1 Gɛtɛ Sanibalati ɛ nʋn alɛ ti biri tɩɩ pɩna ɔpɔrɩ fɔ ti sere fɔ, ɛ ka owurufa gepepe, gɛ ɛ mʋmwa tɩ. 2 Gɛ ɛ dɔ̀ wɔ bɛnɩ gɛtɛ bè yela wɔ gama, ma Samariya bɩtà bʋʋ bɛtàlɛ fɔ bɔɔ bʋnʋn alan, <<Anʋn gɛ Yuda bete nyabɛ gɛtɛ baade ɩ̀ ba gutunkoro lɛ bɛɛ mɛ lɛ? Baà biri be sere bɔɔpɔrɩ fɔ? Baà tɛ gedi? Ǹdò gɛ baà were? Baà talɩ be puligi ataa-kpinlɛ gɛtɛ ɩ kʋla ɩ̀ dɔ anlɛ ditonton lɛ be birima be sere ɔpɔrɩ fɔ?>>

3 Gɛ Amon-te Tobiya gɛtɛ è yela wɔ gama fɔ mɔ alan, <<Aan! Ɔpɔrɩ gɛ bee sere lɛ? Gengyi egbongbon gba ɛ̀ bʋn wuu koro fɔ, eè sila gɛlɛ gaataa yɩɩpɔrɩ nyawʋ ɛ fɩna.>>

4 Ɛwʋ gɛ na tiri onyun alan, <<Oo tii Wurubwarɛ, nʋn anlɛ gɛtɛ bɛɛ mʋmwa tɩ bɛ sa dɩkpata! Yɛ boo getoro gɛtɛ bee toro tɩ lɛ gàà biri baayu yii koro. Yɛ bɛkyʋnlɛ bàà bè gye bɛ san gisele anlɛ anyan gɛtɛ be kpila bɩtà baanɩ bɛ da. 5 Kara tin bɔɔ dɩpwɛ dii koro, gɛ kara ka baade-kpen kyɛ bɛ, yema bɛ kɔkɔ atuyorobi be lù ɛtɩ beserelɛ fɔ bɛ sa wɔ̀ owurufa.>>

6 Okoro tɩ kyaga ɔpɔrɩ fɔ wʋʋ gɛpɩna-sere, gɛ wʋ tɔ wʋ nɩma wukukuba fɔ wʋʋfan, yema gʋtʋn gɩɩ bɛmɛlɛ fɔ bɛ ka booturu powu bɛ mɛ gʋtʋn fɔ.

7 Mɔ gɛtɛ Sanibalati, ma Tobiya, ma Arabi bete, ma Amon bete, ma Asidodi bete bɛ nʋn gɛtɛ Yerusalem wɔ-ɩpɔrɩ wʋʋ gɛpɩna fɔ gɩ san bʋnʋn, gɛ asila-nʋ̀nkʋn fɔ ɩ sʋ fɔ, bɛ ka owurufa bɛ kààrà. 8 Okoro ɛbɛ powu bɛ mɛ onyun gɛtɛ baà bɛ̀ tà Yerusalem bɩtà, fɔ bàà ka gesugiti ba. 9 Gɛlɛ wuu koro ti tiri onyun tɩ tɛ tii Wurubwarɛ, gɛ tɩ sɩ̀ bɛnɩ-dɩyɛlɛ gɛtɛ bàà tɩ̀ dɩyɛ odòn ma ofilibon.

10 Mɔ Yuda bɛnɩ bɛ dɔ̀ alan, <<Gʋtʋn gɩɩ bɛmɛlɛ fɔ bɔɔkɛma wʋʋ yɔlɔ. Gɛ anyan-kpɛtɛlɛ fɔ mɔ ɩ̀ dɔ kpekpesi, gɛtɛ tɩn nan talɩ tɩ pɩna ti sere ɔpɔrɩ fɔ.>>

11 Gɛ tɩɩ bɛkyʋnlɛ mɔ bɛ dɔ̀ alan, <<Pɛ bàà we nyɩnla, abɛɛ bàà we tɩ fɔ, ti were be gyu boo getite, tii wolo bɛ, fɔ bɔɔ gʋtʋn fɔ gi ten dʋkɔ.>>

12 Gɛ Yuda bete gɛtɛ bè si gbɛma bɛ fɔ, bɛ bɛ dɔ̀ tɩ disere dilen-dilen alan, <<Tɩɩ bɛkyʋnlɛ baà ye ɩkʋn kperen-kperen bɛ bɛ tà tɩ bɩtà.>>

13 Okoro na ka bɛnɩ-dɩyɛlɛ na ma yela ɔpɔrɩ fɔ wʋʋ gama, ɩkʋn gɛtɛ bɛn tɛ mara were fɔ. Na sɩ̀ bɛ afʋrɩ-afʋrɩ, gɛ bè de bɛtata, ma buturunyan, ma bɛgyangarɩ. 14 Gɛtɛ na nya ade yaanɩ fɔ, na we gɛtɛ bɛnɩ fɔ boo koro gɩɩ gbɛrɛ bɛ. Okoro na tɔ na yela, gɛ na dɔ̀ bengyebi fɔ, ma bɛndɩrɛbi fɔ, ma bɛnɩ-kurumakyɛɛ fɔ alan, <<Ɩ kara serenti bɛ! Ɩ kʋna gɛtɛ Efonte ɛ̀ sɔ, gɛ wade ɩ̀ ba gɩsaa, fɔ yàà kpà tɛ yɩɩdɩrɛ ɛbɛ, ma yii bebi-teni, ma yii bebi-nanɩ, ma yɩɩsɔ ɛbɛ, ma yaakpaara!>>

15 Gɛtɛ tɩɩ bɛkyʋnlɛ fɔ bɛ nʋn alɛ tɩ nyɩnla amɩnlɛ-kpen gɛtɛ bɛ ka tii koro, gɛ bɛ nyɩnla alɛ Wurubwarɛ ɛ mɩna yɩ fɔ, ɛtɩ powu ti biri tɩ ba ɔpɔrɩ fɔ wʋʋpɩɩ, gɛ ɛkamasɛ e biri e gyu wɔ gʋtʋn gaanɩ.

16 Ye duwi dɩtɔkɔ ka san fɔ, mɩɩn bɛnɩ fɔ ɔfan na yɛ bɛɛ mɛ gʋtʋn fɔ, gɛ ɔfan mɔ bè de buturunyan, ma awɔrɔnyan-dɩyɛlɛ koro, ma bɛgyangarɩ, ma bɩtà bʋʋ gɛgba. Gɛ bɛndɩrɛbi be yela Yuda bete fɔ powu bɔɔ gama kin-kin 17 ɔpɔrɩ fɔ wuu gesere gaade yaanɩ. Bɛnɩ gɛtɛ bee tola anyan bɛ bɛ tɛ ɔpɔrɩ fɔ wʋʋ gɛmara fɔ bɛɛ ka gɛ gʋlɔ-kɩlɩn bɛ mɛ gʋtʋn, fɔ bè de akpanyan mɔ gʋlɔ-nyɔɔfɛ gaanɩ. 18 Gɛ bɛmaralɛ fɔ baanɩ-kamasɛ ɛɛ mɛ gʋtʋn fɔ, wɔ tata ɛ̀ ban wɔ gɛtɩɩ. Mɔ dɩkantan dɩɩfʋ̀nlɛ fɔ bɩrɛ ee yela ma nmɩ.

19 Gɛ na dɔ̀ bengyebi fɔ, ma bɛndɩrɛbi fɔ, ma bɛnɩ-kurumakyɛɛ fɔ alan, <<Gʋtʋn fɔ gʋsɔ, gɛ gɩ̀ yɛrɛ gɩ̀ dɔ gɛtɛ wʋ yɛ ti ye ɔfɔ ma bɛwɔlɔn. 20 Okoro gengyi ɩ̀ nʋn dɩkantan dɩɩ gɛfʋn fɔ, i serenti ɩ ba taakʋn! Tii Wurubwarɛ ɛɛ̀ kpà ɛ tɛ tɩ!>>

21 Okoro tɩ bɔ tɩ mɛ gʋtʋn fɔ, gɛtɛ bɛnɩ fɔ ɔfan fɔ be ton buturu-nyan ye ofila wʋʋ gɛtà ma sere ofila wʋʋ gɛnʋ̀n. 22 Waanɩ fɔ, na biri na dɔ̀ bɛnɩ fɔ alɛ, wù di gɛtɛ ɛnɩ-kamasɛ ma wɔsaranyan bàà sara Yerusalem odente, fɔ wàà yɛ gɛtɛ bàà dɩyɛ ditele fɔ odente, fɔ bàà mɛ gʋtʋn ofila-kenken. 23 Nmɩ oo, mɩɩndɩrɛ ɛbɛ oo, mɩɩn bɛnɩ oo, bɛdɩyɛlɛ fɔ oo, taanɩ ɛkɩ en tiri wɔ ngba sɩ̀ nya. Gengyi ɛnɩ ɛkɩ ɛɛ fɔrɔ ɛ̀ ma kpà butu gba fɔ, è de wakpanyan.