Esira 4

Gɛtɔ-yela Dikwo-dɩrɛ fɔ dii gebiri-sere dii koro

1 Gɛtɛ Yuda bete ma Benyamin bete bɔɔ bɛkyʋnlɛ bɛ nʋn alɛ ɛbɛ gɛtɛ be gye bɛ san gisela fɔ be biri bɛ ba bee sere Dikwo-dɩrɛ bàà tɛ Yahwe, Isareli wo Wurubwarɛ fɔ, 2 bɛ ba Serubabeli ma akpaara yɩɩ bɛndɩrɛ fɔ baakʋn gɛ bɛ dɔ̀ alɛ, "Ɩ yɛ taà kpà yɩ, fɔ yàà sere Dikwo-dɩrɛ fɔ. Yema ɛtɩ ma ɛyɩ powu tɩɩ sʋma gɛ Wurubwarɛ-kɩlɩn, gɛ tɩɩ tɛ wɔ gedi ye sɩyɛɛ ɔkʋna gɛtɛ Asiriya wogyu-dɩrɛ Esaradon ɛ ka tɩ ɛ bɛ sɩ̀ nfan fɔ."

3 Mɔ Serubabeli, ma Yesuwa, ma Isareli wakpaara yɩɩ bɛndɩrɛbi fɔ be tiri wuunyun alan, "Tɩn taa hiyan yɩɩ gɛkpà taà ka ti sere Dikwo-dɩrɛ fɔ tɩ tɛ Yahwe, Isareli wo Wurubwarɛ fɔ. Taà sere dɩ taanyan anlɛ gɛtɛ Perisi wogyu-dɩrɛ Sirusi ɛ dɔ̀ tɩ fɔ."

4 Ɛwʋ gɛ bɛnɩ gɛtɛ bè si gɛtʋnkwaa fɔ gii koro fɔ bɛ kya gɛsa Yuda bete fɔ ɔyɔn ma gɩsaa gɛtɛ bɛ kara ni sere Dikwo-dɩrɛ fɔ. 5 Bɛ tɛ bɛndɩrɛ gɛtɛ bɛ̀ sa Perisi wogyu-dɩrɛ gatɩn fɔ anyan dibilin daanɩ gɛtɛ bàà suguti baade-kamasɛ gɛtɛ bɛɛ mɛ fɔ. Bɛ mɛ gɛlɛ gaade nyayɩ ye Perisiya wogyu-dɩrɛ Sirusi wɔya gɛtɛ ɛ sara bugyu powu waanɩ ma Perisiya wogyu-dɩrɛ Dariwusi wɔya waanɩ.

Gebiri tɔ-yela Wurubwarɛ Dikwo-dɩrɛ fɔ dii gesere dii koro

6 Gɛtɛ Herihesi ɛ bɔ ɛ kya bugyu buu gedi fɔ, Yuda ma Yerusalem bɔɔ bɛkyʋnlɛ fɔ bɛ ŋwara gɩkpa bɛ bɛ tɛ egyu, gɛtɛ bè de ade bee tù Yuda ma Yerusalem bɛnɩ.

7 Gɛlɛ ke gɛ Perisiya wogyu-dɩrɛ Aritaserisi wɔya waanɩ fɔ, Bisilam, ma Mitiredati, ma Tabeeli ma bɛnɩ-kurumakyɛɛ gɛtɛ bɛ̀ fɩya ma ɛbɛ fɔ, bɛ ŋwara gɩkpa bɛ sama wɔ. Aram gɛŋwarabi gɛ bɛ ka bɛ ŋwara gɩkpa fɔ, gɛ bɛ ŋwara gɩ gɛ Aram ginde gaanɩ. 8 Gɛlɛ ke gɛ egyu-dɩrɛ wɔmalɛ Rehum, ma Simisayi gɛtɛ è di gɩkpa gɩɩŋwaralɛ fɔ, bɛ ŋwara gɩkpa bɛ mɩna Yerusalem bɛ ka bɛ san ma egyu-dɩrɛ Aritaserisi alan,

9 "Egyu-dɩrɛ wɔmalɛ Rehum ma gɩkpa gɩɩŋwaralɛ Simisayi fɩya ma bɔɔwɔlɔn ɛbɛ kurumakyɛɛ gɛtɛ bɛ̀ fɩya ma ɛbɛ anlɛ gɔdɔ gɩɩ bɛdɔ̀lɛ, ma bɛndɩrɛbi gɛtɛ bɛɛ nya ye Tripoli, ma Perisiya, ma Ereki, ma Babilon, ma Elam bete gɛtɛ bɛ̀ sa Susa fɔ, 10 ma bɛnɩ-kurumakyɛɛ gɛtɛ bɛ̀ ba gebù-dɩrɛ gɛ Asuribanipali ɛ tɔ̀là bɛ ɛ san Samariya ditele ma Efrati getu-fèn."

11 (Ade gɛtɛ bɛ ŋwara bɛ sa gɩkpa gɛtɛ bɛ ka bɛ tɩyɛma egyu Aritaherisasi fɔ n tɛ ba lɛ).

Tɛ egyu-dɩrɛ Aritaherisasi,

"Ɛtɩ aa bɛsaranyan gɛtɛ tì si gbɛma Efrata fɔ n tɛ tɩyɛma wɔ̀ gɩkpa nyagɩ lɛ.

12 Tii len gɛtɛ awɔ egyu-dɩrɛ àà nyɩnla alɛ Yuda bete gɛtɛ be ye aakʋn bɛ ba taakʋn fɔ, bɛ san Yerusalem bee sere ditele gɛtɛ dɩɩ tɔ diyela bɛnɩ boo koro gɛ dɩ̀ ba duyu-kɛma fɔ. Be biri bee sere dɩɩpɔrɩ ma gesere-gyagakʋn fɔ.

13 Nkele mɔ tii len gɛtɛ egyu-dɩrɛ àà nyɩnla alɛ gengyi bɛnɩ nyabɛ bè biri be sere ditele nyadɩ ma dɩɩpɔrɩ fɔ, ɛkɩ ɛn nan ni le lonpoo, gɛ bɛn nan le gɩkyan-gɩkyan gɩɩ sɩka abɛɛ sɩka belenlɛ-sɩ̀lɛ, gɛ egyu wɔ sɩka ade yaà ba gatɩn. 14 Nkele gɛtɛ tɩ̀ sa awɔ egyu àà gatɩn gɛ tiin len taà mɛ anlɛ tin bù wɔ̀, okoro gɛ tɩɩ ŋwara gɩkpa nyagɩ taà yɛ egyu àà nyɩnla, 15 fɔ àà yɛ bàà ma buguti ɛbɛ gɛtɛ be gyegeye wɔ̀ bɛ sara fɔ baakpa yaanɩ. Gɛlɛ gaakpa fɔ yaanɩ fɔ, aà we gɛtɛ ditele nyadɩ dɩɩ tɔ di yela bɛnɩ boo koro ɔya-kamasɛ, gɛ ye sɩyɛɛ wukukuba fɔ dɩɩ ka ade ma ade-bi dɩ mɔma begyu ma bɛndɩrɛbi gɛtɛ bɛ sara fɔ powu. Nyawʋ wuu koro gɛ be tì muru dɩ fɔ. 16 Tii len egyu-dɩrɛ àà nyɩnla alɛ gengyi bè sere ditele nyadɩ ma dɩɩpɔrɩ fɔ, an nan ni wura gedikʋn gɩkɩ a ye Efrata wofèn."

17 Ɛwʋ gɛ egyu-dɩrɛ e tiri ade fɔ yiinyun ɛ tɩyɛma bɛ alan,

"Ntɛ ŋwara gɩkpa nyagɩ n tɩyɛma egyu-dɩrɛ wɔmalɛ Rehum, ma gɩkpa gɩɩŋwaralɛ Simisaya, ma ɛbɛ powu gɛtɛ bɛ̀ fɩya ma ɛwɔ, gɛ bè si Samariya, ma Efrata gɩlan powu fɔ.

Na sa yɩ onyun.

18 Gɩkpa gɛtɛ ɩ tɩyɛma mɩ fɔ, na yɛ be tiri gaanɩ bɛ ba Perisiya ginde gaanɩ gɛ bɛ kalan gɩ mɩɩn bʋnʋn baanɩ. 19 Okoro na yɛ bɛ ma bugiti akpa yaanɩ gɛ wu wùlà gɛtɛ, sɩyɛɛ wukukuba fɔ, ditele-dɩrɛ nyadɩ dɩɩ tɔ di yela begyu boo koro gɛ dì di gɛtɔ-yela ma ade ma ade-bi yii ditele. 20 Begyu-dɩrɛ ma ɔkɛma bɛ sara Yerusalem bɛ bɛ da, gɛ ɛbɛ na kpakya Efrata getu-fèn-do fɔ powu, gɛ be to lonpoo, ma gɩkyan-gɩkyan gɩɩ sɩka, ma sɩka-belenlɛ-sɩ̀lɛ ma anyan powu dʋkɔbɛ. 21 Gɛlɛ wuu koro ɩ tɛ bɛ ose bàà ten gʋtʋn fɔ ka ma sere gɛtɛ nan biri ntɛ ose-fon. 22 Ɩ nya gepe gɛtɛ ɩn nan gbɛlɩ ade nyayɩ. Anʋn yii koro gɛ yaà yɛ ade-kpen nyayɩ yàà bɛ mɛ ade-dɩrɛ, fɔ yàà ka dɩyɩyɛ mɔma egyu-dɩrɛ."

23 Disere-kɩlɩn gɛtɛ bɛ kalan egyu-dɩrɛ Aritaserisi gɩkpa fɔ bɛ tɛ Rehum ma gɩkpa gɩɩŋwaralɛ Simisayi ma bɔɔwɔlɔn ɛbɛ fɔ, bɛ tɔ disere-kɩlɩn bɛ san Yuda bete baakʋn Yerusalem gɛ bɛ ma ten bɛ gʋtʋn fɔ gɩɩ gɛmɛ dɩkpankpasan daanɩ. 24 Okoro Yahwe Dikwo-dɩrɛ fɔ dɩɩ gʋtʋn gi ten ka ma sere Perisiya wogyu-dɩrɛ Dariwusi wo bugyu buu gedi wʋʋ gɩkyan-nyɔɔfɛ gaanɩ.