Nehemiya 6

Gebiri-tɔ-yela Nehemiya wo koro

1 Sanibalati, ma Tobiya, ma Arabi-te Gesem, ma tɩɩ bɛkyʋnlɛ-kurumakyɛɛ bɛ nʋn gɛtɛ na biri na sere ɔpɔrɩ fɔ, gɛ difwe dɩkɩ din kuruma. Wu kuruma gɛ ɩpʋnʋ gɛtɛ nan sa itunu fɔ yiiko. 2 Gɛ Sanibalati ma Gesem bɛ sa mɩ ɔtʋn alan, <<Ba taà tuma atele gɛtɛ ɩ̀ sa Ono wɔtalɩ waanɩ fɔ yɩɩ dɩkɩ daanɩ.>>

Mɔ fɔ bɛ mɛ gɛ onyun gɛtɛ bàà mɛ mɩ ade-kpen. 3 Ɛwʋ gɛ na sa bɛnɩ baakʋn alɛ bɛ ma dɔ̀ bɛ alan, <<Gʋtʋn gɩ da mɩ alɔ, okoro mɩn nan talɩ n ba. Lan gɛ nan kere gʋtʋn n ya fɔ nan tɔ n ba yaakʋn?>>

4 Bɛ sa mɩ ɔtʋn-kɩlɩn fɔ disere dɩnaa, gɛ ɔya-kamasɛ fɔ, ade-kɩlɩn fɔ gɛ ǹ bɔ n tɛ dɔ̀ bɛ.

5 Disere-tonfɛ fɔ, Sanibalati ɛ sa wɔsaranyan alɛ ɛ bɛ dɔ̀ mɩ ɔtʋn-kɩlɩn fɔ. Fɔ ɛ ŋwara gɩkpa gɛtɛ ɛn tan giinyun ɛ tɛ wɔ alɛ ɛ ka ɛ bɛ̀ tɛ mɩ. 6 Bɛ ŋwara bɛ sa gɩkpa fɔ gaanɩ alan,

<<Tɩɩ nʋn ti ye bɩfɩɩ gɛtɛ bu silin yɩ bu tuma fɔ baakʋn alɛ ɛyɩ ma Yuda bete ɩɩ sa amɩnlɛ gɛtɛ yàà tɔ yela gɩfɩɩ gɩɩ bɛnyalɛ boo koro. Okoro gɛ i biri ɩɩ mara ɔpɔrɩ fɔ. Gesem ke ɛ dɔ̀ ade fɔ na nʋn. Ɛwʋ gɛtɛ wʋ̀ fɩya fɔ n di alɛ awɔ n te len àà mɛ egyu-dɩrɛ a tɛ bɛ. 7 Gɛ alɛ a were len Wurubwarɛ bɛtabʋrʋlɛ gɛtɛ bàà yasɩ aade nyayɩ Yerusalem gɩfɩɩ gaanɩ alɛ, <Egyu ɛ̀ sa Yuda!> N te to n di gɛtɛ egyu-dɩrɛ ɛɛ̀ nʋn gɛlɛ gaade nyayɩ, okoro ba fɔ taà ka amɩnlɛ ade fɔ yii koro.>>

8 Gɛ na tiri wuunyun na tɩyɛma wɔ alan, <<Ade gɛtɛ aa dɔ̀ lɛ yaanɩ wʋkɩ wʋn ma waanɩ. Awɔ gbagba n tɛ salɩ yɩ a sa.>>

9 Bɛɛ sa tɩ gɛ gɩsaa gɛtɛ koro gàà yɔ tɩ, fɔ tɩ kara talɩ ti werema gʋtʋn fɔ.

Mɔ na tiri onyun alan, <<Oo Wurubwarɛ, sa mɩ ɔkɛma.>>

10 Duwi dɩkɩ na tɔ na san Delaya wobi Semaya gɛtɛ è di Meetabeli wɔnana fɔ wakʋn nan ma silin wɔ. Fɔ bɛn taa tɛ wɔ osele gɛtɛ èè ye wɔ dɩkpaara daanɩ. Ɛwʋ gɛ ɛ dɔ̀ mɩ alan, <<Yɛ taà ma tuma Wurubwarɛ dɩkpaara, Dikwo-dɩrɛ fɔ dɩɩkʋn-dɩrɛkʋn, tàà ma bu dʋkɔ, fɔ taà tan dikwo-dɩrɛ fɔ dɩɩ-ɩpʋnʋ, yema bɛnɩ bee len bàà bè wolo wɔ̀. Baà bè wolo wɔ̀ odente.>>

11 Mɔ na dɔ̀ wɔ alan, <<Fɔ eteni anlɛ nmɩ lɛ nan serenti? Nmɩ nyawɔ nan ma bu Wurubwarɛ Dikwo-dɩrɛ daanɩ alɛ n te to koro nkpa? Mɩn nan san!>>

12 Na we na nyɩnla gɛtɛ nka Wurubwarɛ na sa wɔ, mɔ ɛ tabʋrʋ gɛlɛ gaade nyayɩ yema Tobiya ma Sanibalati na hayɩ wɔ. 13 Bɛ hayɩ wɔ gɛtɛ ɛ̀ɛ̀ mɛ gɛlɛ, fɔ gɩsaa gàà ton mɩ, fɔ nan wura n gyu ade-kpen yaanɩ, fɔ bàà wura sa miin diyere dɩdɩɩ bàà ka bɛ sa mɩ ɩnɩnfa.

14 Gɛ na tiri onyun alan, <<Oo miin Wurubwarɛ, ade gɛtɛ Tobiya ma Sanibalati bɛ mɛ lɛ yii koro, kara finla gɛtɛ àà tiira bɛ giten. Tiira Wurubwarɛ wɔtabʋrʋlɛ-nanɩ Nowadiya ma bɛtabʋrʋlɛ-kurumakyɛɛ gɛtɛ be len bàà yɛ gɩsaa gàà ton mɩ fɔ giten.>>

Ɔpɔrɩ fɔ wuu gesere-werema

15 Okoro be sere ɔpɔrɩ fɔ be were Eluli wobon duwi dikpilin ma tonfɛ (25) daanɩ. Gʋtʋn fɔ powu gi to awi akpilin anyɔɔ ma fwo-anyɔɔ (52). 16 Gɛtɛ tɩɩ bɛkyʋnlɛ powu bɛ nʋn ade nyayɩ fɔ, bɩfɩɩ gɛtɛ bu silin tɩ bu tuma fɔ bu gyu gɩsaa, gɛ ɩnɩnfa i gye bʋ, yema be we bɛ nyɩnla gɛtɛ Wurubwarɛ na kpà tɩ, gɛ gʋtʋn fɔ gi were.

17 Ɔya wʋtɔkɔ powu waanɩ fɔ, Yuda bengyebi ma Tobiya bɛ̀ bɔ bɛɛ ŋwara akpa bɛ tɩyɛma bɛwɔlɔn. 18 Fɔ Yuda bɛnɩ kpekpesi bè yela Tobiya gama, yema wolote n di Arahi wobi-teni Sekaniya. Gɛ wobi Yehohanan e to Berekiya wobi-teni Mesulam wobi-nanɩ gɩna. 19 Bɛnɩ bee tì bè sila wɔ bɛ tɛ mɩ, fɔ bɛ ma dɔ̀ wɔ ade gɛtɛ n tɛ dɔ̀ ka da ma wo koro fɔ. Gɛ Tobiya gba ɛɛ tɩ̀ ŋwara akpa ɛ tɩyɛma mɩ fɔ wàà sa mɩ gɩsaa.