛ ɔsɛ gepepe.

18 Gɛ duwi-kamasɛ, ye duwi-gyangbasɛ fɔ ma sere duwi-kurumakyɛɛ fɔ, Esira ɛɛ tɩ̀ kalan ade e ye Wurubwarɛ Wose wuu gɩkpa fɔ gaanɩ. Be di ɔsɛ awi kwarankɩ, gɛ duwi-nɩyɛfɛ fɔ daanɩ fɔ, be wura getuma-dɩrɛ anlɛ gɛtɛ Ose fɔ wuu wùlà fɔ.