1 Begyu-dɩrɛ 20

Ben-Hadadi ɛ ta bɩtà ma Samariya gɩfɩɩ

1 Aram wogyu Ben-Hadadi ɛ kʋla wɔ bɩtà bʋʋ bɛtàlɛ e tuma, gɛ begyu-dɩrɛ dikpilin ma fwo bɛnyɔɔ ma baabengyi, ma boo tiiramisan ɛbɛ, bɛ̀ fɩya ma ɛwɔ, gɛ ɛ bʋn ɛ̀ɛ̀ ma tà bɩtà ma Samariya. 2 Gɛ ɛ sa bɛnɩ Isareli wogyu-dɩrɛ Ahabi wakʋn wo ditele-dɩrɛ fɔ daanɩ bɛ ma dɔ̀ wɔ alan, <<Ben-Hadadi alan, 3 <Aa sɩka-fututu, ma aa sɩka-sɩya, ma aasɔ ɛbɛ-kpara, ma aa bebi-kpara powu, bè di gɛ miinyo.> >>

4 Ɛwʋ gɛ Isareli wogyu e tiri wuunyun alan, <<Ɛwʋ gɛ a dɔ̀ lɛ, miinfonte, egyu-dɩrɛ, nmɩ ma gɩnyan-kamasɛ gɛtɛ ǹ ba fɔ, tì di gɛ aayo.>>

5 Gɛ Ben-Hadadi e biri ɛ sa bɛnɩ alan, <<Ben-Hadadi ɛɛ dɔ̀ alan, <Na sa bɛ bɛ dɔ̀ wɔ̀ alɛ ka aa sɩka fututu, ma aa sɩka-sɩya, ma aasɔ ɛbɛ, ma aa bebi tɛ mɩ.> 6 Mɔ gɩsa ɔya nyawʋ anlɛ, nan sa mɩɩn bɛndɩrɛbi bàà ma yasɩ aa digyukpaara, ma aa bɛndɩrɛbi baakpaara. Gɛ gɩnyan-kamasɛ gɛtɛ gì di gɩnyan-gbaa tɛ wɔ̀ fɔ, baà ma ka bɛ da.> >>

7 Ɛwʋ gɛ Isareli wogyu-dɩrɛ e kpèlè gɛtʋnkwaa fɔ gɩɩ bɛndɩrɛ powu e tuma, gɛ ɛ dɔ̀ bɛ alan, <<Ɩ nya anlɛ gɛtɛ ete nyawɔ ee len ade. Gɛtɛ ɛ sa alɛ be be to mɩɩnsɔ ɛbɛ, ma miin bebi, ma mɩɩn sɩka-fututu, ma mɩɩn sɩka-sɩya fɔ, min terema.>>

8 Gɛ bɛndɩrɛ fɔ ma bɛnɩ fɔ powu be tiri wuunyun alan, <<Kara nʋn wakʋn, gɛ kara tɛ wɔ anyan gɛtɛ ee lila fɔ.>>

9 Okoro e tiri wuunyun ɛ tɛ Ben-Hadadi bɛsalɛ fɔ alan, <<Ɩ dɔ̀ miinfonte, egyu-dɩrɛ alan, <Ɛwʋ gɛtɛ a gyegeye a lila aasaranyan fɔ, nan mɛ, mɔ ɛwʋ nyawʋ bɩrɛ, mɩɩn nan yera.> >> Gɛ bɛsalɛ fɔ be biri bɛ da gɛ be birima ade fɔ bɛ ma dɔ̀ Ben-Hadadi. 10 Gɛ Ben-Hadadi e biri ɛ sa bɛnɩ-fon Ahabi wakʋn alan, <<Gengyi mɩn mɩna Samariya ditele powu gɛ atɩn ì kuruma gɛtɛ mɩɩn bɛnɩ fɔ baanɩ ɛkamasɛ èè wura gʋlɔ gii diboro fɔ, bekpen be wolo mɩ.>>

11 Gɛ Isareli wogyu e tiri wuunyun alan, <<Ɩ dɔ̀ wɔ alan, <Wun di gɛtɛ ɛnɩ gɛtɛ ɛɛ sa akpa yɩɩ gɛgba fɔ, ɛ̀ɛ̀ bʋma koro anlɛ ɛwɔ gɛtɛ ee lo gɩ fɔ.> >>

12 Ɔya gɛtɛ Ben-Hadadi ɛ nʋn ɔtʋn nyawʋ fɔ, fɔ ɛwɔ ma wo begyu bɛɛ nyʋn bʋkan dɩyan dii dikwo daanɩ. Gɛ ɛ dɔ̀ wɔ bɛnɩ fɔ alan, <<Ɩ ban gbagya taà san bɩtà!>> Okoro bɛ pɩna koro gɛtɛ bàà tà ditele fɔ bɩtà.

Ahabi e di Ben-Hadadi wo koro

13 Gɛ Wurubwarɛ wɔtabʋrʋlɛ ɛkɩ ɛ ba Isareli wogyu Ahabi wakʋn, gɛ ɛ dɔ̀ wɔ alan, <<Yahwe ɛɛ dɔ̀ alan, <A we bɩtà bʋʋ bɛtàlɛ kpekpesi nyabɛ? Nan ka bɛ n sa aa gʋlɔ ǹdò, fɔ àà nyɩnla alɛ, nmɩ n di Yahwe.> >> 14 Gɛ Ahabi e lila alan, <<Ɛnyan nan mɛ ade nyayɩ?>>

Wurubwarɛ wɔtabʋrʋlɛ fɔ ɛ dɔ̀ alan, <<Yahwe ɛɛ dɔ̀ alan, <Bɛsaranyan gɛtɛ bè di bɛndɩrɛbi tɛ atele fɔ nan mɛ.> Gɛ Ahabi e lila alan, <<Ɛnyan nan gyegeye ɛ tà bɩtà fɔ?>> Gɛ Wurubwarɛ wɔtabʋrʋlɛ fɔ e tiri wuunyun alan, <Awɔ.>

15 Gɛlɛ wuu koro Ahabi e kpèlè bɛsaranyan gɛtɛ bè di bɛndɩrɛbi tɛ atele fɔ e tuma. Bɛ̀ ba bɛnɩ gɛkpɩn ma dikpilin ma fwo-bɛnyɔɔ (232). Gɛ e kpèlè Isareli bɛnɩ kurumakyɛɛ fɔ powu e tuma. Bɛ̀ ba bɛnɩ ɩgbaa isiyee ma nkpɩn ton (7,000).

16 Gɛ bɛ tɔ ofila-kenken bɛ da bɩtà fɔ, fɔ Ben-Hadadi ma begyu dikpilin ma fwo-bɛnyɔɔ, gɛtɛ bɛɛ kpà wɔ fɔ, bɛ̀ sa dɩyan dii dikwo daanɩ bɛ nyʋn be su. 17 Bɛsaranyan gɛtɛ bè di bɛndɩrɛbi tɛ atele fɔ na gyegeye na san.

Gɛ Ben-Hadadi wɔ bɛnɩ-dɩyɛlɛ fɔ, bɛ bɛ dɔ̀ wɔ alan, <<Bɩtà bʋʋ bɛtàlɛ be ye Samariya bɛɛ ba.>> 18 Gɛ ɛ dɔ̀ alan, <<Gengyi bɛɛ ba gɛ olila waanɩ fɔ, i gye bɛ gʋnʋn-ŋɔrɔ. Gengyi bɛɛ ba gɛ akpa fɔ, i gye bɛ gʋnʋn-ŋɔrɔ.>>

19 Gɛ Isareli bɛsaranyan gɛtɛ bè di bɛndɩrɛbi tɛ atele fɔ, be gyegeye be ye ditele fɔ daanɩ, gɛ bɩtà bʋʋ bɛtàlɛ-kurumakyɛɛ fɔ powu bɛ tɛrɛma bɛ. 20 Gɛ baanɩ-kamasɛ e wolo wokengbelilɛ, Aram bete be serenti, gɛ Isareli bete bɛ kpà bɛ gyaga boo koro. Mɔ Aram wogyu Ben-Hadadi ɛ ka wo dibengyi gɛ ɛbɛ ma wabengyi yɩɩ bɛsaralɛ be serenti. 21 Gɛ Isareli wogyu ɛ tɛrɛma bɛ, gɛ ɛ ma gye abengyi ma tiiramisan ɛbɛ, gɛ e wolo Aram bete fɔ kpekpesi.

22 Wʋʋ gama fɔ, Wurubwarɛ wɔtabʋrʋlɛ fɔ ɛ ba Isareli wogyu Ahabi wakʋn, gɛ ɛ dɔ̀ wɔ alan, <<Sa koro ɔkɛma, fɔ àà pɩna koro gepepe, fɔ àà nya isele gɛtɛ aà ka. Yema gɩkyan-fon ɔya nyawʋ wʋʋkʋnan anlɛ, Aram wogyu eè biri ɛ bɛ tà wɔ̀ bɩtà.>>

23 Gɛ Aram wogyu bɛndɩrɛbi fɔ bɛ tɛ wɔ amɩnlɛ alan,<<Boo bekpen fɔ bè di gɛ idon yii bekpen, gɛlɛ wuu koro gɛ bɛ ba ɔkɛma da tɩ fɔ. Mɔ gengyi tɩ̀ tà bɩtà ma ɛbɛ ɔtalɩ waanɩ fɔ, wʋ̀ mɛ laan fɔ taà wura ɔkɛma tɩ da bɛ. 24 Nkele tiri begyu fɔ powu gɛtɛ bɛɛ kpakya fɔ, fɔ àà ka bɩtà bʋʋ bɛndɩrɛ a sere bɔɔ bɩsɩrɩ. 25 Gɛ wù di gɛtɛ àà kʋla bɩtà bʋʋ bɛtàlɛ, bàà sɔ anlɛ ɛbɛ gɛtɛ be wolo fɔ, aabengyi, ma tiiramisan ɛbɛ powu baasɔ yaà mɛ kyɛkyɛ anlɛ ɛyɩ gɛtɛ be wolo fɔ. Fɔ taà ma kpà ma Isareli bete ɔtalɩ waanɩ, yema wʋ̀ mɛ laan fɔ taà wura ɔkɛma tɩ da bɛ.>> Ɛwʋ gɛ nʋn baakʋn, gɛ ɛ mɛ anlɛ gɛtɛ bɛ dɔ̀ fɔ.

26 Gɛtɛ okenanfile wu biri wʋ nɩma fɔ, Ben-Hadadi e kʋla Aram bete, gɛ ɛ bʋn ɛ san Afeki, ɛ ma kpà ma Isareli bete.

27 Gɛtɛ Isareli bete fɔ bɛ kʋla gɛ be yo bɛ anyandilɛ ma akpa yaanyan hiyanlɛ be were fɔ, bɛ tɔ bɛ da bɛ ma tuma bɛ. Isareli bete be sere asarakʋn buru-buru anyɔɔ Aram bete boofèn anlɛ begbebi baakpi mɔ Aram bete bɛ walɩ ɔtalɩ fɔ waanɩ.

28 Gɛ Wurubwarɛ wɔtabʋrʋlɛ ɛ bɛ dɔ̀ Isareli wogyu alan, <<Yahwe ɛɛ dɔ̀ alan, <Gɛtɛ Aram bete bɛɛ sa amɩnlɛ alɛ Yahwe è di gɛ idon yiikpen, mɔ en di gɛ ɔtalɩ wuukpen okoro nan ka bɛnɩ dɩtɩnpan nyadɩ n sa aa gʋlɔ, fɔ àà nyɩnla alɛ, nmɩ n di Yahwe fɔ.> >>

29 Bɛ sara ofèn ma ofèn ma bɛwɔlɔn awi kwarankɩ, gɛ duwi kwarankɩfɛ fɔ, akpa fɔ i sere. Gɛ Isareli bete bɛ nyaara Aram bɩtà bʋʋ bɛtàlɛ asepekyi ton (100,000) duwi-kɩlɩn daanɩ. 30 Gɛ bekurumakyɛɛ fɔ be serenti be san Afeki ditele daanɩ, gɛ ɔpɔrɩ wu sila wu tin bɛnɩ disepekyi ma ɩgbaa isiyee ma nkpɩn ton (27,000).

Gɛ Ben-Hadadi mɔ e serenti ɛ ma gyu ditele fɔ daanɩ, gɛ e bu gamɩ wuu dikwo dɩkɩ daanɩ. 31 Gɛ wɔ bɛndɩrɛbi fɔ bɛ dɔ̀ wɔ̀ alan, <<Nya, tɩ nʋn alɛ Isareli dɩkpaara dii begyu-dɩrɛ fɔ bè di begyu gɛtɛ bee we ɛnɩ gutunkoro. Okoro yɛ tàà liba bekotoku, fɔ tàà ka ɩŋʋʋ ti milin bigyen, fɔ tàà san Isareli wogyu wakʋn, nkɩfɔ ɛɛ̀ yɛ wɔ̀ àà sara nkpa.>> 32 Okoro be liba bekotoku, gɛ bɛ ka ɩŋʋʋ be milin bigyen, gɛ bɛ san Isareli wogyu wakʋn alan, <<Aasaranyan Ben-Hadadi alan, <Ǹ fɔ wɔ̀ gɛ, yɛ mɩ nan sara nkpa.> >>

Gɛ egyu lila alan, <<Ɛ̀ sangba è si nkpa? È di gɛ miinnobi.>> 33 Bɛnɩ fɔ, bɛ̀ nyɩ alɛ ade-kpara gɛ ɛɛ dɔ̀, okoro be yera alan, <<Ɩɩn! È di gɛ aanobi>> Gɛ ɛ dɔ̀ bɛ alan, <<Ɩ ma ka wɔ ɩ mɔma mɩ!>> Gɛtɛ Ben-Hadadi e be gyu fɔ, Ahabi ɛ yɛ wɔ e be gyu wo tiiramisan anɩ. 34 Gɛ Ben-Hadadi ɛ dɔ̀ wɔ alan, <<Atele gɛtɛ miinte e to e ye aate wakʋn fɔ, nan birima yɩ n tɛ wɔ̀, gɛ a talɩ a sere awɔ gbagba aa gɩyɛ gaadikʋn Damasiko, anlɛ gɛtɛ miinte ɛ mɛ Samariya fɔ.>>

Gɛ Ahabi ɛ dɔ̀ wɔ̀ alan, <<Dikola nyadɩ dɩɩ gɛtà wuu koro, waà yɛ wɔ̀ àà wura koro.>> Gɛ ɛ tà dikola ma ɛwɔ, gɛ e tiri wɔ osele.

Wurubwarɛ wɔtabʋrʋlɛ ɛkɩ e tin Ahabi dɩpwɛ

35 Ɛwʋ gɛ Wurubwarɛ ɛ dama wɔ bɛtabʋrʋlɛ fɔ baanɩ ɛkɩ wo koro ɛ dɔ̀ wɔwɔlɔn alan,<<N fɔ wɔ̀ gɛ, gbɛrɛ mɩ!>> Mɔ wɔwɔlɔn fɔ e terema.

36 Gɛ Wurubwarɛ wɔtabʋrʋlɛ fɔ ɛ dɔ̀ alan, <<Gɛtɛ an di Yahwe wanyun-gyebi yii koro lɛ, à bo a kpe a ye maakʋn pɛ ɛdɩ̀rɛ̀ eè wolo wɔ̀.>> Gɛ gɛtɛ ete fɔ e bo e kpe e ye wakʋn ɛ da fɔ, ɛdɩ̀rɛ̀ e tuma wɔ gɛ e wolo wɔ. 37 Gɛ Wurubwarɛ wɔtabʋrʋlɛ fɔ e biri e we ete-fon ɛkɩ, gɛ ɛ dɔ̀ wɔ alan, <<N fɔ wɔ̀ gɛ, gbɛrɛ mɩ!>> Okoro ete fɔ ɛ gbɛrɛ wɔ e pira. 38 Gɛ Wurubwarɛ wɔtabʋrʋlɛ fɔ ɛ san ɛ ma yela osele-kere ee so egyu-dɩrɛ, gɛ ɛ ka diyenkpen ɛ ban wɔ bʋnʋn, gɛtɛ ɛkɩ ɛ kara nyɩnla wɔ. 39 Gɛtɛ egyu-dɩrɛ ɛɛ da fɔ, Wurubwarɛ wɔtabʋrʋlɛ fɔ e kpèlè wɔ gɛ ɛ dɔ̀ alan, <<Aasaranyan ɛ san bɩtà baanɩ, gɛ bɩtà bʋʋtàlɛ ɛkɩ e gye ete ɛkɩ bɩtà gɛ ɛ ka wɔ ɛ mɔma mɩ alan, <Nya ete nyawɔ wo koro, gengyi à yɛ wɔ e serenti fɔ, aà ka aa nkpa a le gutoro, abɛɛ aà le sɩka-fututu abi gɛtɛ wʋʋdʋrʋ waà mɛ kilo dikpilin ma fwo bɛnaa (34).> 40 Ɔya gɛtɛ aasaranyan bʋnʋn bʋ sɩna dɩbɩyan ma ologyi fɔ, ete fɔ ɛ nyʋn.>>

Gɛ Isareli wogyu ɛ dɔ̀ wɔ̀ alan, <<A tin koro dɩpwɛ, gɛ wù di gɛtɛ àà wura wuu giten-tiira.>>

41 Ɛwʋ gɛ bilenten ɛtabʋrʋlɛ fɔ e tirima diyenkpen gɛtɛ ɛ ka ɛ ban bʋnʋn ma duyu fɔ powu, gɛ Isareli wogyu ɛ nyɩnla wɔ gɛtɛ è di Wurubwarɛ bɛtabʋrʋlɛ fɔ baanɩ ɛkɩ. 42 Gɛ ɛ dɔ̀ egyu-dɩrɛ alan, <<Yahwe ɛ dɔ̀ alan, <A kere ɛnɩ gɛtɛ na mɛ gɛtɛ èè ku fɔ a ya. Gɛlɛ wuu koro, aà ka aa nkpa a to wɔ nkpa, gɛ aà ka aa bɩtà bʋʋ bɛtàlɛ bɔɔ nkpa a to wɔ bɩtà bʋʋ bɛtàlɛ booyo, yema a yɛ wɔ bɩtà bʋʋ bɛtàlɛ fɔ bɛkɩ be serenti.>> 43 Ɛwʋ gɛ Isareli wogyu e biri ɛ da wɔlɛ Samariya, owurufa ma koro gɩɩ gɛyɔ gaanɩ.