1 Begyu-dɩrɛ 13

Wurubwarɛ wɔtabʋrʋlɛ gɛtɛ e ye Yuda

1 Duwi dɩkɩ Yahwe ɛ sa wɔtabʋrʋlɛ ɛkɩ e ye Yuda ɛ san Beteli, ɔya gɛtɛ Yerobwam è yela èè kuma olifwi. 2 Gɛ Yahwe wɔtabʋrʋlɛ fɔ ɛ gbɛrɛ afala ɛ tɛ gedi gɩɩ gɛtɛkʋn fɔ alan, <<Oo bekpen boo gedi gɩɩ gɛtɛ̀kʋn! Bekpen boo gedi gɩɩ gɛtɛ̀kʋn! Yahwe ɛɛ dɔ̀ alan, <Baà wo ebi-tenibi ɛkɩ Dafidi dɩkpaara daanɩ, gɛtɛ baà kpèlè wɔ alɛ Yosiya. Awɔ gedi gɩɩ gɛtɛ̀kʋn nyagɩ, aa koro gɛ ɛɛ̀ ka bekpen boo gedi gɩɩ bɛtɛlɛ gɛtɛ bee kuma olifwi bɛ tɛ bekpen fɔ ɛ tɛ gedi, gɛ baà kuma bɛnɩ baanankʋba aa koro.> >> 3 Duwi dɩtɔkɔ ke daanɩ fɔ, Wurubwarɛ wɔtabʋrʋlɛ fɔ ɛ mɛ dɩdawʋ e wùlà, gɛ ɛ dɔ̀ alan, <<Nya, gedi gɩɩ gɛtɛ̀kʋn fɔ gaà yo anyɔɔ, gɛ bʋtɔ gɛtɛ bʋ̀ gyaga gii koro fɔ baà da bu lulu. Nyawʋ n di dɩdawʋ gɛtɛ daà wùlà alɛ Yahwe na tabʋrʋ.>>

4 Gɛtɛ egyu-dɩrɛ Yerobwam ɛ nʋn Wurubwarɛ wɔtabʋrʋlɛ fɔ wade gɛtɛ ɛ gbɛrɛ afala ɛ dɔ̀ ɛ gyaga Beteli gedi gɩɩ gɛtɛ̀kʋn fɔ gii koro fɔ, ɛ tʋna gʋlɔ e wùlà wɔ, gɛ ɛ dɔ̀ alan, <<I gye wɔ!>> Gɛ wɔ gʋlɔ gɛtɛ ɛ tʋna e wùlà wɔ fɔ, gi ku gɩ̀ fà, gɛ ɛn mɩnɩ talɩ birima gɩ. 5 Gedi gɩɩ gɛtɛ̀kʋn fɔ mɔ gi yo anyɔɔ, gɛ gɩɩ bʋtɔ fɔ bʋ da bu lulu, anlɛ gɛtɛ Yahwe ɛ dama wɔtabʋrʋlɛ wo koro ɛ dɔ̀ fɔ, ma dɩdawʋ gɛtɛ ɛ tɛ bɛ fɔ. 6 Ɛwʋ gɛ egyu-dɩrɛ fɔ ɛ dɔ̀ Wurubwarɛ wɔtabʋrʋlɛ fɔ alan, <<Tiri onyun fɔ Yahwe aa Wurubwarɛ fɔ tɛ mɩ, fɔ mɩɩn gʋlɔ gàà biri ba giinundu.>> Gɛ Wurubwarɛ wɔtabʋrʋlɛ fɔ e tiri onyun ɛ fɔ Yahwe gɛ egyu-dɩrɛ gʋlɔ fɔ gi biri gɩ ba giinundu.

7 Ɛwʋ gɛ egyu-dɩrɛ fɔ ɛ dɔ̀ Wurubwarɛ wɔtabʋrʋlɛ fɔ alan, <<Ba taà san dɩkpaara, àà ma di gɩnyankɩ, fɔ nan kyɛ wɔ̀ anyan.>>

8 Mɔ Wurubwarɛ wɔtabʋrʋlɛ fɔ ɛ dɔ̀ egyu-dɩrɛ alan, <<Gengyi terema a yo aanyan gɛtɛ à ba fɔ ɔfan a tɛ mɩ gba fɔ, mɩn nan tɛrɛma wɔ n san, mɩn nan di, gɛ mɩn nan nyʋn butu nfan. 9 Yema Yahwe ɛ dɔ̀ mɩ alɛ, n kara di, gɛ n kara nyʋn butu, gɛ n kara biri ma osele gɛtɛ na ka na san fɔ n ba.>> 10 Okoro ɛ ka gɛ ma osele-fon ɛ da. En mini biri ka ma osele gɛtɛ ɛ ka ɛ ba Beteli fɔ.

11 Fɔ Wurubwarɛ wɔtabʋrʋlɛ-tenikwaa ɛkɩ ɛ̀ sa Beteli. Gɛ wo bebi-tenibi bɛ bɛ dɔ̀ wɔ ade powu gɛtɛ Wurubwarɛ wɔtabʋrʋlɛ fɔ ɛ mɛ duwi dɩtɔkɔ. Gɛ be biri bɛ dɔ̀ wɔ ade gɛtɛ Yahwe wɔtabʋrʋlɛ fɔ ɛ dɔ̀ egyu-dɩrɛ. 12 Ɛwʋ gɛ boote e lila bɛ alan, <<Osele-mɔmɔ gɛ ɛ ka e biri?>> Gɛ wo bebi fɔ be wùlà wɔ osele gɛtɛ Wurubwarɛ wɔtabʋrʋlɛ gɛtɛ e ye Yuda fɔ ɛ dama. 13 Gɛ ɛ dɔ̀ wo bebi fɔ alan, <<Ɩ pɩna dɩkpɔŋɔ-tɩtɩɩ ɩ tɛ mɩ!>> Gɛ bɛ pɩna dɩkpɔŋɔ-tɩtɩɩ fɔ bɛ tɛ wɔ, gɛ ɛ bʋn ɛ gyaga dii koro. 14 Gɛ ɛ tɛrɛma Wurubwarɛ wɔtabʋrʋlɛ fɔ. Ɛ ma tama wɔ è si dɩlɛɛ dɩɩpɩ, gɛ e lila wɔ alan, <<Awɔ n di Wurubwarɛ wɔtabʋrʋlɛ gɛtɛ e ye Yuda fɔ?>> Gɛ e tiri wuunyun alan, <<Ɩɩn, nmɩ.>> 15 Gɛ ɛ dɔ̀ wɔ alan, <<Ba taà san dɩkpaara, taà ma di.>>

16 Mɔ Wurubwarɛ wɔtabʋrʋlɛ fɔ ɛ dɔ̀ wɔ alan, <<Mɩn nan talɩ n biri n tɛrɛma wɔ̀ n san n ma di abɛɛ n ma nyʋn butu nfan nyawʋ. 17 Yema Yahwe wanyun-gyebi fɔ ɩ dɔ̀ mɩ alɛ n kara di, gɛ n kara nyʋn butu, gɛ n kara biri ma osele gɛtɛ na ka na san fɔ n ba.>>

18 Ɛwʋ gɛ Wurubwarɛ wɔtabʋrʋlɛ-tenikwaa fɔ ɛ dɔ̀ wɔ alan, <Nmɩ mɔ n di gɛ Wurubwarɛ wɔtabʋrʋlɛ anlɛ awɔ. Gɛ Wurubwarɛ wɔsalɛ ɛkɩ ɛ dɔ̀ mɩ alɛ Yahwe alan, <Biri ma wɔ ba aa dɩkpaara, fɔ èè be di, fɔ ɛ̀ɛ̀ nyʋn butu.> >> (Mɔ fɔ, ɛ gban wɔ gɛ.) 19 Okoro Wurubwarɛ wɔtabʋrʋlɛ fɔ e biri ɛ nyɩma wɔ ɛ san wɔ dɩkpaara, e di gɛ ɛ nyʋn.

20 Gɛtɛ bè si bee di fɔ, Yahwe ɛ tabʋrʋ ma Wurubwarɛ wɔtabʋrʋlɛ-tenikwaa fɔ gɛtɛ e birima wɔ ɛ ba fɔ, 21 gɛ ɛ gbɛrɛ afala ɛ dɔ̀ Wurubwarɛ wɔtabʋrʋlɛ gɛtɛ e ye Yuda fɔ alan, <<Yahwe ɛɛ dɔ̀ alan, <An di Nmɩ Yahwe maanyun-gyebi yii koro, gɛ an di miinse, gɛtɛ Nmɩ Yahwe aa Wurubwarɛ na tɛ wɔ̀ fɔ wuu koro. 22 A biri a san a ma di, gɛ a nyʋn ɔkʋn gɛtɛ na dɔ̀ wɔ̀ alɛ kara di, gɛ kara nyʋn fɔ. Gɛlɛ wuu koro bɛn nan lò wɔ aate ɛbɛ boo gelòkʋn fɔ gaanɩ.> >>

23 Gɛtɛ Wurubwarɛ wɔtabʋrʋlɛ fɔ e di gɛ ɛ nyʋn e were fɔ, Wurubwarɛ wɔtabʋrʋlɛ-tenikwaa fɔ ɛ pɩna wɔ dɩkpɔŋɔ-tɩtɩɩ ɛ tɛ wɔ. 24 Gɛtɛ ɛ̀ san osele waanɩ ɛɛ fɔrɔ fɔ, ɛdɩ̀rɛ̀ e ye e tuma wɔ, e wolo wɔ, gɛ wo gikpena gɩ̀ fɩna osele waanɩ. Gɛ wɔ dɩkpɔŋɔ-tɩtɩɩ ma ɛdɩ̀rɛ̀ fɔ bè yela wɔpɩ. 25 Ɛwʋ gɛ bɛnɩ bɛkɩ bɛ ba bɛɛ da, gɛ be we gɛtɛ ekpena fɔ ɛ̀ fɩna dʋkɔ, gɛ ɛdɩ̀rɛ̀ fɔ mɔ è yela ekpena fɔ wɔpɩ. Gɛ bɛ san bɛ ma dɔ̀ ade fɔ ditele gɛtɛ Wurubwarɛ wɔtabʋrʋlɛ-tenikwaa fɔ ɛ̀ sa daanɩ fɔ.

26 Gɛtɛ Wurubwarɛ wɔtabʋrʋlɛ gɛtɛ e biri ma wɔ osele waanɩ fɔ ɛ nʋn ade fɔ, ɛ dɔ̀ alan, <<Wù di gɛ Wurubwarɛ wɔtabʋrʋlɛ gɛtɛ en di Yahwe wanyun-gyebi yii koro fɔ. Yahwe e tiri wɔ ɛ tɛ ɛdɩ̀rɛ̀. Ɛ fɛɛran wɔ gɛ e wolo wɔ, anlɛ gɛtɛ Yahwe wanyun-gyebi fɔ ɩ dɔ̀ wɔ fɔ.>>

27 Gɛ Wurubwarɛ wɔtabʋrʋlɛ-tenikwaa fɔ ɛ dɔ̀ wo bebi alan, <<Ɩ pɩna dɩkpɔŋɔ-tɩtɩɩ ɩ tɛ mɩ.>> Gɛ bɛ pɩna dɩ bɛ tɛ wɔ. 28 Gɛ ɛ san ɛ ma we ekpena fɔ gɛtɛ ɛ̀ fɩna osele waanɩ, gɛ dɩkpɔŋɔ-tɩtɩɩ, ma ɛdɩ̀rɛ̀ fɔ bè yela wɔpɩ. Ɛdɩ̀rɛ̀ fɔ ɛn kɔrɔ ekpena fɔ, gɛ ɛn fɛɛran dɩkpɔŋɔ-tɩtɩɩ fɔ mɔ. 29 Okoro Wurubwarɛ wɔtabʋrʋlɛ-tenikwaa fɔ ɛ ka Wurubwarɛ wɔtabʋrʋlɛ fɔ gikpena ɛ gyaga dɩkpɔŋɔ-tɩtɩɩ fɔ dii koro, gɛ e biri ma wɔ ɛ ba Beteli ditele daanɩ, bàà wula wɔ, fɔ bàà lò wɔ. 30 Ɛwʋ gɛ e lò wɔ ɛwɔ gbagba wɔ dɩtaa-fwe daanɩ, gɛ be wula wɔ, gɛ bɛ dɔ̀ alan, <<Awo, miinobi!>> 31 Gɛtɛ be lò wɔ be were fɔ, ɛ dɔ̀ wo bebi-teni fɔ alan, <<Gengyi n ku fɔ, i lò mɩ ɔkʋn gɛtɛ be lò Wurubwarɛ wɔtabʋrʋlɛ fɔ. Ɩ ka maanankʋba ɩ sɩ̀ ɩ gbɛma woyo fɔ. 32 Yema Yahwe wanyun-gyebi gɛtɛ ɛ dama wo koro ɛ tabʋrʋ ɛ dama gedi gɩɩ gɛtɛ̀kʋn gɛtɛ gɩ̀ sa Beteli fɔ gii koro, ma akpen-kwo gɛtɛ ɩ̀ sa Samariya atele yaanɩ fɔ powu yaà ba waanɩ.>>

33 Mɔ ade nyayɩ yɩɩ gama fɔ, Yerobwam en foma ye wade-kpen yiisele waanɩ, mɔ ɛ ni biri e tiri gedi gɩɩ bɛtɛlɛ e ye bɛnɩ powu baanɩ, gɛ ɛnɩ-kamasɛ gɛtɛ ee len ɛ̀ɛ̀ mɛ gedi gɩɩ bɛtɛlɛ fɔ, ee ku wɔ ɛ mɛ ekpente. 34 Okoro ade nyayɩ ɩ bɛ mɛ ade-kpen ɩ tɛ Yerobwam dɩkpaara, gɛtɛ ɩ yɛ wɔ ɛ nʋ̀n gɛ e muru e ye gɛtʋnkwaa gaanɩ.