2 Ɩya-ɩya 25

Yuda wogyu Amasiya

1 Ɔkʋna Amasiya e di bugyu fɔ ɛ̀ ba bɩkyan dikpilin ma ton, gɛ e di bugyu Yerusalem bɩkyan dikpilin ma yɛkɩ. Wɔna diyere n di Yehowadin gɛtɛ e ye Yerusalem fɔ. 2 Ɛ mɛ ade gɛtɛ ɩ̀ tʋna Yahwe bʋnʋn, mɔ nka ma woturu powu. 3 Ɔkʋna gɛtɛ Amasiya wo bugyu bu sere ɩkpaa gepepe fɔ, e wolo bɛndɩrɛbi gɛtɛ be wolo wote fɔ. 4 Mɔ en wolo bɛndɩrɛbi fɔ boo bebi, yema bɛ ŋwara Mose Ise yɩɩ Gɩkpa gaanɩ alɛ Yahwe ɛ dɔ̀ alan, <<Ɩ kara wolo bɛtaawe bebi baade-kpen yii koro, gɛ ɩ kara wolo bebi bɛtaawe baade-kpen yii koro, ɛkamasɛ wade-kpen gɛtɛ ɛ mɛ fɔ yii diku gɛ eè ku>> okoro.

5 Gɛ Amasiya e kpèlè Yuda wofoli ma Benyamin wofoli wuu bete e tuma, gɛ ɛ sɩ̀ bɛ akpen-akpen, gɛ e tiri bɩtà bʋʋ bɛndɩrɛ gɛtɛ bɩtà bʋʋ bɛtàlɛ nkpɩn ton-ton, ma ɛbɛ gɛtɛ akpilin ton-ton bɛ̀ sa bɔɔ gatɩn fɔ ɛ sɩ̀ odu waakpaara-akpaara yiinyun. Gɛ ɛ kalan ɛbɛ gɛtɛ be di bɩkyan dikpilin ka bʋn fɔ. Ɛbɛ powu bɛ ba asepekyi fwo-ton (300,000) gɛtɛ baà talɩ be ton gɩtʋrʋnyan ma gɩwɔrɔnyan-panpasan-dɩyɛlɛ koro bɛ san akpà. 6 Gɛ e biri ɛ hayɩ bɩtà bʋʋ bɛtàlɛ asepekyi ton (100,000) e ye Isareli fɔ èè le bɛ sɩka-fututu gɛtɛ wʋʋdʋrʋ wʋ̀ ba bekilo gbaa ɛkɩ ma nkpɩn kwarankɩ (3,400).

7 Mɔ Wurubwarɛ wɔtabʋrʋlɛ ɛkɩ ɛ ba wakʋn ɛ bɛ dɔ̀ wɔ alan, <<Oo egyu-dɩrɛ, kara yɛ Isareli bɩtà bʋʋ bɛtàlɛ nyabɛ bàà fɩya ma awɔ san, yema alɛ Yahwe ɛn fɩya ma Isareli bete, gɛ ɛn fɩya ma Efrayim gba. 8 Gɛ gengyi à san a ma kpà lann fɔ, Wurubwarɛ ɛɛ̀ yɛ aa bɛkyʋnlɛ fɔ bàà di aa koro. Yema Wurubwarɛ n ba ɔkɛma gɛtɛ ɛ̀ɛ̀ kpà aa bɛkyʋnlɛ abɛɛ ɛ̀ɛ̀ yɛ bɛ bàà nʋ̀n bɩtà baanɩ.>>

9 Ɛwʋ gɛ Amasiya e lila Wurubwarɛ wɔtabʋrʋlɛ fɔ alan, <<Gɛ gɛtɛ na were le sɩka-fututu gɛtɛ wʋʋdʋrʋ wʋ̀ ba bekilo gbaa ɛkɩ ma nkpɩn kwarankɩ (3,400) lɛ de?>>

Gɛ Wurubwarɛ wɔtabʋrʋlɛ fɔ e tiri wuunyun alan, <<Yahwe ɛ̀ talɩ ɛ tɛ wɔ̀ ɛ da gɛlɛ.>>

10 Okoro Amasiya e tiri bɩtà bʋʋ bɛtàlɛ gɛtɛ be ye Efrayim bɛ ba wakʋn fɔ osele, gɛ ɛ yɛ bɛ be biri bɛ da bɔɔlɛ. Bɛ ka owurufa Yuda wo koro, gɛ bɛ tɔ bɛ da bɔɔlɛ ma owurufa.

11 Gɛ Amasiya e sere oturu, gɛ e gyegeye wɔ bɩtà bʋʋ bɛtàlɛ fɔ bɔɔ bʋnʋn, gɛ bɛ san Bʋbɔlɛ bʋʋ Dɩtagba fɔ daanɩ, gɛ e wolo Edom bete ɩgbaa ton (10,000) dʋkɔbɛ. 12 Yuda bɩtà bʋʋ bɛtàlɛ fɔ be ni gye bɛnɩ ɩgbaa ton (10,000) gʋnʋn-ŋɔrɔ, gɛ bɛ ka bɛ bɛ bʋn dɩtaa-tɔlɛ dɩkɩ dii koro, gɛ be tunla bɛ be ye gatala dʋkɔ bɛ fɩna gɛtʋnkwaa, gɛ be sila kpeti-kpeti.

13 Gɛ bɩtà bʋʋ bɛtàlɛ gɛtɛ Amasiya ɛn yɛ bɛ bàà tɛrɛma bɛ san akpa fɔ bɛ ma tin Yuda watele yaanɩ ye Samariya ma gyu Beti-Horon. Be wolo bɛnɩ Gbaa ma nkpɩn-ton (3,000) gɛ be kpila anyɩmɩnyan kpekpesi bɛ da.

14 Gɛtɛ Amasiya ɛ ma di Edom bete boo koro e be gyu fɔ, ɛ ka bekpen gɛtɛ e to e ye baakʋn fɔ ɛ ba wakʋn. Ɛ tɩyɛ bɛ ɛ sɩ̀ anlɛ ɛwɔ gbagba wo bekpen, gɛ ɛ sʋma bɛ, gɛ ɛ tɛ bɛ gekuma gii gedi. 15 Ɛwʋ gɛ Yahwe wowurufa wʋ tɔ Amasiya wuu koro, gɛ ɛ sa wɔtabʋrʋlɛ ɛkɩ wakʋn alan, <<Anʋn yii koro gɛ a sʋma bɛnɩ nyabɛ boo bekpen gɛtɛ bɛn talɩ be to bɛ be ye aalɔ yaanɩ fɔ?>>

16 Gɛtɛ Wurubwarɛ wɔtabʋrʋlɛ fɔ ɛ̀ sangba ɛɛ tabʋrʋ fɔ, egyu-dɩrɛ e lila wɔ alan, <<Ti tiri wɔ̀ alɛ mɛ amɩnlɛ-yɩɩtɛlɛ tɛ egyu-dɩrɛ? Ten! Nka gɛlɛ nan wolo wɔ̀.>>

Okoro Wurubwarɛ wɔtabʋrʋlɛ fɔ e kere gɛtabʋrʋ ɛ ya, mɔ ɛ dɔ̀ alan, <<Ǹ nyɩ gɛtɛ Wurubwarɛ ɛ mɛ gɛtɛ eè muru wɔ̀, yema ade nyayɩ gɛtɛ a mɛ gɛ an nʋn maade gɛtɛ na dɔ̀ fɔ.>>

17 Gamama gɛtɛ Yuda wogyu-dɩrɛ Amasiya e to amɩnlɛ e ye waamɩnlɛ-yɩɩbɛtɛlɛ baakʋn fɔ, ɛ sa Yehohasi gɛtɛ è di Yehowahasi wobi, gɛ è di Isareli wogyu-dɩrɛ Yehu wɔnana fɔ ɔtʋn alan, << Bè tuma mɩ, fɔ tàà kpà.>>

18 Mɔ Isareli wogyu Yehowasi e birima ɔtʋn ɛ tɩyɛma Yuda wogyu Amasiya alan, <<Dɩfa ma iwiya gɛtɛ ɩ̀ sa Lebanon wo-idon yaanɩ fɔ ɩ sa seda wo-iyon ɔtʋn alɛ, <Ka aabi-nanɩ tɛ miinbi-teni èè to gɩna.> Ɛwʋ gɛ dɩfa dɩɩnan ɛkɩ e be kyikya dɩfa ma iwiya fɔ ɛ mɩna. 19 Wʋ̀ sa waanɩ alɛ a di Edom bete boo koro, gɛ wʋ yɛ wɔ̀ aa bʋma koro gatala. Yɛ wàà di wɔ̀ gʋnʋn alɛ a di boo koro, mɔ waran sara aalɛ! Anʋn yii koro gɛ aa len ade gɛtɛ yaà ka gyerebi ɩ mɔma awɔ ma Yuda bɛnɩ powu?>>

20 Mɔ Amasiya e terema, ɛn nʋn. Yema Wurubwarɛ ɛ wɛrɛ mɛ ɛ sɩ̀ gɛtɛ ɛɛ̀ yɛ Yehowasi èè di Amasiya wo koro gɛtɛ e biri ɛ ma sʋma Edom bekpen fɔ wuu koro. 21 Okoro Isareli wogyu-dɩrɛ Yehowasi ɛ san ɛ ma tama Yuda wogyu-dɩrɛ Amasiya Beti-Semesi ditele gɛtɛ dɩ̀ sa Yuda gɛtʋnkwaa gaanɩ gɛ bɛ tà bɩtà. 22 Isareli bɩtà bʋʋ bɛtàlɛ be di Yuda bɩtà bʋʋ bɛtàlɛ fɔ boo koro, gɛ wʋ yɛ Yuda bɩtà bʋʋ bɛtàlɛ fɔ be serenti bɛ da baatele yaanɩ. 23 Isareli wogyu Yehowasi e gye Yuda wogyu Amasiya gɛtɛ è di Yowasi wobi, gɛ è di Ahasiya wɔnana fɔ bɩtà Beti-Semesi. Gɛ Yehowasi ɛ san Yerusalem ɛ ma sila Yerusalem wɔpɔrɩ fɔ ɛ fɩna, ye Efrayim Wotunu ka ma sere otunu gɛtɛ bee kpèlè Kɔna Wotunu fɔ. Ɔpɔrɩ gɛtɛ e sila fɔ waà mɛ bɩsɩrɩ nkpɩn bisiyee (600). 24 Gɛ be kpila sɩka-sɩya ma sɩka-fututu powu, ma anyɩmɩnyan gɛtɛ be we Yahwe Dikwo-dɩrɛ daanɩ gɛtɛ Obedi-Edom ɛɛ nya yii koro fɔ, fɩya ma digyu-kpaara daanyan-kpara fɔ ma bɛnɩ gɛtɛ be gye fɔ, gɛ ɛ ka bɛ e birima ɛ da Samariya. 25 Yowasi wobi Amasiya gɛtɛ è di Yuda wogyu-dɩrɛ fɔ ɛ sara nkpa bɩkyan fwo-ton Yehowahasi wobi Yehowasi gɛtɛ è di Isareli wogyu-dɩrɛ diku dɩɩ gama. 26 Ade-kurumakyɛɛ gɛtɛ Amasiya ɛ mɛ, ma ɛyɩ gɛtɛ ɛ mɛ wo bugyu buu gedi baanɩ, ye digyegeye ma sere ɔkʋna fɔ, bɛ ŋwara yɩ bɛ sa Yuda ma Isareli begyu-dɩrɛ boo koro gaade yɩɩ gɩkpa-dɩrɛ fɔ gaanɩ. 27 Ye ɔkʋna gɛtɛ Amasiya e kere Yahwe gɛsʋma ɛ ya fɔ, Yerusalem bɛnɩ bɛ mɛ onyun bàà wolo Amasiya, gɛ e serenti ɛ san Lakisi. Mɔ bɛ sa bɛnɩ bɛ tɛrɛma wɔ bɛ san dʋkɔ bɛ ma wolo wɔ. 28 Gɛ bɛ ka wo gikpena fɔ bɛ gyaga dibengyi dii koro bɛ ba Yerusalem, gɛ be lò wɔ wotu ɛbɛ boo gelòkʋn, ɔkʋn gɛtɛ bee kpèlè Dafidi Ditele fɔ.