Nehemiya 3

Yerusalem wɔpɔrɩ fɔ wuu beserelɛ

1 Gedi gɩɩtɛlɛ ɛndɩrɛ Eliyasibi, ma gedi gɩɩ bɛtɛlɛ-do fɔ na pɩna Bɛyɛran Bootunu fɔ na sere. Bɛ ka wʋ bɛ sa Wurubwarɛ gʋlɔ, gɛ bɛ sa wʋʋ-ɩpʋnʋ. Bɛ ka ɔpɔrɩ fɔ bɛ sa Wurubwarɛ gʋlɔ ka ma ye abansʋrʋ Akpilin-ton wɔpɩ, ka ma gyu Abansʋrʋ Hananeli. 2 Yeriko beteni be sere ɔpɔrɩ gɛtɛ wʋ̀ tɛrɛma fɔ, gɛ Imiri wobi-teni Sakuri na pɩna ɔpɔrɩ gɛtɛ wʋ̀ tɛrɛma Yeriko beteni booyo fɔ e sere.

3 Gɛ Hasenaa bebi-teni be sere otunu gɛtɛ bee kpèlè alɛ Ɛsʋ̀n Wotunu fɔ. Bɛ sa wʋʋ gatala giitunu-yon-fon, gɛ be sere itunu-yon-fon, gɛ bɛ sa wʋʋ-ɩpʋnʋ, ma otunu waawɔrɔnyan, ma wawɔrɔnyan-tanlɛ fɔ. 4 Uriya wobi Meremoti gɛtɛ wotu n di Akosi fɔ na pɩna ofèn gɛtɛ wʋ̀ tɛrɛma fɔ. Wɔ gama fɔ Berekiya wobi Mesulam, gɛtɛ wotu n di Mesesabeli mɔ na pɩna ofèn gɛtɛ wʋ̀ tɛrɛma fɔ. Gɛ Baana wobi Sadoki mɔ ɛ pɩna ofèn gɛtɛ wʋ̀ tɛrɛma fɔ. 5 Tekowa bete na pɩna ɔpɔrɩ fɔ wuufèn gɛtɛ wʋ̀ tɛrɛma fɔ. Mɔ boo ditele dɩɩ bɛnɩ gɛtɛ bɛ̀ ba gingyebi fɔ, bɛn warama koro tɛ bɔɔ bɛnɩ gɛtɛ bɛɛ nya gʋtʋn fɔ gii koro fɔ.

6 Paseya wobi Yoyada ma Besodeya wobi Mesulam bɛ pɩna Otunu-kuba fɔ. Be sere itunu-yon, gɛ bɛ sa yɩɩ-ɩpʋnʋ, ma otunu waawɔrɔnyan, ma waawɔrɔnyan-tanlɛ fɔ. 7 Gibeyon ma Misipa bete, ma Gibeyon-te Melatiya, ma Meronoti-te Yadon na pɩna ɔpɔrɩ fɔ wuufèn gɛtɛ wʋ̀ tɛrɛma fɔ. Atele nyayɩ ɩ̀ sa Efrati Getu-fèn gɩɩ bɛnyalɛ bɔɔ gatɩn. 8 Haraya wobi Usiyeli, gɛtɛ è di sɩka-sɩya gʋtʋn gɩɩmɛlɛ fɔ na pɩna ofèn gɛtɛ wʋ̀ tɛrɛma fɔ. Gɛ Hananiya gɛtɛ ɛɛ mɛ lafɩnta fɔ na pɩna ɛwʋ gɛtɛ wù tɛrɛma fɔ. Bɛ pɩna ɔpɔrɩ fɔ bɛ ma sere ɔkʋn gɛtɛ bee kpèlè Ɔpɔrɩ ma Otin fɔ. 9 Huri wobi Refaya gɛtɛ è di Yerusalem wɔlanlanbi wʋʋfan wʋkɩ wuugyegeyelɛ fɔ mɔ na pɩna ofèn gɛtɛ wʋ̀ tɛrɛma fɔ. 10 Wʋʋ gama fɔ, Arumafi wobi Yedaya mɔ ɛ pɩna ɔkʋn gɛtɛ wʋ̀ sa wɔ dɩkpaara diifèn-do fɔ. Gɛ Asabineya wobi Atusi ɛ pɩna ɔpɔrɩ fɔ wuufèn gɛtɛ wʋ̀ tɛrɛma fɔ. 11 Harim wobi Malikiya, ma Pahati-Mowabi wobi Hasubi bɛ pɩna ɔpɔrɩ fɔ wuufèn wʋkɩ, ma dikwo-tɔlɛ gɛtɛ bee kuma boroboro daanɩ fɔ. 12 Halohesi wobi Salum, gɛtɛ è di Yerusalem wɔlanlanbi wʋʋfan fɔ wuugyegeyelɛ fɔ bebi-nanɩ bɛ kpà wɔ, gɛ bɛ pɩna ofèn gɛtɛ wʋ̀ tɛrɛma fɔ.

13 Hanun ma Sanowa bete na pɩna Dɩtagba Diitunu fɔ. Bɛ pɩna wʋ be sere, gɛ bɛ sa wʋʋ-ɩpʋnʋ, ma waawɔrɔnyan, ma waawɔrɔnyan-tanlɛ fɔ. Gɛ bɛ pɩna ɔpɔrɩ fɔ gɛtɛ waabo wʋ̀ ba bemeta nkpɩn bʋnyɔɔ ma akpilin anyɔɔ ma fwo (450) ma sere Ditonton Diitunu wʋʋpɩ.

14 Rekabi wobi Malikiya, gɛtɛ è di Beti-Akerem wɔlanlanbi wʋʋnyalɛ fɔ na pɩna Ditonton Diitunu fɔ. E biri sere wʋ, gɛ ɛ sa wʋʋ-ɩpʋnʋ, ma waawɔrɔnyan, ma waawɔrɔnyan-tanlɛ fɔ.

15 Koli-Hose wobi Salum, gɛtɛ è di Misipa wɔlanlanbi wʋʋnyalɛ fɔ na pɩna Ditiribun Diitunu fɔ. Ɛ pɩna wʋ e sere, gɛ e tin wʋ, gɛ ɛ sa wʋʋ-ɩpʋnʋ, ma waawɔrɔnyan, ma waawɔrɔnyan-tanlɛ fɔ. E biri ɛ pɩna Silowam Ditiribun dɩɩpɔrɩ gɛtɛ wʋ̀ gbɛma egyu-dɩrɛ dɩkpaarabi fɔ ma sere akyikya-warankʋn gɛtɛ ɩ waran ɩ ma ye ɔkʋn gɛtɛ bee kpèlè Dafidi Ditele fɔ. 16 Wʋʋ gama fɔ, Asibuki wobi Nehemiya, gɛtɛ è di Beti-Suri wɔlanlanbi wʋʋfan wʋʋnyalɛ fɔ na pɩna ɛ ma sere Dafidi wodu wʋʋ bɛnɩ bɔɔ bɩsàn buufen-do, ka ma ye butu buu geyelakʋn gɛtɛ bɛ mɛ fɔ, ma bɩtà bʋʋ bɛtàlɛ-dɩrɛ bɔɔ gɛsarakʋn.

17 Lefi bete gɛtɛ bɛ̀ sa Bani wobi Remu gatɩn fɔ na pɩna ɔpɔrɩ fɔ wuufèn gɛtɛ wʋ̀ tɛrɛma fɔ. Gbɛma wɔ fɔ, Asabiya gɛtɛ è di Keyila wɔlanlanbi wʋʋfan wʋkɩ wʋʋnyalɛ fɔ na pɩna ɔpɔrɩ fɔ wɔlanlanbi boo diyere daanɩ. 18 Wɔ gama fɔ, gɩfɩɩ gɩɩ bɛnɩ gɛtɛ bɛ̀ sa Henadadi wobi Bafayi gɛtɛ è di Keyila dikpi ɔfan-nyɔɔfɛ wʋʋnyalɛ fɔ gatɩn fɔ na pɩna. 19 Wɔ gama fɔ, Yesuwa wobi Eseri, gɛtɛ è di Misipa ditele dɩɩnyalɛ fɔ na pɩna ɔpɔrɩ fɔ ye wʋʋ gɩbʋnlɛ gɛtɛ gɩ̀ sa akpanyan yɩɩ gɛsɩkʋn giifèn-do fɔ ma sere ɔpɔrɩ fɔ wʋʋ kɔna anɩ. 20 Wɔ gama fɔ, Sabayi wobi Baruki na pɩna ofèn gɛtɛ wʋ̀ tɛrɛma fɔ, ye ɔpɔrɩ fɔ wʋʋ kɔna anɩ ma sere gedi gɩɩtɛlɛ ɛndɩrɛ Eliyasibi dɩkpaara diitunu. 21 Wɔ gama fɔ, Uriya wobi Meremoti gɛtɛ è di Akosi wɔnana fɔ na pɩna ɔpɔrɩ fɔ ye Eliyasibi dɩkpaara diitunu ma sere dɩkpaara fɔ dii getenkʋn.

22 Wʋʋ gama fɔ, ɩlanlan gɛtɛ i silin Yerusalem i tuma fɔ yii gedi gɩɩ bɛtɛlɛ na pɩna ɔpɔrɩ gɛtɛ wʋ̀ tɛrɛma fɔ. 23 Bɔɔ gama fɔ, Benyamin ma Hasubi na pɩna ɔpɔrɩ fɔ wuufèn gɛtɛ wʋ̀ sa bɔɔ dɩkpaara dɩɩ bʋnʋn-bʋnʋn fɔ. Bɔɔ gama fɔ, Maaseya wobi Asariya, gɛtɛ è di Ananiya wɔnana fɔ na pɩna ofèn gɛtɛ wʋ̀ gbɛma wɔ dɩkpaara dɩɩ gɩlan fɔ. 24 Wɔ gama fɔ, Henadadi wobi Binuwi na pɩna ofèn gɛtɛ wʋ ka wu ye Asariya dɩkpaara ma sere ɔpɔrɩ fɔ wʋʋ kɔna anɩ fɔ. 25 Usayi wobi Palali na pɩna e ye ɔpɔrɩ fɔ wʋʋ kɔna anɩ ka ma sere dikwo-tɔlɛ gɛtɛ dɩ̀ sa digyu-kpaara dɩɩpɩ, gbɛma bɛdɩyɛlɛ bɔɔ dɩkpaara fɔ. 26 Gɛ Dikwo-dɩrɛ dɩɩ gʋtʋn gɩɩ bɛmɛlɛ gɛtɛ bè si Ofeli wodonbi wuu koro fɔ mɔ bɛ pɩna ɔpɔrɩ fɔ bɛ ma sere ɔkankɩ gɛtɛ wù di Butu Buutunu wuufèn-do gɛtɛ wʋ̀ sa ofila wʋʋ gɛtàkʋn wʋʋ gɩlan ma dikwo-tɔlɛ dɩɩpɩ fɔ. 27 Bɔɔ gama fɔ, Tekowa bete na pɩna ofèn gɛtɛ wu ye dikwo-tɔlɛ fɔ dɩɩpɩ fɔ, ka ma sere Ofeli Wɔpɔrɩ wʋʋpɩ.

28 Gedi gɩɩ bɛtɛlɛ na pɩna Dibengyi Diitunu gatala wʋʋ gɩlan fɔ. Ɛkamasɛ ɛ pɩna wɔ dɩkpaara dɩɩ bʋnʋn-bʋnʋn. 29 Bɔɔ gama fɔ, Imeri wobi Sadoki na pɩna ɔpɔrɩ fɔ gɛtɛ wʋ̀ sa wɔ dɩkpaara diifèn-do fɔ. Wɔ gama fɔ, Sekaniya wobi Semaya, gɛtɛ è di ɛdɩyɛlɛ Ofila wʋʋ Gɛtàkʋn Wuutunu fɔ mɔ ɛ pɩna ɔpɔrɩ fɔ. 30 Wɔ gama fɔ, Selemiya wobi Ananiya, ma Salafi wobi-kooronfɛ gɛtɛ bee kpèlè wɔ Hanun fɔ mɔ na pɩna ofèn wʋkɩ. Bɔɔ gama fɔ, Berekiya wobi Mesulam na pɩna ofèn gɛtɛ wʋ̀ sa wɔ dɩkpaara diifèn-do fɔ. 31 Wʋʋ gama fɔ, Malikiya gɛtɛ è di sɩka-sɩya gʋtʋn gɩɩ bɛmɛlɛ baanɩ ɛkɩ fɔ na pɩna e ye Dikwo-dɩrɛ dɩɩ gʋtʋn gɩɩ bɛmɛlɛ ma gɩyɛ gii bedilɛ bɔɔ gɛsarakʋn, gɛtɛ wʋ̀ sa ɔbalan gɛtɛ bɛɛ nya bɛnɩ baade yaanɩ fɔ wuufèn-do fɔ, ka ma ye gatala gii dikwo gɛtɛ dɩ̀ sa ɔpɔrɩ fɔ wʋʋ kɔna anɩ fɔ dɩɩpɩ. 32 Sɩka-sɩya gʋtʋn gɩɩ bɛmɛlɛ ma gɩyɛ gii bedilɛ fɔ na pɩna ɔpɔrɩ fɔ wuufèn-kurumakyɛɛ. Wʋ ka wu ye gatala gii dikwo dɩɩ kɔna fɔ wʋʋpɩ ka ma sere Bɛyɛran Bootunu wʋʋpɩ.