Esira 8

Akpaara yɩɩ bɛndɩrɛ gɛtɛ bɛ fɩya ma Esira gɛ be biri bɛ ba fɔ

1 Akpaara yɩɩ bɛndɩrɛbi gɛtɛ bɛ ŋwara baayere gɛtɛ bɛ fɩya ma Esira gɛ be ye Babilon bɛ ba Yerusalem, Egyu-dɩrɛ Aritaserisi wo bugyu buu gedi bʋʋya waanɩ fɔ baayere n tɛ ba lɛ.

2 Ɛwɔ gɛtɛ è di ɛndɩrɛ Finehasi wodu waanɩ fɔ n di Gerisom,

ɛwɔ gɛtɛ è di ɛndɩrɛ Itama wodu waanɩ fɔ n di Daniyeli,

ɛwɔ gɛtɛ è di ɛndɩrɛ Dafidi wodu waanɩ fɔ n di Hatusi, 3 gɛtɛ è di gɛ Sekaniya wobi fɔ,

ɛwɔ gɛtɛ è di ɛndɩrɛ Parosi wodu waanɩ fɔ n di Sekaniya. Gɛ bɛ ŋwara beteni akpilin kwarankɩ ma fwo (150) baayere bɛ fɩya ma ɛbɛ.

4 ɛwɔ gɛtɛ è di ɛndɩrɛ Patati-Mowabi wodu waanɩ fɔ, n di Seraya wobi Eliyehoyenayi. Gɛ bɛ ŋwara beteni gɛkpɩn baayere bɛ fɩya ma ɛwɔ,

5 ɛwɔ gɛtɛ è di ɛndɩrɛ Satu wodu waanɩ fɔ, n di Yahasiyeli wobi-teni Sekaniya. Gɛ bɛ ŋwara beteni gɛkpɩn ma akpilin ton (300) baayere bɛ fɩya ma ɛwɔ,

6 ɛwɔ gɛtɛ è di ɛndɩrɛ Adin wodu waanɩ fɔ, n di Yonathan wobi Ebedi. Gɛ bɛ ŋwara beteni akpilin anyɔɔ ma fwo baayere bɛ fɩya ma ɛwɔ,

7 ɛwɔ gɛtɛ è di ɛndɩrɛ Elam wodu waanɩ fɔ, n di Ataliya wobi-teni Yesaya. Gɛ bɛ ŋwara beteni akpilin asiyee ma fwo baayere bɛ fɩya ma ɛwɔ,

8 ɛwɔ gɛtɛ è di ɛndɩrɛ Sefatiya wodu waanɩ fɔ, n di Mikayeli wobi-teni Sebadiya. Gɛ bɛ ŋwara beteni akpilin anaa baayere bɛ fɩya ma ɛwɔ,

9 ɛwɔ gɛtɛ è di ɛndɩrɛ Yowabi wodu waanɩ fɔ, n di Yetiyeli wobi Obadiya. Gɛ bɛ ŋwara beteni gɛkpɩn ma fwo nɩyɛ baayere bɛ fɩya ma ɛwɔ,

10 ɛwɔ gɛtɛ è di ɛndɩrɛ Bani wodu waanɩ fɔ, n di Yosifiya wobi-teni Selomiti. Gɛ bɛ ŋwara beteni akpilin kooron (160) baayere bɛ fɩya ma ɛwɔ,

11 ɛwɔ gɛtɛ è di ɛndɩrɛ Bebayi wodu waanɩ fɔ, n di Babayi wobi-teni Sekariya. Gɛ bɛ ŋwara beteni dikpilin ma nɩyɛ baayere bɛ fɩya ɛwɔ,

12 ɛwɔ gɛtɛ è di ɛndɩrɛ Asigadi wodu waanɩ fɔ n di, Hakatan wobi-teni Yohanan. Gɛ bɛ ŋwara beteni akpilin ton ma fwo (110) baayere bɛ fɩya ma ɛwɔ,

13 Adonikam wodu waanɩ fɔ, ɛbɛ gɛtɛ bɛ wɔ gama fɔ, baayere n di, Elifeleti, ma Yewuheli, ma Semahiya. Gɛ bɛ ŋwara beteni akpilin asiyee baayere bɛ fɩya ma ɛbɛ, 14 Bɛnɩ gɛtɛ be ye Bigifayi wodu waanɩ fɔ, n di Utayi ma Sakuri. Gɛ bɛ ŋwara beteni akpilin asiyee ma fwo baayere bɛ fɩya ma ɛbɛ.

Gebiri ba Yerusalem

15 Na kpèlè bɛ na tuma butu gɛtɛ bɩɩ da san Ahafa fɔ, gɛ tɩ sara dʋkɔbɛ awi asiyee. Gɛtɛ na nya bɛnɩ fɔ ma gedi gɩɩ bɛtɛlɛ fɔ baanɩ fɔ, min we Lefi-te ɛkɩ dʋkɔ. 16 Gɛlɛ wuu koro, nan kpèlè Eliyeseri, ma Ariyeli, ma Semaya, ma Elinatan, ma Yaribi, ma Elinatan, ma Natan, ma Sekariya ma Mesulam gɛtɛ bè di begyegeyelɛ fɔ, ma Yoyaribi ma Elinatan gɛtɛ bè di gɩkpa gɩɩ bɛnyɩnlalɛ-dɩrɛ, 17 gɛ na sa bɛ Kasifiya ditele dɩɩndɩrɛ Ido wakʋn. Na dɔ̀ bɛ ɛwʋ gɛtɛ baà dɔ̀ Ido ma wɔ bɛfʋrɩ ma gʋtʋn gɩɩ bɛmɛlɛ gɛtɛ bɛ̀ sa Kasifiya ditele Dikwo-dɩrɛ daanɩ fɔ, fɔ bàà ka bɛnɩ mɔma tɩ tɛ Wurubwarɛ dikwo fɔ, gɛtɛ bàà mɛ gʋtʋn dɩkpaara fɔ daanɩ. 18 Gɛtɛ tɩɩ Wurubwarɛ ɛ̀ fɩya ma ɛtɩ okoro, bɛ ka Serebiya gɛtɛ wamɩnlɛ ɩ̀ dɔ̀ fɔ gɛ e ye Lefi wobi Mahili gɛtɛ wotu n di Isareli fɔ wodu waanɩ, ma ɛwɔ Serebiya bebi ma wɔdɩrɛ ɛbɛ bɛ mɔ ma tɩ. Ɛbɛ powu bɛ ba beteni fwo-nɩyɛ. 19 Ɛbɛ ma Hasabiya, fɩya ma Yesaya gɛtɛ e ye Merari wodu waanɩ fɔ, ma wɔdɩrɛ ɛbɛ, ma boo bebi, ma wokperebi ɛbɛ. Gɛ ɛbɛ powu bɛ ba beteni dikpilin. 20 Be biri bɛ ka bɛnɩ gɛkpɩn ma dikpilin (220) bɛ tɩyɛma gɛtɛ bàà bɛ mɛ gʋtʋn Dikwo-dɩrɛ fɔ daanɩ. Ɛbɛ n di bɛnɩ gɛtɛ Dafidi ma wɔ bɛndɩrɛbi be tiri bɛ sɩ̀ bàà tɩ̀ kpà Lefi bete gʋtʋn. Bɛ ŋwara ɛbɛ powu baayere.

21 Ahafa getu-kere dʋkɔ gɛ na dɔ̀ gɛtɛ taà ban onyun fɔ tàà warama koro gatɩn Yahwe bʋnʋn, fɔ taà fɔ wɔ ɛ̀ɛ̀ dɩyɛ ɛtɩ ma tii bebi ma taanyan powu tiisele wuu-ɩsan fɔ waanɩ. 22 Wʋ mɛ mɩ ɩnɩnfa gɛtɛ nan lila egyu alɛ ɛ tɛ tɩ bɩtà bʋʋ bɛtàlɛ, ma abengyi yɩɩ bɛsaralɛ, gɛtɛ bàà dɩyɛ tɩ osele waanɩ tɩɩ bɛkyʋnlɛ boo koro. Yema tɩ wɛrɛ dɔ̀ wɔ anlɛ gɛtɛ tɩɩ Wurubwarɛ ɛɛ kpà ɛbɛ gɛtɛ bè lila wɔ gɛkpa fɔ, mɔ wowurufa wʋʋ tɔ ɛwɔ gɛtɛ è fi gama e ten wɔ fɔ wo koro. 23 Okoro tɩ ban onyun gɛ ti tiri onyun tɩ tɛ Wurubwarɛ ade nyayɩ yii koro, gɛ ɛ nʋn tiinyun-tiri.

24 Ɛwʋ gɛ na tiri gedi gɩɩ bɛtɛlɛ gɩɩ bɛndɩrɛ fwo bɛnyɔɔ gɛtɛ bɛ gya gʋtʋn fɔ gaanɩ fɩya ma Serebiya, ma Hasabiya, ma bɔɔwɔlɔn ɛbɛ fwo, 25 gɛ na keri sɩka-fututu, ma sɩka-sɩya, ma anyan-kurumakyɛɛ gɛtɛ egyu ma wamɩnlɛ yɩɩ bɛtɛlɛ, ma wɔ bɛndɩrɛbi, ma Isareli powu bɛ tɛ tɛ Wurubwarɛ Dikwo-dɩrɛ fɔ dɩɩ gʋtʋn fɔ, na tɛ bɛ. 26 Anyan gɛtɛ na keri fɔ ɩ ba sɩka-fututu wanyɩmɩnyan bekotoku nkpɩn bisiyee ma akpilin anyɔɔ ma fwo (650), sɩka-fututu wanyan mɔ ɩ̀ ba bekotoku akpilin ton (100), sɩka-sɩya ɛ̀ ba bekotoku akpilin ton (100), 27 ma sɩka-sɩya bemudu dikpilin gɛtɛ wʋʋdʋrʋ wʋ̀ ba bekilo nɩyɛ ma ɔfan, ma anyɩmɩnyan anyɔɔ-kpara gɛtɛ bɛ ka gɩwɔrɔnyan-sɩya bɛ mɛ yɩ gɛ ɩ̀ ba ɔyɛkɛma anlɛ sɩka-sɩya fɔ. 28 Na dɔ̀ gedi gɩɩ bɛtɛlɛ fɔ alɛ, "Bɛ mɛ ɛyɩ ma anyan nyayɩ fɩrɩnfɩrɩn bɛ tɛ Yahwe. Sɩka-fututu ma sɩka-sɩya fɔ ì di gɛ gedi gɩɩ gɛtɛ̀ gɛtɛ gi ye oturu waanɩ tɛ̀ Yahwe, yiitu ɛbɛ boo Wurubwarɛ fɔ. 29 I nya anyan fɔ yii koro gepepe ka ma sere gɛtɛ yaà keri yɩ Dikwo-dɩrɛ fɔ daakwo yaanɩ, gedi gɩɩ bɛtɛlɛ, ma Lefi bete, ma Isareli wakpaara yɩɩ bɛndɩrɛbi bɔɔ bʋnʋn Yahwe dɩkpaara gɛtɛ dɩ̀ sa Yerusalem fɔ daanɩ." 30 Ɛwʋ gɛ gedi gɩɩ bɛtɛlɛ ma Lefi bete fɔ be to sɩka-fututu, ma sɩka-sɩya, ma anyɩmɩnyan fɩrɩnfɩrɩn gɛtɛ bɛ keri yɩ Wurubwarɛ Dikwo daanɩ Yerusalem fɔ. 31 Ebon-gyangbasɛ wo duwi fwo-nyɔɔfɛ daanɩ gɛ tɩ tɔ ti ye Ahafa getu giinyun fɔ gɩɩpɩ tɩɩ fɔrɔ Yerusalem. Tii Wurubwarɛ ɛ kpà tɩ gɛ e tiri tɩ e ye tɩɩ bɛkyʋnlɛ ma ɛbɛ gɛtɛ bee tin osele waanɩ fɔ baalɔ yaanɩ osele fɔ wʋʋ-ɩsan powu yaanɩ. 32 Tɩ ma gyu Yerusalem gɛ tɩ sara dʋkɔ ti tuna awi asiyee. 33 Duwi-naafɛ fɔ, tɩ keri sɩka-fututu, ma sɩka-sɩya, ma anyɩmɩnyan fɩrɩnfɩrɩn Wurubwarɛ Dikwo-dɩrɛ fɔ daanɩ gɛ bɛ ka yɩ bɛ sa Uriya wobi Meremoti gɛtɛ è di gedi gɩɩtɛlɛ fɔ walɔ yaanɩ. Finehasi wobi Eleyasa ɛ̀ fɩya ma ɛwɔ, fɩya ma Yesuwa wobi Yosabadi gɛtɛ è di Lefi-te fɔ, ma Binuwi wobi Nowadiya. 34 Bɛ kalan gɩnyan-kamasɛ ma gaasɔ, ma gɩɩdʋrʋ gɛ bɛ ŋwara ɔdʋrʋ fɔ powu bɛ sɩ̀ ɔya wʋtɔkɔ waanɩ.

35 Ɛwʋ gɛ bɛnɩ gɛtɛ be gye gisela fɔ, bɛ ka bɛkwɔ-teni fwo bɛnyɔɔ, ma ayɛran-gbʋgbʋ akpilin anaa ma fwo-kooron, ma bɛyɛran-teni akpilin asiyee ma fwo kwarankɩ bɛ tɛ Isareli wo Wurubwarɛ fɔ gekuma gii gedi. Gɛ bɛ ka begbebi-teni fwo-bɛnyɔɔ bɛ tɛ ade-kpen yɩɩ gɛkakyɛ yii gedi. Ɛyɩ nyayɩ powu ì di gɛ gekuma gii gedi tɛ Yahwe. 36 Bɛ ka egyu-dɩrɛ gɩkpa fɔ bɛ san ma Efrati getu giifèn-do gii begyegeyelɛ ma bɛndɩrɛbi fɔ, gɛ ɛbɛ mɔ bɛ kpà bɛnɩ fɔ ma Wurubwarɛ Dikwo-dɩrɛ fɔ dii gesere.