2 Ɩya-ɩya 26

Yuda wogyu Usiya

1 Ɛwʋ gɛ Yuda bɛnɩ powu be gye Usiya gɛtɛ e di bɩkyan fwo-kooron fɔ bɛ sɩ̀ bugyu be sere wote Amasiya gɩsɩrɩ. 2 Gɛtɛ wote e ku wʋʋ gama fɔ, ɛwɔ na pɩna na sere Elati ɛ tɛ Yuda.

3 Usiya e di bugyu fɔ ɛ̀ ba bɩkyan fwo-kooron, gɛ e di bugyu Yerusalem bɩkyan akpilin anyɔɔ ma fwo-bʋnyɔɔ (52). Wɔna diyere n di Yekoliya, gɛ e ye Yerusalem 4 Ɛ mɛ ade gɛtɛ ɩ̀ tʋna Yahwe bʋnʋn anlɛ gɛtɛ wote Amasiya ɛ mɛ fɔ. 5 Ɔkʋna gɛtɛ Sekariya è si nkpa, gɛ ɛɛ tɩ̀ tabʋrʋ ɛ tɛ Usiya Wurubwarɛ geserenti gaanɩ fɔ, ɛ san Wurubwarɛ gelenbi gaanɩ. Gɛ Wurubwarɛ ɛ yɛ ade i pe ɩ tɛ wɔ.

6 Usiya ɛ san ɛ ma kpà ma Filisiti bete gɛ e gbena Gati, ma Yabine, ma Asidodi bɔ-ɩpɔrɩ. Gɛ ɛ pɩna e sere atele gbɛma Asidodi ma ɩkʋn-fon, Filisiti bete baanɩ. 7 Gɛ Wurubwarɛ ɛ yɛ wɔ e di Filisita bete, ma Arabi bete gɛtɛ bɛ sa Guri-Baali ma Mewun bete boo koro 8 Amori bete bee le gɩkyan-gɩkyan gii gutoro bɛ tɛ Usiya, gɛ e wura ɔkɛma-dɩrɛ gɛtɛ wʋ yɛ wo diyere dɩ yasɩ dɩ ma ye sɩyɛɛ Egyipiti wɔ-ɩbalan yaanɩ.

9 Usiya ɛ mara ayelakʋn-dɩyɛlɛ Yerusalem ma otunu gɛtɛ bee kpèlè Kɔna Wotunu fɔ, ma Dɩtagba Diitunu, ma ɔkʋn gɛtɛ ɔpɔrɩ fɔ wu fi fɔ, gɛ ɛ mara ɩpɔrɩ ɛ sa yɩ. 10 Gɛ e biri ɛ mara ayelakʋn-dɩyɛlɛ otonkuma yaanɩ gɛ e kunla atiribun yema ɛ ba ditele dɩ bɛnan kpekpesi odon wʋʋ bɩsɩrɩ wuufila wʋʋ gɛnʋ̀nkʋn gɩɩ gɩlan ma wɔtalɩ waanɩ. Usiya ee len bʋfʋn baade okoro ɛ yɛ bɛnɩ bɛ fʋn wayɩn wo-ili idon yɩɩ ntʋnkwaa baanɩ, ma ntʋnkwaa-kpara baanɩ.

11 Usiya e wura bɩtà bʋʋ bɛtàlɛ gɛtɛ be wùlà bɛ akpa yɩɩ gakpa gepepe. Be yo baanɩ akpen-akpen tɛ akpa anlɛ gɛtɛ wɔ gɩkpa gɩɩ ŋwaralɛ Yeyeli ma ɛndɩrɛbi Maaseya bɛ ŋwara bɛ sa gɩkpa gaanɩ ɔkʋna gɛtɛ Hananiya ɛɛ nya boo koro fɔ. 12 Akpaara yɩɩ bɛndɩrɛ gɛtɛ bɛɛ nya bɩtà bʋʋ bɛtàlɛ fɔ boo koro fɔ bɛ̀ ba gbaa ma nkpɩn-busiyee (2,600). 13 Bɩtà bʋʋ bɛtàlɛ asepekyi fwo-ton ma ɩgbaa isiyee ma nkpɩn kwarankɩ ma akpilin ton (307,500) n sa be gyegeyelɛ fɔ bɔɔ gatɩn gɛtɛ be wula bɛ akpa yɩɩ gakpa gepepe, ɔkɛma-dɩrɛ wuu bete gɛtɛ baà tɩ̀ tà bɔɔ bɛ kyʋnlɛ bɩtà bɛ tɛ egyu-dɩrɛ. 14 Usiya ɛ tɛ bɩtà bʋʋ bɛtàlɛ fɔ baanɩ-kamasɛ gɩwɔrɔnyan-dɩyɛlɛ koro, ma bɩsɩnta, ma gɩwɔrɔnyan gaakoto, ma bɩtà bʋʋ ngba, ma agyatʋrʋ, ma bɛtaya. 15 Gɛ wɔ bɛnɩ gɛtɛ bɛ̀ nyɩ̀ alɔ yaanɩ yaadawʋ yɩɩ bʋtʋn yɩɩ gɛ mɛ fɔ, bɛ mɛ ɩdʋ gɛtɛ yiiko-yiiko ɩɩ talɩ ɩ tà bɩsɩnta, gɛ ɩɩ talɩ i fun ataa-dɩrɛ-dɩrɛ, gɛ ii fun bɩsɩnta ma ataa i ye Yerusalem ayelakʋn-dɩyɛlɛ ma ɩpɔrɩ yii koro. Gɛ wo diyere di ye, gɛ e wura ɔkɛma-dɩrɛ yema Wurubwarɛ ɛ kpà wɔ.

16 Mɔ gɛtɛ Usiya e wura ɔkɛma fɔ, wɔ gɛbʋma koro gatala wʋ yɛ wɔ ɛ nʋ̀n. En di nʋnkwarɩ tɛ Yahwe, wɔ Wurubwarɛ fɔ, gɛ e gyu Yahwe Dikwo-dɩrɛ fɔ daanɩ e kuma olifwi, olifwi wuu gedi gɩɩ gɛtɛ̀kʋn fɔ gii koro. 17 Gɛ gedi gɩɩtɛlɛ Asariya, fɩya ma gedi gɩɩ bɛtɛlɛ akpilin anaa do gɛtɛ bɛ̀ ba oturu bɛ tɛrɛma wɔ be gyu Dikwo-dɩrɛ fɔ daanɩ. 18 Bɛ ma sʋ wɔ, gɛ bɛ dɔ̀ wɔ alan, <<Usiya! Nka awɔ nan kuma olifwi a tɛ Yahwe. Gedi gɩɩ bɛtɛlɛ gɛtɛ bè di Aaron wodu wʋʋ bɛnɩ gɛtɛ bɛ kpa koro dɩdɩɩ fɔ bɔɔ gʋtʋn gɩlɛ. Ye ɔkʋn fɩrɩnfɩrɩn-kʋn nfan san, yema an di nʋnkwarɩ tɛ Yahwe, gɛ ɛn nan hira wɔ.>>

19 Fɔ Usiya è yela gedi gɩɩ gɛtɛ̀kʋn fɔ gɩɩpɩ è de olifwi wʋʋ bɛtasabi. Gɛ ɛ ka owurufa ma gedi gɩɩ bɛtɛlɛ fɔ Yahwe Dikwo-dɩrɛ fɔ daanɩ dʋkɔ, disere-kɩlɩn fɔ, akyanga-kpen akɩ ɩ ŋwan wɔ gɛyɛ gii koro. 20 Gɛtɛ gedi gɩɩtɛlɛ ɛndɩrɛ Asariya ma gedi gɩɩ bɛtɛlɛ do fɔ powu bɛ nya fɔ, be we gɛtɛ akyanga ɩ ŋwan wɔ bʋnʋn. Okoro bɛ kpaara wɔ be ye okòro. Ɛwɔ gbagba mɔ e kutuma e ye, yema Yahwe ɛ yɛ geyeba gɩ gbɛrɛ wɔ.

21 Egyu-dɩrɛ Usiya e gyu akyanga ka ma sere gɛtɛ e ku. Ɛ sara dɩkpaara kperen dɩkɩ daanɩ woko-kwan, gɛ wobi Yotam na yɛ ɛ nya digyukpaara fɔ ma gɩfɩɩ fɔ gɩɩ bɛnɩ boo koro.

22 Wurubwarɛ wɔtabʋrʋlɛ Amosi wobi Isaya ɛ ŋwara ade-kurumakyɛɛ gɛtɛ Usiya ɛ mɛ wo bugyu buu gedi gaanɩ ye digyegeye ma sere ɔkʋna powu. 23 Usiya e ku gɛ be lò wɔ gbɛma wotu ɛbɛ bɔɔ bɩsàn gɛtɛ bee lò begyu fɔ, yema bɛnɩ bɛɛ dɔ̀ alan, <<Ee yeba akyanga.>> Gɛ wobi Yotam e di bugyu e sere wɔ gɩsɩrɩ.