Esira 7

Esira e be gyu Yerusalem

1 Ade nyayɩ powu yɩɩ gama, ɔya gɛtɛ Perisiya wogyu Aritaserisi ee di bugyu fɔ, fɔ Esira e ye Babilon ɛ ba Yerusalem. Esira wote n di Seraya gɛ Seraya wote n di Asariya, Asariya wote n di Hilikiya, 2 Hilikiya wote n di Salum, Salum wote n di Sadoki, Sadoki wote n di Ahitubi, 3 Ahitubi wote n di Amariya, Amariya wote n di Asariya, Asariya wote n di Merayoti, 4 Merayoti wote n di Seraya, Seraya wote n di Usi, Usi wote n di Buki, 5 Buki wote n di Abisuwa, Abisuwa wote n di Finehasi, Finehasi wote n di gedi gɩɩtɛlɛ ɛndɩrɛ Aaron wobi Eleyasa. 6 Esira nyawɔ ɛ tɔ e ye Babilon ɛ ba. È di gɛ Mose Wo-ise, gɛtɛ Yahwe, Isareli wo Wurubwarɛ ɛ tɛ fɔ wuu wùlàlɛ, gɛ ɛ gya waanɩ. Egyu ɛ tɛ wɔ gɩnyan-kamasɛ gɛtɛ e lila fɔ, yema Yahwe, wo Wurubwarɛ gʋlɔ gɩ̀ gyaga wo koro. 7 Isareli bɛnɩ bɛkɩ fɩya ma gedi gɩɩtɛlɛ, ma Lefi bete, ma ɩnʋn yɩɩ bɛnʋmalɛ, ma otunu wʋʋ bɛdɩyɛlɛ, ma Dikwo-dɩrɛ dɩɩ gʋtʋn gɩɩ bɛmɛlɛ, mɔ bɛ ba Yerusalem, egyu Ariteserisi wo bugyu buu gedi wʋʋ gɩkyan kwarankɩfɛ gaanɩ.

8 Babilon wogyu-dɩrɛ bugyu buu gedi wʋʋ gɩkyan kwarankɩfɛ giibon tonfɛ anɩ gɛ Esira e be gyu Yerusalem. 9 Esira ɛ kya wosele wʋʋ-ɩsan e ye Babilon, ebon gyangbasɛ wo duwi gyangbasɛlɛ daanɩ gɛ e be gyu Yerusalem ebon tonfɛ wo duwi gyangbasɛlɛ daanɩ yema wo Wurubwarɛ ɛ̀ fɩya ɛwɔ. 10 Esira ɛ ka wo koro powu ɛ tɛ Yahwe Wose fɔ wʋʋ gɛkasɩ ma wuu koro wuu gedi, fɔ ɛ̀ɛ̀ talɩ wùlà wade-wùlàlɛ ma ise fɔ Isareli anɩ.

Egyu Aritaserisi ɛ ŋwara gɩkpa ɛ tɩyɛma Esira

11 Gɩkpa gɛtɛ egyu Aritaserisi ɛ ŋwara ɛ tɩyɛma Esira gɛtɛ è di gedi gɩɩtɛlɛ, ma ewùlàlɛ gɛ ɛ̀ nyɩ̀ Yahwe wo-ise ma wade wùlàlɛ gɛtɛ Yahwe ɛ ka ɛ tɛ Isareli bete fɔ, n tɛ ba lɛ.

12 "Nmɩ Aritaserisi, begyu boogyu-dɩrɛ, n tɛ ŋwara gɩkpa nyagɩ n tɛ awɔ gedi gɩɩtɛlɛ Esira gɛtɛ à di Gatala gii Wurubwarɛ fɔ wose wuu wùlàlɛ fɔ,

N tɛ sa wɔ onyun.

13 Nkele n tɛ ose alan, Isareli-nɩ-kamasɛ gɛtɛ ɛ̀ sa miin bugyu baanɩ fɔ, fɩya ma gedi gɩɩ bɛtɛlɛ, ma Lefi bete gɛtɛ bee len bàà tɛrɛma wɔ san Yerusalem fɔ, bɛ̀ talɩ bɛ san. 14 Yema nmɩ egyu-dɩrɛ fɩya ma maamɩnlɛ yɩɩ bɛtɛlɛ kwarankɩ n tɛ sa wɔ àà ma lila anlɛ gɛtɛ Yerusalem ma Yuda i we fɔ àà nya anlɛ gɛtɛ bee di aa Wurubwarɛ Wose gɛtɛ wʋ̀ sa aa gʋlɔ gaanɩ fɔ. 15 Wù di gɛtɛ àà ka sɩka-fututu ma sɩka-sɩya gɛtɛ nmɩ egyu ma maamɩnlɛ yɩɩ bɛtɛlɛ tɩ tɛ Isareli, wo Wurubwarɛ gɛtɛ wo Dikwo-dɩrɛ dɩ̀ sa Yerusalem fɔ, 16 fɩya ma sɩka-fututu ma sɩka-sɩya powu gɛtɛ a wura a ye Babilon gɩlan, fɩya ma ɛwʋ gɛtɛ aa bɛnɩ ma gedi gɩɩ bɛtɛlɛ bɛ tɛ be ye booturu waanɩ tɛ Yahwe Dikwo-dɩrɛ gɛtɛ dɩ̀ sa Yerusalem fɔ. 17 Ka sɩka fɔ se bɛkwɔ-teni, ma ayɛran-gbʋgbʋ, ma bɛyɛran atan fɩya ma anyan yaabi yii gedi, ma bʋkan buu gedi, fɔ yàà ka yɩ tɛ gedi Wurubwarɛ Dikwo-dɩrɛ gɛtɛ dɩ̀ sa Yerusalem dii gedi gɩɩ gɛtɛ̀kʋn fɔ gii koro.

18 Wʋʋ gama fɔ, awɔ ma aawɔlɔn ɛbɛ Yuda bete ɩ̀ talɩ ɩ ka sɩka-fututu ma sɩka-sɩya-kurumakyɛɛ fɔ ɩ mɛ gɩnyan-kamasɛ gɛtɛ i we gɛtɛ wʋ̀ kɔlɔ tɛ yɩ gɛ wʋ̀ kɔlɔ tɛ Wurubwarɛ fɔ. 19 Ka anyɩmɩnyan powu gɛtɛ tɩ ka tɩ sa aagʋlɔ lɛ ma tɛ Yerusalem wo Wurubwarɛ fɔ, fɔ bàà ka mɛ gʋtʋn Wurubwarɛ Dikwo-dɩrɛ fɔ daanɩ. 20 Gɛ gɩnyan-kamasɛ gɛtɛ gaà biri gi hiyan yɩɩ Wurubwarɛ Dikwo-dɩrɛ fɔ daanɩ fɔ, ɩ̀ talɩ i tiri kɔba i ye gigyu-bɩya gaanɩ.

21 "Nkele nmɩ egyu Aritaserisi, n tɛ dɔ̀ ɛyɩ Efrati getu gɩɩ gɩlan gɩɩ bɛndɩrɛbi gɛtɛ bɛɛ nya kɔba wade yii koro fɔ alɛ, ɩ tɛ gedi gɩɩtɛlɛ ma gatala gii Wurubwarɛ wo-ise yiiwùlàlɛ Esira gɩnyan-kamasɛ gɛtɛ eè lila yɩ 22 ka ma sere sɩka-fututu bekotoku akpilin ton, ma ɔnʋmʋ-sʋnlɛ bekotoku akpilin ton (100), ma wayɩn bɛgalɔn nkpɩn bisiyee (600) ma olife bʋnɔ bɛgalɔn nkpɩn bisiyee (600), ma bʋbɔlɛ baasɔ anlɛ gɛtɛ è len. 23 Gɩnyan-kamasɛ gɛtɛ gatala gii Wurubwarɛ fɔ e wùlà alɛ èè len wo Dikwo-dɩrɛ fɔ daanɩ fɔ, ɩ mɛ wʋ gɛlɛ kyɛkyɛ. Anʋn yii koro gɛ wowurufa waà ba nmɩ ma miin bebi tii bugyu boo koro? 24 N te len yàà nyɩnla alɛ ɩn ma osele yàà to lonpoo, abɛɛ gɩkyan gɩɩ sɩka, abɛɛ sɩka belenlɛ-sɩ̀lɛ ɩ sɩ̀ gedi gɩɩ bɛtɛlɛ fɔ baanɩ ɛkɩ, abɛɛ Lefi bete, abɛɛ ɩnʋn yɩɩ bɛnʋmalɛ fɔ, abɛɛ otunu wʋʋ bɛdɩyɛlɛ fɔ, abɛɛ Dikwo-dɩrɛ fɔ dɩɩ gʋtʋn gɩɩ bɛmɛlɛ, abɛɛ gʋtʋn gɩɩ bɛmɛlɛ-kurumakyɛɛ gɛtɛ bɛ̀ sa Wurubwarɛ dɩkpaara daanɩ fɔ.

25 Gɛ awɔ Esira, ka gɛsɛyɩ gɛtɛ Wurubwarɛ ɛ tɛ wɔ̀ fɔ tiri gɔdɔ gɩɩ bɛdɔ̀lɛ gɛtɛ bɛ̀ nyɩ̀ aa Wurubwarɛ wo-ise fɔ yaanɩ fɔ bàà dɔ̀ bɛnɩ powu gɛtɛ bɛ̀ sa Efrati getu-fèn, ma ɛbɛ gɛtɛ bɛ̀ nyɩ Wurubwarɛ wo-ise fɔ powu bɔɔ gɛdɔ̀, fɔ àà wùlà ɛbɛ gɛtɛ bɛn nyɩ yɩ fɔ. 26 Ɛnɩ-kamasɛ gɛtɛ ɛn nan di aa Wurubwarɛ wose ma egyu-dɩrɛ wose fɔ, baà mɛ ade gɛtɛ ɩɩ ba lɛ yaanɩ wʋkɩ bɛ ka be tiira wɔ giten. Baà wolo wɔ, abɛɛ baà berema wɔ ditele fɔ daanɩ, abɛɛ baà to wanyan powu gɛtɛ ɛ̀ ba, abɛɛ baà tan wɔ dikwo.

27 Ɛwʋ gɛ Esira ɛ dɔ̀ alɛ, "I sila Yahwe, tiitu ɛbɛ boo Wurubwarɛ gɛtɛ ɛ ka ade nyayɩ ɛ sa egyu woturu waanɩ gɛ ɛ ka gebù ɛ tɛ Yahwe Dikwo-dɩrɛ fɔ Yerusalem, 28 gɛ e tiri wo gelen e wùlà mɩ egyu ma wamɩnlɛ yɩɩ bɛtɛlɛ ma wɔ bɛndɩrɛbi ma ɔkɛmalɛ bɔɔ bʋnʋn fɔ. Yema Yahwe miin Wurubwarɛ ɛ̀ fɩya ma nmɩ. Gɛlɛ wuu koro na gbɛrɛ oturu gɛ na kʋla Isareli begyegeyelɛ powu gɛ bɛ bɛ fɩya ma nmɩ gɛ tɩ san Yerusalem."