1 Gɛtɛ Rehobwam e bè gyu Yerusalem fɔ, ɛ kʋla Yuda ma Benyamin boo-ifoli yɩɩ bɩtà bʋʋ bɛtàlɛ asepekyi yɛkɩ (180,000) gɛtɛ bɛ̀ nyɩ̀ bɩtà bʋʋ gɛtà gepepe bàà ma kpà ma Isareli, fɔ èè biri to bugyu fɔ fɩya.

2 Mɔ Wurubwarɛ ɛ da ma wɔtabʋrʋlɛ Semaya wo koro ɛ dɔ̀ alan, 3 <<Dɔ̀ Solomon wobi Rehobwam, Yuda wogyu-dɩrɛ, ma Isareli bete powu, ma Yuda, ma Benyamin boo-ifoli powu, ma bɛnɩ-kurumakyɛɛ fɔ alan, 4 <Yahwe alɛ ɩ kara bʋn ɩ san ɩ ma kpà ma yɩɩwɔlɔn ɛbɛ Isareli bete fɔ. Ɛkamasɛ e biri ɛ san wɔ dɩkpaara, yema nmɩ na yɛ gɛ wʋ ba gɛlɛ.> >> Okoro bɛ nʋn Yahwe wanyun-gyebi fɔ, gɛ ɛkamasɛ e biri ɛ da wɔ dɩkpaara, anlɛ gɛtɛ Yahwe wanyun-gyebi ɩ dɔ̀ fɔ.

5 Rehobwam ɛ sara Yerusalem gɛ e sere ɩpɔrɩ e silin atele-dɩrɛ-dɩrɛ gɛtɛ ɩ̀ sa Yuda fɔ. 6 Atele fɔ n di, Betelehem, ma Etam, ma Tekwa, 7 ma Beti-Suri, ma Soko, ma Adulam, 8 ma Gati, ma Maresa, ma Sifi, 9 ma Adorayim, ma Lakisi, ma Aseka, 10 ma Sora, ma Ayalon, ma Hebron. 11 Rehobwam ɛ pɩna e sere ɩpɔrɩ gɛtɛ ɩ̀ ba ɔkɛma, gɛ e tiri bɩtà bʋʋ bɛndɩrɛ ɛ sɩ̀ ditele-kamasɛ daanɩ, gɛ ɛ sɩ̀ anyandilɛ ma bʋnɔ, ma bʋkan ditele-kamasɛ daanɩ. 12 Ɛ ka awɔrɔnyan panpasan-dɩyɛlɛ koro ma buturunyan ɛ sɩ̀ atele fɔ powu yaanɩ. Ɛ mɛ gɛlɛ ɛ ka ɛ sa yɩ ɔkɛma. Okoro Yuda ma Benyamin ntʋnkwaa bʋ yɛ bʋ̀ sa wɔ gatɩn.

13 Gɛ gedi gɩɩ bɛtɛlɛ ma Lefi bete powu gɛtɛ bɛ̀ sa Isareli gatɩn gɩɩ gɩlan fɔ bɛ ma fɩya ma Rehobwam. 14 Lefi bete fɔ gba be kere bɔɔ bɛnan baadikʋn ma baanyan bɛ ya, gɛ bɛ tɔ bɛ san Yuda ma Yerusalem yema Yerobwam ma wo bebi-teni bɛn tɛ bɛ osele bàà mɛ bɔɔ gʋtʋn anlɛ Yahwe gedi gɩɩ bɛtɛlɛ. 15 Gɛ Yerobwam e tiri ɛwɔ gbagba gedi gɩɩ bɛtɛlɛ gɛtɛ baà tɩ̀ mɛ gʋtʋn asʋmakʋn yaanɩ, fɔ bàà tɩ̀ tɛ bekpen gɛtɛ ɛ yɛ mɛ mara bɛ anlɛ begbebi ma akwɔbi fɔ gedi. 16 Ɛwʋ gɛ Isareli wo-ifoli powu yɩɩ bɛnɩ gɛtɛ bee len bàà sʋma Yahwe, Isareli wo Wurubwarɛ fɔ, bɛ tɛrɛma Lefi bete fɔ bɛ san Yerusalem bàà ma tɛ Yahwe, bootu ɛbɛ bɔɔ Wurubwarɛ fɔ gedi. 17 Bɛ sa Yuda bugyu fɔ ɔkɛma gɛ bɛ ka bɩkyan bisiyee bɛ kpà Solomon wobi Rehobwam, gɛ bɛ san Wurubwarɛ wosele waanɩ anlɛ gɛtɛ bɛ sara Dafidi ma Solomon baawi yaanɩ fɔ.

18 Rehobwam e to Mahalati gɩna. Mahalati è di gɛ Dafidi wobi-teni Yerimoti wobi-nanɩ, gɛ wɔna n di Abihayili gɛtɛ è di Yese wobi-teni Eliyabi wobi-nanɩ fɔ. 19 E wo bebi-teni ɛ tɛ wɔ. Ɛbɛ n di Yehusi, ma Semariya, ma Saham. 20 Gamama fɔ, e to Abisalom wobi-nanɩ Maaka gɩna, gɛ e wo Abiya, ma Atayi, ma Sisa, ma Selomiti ɛ tɛ wɔ. 21 Rehobwam e len Abisalom wobi-nanɩ Maaka wade ɛ da wɔsɔ ɛbɛ, ma wodima ɛbɛ kurumakyɛɛ fɔ powu. Ɛwʋ powu waanɩ fɔ, Rehobwam e to bɛna fwo-nɩyɛ (18) ma be dɩma akpilin asiyee (60). Gɛ e wo bebi-teni dikpilin ma nɩyɛ (28), ma bebi-nanɩ akpilin asiyee (60).

22 Rehobwam ɛ mɛ Maaka wobi-teni Abiya egyegeyelɛ ɛ tɛ wɔdɩrɛ ma wonobi ɛbɛ, fɔ wàà wùlà alɛ ɛwɔ nan bè di bugyu. 23 Rehobwam ɛ mɛ gɛsɛyɩ, gɛ ɛ ka gʋtʋn ɛ sa-sa wo bebi-teni fɔ baalɔ, Yuda ma Benyamin baatele gɛtɛ bɛ mara ɩpɔrɩ be silin yɩ fɔ yaanɩ. Ɛ tɛ bɛ anyan gɛtɛ baà hiyan powu ma bɛna kpekpesi.