1 Yosiya e di Gɛkààrada Yerusalem anɩ ɛ ka sa Yahwe gebù, gɛ be wolo Gɛkààrada gɩɩyɛran fɔ ebon-gyangbasɛ wo duwi fwo-naafɛ daanɩ. 2 E yo gʋtʋn ɛ tɛ gedi gɩɩ bɛtɛlɛ, gɛ ɛ sa bɛ aniya bàà tɩ mɛ gʋtʋn Yahwe Dikwo-dɩrɛ fɔ daanɩ. 3 Ɛ dɔ̀ Lefi bete gɛtɛ bè di Isareli wade yii bewùlàlɛ gɛtɛ bɛ kpa koro dɩdɩɩ fɔ alan, <<Ɩ ka Dɩdaka fɔ ɩ sɩ̀ Dikwo-dɩrɛ gɛtɛ Isareli wogyu Dafidi wobi Solomon e sere fɔ daanɩ. Wun di gɛtɛ yàà ni tola dɩ yaagongyi yii koro, mɔ ɩ sʋma Yahwe yii Wurubwarɛ fɔ, ma wɔ bɛnɩ Isareli bete. 4 I yela yaayelakʋn ofoli-ofoli Dikwo-dɩrɛ fɔ daanɩ anlɛ gɛtɛ Egyu-dɩrɛ Dafidi ma wobi Solomon bɛ ŋwara bɛ sɩ fɔ.

5 I yela anlɛ gɛtɛ ɛyɩ bɛkɩ yaà talɩ ɩ kpà Isareli dɩkpaara-kamasɛ dɩɩ bɛnɩ fɔ. 6 I wolo Gɛkààrada gɩɩ bɛyɛran fɔ, fɔ yàà kpa koro dɩdɩɩ, fɔ yàà pɩna yɩɩwɔlɔn ɛbɛ booyo bɛyɛran fɔ, fɔ yàà mɛ anlɛ gɛtɛ Yahwe ɛ dama Mose wo koro ɛ dɔ̀ fɔ.>>

7 Ɛwʋ gɛ egyu-dɩrɛ Yosiya ɛ tɛ bɛnɩ fɔ powu bɛyɛran ma begbebi gɛtɛ baasɔ ɩ̀ ba disepekyi dɩkɩ ma ɩgbaa ton tɛ Gɛkààrada gii gedi fɔ. Gɛ ɛ nɩ tɛ bɛkwɔ gbaa ɛkɩ ma nkpɩn ton e ye ɛwɔ gbagba wanyan yaanɩ.

8 Gɛ wɔ bɛndɩrɛbi mɔ bɛ tɛ be ye ɛbɛ gbagba bo-ituru yaanɩ bɛ tɛ bɛnɩ fɔ, ma gedi gɩɩ bɛtɛlɛ, ma Lefi bete. Gɛ Hilikiya, ma Sakariya, ma Yetiyeli, gɛtɛ bɛɛ mɛ gʋtʋn Wurubwarɛ Dikwo-dɩrɛ fɔ daanɩ fɔ, bɛ tɛ gedi gɩɩ bɛtɛlɛ fɔ Gɛkààrada gaanyan gɛtɛ ɩ̀ ba disepekyi dɩkɩ ma ɩgba isiyee, ma bɛkwɔ gɛkpɩn ma akpilin ton. 9 Lefi bete bɔɔ bɛndɩrɛ Konaniya, ma Semayiya, ma wɔndɩrɛ ɛbɛ Nethaniyeli, ma Hasabiya, ma Yeyiyeli, ma Yosabadi bɛ tɛ bɛyɛran ɩgbaa ɩnyɔɔ ma nkpɩn ton, ma begbebi atan, ma ayɛran-gbʋgbʋ nkpɩn bʋnyɔɔ ma akpilin ton bɛ tɛ Lefi bete gɛtɛ bàà ka tɛ gedi fɔ.

10 Gɛtɛ bɛ pɩna gɩnynan-kamasɛ be were bɛ tɛ Gɛkààrada fɔ, gedi gɩɩ bɛtɛlɛ ma Lefi bete be yela baayelakʋn kperen-kperen anlɛ gɛtɛ egyu-dɩrɛ ɛ dɔ̀ bɛ fɔ. 11 Be wolo Gɛkààrada gɩɩ bɛyɛran fɔ, gɛ gedi gɩɩ bɛtɛlɛ bɛ ka bɛnan fɔ bɔɔkalan bɛ ŋwan gedi gɩɩ gɛtɛ̀kʋn fɔ gii koro, fɔ Lefi bete bɛɛ bɩya bɛnan fɔ. 12 Bɛ sɩ̀ gekuma gii gedi gɩɩ fɔ kperen gɛtɛ bɛnɩ fɔ baakpi kperen-kperen bàà tɛ Yahwe gedi anlɛ gɛtɛ bɛ ŋwara bɛ sa Mose gɩkpa gaanɩ fɔ. Gɛlɛ ke gɛ bɛ mɛ bɛkwɔ fɔ mɔ. 13 Be kuma Gɛkààrada gɩɩ bɛnan fɔ anlɛ gɛtɛ be wùlà fɔ, gɛ bɛ gyaga gedi gɩɩ gɛtɛ̀ fɩrɩnfɩrɩn fɔ bɛdanseyi, ma bɛsɩrɩbayɩ, ma bɛtasa yaanɩ gɛ be yo yɩ ɔtan-ɔtan bɛ tɛ bɛnɩ fɔ powu. 14 Nyawʋ wʋʋ gama fɔ, bɛ nya ɛbɛ gbagba mɔ boo koro, ma gedi gɩɩ bɛtɛlɛ fɔ, yema gedi gɩɩ bɛtɛlɛ gɛtɛ bè di Aaron wodu waanɩ wʋʋ bɛnɩ fɔ, bɛɛ tɛ gekuma gaanyan ma ayo yaanyan gɛlɛɛ ofila wàà gyu. Gɛlɛ wuu koro Lefi bete fɔ bɛ nya boo koro ma gedi gɩɩ bɛtɛlɛ gɛtɛ bè di Aaron wodu waanɩ wuu bebi fɔ.

15 Ɩnʋn yɩɩ bɛnʋmalɛ gɛtɛ bè di Asafi wodu waanɩ wʋʋ bɛnɩ fɔ, bè yela baayelakʋn anlɛ gɛtɛ Dafidi, ma Asafi, ma Heman, ma Wurubwarɛ wɔtabʋrʋlɛ Yadutun be wùlà bɛ fɔ. Gɛ wun di gɛtɛ itunun yɩɩ bɛnyalɛ fɔ bàà kpe ye baayelakʋn, yema bɔɔwɔlɔn ɛbɛ Lefi bete fɔ bɛ pɩna koro gɛtɛ bàà nya boo koro.

16 Gɛlɛ wuu okoro, anlɛ gɛtɛ egyu Yosiya ɛ bɔ ɛ dɔ̀ fɔ, bɛ mɛ wʋ duwi dɩtɔkɔ tɛ Yahwe gɛsʋma. Anlɛ gɛtɛ baà tì di Gɛkààrada gii duwi fɔ, ma gekuma gii gedi gɩɩ gɛtɛ̀, gedi gɩɩ gɛtɛ̀kʋn fɔ gii koro. 17 Gɛ Isareli bete gɛtɛ bɛ̀ sa dʋkɔ fɔ, be di Gɛkààrada gɩɩsɛ fɔ ma Boroboro gɛtɛ bɛn sa gɩfa-ŋanlɛ awi kwarankɩ. 18 Ye Wurubwarɛ wɔtabʋrʋlɛ Samuweli wɔya waanɩ be sere ma ǹdò lɛ, ben di Gɛkààrada gɩɩsɛ wʋkɩ anlɛ nyawʋ. Begyu powu gɛtɛ bɛ sara bɛ bɛ da fɔ, baanɩ ɛkɩ en di Gɛkààrada gii duwi anlɛ egyu Yosiya, ma gedi gɩɩ bɛtɛlɛ, ma Lefi bete, ma Yuda bete, ma Isareli, ma Yerusalem booyo nyawʋ. 19 Yosiya wo bugyu buu gedi wʋʋ gɩkyan fwo-nɩyɛfɛ gaanɩ gɛ be di Gɛkààrada gii duwi fɔ.

20 Nyayɩ powu yɩɩ gama gɛtɛ Yosiya ɛ pɩna Dikwo-dɩrɛ fɔ, Egyipiti wogyu Neko ɛ san bɩtà karikemisi Efurati anɩ. Gɛ Yosiya ɛ san ɛ ma tà bɩtà ma ɛwɔ. 21 Mɔ Neko ɛ sa bɛsalɛ wakʋn ɛ dɔ̀ alan, <<Oo! Egyu Yosiya, ololo mɔmɔ n sa ɛtɩ ma awɔ taanɩ? Mɩn ba na ba kpà ma awɔ, nan ba na kpà gɛ ma bɩɩn bɛkyʋnlɛ, gɛ Wurubwarɛ ɛ dɔ̀ mɩ alɛ n kya koro. Okoro ten gɛtɔ-yela Wurubwarɛ gɛtɛ ɛ̀ sa ma nmɩ fɔ wo koro, nka gɛlɛ fɔ, eè muru wɔ̀.>>

22 Mɔ Yosiya è len gɛtɛ ɛ̀ɛ̀ kpa ma ɛwɔ. Okoro e terema ɛn nʋn ade gɛtɛ Wurubwarɛ ɛ dama Neko wo koro ɛ dɔ̀ fɔ. E foma wo koro gɛ ɛ san ɛ̀ ma ta wɔ bɩtà Megido wɔtalan waanɩ.

23 Akpa yannɩ fɔ, gɩsɩnta gi sere egyu Yosiya gɛ ɛ dɔ̀ wɔ bɩtà bʋʋndɩrɛbi fɔ alan, << ka mɩ ye, na pira gɛtɛ wʋn ma gɛnya.>> 24 Okoro be tiri wɔ be ye wo tiira-mɩ-san anɩ gɛ bɛ ka wɔ bɛ sa tiira-mɩ-san-fon gɛtɛ ɛ̀ sa dʋkɔ fɔ anɩ gɛ bɛ ka wɔ bɛ san Yerusalem, dʋkɔ gɛ e ku. Be lò wɔ wotu ɛbɛ bɔɔ gɩ̀sàn gaanɩ, gɛ Yuda ma Yerusalem powu be wula wɔ. 25 Wurubwarɛ wɔtabʋrʋlɛ Yeremiya tiri ɔnʋn ɛ ka e wula Yosiya, gɛ wʋ be biligi ɔkɔnʋn wʋ tɛ ɩnʋn yɩɩ bɛnʋmalɛ gɛtɛ beteni ma bɛnanɩ powu bɛɛ tɩ nʋma wʋ gengyi bee wula wɔ fɔ. Bɛ ŋwara wʋ bɛ sa dɩkpʋkpʋ dɩɩnʋn yaanɩ. 26 Ade-kurumakyɛɛ gɛtɛ Yosiya ɛ mɛ wo bugyu buu gedi baanɩ, ma wɔ gɛka koro tɛ anlɛ gɛtɛ bɛ ŋwara bɛ sa Yahwe wo-ise yaanɩ, 27 ma wade-mɛlɛ powu ye digyegeye ma sere ɔkʋna powu, bɛ ŋwara yɩ bɛ sa Isareli ma Yuda begyu bɔɔ gɩkpa gaanɩ.