2 Ɩya-ɩya 22

Yuda wogyu Ahasiya

1 Yerusalem bete bɛ sɩ̀ Yehoram wobi-teni Ahasiya gɛtɛ è di wobi-teni-sʋnalɛ ɔkʋna fɔ bugyu, yema bɩtà bʋʋ bɛtàlɛ gɛtɛ bɛ ba ma Arabi bete fɔ, be wolo bebi-teni bɛndɩrɛ fɔ powu. Gɛlɛ wuu koro Yuda wogyu Yehoram wobi Ahasiya n te di bugyu Yuda.

2 Ɔkʋna gɛtɛ Ahasiya e di bugyu fɔ, ɛ̀ ba bɩkyan dikpilin ma bʋnyɔɔ, gɛ e di bugyu Yerusalem gɩkyan-kɩlɩn. Wɔna n di Omiri wɔnana Ataliya.

3 Ahasiya mɔ ɛ tɛrɛma gɛ Ahabi wo-isele kpen fɔ yaanɩ, yema wɔna e yela wɔ gama ma ade-kpen yɩɩ gɛmɛ. 4 Ɛ mɛ ade-kpen Yahwe bʋnʋn anlɛ gɛtɛ Ahabi ma wɔ dɩkpaara bɛ mɛ fɔ. Yema wote diku dɩɩ gama fɔ, Ahabi dɩkpaara dɩɩ bɛnɩ na bilingi waamɩnlɛ yɩɩbɛtɛlɛ, gɛ wʋ yɛ wɔ ɛ nʋ̀n. 5 Baamɩnlɛ gɛtɛ bɛ tɛ wɔ fɔ yii koro, ɛ fɩya ma Isareli wogyu Ahabi wobi-teni Yoram, gɛ bɛ ma tà bɩtà ma Aram wogyu Hasayeli Ramoti-Gileyadi ditele daanɩ. Gɛ Aram bete be pira Yoram. 6 Okoro e biri ɛ san Yesereeli ɛ̀ɛ̀ ma kya wakʋn gɛtɛ e pira Ramoti ditele daanɩ, ɛbɛ ma Aram wogyu Hasayeli baakpa fɔ yaanɩ fɔ.

Gɛ Yehoram wobi Ahasiya ɛ san ɛ ma silin wɔ Yesereli ditele dʋkɔbɛ.

7 Wurubwarɛ ɛ yɛ Ahasiya wɔ-ɩsan gɛtɛ ɛ san Yoram wakʋn fɔ i bilingi duyu-kpen-dɩrɛ ɩ tɛ wɔ. Ɔkʋna gɛtɛ Ahasiya ɛ ma gyu dʋkɔ fɔ, ɛbɛ ma Yoram bɛ tɔ bɛ ma tuma Nimisi wobi Yehu. Ɛwɔ gɛ Yahwe e tiri gɛtɛ eè muru Ahabi wodu wʋʋ bɛnɩ fɔ. 8 Gɛtɛ Yehu ee tin Ahabi wodu wʋʋ bɛnɩ dɩpwɛ anlɛ gɛtɛ Wurubwarɛ ɛ dɔ̀ fɔ, e we Yuda bɛndɩrɛ ma Ahasiya bekperebi gɛtɛ bɛɛ mɛ gʋtʋn bɛ tɛ wɔ, gɛ e wolo bɛ. 9 Gɛ Yehu e gyu gebugiti Ahasiya gɛ wɔ bɛsaranyan bɛ ma we wɔ gɛtɛ è bu Samariya ditele. Be gye wɔ gɛ bɛ ka wɔ bɛ mɔma Yehu gɛ e wolo wɔ. Gɛ be lò wɔ gepe yema bɛ dɔ̀ alan, <<È di Yehosafati gɛtɛ ɛ sʋma Yahwe nʋnkwarɩ anɩ fɔ wɔnana.>> Okoro ɛnɩ gbaa ɛkɩ ɛ mɩnɩ ma Ahasiya dɩkpaara fɔ daanɩ gɛtɛ eè di bugyu.

Ataliya ma Yowasi

10 Ɔkʋna gɛtɛ egyu-dɩrɛ Ahasiya wɔna Ataliya ɛ nʋn gɛtɛ wobi-teni Ahasiya e ku fɔ, ɛ san alɛ ɛ̀ ma muru Yuda digyu-kpaara fɔ dɩɩ bɛnɩ powu. 11 Mɔ egyu-dɩrɛ Yehoram wobi-nanɩ Yehoseba gɛtɛ e di Ahasiya wonosobi fɔ, ɛ ka Ahasiya wobi Yowasi e serenti e ye digyu-kpaara dɩɩ bɛnɩ gɛtɛ baà be wolo fɔ baanɩ. Ɛ ka ebi fɔ ma ɛnɩ gɛtɛ ɛɛ kyala wɔ fɔ ɛ ma bubwa Dikwo-dɩrɛ dii dikwo-dʋrɔlɛ dɩkɩ daanɩ. Okoro Ataliya en wura wolo wɔ. 12 Yowasi ma wɔnyalɛ fɔ be bu Yahwe Dikwo-dɩrɛ fɔ daanɩ bɩkyan kooron, fɔ Ataliya ee di bugyu gɛtʋnkwaa fɔ gaanɩ.