1 Yehosafati e ku, gɛ be lò wɔ ɔkʋn gɛtɛ bee kpèlè alɛ Dafidi Ditele fɔ. Gɛ wobi Yehoram e di bugyu e sere wɔ gɩsɩrɩ. 2 Egyu Yehosafati wobi Yehoram ɛ ba benobi kooron. Ɛbɛ n di, Asariya, ma Yehiyeli, ma Sekariya, ma Asariyahu, ma Mikayeli, ma Sefatiya. Ɛbɛ powu bè di Isareli wogyu Yehosafati bebi 3 Boote ɛ tɛ bɛ anyan kpekpesi. Ɛyɩ n di sɩka-fututu, ma sɩka-sɩya ma anyan ma ɔyɛ-kɛma kpekpesi, gɛ ɛ ka baanɩ-kamasɛ ɛ mɛ Yuda watele gɛtɛ bɛ mara ɩpɔrɩ be silin fɔ yii begyegeyelɛ. Mɔ ɛ ka bugyu fɔ ɛ sa Yehoram gʋlɔ yema ɛwɔ n di wobi-teni ɛndɩrɛ.

4 Gɛtɛ Yehoram e be di bugyu e sere wote gɩsɩrɩ, gɛ e sere ɩkpaa fɔ, e wolo wonobi ɛbɛ fɔ powu, fɩya ma Isareli bɛndɩrɛbi fɔ bɛkɩ. 5 Yehoram e di bugyu fɔ ɛ̀ ba bɩkyan dikpilin ma fwo-bʋnyɔɔ, gɛ e di bugyu Yerusalem bɩkyan nɩyɛ. 6 Yehoram mɔ ɛ mɛ gɛ anlɛ gɛtɛ Isareli begyu bɛ mɛ fɔ. Ɛ mɛ ade-kpen Yahwe bʋnʋn. Ɛ mɛ duyu-kɛma anlɛ egyu Ahabi, yema e to Ahabi wobi-nanɩ ɛkɩ gɩna. 7 Mɔ dikola gɛtɛ Yahwe ɛ tà ma Dafidi fɔ dii koro fɔ, en len ɛ̀ɛ̀ mɩna Dafidi dɩkpaara. Yema Yahwe ɛ dɔ̀ ɛ sɩ̀ gɛtɛ Dafidi wodu wʋʋ bɛnɩ nan di bugyu gakpaakpa.

8 Yehoram wɔya waanɩ fɔ, Edom bete bɛ tɔ be yela Yuda gɩfɩɩ gii koro, gɛ bɛ sɩ̀ ɛbɛ gbagba boogyu. 9 Ɛwʋ gɛ Yehoram ɛ ka wɔ bɛndɩrɛbi ma wo tiiramisan ɛbɛ, gɛ bɛ ma sʋ Edom bɛ sa. Dʋkɔ fɔ, Edom bɩtà bʋʋ bɛtàlɛ bɛ silin ɛwɔ ma wo tiiramisan ɛbɛ yɩɩ bɛsaralɛ bɔɔ bɛndɩrɛ fɔ powu be tuma, mɔ ɛ tɔ e serenti odente. 10 Okoro Edom ɛ lanla koro e ye Yuda anɩ bè ye ma ǹdò.

Ɔya wʋtɔkɔ waanɩ ke gɛ Libina ditele mɔ dɩ tɔ di yela Yuda wo koro, yema Yehoram e terema Yahwe, wotu ɛbɛ boo Wurubwarɛ fɔ. 11 Nkele mɔ e ni sere asʋmakʋn Yuda wo-idon yii koro, gɛ ɛ yɛ bɛnɩ gɛtɛ bɛ̀ sa Yerusalem ma Yuda fɔ be lulu osele, yema bɛ ma sʋma bekpen.

12 Ɛwʋ gɛ Wurubwarɛ wɔtabʋrʋlɛ Eliya ɛ ŋwara gɩkpa ɛ san ma Yehoram alan,<<Yahwe, aate Dafidi wo Wurubwarɛ alan, <An tɛrɛma aate Yehosafati abɛɛ aatu Yuda wogyu Asa wo-isele. 13 Mɔ fɔ, a tɛrɛma gɛ Isareli begyu boo-isele, gɛ a yɛ Yerusalem ma Yuda bete bɛ ma sʋma bekpen anlɛ gɛtɛ egyu Ahabi ma ɛbɛ gɛtɛ be di bugyu wɔ gama fɔ bɛ mɛ Isareli fɔ. A biri wolo awɔ gbagba aanobi ɛbɛ, aate dɩkpaara dii beteni gɛtɛ bee di gʋnʋn bɛ da wɔ fɔ. 14 Okoro nkele, Yahwe è de dɩyɩyɛ-dɩrɛ ɛɛ ba aa bɛnɩ, ma aa bebi-teni, ma aasɔ ɛbɛ ma gɩnyan-kamasɛ gɛtɛ gi di aayo fɔ gii koro. 15 Gɛ awɔ-gbagba mɔ, ɛɛ̀ yɛ àà gyu ɩkpɩn yii geyeba-kpen gɩkɩ gɛtɛ gaà mɛ ɔkɛma duwi n di duwi ma sere gɛtɛ aà ku.

16 Ɛwʋ gɛ Yahwe ɛ yɛ Filisiti bete ma Arabi bete gɛtɛ bè si gbɛma Etiyopiya bete fɔ bɛ ma kpà ma Yehoram. 17 Bɛ ma kpà ma Yuda bete, gɛ be tola baanyan-kpara gɛtɛ be wura digyu-kpaara fɔ daanɩ fɔ, fɩya ma wo bebi-teni ma wɔsɔ ɛbɛ powu bɛ da. Ahasiya gɛtɛ è di wobi-teni-sʋnalɛ ɔkʋna fɔ woko gɛ be kere bɛ ya.

18 Nyawʋ powu wʋ gama fɔ, Yahwe ɛ yɛ ɩkpɩn yii geyeba gɩkɩ gɛtɛ gɩ̀ ma gɩfa gɩ gbɛrɛ Yehoram. 19 Bɩkyan bʋnyɔɔ bàà be were fɔ, wo geyeba fɔ gɩ mɛ ɔkɛma gɛ ɛ ka dɩfana-dɩrɛ e ku. Wɔ bɛnɩ bɛn sa ɔtan wula wɔ anlɛ gɛtɛ be wula bootu ɛbɛ fɔ.

20 Gɛtɛ Yehoram e di bugyu fɔ ɛ̀ ba bɩkyan dikpilin ma fwo-bʋnyɔɔ, gɛ e di bugyu Yerusalem bɩkyan nɩyɛ. Gɛtɛ e ku fɔ, wʋn mɛ ɛnɩ ɛkɩ dɩkpʋkpʋ. Be lò wɔ ɔkʋn gɛtɛ bee kpèlè alɛ Dafidi Ditele fɔ, mɔ nka begyu boo gelòkʋn fɔ.