2 Ɩya-ɩya 6

1 Ɛwʋ gɛ Solomon e tiri onyun alan, <<Oo Yahwe, a dɔ̀ alɛ aà sara dɩkpaba-kpim daanɩ. 2 Na sere Dikwo-kpatakpɩrɩ na tɛ wɔ̀, ɔkʋn gɛtɛ aà sara gakpaakpa fɔ.>> 3 Ɛwʋ gɛ Solomon e fi bʋnʋn e ten Isareli bete powu gɛtɛ bè yela dʋkɔ fɔ, gɛ e hira bɛ. 4 Gɛ ɛ dɔ̀ alan, <<Ɩ yɛ taà sila Yahwe, Isareli wo Wurubwarɛ, gɛtɛ ɛ ka wɔkɛma ɛ yɛ anyun-gyebi gɛtɛ ɛ dɔ̀ ɛ sɩ̀ ɛ tɛ miinte Dafidi fɔ ɩ ba waanɩ fɔ. Wurubwarɛ ɛ dɔ̀ alan, 5 <Ye duwi gɛtɛ na tiri mɩɩn bɛnɩ Isareli bete na ye Egyipiti gɛtʋnkwaa gaanɩ lɛ, miin te tiri ditele dɩkɩ ye Isareli wo-ifoli fɔ yaanɩ gɛtɛ bàà sere Dikwo-dɩrɛ miin diyere dii koro bàà tɩ sʋma mɩ dʋkɔ. Gɛ mɩɩn tiri ɛnɩ ɛkɩ alɛ e di bugyu ɛ tɛ mɩɩn bɛnɩ Isareli bete. 6 Mɔ nkele, na tiri Yerusalem gɛtɛ bɛnɩ bàà tɩ̀ sʋma mɩ dʋkɔ, gɛ na tiri Dafidi ɛ̀ɛ̀ mɛ boogyu.> 7 <<Miinte Dafidi ɛ ka ɛ sa woturu waanɩ gɛtɛ eè sere Dikwo-dɩrɛ ɛ tɛ Yahwe, Isareli wo Wurubwarɛ, fɔ bàà tɩ̀ sʋma wɔ daanɩ. 8 Gɛ Yahwe ɛ dɔ̀ miinte Dafidi alan, <A mɛ ade gɛtɛ wʋ̀ sa aaturu waanɩ alɛ aà sere Dikwo-dɩrɛ bàà tɩ̀ sʋma mɩ daanɩ lɛ. 9 Mɔ fɔ nka awɔ nan sere Dikwo-dɩrɛ fɔ. Aabi gɛtɛ è di gɛ awɔ gbagba aa nkalan nan sere Dikwo-dɩrɛ fɔ bàà tɩ̀ sʋma mɩ daanɩ.>

10 <<Yahwe e di wade-dɔ̀lɛ-sɩ̀lɛ fɔ yii koro. Yema na sere miinte Dafidi gɩsɩrɩ, gɛ ǹ si Isareli gigyu-bɩya gii koro, anlɛ gɛtɛ ɛ bɔ ɛ dɔ̀ ɛ sɩ̀ fɔ, gɛ na sere Dikwo-dɩrɛ gɛtɛ bàà tɩ̀ sʋma Yahwe, Isareli wo Wurubwarɛ fɔ daanɩ fɔ. 11 Dʋkɔ gɛ na ka Dɩdaka gɛtɛ Dikola gɛtɛ Yahwe ɛ tà ma wɔ bɛnɩ Isareli bete fɔ ma daanyan gɛtɛ ɩ̀ sa daanɩ fɔ na bɛ sɩ̀.>>

Solomon wonyun-tiri

12 Ɛwʋ gɛ Solomon ɛ tɔ e yela Yahwe gedi gɩɩ gɛtɛ̀kʋn fɔ gɩɩ bʋnʋn, Isareli dikpi fɔ powu dɩɩ bʋnʋn, gɛ ɛ bʋma walɔ gatala. 13 Fɔ ɛ ka gɩwɔrɔnyan-sɩya ɛ mɛ gɛbʋn-yelakʋn gɛtɛ gaabo ɩ̀ ba bɩsɩrɩ kwarankɩ ma ɔfan, gaayɛrɛ ɩ̀ ba bɩsɩrɩ kwarankɩ ma ɔfan, gɛ gaatɔ ɩ̀ ba bɩsɩrɩ bɩnaa ma ɔfan, gɛ ɛ ka gɩ ɛ ma sɩ̀ dɩkpaara fɔ di getite. Ɛ bʋn e yela gɛbʋn-yelakʋn fɔ gii koro, gɛ ɛ waran e kura Isareli bɛnɩ fɔ powu bɔɔ bʋnʋn, gɛ ɛ bʋma walɔ e wùlà gatala. 14 Gɛ e tiri onyun ɛ dɔ̀ alan,

<<Oo Yahwe, Isareli wo Wurubwarɛ, ɛkɩ ɛn ma gatala, abɛɛ gɛtʋnkwaa anlɛ awɔ. Awɔ nte di gelen gii dikola gɛtɛ a tà ma aa bɛsaranyan gɛtɛ bɛɛ ka boo-ituru powu bɛ san aasele waanɩ fɔ dii koro. 15 A di aade gɛtɛ a dɔ̀ a sɩ̀ a tɛ miinte Dafidi gɛtɛ è di aasaranyan fɔ yii koro. A ka aanyun a dɔ̀ ade a sɩ̀, gɛ a ka aakɛma a yɛ wʋ ba waanɩ anlɛ gɛtɛ wù we ǹdò lɛ. 16 Nkele Yahwe, Isareli wo Wurubwarɛ, di ade gɛtɛ a dɔ̀ a sɩ̀ a tɛ aasaranyan, miinte Dafidi alan, <Wʋn nan ba alɛ, an nan wura ɛnɩ gɛtɛ ɛ̀ɛ̀ sara Isareli gigyu-bɩya fɔ gii koro mɩɩn bʋnʋn, gengyi aa bebi baà bù, mɩ gɛ baà di maade yii koro anlɛ gɛtɛ a mɛ fɔ, wʋn nan ba wʋ nya alɛ an nan wura ɛnɩ gɛtɛ ɛɛ̀ sara gigyu-bɩya fɔ gii koro.> fɔ yii koro. 17 Okoro nkele, oo Yahwe, Isareli wo Wurubwarɛ, yɛ aade gɛtɛ a dɔ̀ a sɩ̀ a tɛ aasaranyan miinte Dafidi fɔ, yàà ba waanɩ.

18 <<Gɛ gbagbaagba fɔ, Wurubwarɛ ɛɛ̀ bɛ sara gɛtʋnkwaa gaanɩ ma bɛnɩ-nyalɛ? Gatala, ma gatala gɩɩ gatala gba ɩn nan nɩma wɔ̀ gɛsara. Lan gɛ waà mɛ gɛ Dikwo gɛtɛ na sere lɛ daà nɩma wɔ̀? 19 Mɔ, oo Yahwe, miin Wurubwarɛ, nʋn nmɩ aasaranyan miinyun-tiri, fɔ àà we mɩ gutunkoro. Nʋn gewula ma onyun-tiri gɛtɛ aasaranyan ee tiri aa bʋnʋn ǹdò lɛ. 20 Yɛ aa bʋnʋn bàà gyaga Dikwo-dɩrɛ nyadɩ dii koro odon ma ofilibo nfan nyawʋ gɛtɛ a dɔ̀ alan, <Miin diyere daà sara dʋkɔ> lɛ, fɔ àà nʋn onyun-tiri gɛtɛ nmɩ aasaranyan nte tiri nfan fɔ. 21 Nʋn nmɩ aasaranyan maade-fɔlɛ, ma aa bɛnɩ Isareli bete booyo gengyi tì fi tɩɩ bʋnʋn tì ten nfan gɛ ti tiri onyun fɔ. Nʋn taakʋn ye gatala aa gɛsarakʋn fɔ. Nʋn taakʋn, fɔ àà ka taade-kpen kyɛ tɩ! 22 <<Gɛ gengyi ɛnɩ ɛkɩ ɛ̀ mɛ wɔwɔlɔn ade-kpen, gɛ wù di gɛtɛ ɛ̀ɛ̀ kan ntam, gɛ ɛ̀ ba ɛɛ kan ntam aa gedi gɩɩ gɛtɛ̀kʋn, aa Dikwo-dɩrɛ nyadɩ daanɩ nfan fɔ, 23 nʋn ye gatala, fɔ àà mɛ wʋʋ gʋtʋn. Dɔ̀ aa bɛsaranyan fɔ bɔɔ gɔdɔ, fɔ àà tin ɛwɔ gɛtɛ waade ɩn kɔlɔ fɔ dɩpwɛ, fɔ àà ka wade-kpen tola wɔ. Fɔ àà tɛ ɛwɔ gɛtɛ wade ɩ̀ dɔ̀ fɔ aten. 24 <<Gengyi aa bɛnɩ Isareli bete bɔɔ bɛkyʋnlɛ bè di boo koro bɩtà baanɩ yema bɛ mɛ wɔ̀ ade-kpen, gɛ bè biri bɛ ba aakʋn, be be kpèlè aa diyere be tiri onyun aa Dikwo-dɩrɛ fɔ daanɩ bɛ̀ fɔ ade-kpen yɩɩ gɛkakyɛ fɔ, 25 nʋn bɔɔ gɛfɔ fɔ ye gatala, fɔ àà ka aa bɛnɩ Isareli bete fɔ baade-kpen kyɛ bɛ, fɔ àà birima bɛ ba gɛtʋnkwaa, gɛtɛ a ka a tɛ bootu ɛbɛ fɔ gaanɩ.

26 <<Gengyi gatala gɩ̀ tan, gɛ ɛsʋn ɛn taa nɩ̀ nʋ̀n, yema aa bɛnɩ bɛ mɛ ade-kpen aa koro, gɛ gengyi bɛ̀ dama Dikwo-dɩrɛ fɔ dii koro be tiri onyun be tiri baade-kpen bɛ dɔ̀ aa diyere daanɩ, gɛ bè kere yɩ bɛ ya, yema aa tiira bɛ giten fɔ, 27 nʋn baakʋn ye gatala, fɔ àà ka aa bɛsaranyan Isareli bete baade-kpen kyɛ bɛ. Wùlà bɛ dɩsarabi-kpara, fɔ àà yɛ ɛsʋn ɛ̀ɛ̀ nʋ̀n gɛtʋnkwaa gɛtɛ a tɛ aa bɛnɩ gàà mɛ baadikurumanyan fɔ gaanɩ. 28 <<Gengyi dɩkpan abɛɛ gyerebi dɩ̀ nʋ̀n gɛtʋnkwaa fɔ gii koro, abɛɛ anyandilɛ yɩɩ gɛmɩna abɛɛ bɛkpagyɩgyɩ abɛɛ ma akpata, abɛɛ gengyi ɛkyʋnlɛ ɛkɩ ɛ̀ bɛ sʋ bɛ ɛ sa boo ditele dɩkɩ daanɩ, abɛɛ gyerebi-dɩrɛ abɛɛ diyebabi dɩkɩ dɩ̀ ba gɛtʋnkwaa fɔ gii koro, 29 abɛɛ gengyi aa bɛnɩ Isareli bete fɔ baanɩ ɛkɩ è nu koro wɔ dɩfana ma dɩyɩyɛ daanɩ, gɛ ɛ bʋma walɔ e wùlà Dikwo-dɩrɛ nyadɩ e tiri onyun dɩkpʋkpʋ daanɩ fɔ, 30 nʋn ye gatala aa gɛsarakʋn fɔ gaanɩ, fɔ àà ka wade-kpen kyɛ wɔ, fɔ àà mɛ wʋʋ gʋtʋn, fɔ àà le ɛkamasɛ gutoro anlɛ gɛtɛ wade mɛlɛ ì we. Yema à nyɩ̀ woturu waanɩ, gɛ awɔ aako n nyɩ̀ bɛnɩ powu boo-ituru yaanɩ. 31 Gɛlɛ fɔ, baà serenti wɔ̀, fɔ bàà di ade yii koro ɔya-kamasɛ gɛtɛ bɛ̀ sa gɛtʋnkwaa gɛtɛ a ka a tɛ tiitu ɛbɛ fɔ gaanɩ fɔ.

32 <<Gɛlɛ ke gɛ gengyi esela ɛkɩ gɛtɛ en di aa bɛnɩ Isareli bete baanɩ ɛkɩ, ɛ̀ nʋn aa diyere-dɩrɛ, ma aakɛma, ma aa geto-bɛnɩ-ya yii koro, è ye gende ma ɔfɔ gɩkɩ gaanɩ è be tiri onyun Dikwo-dɩrɛ nyadɩ daanɩ fɔ, 33 nʋn wakʋn ye gatala, aa gɛsarakʋn fɔ gaanɩ, fɔ àà mɛ gɩnyan-kamasɛ gɛtɛ esela fɔ e lila wɔ̀ fɔ, fɔ wàà yɛ gɛtʋnkwaa gɩɩ bɛnɩ powu bàà nyɩnla aa diyere, fɔ bàà serenti wɔ̀, anlɛ gɛtɛ aa mɛ a tɛ aa bɛnɩ Isareli bete fɔ, fɔ bàà nyɩnla alɛ Dikwo-dɩrɛ nyadɩ gɛtɛ na sere fɔ daanɩ gɛ bàà sʋma wɔ̀. 34 <<Gengyi aa bɛnɩ bɛ̀ san bɩtà ma bɔɔ bɛkyʋnlɛ fɔ, ɔkʋn-kamasɛ gɛtɛ à dɔ̀ bɛ alɛ bɛ san, gɛ bè fi bɔɔ bʋnʋn be ten ditele-dɩrɛ gɛtɛ a tiri, ma Dikwo-dɩrɛ gɛtɛ na sere bàà tɩ̀ sʋma wɔ̀ daanɩ lɛ, gɛ bè tiri onyun bɛ tɛ wɔ̀ fɔ, 35 nʋn boonyun-tiri ma bɔɔ gɛfɔ fɔ ye gatala, aa gɛsarakʋn fɔ gaanɩ, fɔ àà kpà tɛ bɛ. 36 <<Ɛkɩ ɛn ma gɛtɛ ɛn taà mɛ ade-kpen. Okoro gengyi bɛ̀ mɛ wɔ̀ ade-kpen, gɛ à ka owurufa boo koro, gɛ à tiri bɛ a tɛ bɔɔ bɛkyʋnlɛ gɛtɛ bàà gye bɛ bɩtà san gisela, ɔfɔ abɛɛ gbɛma, 37 gɛ gengyi bè foma be boo-ituru gɛtʋnkwaa gɛtɛ be gye bɛ bɩtà bɛ san fɔ gaanɩ, gɛ bè fi bɛ ba aakʋn bɛ dɔ̀ alan, <Tɩ mɛ ade-kpen, tɩ mɛ ɛwʋ gɛtɛ wʋn kɔlɔ, tɩ mɛ duyu-kɛma daade>, 38 gɛ gengyi bɛ̀ ka boo-ituru ma bɔɔkala ɛbɛ powu be biri be foma bɛ ba aakʋn, bɔɔ bɛkyʋnlɛ gɛtɛ be gye bɛ bɩtà fɔ bɔɔ gɛtʋnkwaa gaanɩ dʋkɔ, gɛ bè fi bɔɔ bʋnʋn be ten gɛtʋnkwaa gɛtɛ a ka a tɛ bootu ɛbɛ, ma ditele-dɩrɛ gɛtɛ a tiri, ma Dikwo-dɩrɛ, gɛtɛ na sere gɛtɛ bàà tɩ̀ sʋma wɔ̀ daanɩ fɔ, gɛ bè tiri onyun fɔ, 39 nʋn boonyun-tiri ma bɔɔ gɛfɔ ye gatala aa gɛsarakʋn fɔ gaanɩ, fɔ àà kpà tɛ bɛ, fɔ àà ka aa bɛnɩ baade-kpen gɛtɛ bɛ mɛ wɔ̀ fɔ kyɛ bɛ.

40 <<Nkele miin Wurubwarɛ, ǹ fɔ wɔ̀ gɛ, nʋn onyun-tiri gɛtɛ baà tiri nfan nyawʋ powu fɔ.

41 <<Nkele, oo Yahwe, miin Wurubwarɛ, tɔ fɔ àà bɛ̀ sara aa getunakʋn fɔ gaanɩ,

awɔ ma aakɛma wʋʋ dɩdaka fɔ.

Oo Yahwe Wurubwarɛ, yɛ aa getoya gàà sara ma aa gedi gɩɩ bɛtɛlɛ,

fɔ aa bɛnɩ bàà di ɔsɛ aade-kpara yaanɩ.

42 Oo Yahwe, mɩɩn Wurubwarɛ, kara tiri bʋnʋn ye aasaranyan gɛtɛ a sʋrʋ bʋnɔ wo koro fɔ.

Kʋna gelen-dɩrɛ gɛtɛ a dɔ̀ a sɩ̀ a tɛ aasaranyan Dafidi fɔ.>>