2 Ɩya-ɩya 2

Solomon ɛɛ pɩna koro èè sere Wurubwarɛ Dikwo-dɩrɛ fɔ

1 Solomon ɛ dɔ̀ alɛ eè sere Dikwo-dɩrɛ bàà tɩ̀ sʋma Yahwe daanɩ, ma ɛwɔ gbagba wo digyu-kpaara. 2 Solomon e tiri atola yii betolalɛ asepekyi asiyee ma ɩgbaa ton (70,000), ma ataa yɩɩ bɛkpalɩlɛ asepekyi anaa (80,000) idon yaanɩ, ma bɛndɩrɛ gɛtɛ bɛɛ nya gʋtʋn gii koro gbaa ma nkpɩn kooron ma akpilin ton (3,300) gɛtɛ bɛɛ nya gʋtʋn fɔ gii koro. 3 Gɛ Egyu-dirɛ Solomon ɛ sa Tire wogyu Hiram ɔtʋn alan,<<Tɩyɛma mɩ Seda wo-iyon anlɛ gɛtɛ a tɩ̀ mɛ a tɛ miinte Dafidi, ɔkʋna gɛtɛ e sere wo digyu-kpaara fɔ. 4 Nte len nan sere Wurubwarɛ Dikwo-dɩrɛ gɛtɛ bàà tɩ̀ sʋma Yahwe, miin Wurubwarɛ daanɩ. Fɔ dàà mɛ ɔkʋn-fɩrɩnfɩrɩnkʋn gɛtɛ nmɩ ma mɩɩn bɛnɩ taà tɩ̀ kuma olifwi Yahwe bʋnʋn, ma ɔkʋn gɛtɛ baà tɩ̀ ka boroboro gɛtɛ bɛ ka bɛ tɛ Wurubwarɛ gedi fɔ bɛ sɩ̀ ɔya-kamasɛ, ma ɔkʋn gɛtɛ baà tɩ̀ tɛ gekuma gii gedi gagyɩgyan ma ɔgyɔlɔ ma Awi-tunalɛ ma Bebon-Fon bɔɔ-ɩsɛ yii gedi ma Awi-dilɛ ɔsɛ-kurumakyɛɛ tɛ Yahwe, tii Wurubwarɛ fɔ. Ɛ dɔ̀ ɛtɩ Isareli bete gɛtɛ tàà di ade nyayɩ yii koro gakpaakpa.

5 Wurubwarɛ Dikwo gɛtɛ nan sere fɔ daà mɛ Dikwo-dɩrɛ, yema tii Wurubwarɛ è di ɛgbaa da ekpen-kamasɛ. 6 Mɔ ɛnyan nan talɩ e sere Dikwo-dɩrɛ ɛ tɛ Yahwe, gɛtɛ gatala, ma gatala gɩɩ gatala gba ɩn sɔ tɛ wɔ̀ lɛ? Ɛnyan gɛ ǹ di gɛtɛ nan sere dikwo n tɛ wɔ, sɩyɛɛ gekuma gii gedi gɩɩ gɛtɛ̀kʋn giiko. 7 Okoro tɩyɛma mɩ eteni ɛkɩ gɛtɛ ɛ̀ nyɩ sɩka-sɩya ma sɩka-fututu, ma gɩwɔrɔnyan sɩya ma gɩwɔrɔnyan yɩɩ gʋtʋn gɩɩ gɛmɛ, gɛ è biri ɛ̀ nyɩ̀ ɔkpɩ wuu butu wʋʋ-ɩyangʋ, ma ɔyangʋ-sɩya-yuu ma nkeni butu bʋʋ-ɩyangʋ, gɛ ɛ kʋkwa ma anyan yɩɩ gɛta fɔ ɛ̀ɛ̀ bɛ mɛ gʋtʋn ma maadawʋ yii bete gɛtɛ miinte Dafidi e tiri ɛ sɩ̀ Yuda ma Yerusalem fɔ.

8 Nkele mɔ, ka seda wo-iyon, ma sipiresi wo-iyon ma alimugi wo-iyon ye Lebano tɩyɛma mɩ. Yema ǹ nyɩ̀ gɛtɛ aa bɛnɩ bɛ̀ nyɩ̀ iyon yii gekebi. Mɩɩn bɛsaranyan baà bɛ kpà bɛ, 9 fɔ bàà talɩ kebi iyon fɔ yàà sɔ, yema Dikwo-dɩrɛ gɛtɛ nan sere fɔ daà sɔ, gɛ daà mɛ ɔmɩrɩ. 10 Nan le aa bɛsaranyan gɛtɛ baà kebi iyon fɔ amɔrɔ bɛbagɩ disepekyi, ma anaabi, bɛbagɩ disepekyi, ma wayɩn bʋkan bɛgalɔn disepekyi, ma olife bʋnɔ bɛgalɔn disepekyi.>>

11 Ɛwʋ gɛ Tire wogyu Hiram ɛ ŋwara gɩkpa e tiri wuunyun ɛ tɛ Solomon alan,

<<Gɛtɛ Yahwe ee len wɔ bɛnɩ baade okoro, ɛ sɩ̀ wɔ̀ bugyu ɛ tɛ bɛ.>>

12 Gɛ Hiram e biri ɛ ŋwara ɛ fɩya alan,

<<Ɩ yɛ taà sila Yahwe, Isareli wo Wurubwarɛ gɛtɛ ɛ mɛ gatala ma gɛtʋnkwaa fɔ. Ɛ tɛ egyu Dafidi ebi-teni ɛkɩ gɛtɛ ɛ sɛyɩ, gɛ ɛ̀ nyɩ̀ ade, gɛ ee we ade yaanɩ ɛ nyɩnla. Ɛwɔ nan sere Dikwo-dɩrɛ ɛ tɛ Yahwe, ma ɛwɔ gbagba wo digyu-kpaara fɔ.

13 Ǹ tɛ sa Huram-Abi ɛ̀ɛ̀ ba aakʋn. È di adawʋ yɩɩsalɛ-dɩrɛ. 14 Wɔna e ye Dan wofoli waanɩ, gɛ wote e ye Tire. Be wùlà wɔ sɩka-sɩya ma sɩka-fututu, ma gɩwɔrɔnyan-sɩya, ma gɩwɔrɔnyan, ma ataa ma iyon yɩɩ gʋtʋn gɩɩ gɛmɛ, gɛ ɛ̀ nyɩ̀ ɔyangʋ-sɩya ma nkeni butu bʋʋ-ɩyangʋ, ma ɔyangʋ-sɩya-yuu, ma ɔyangʋ ɔkpɩ wuu butu, ma akɛlɛlɛ-kpara yɩɩ gɛka mɛ gʋtʋn. Ɛ̀ nyɩ̀ gɛsalɩ gaadawʋ gɩɩ gʋtʋn gepepe, gɛ dɩdawʋ-kamasɛ gɩɩ gʋtʋn gɛtɛ bè len ɛ̀ɛ̀ mɛ fɔ, ɛ̀ talɩ ɛ mɛ. Ɛɛ̀ bɛ mɛ gʋtʋn ma aa bɛnɩ gɛtɛ bɛ̀ nyɩ̀ adawʋ yɩɩ gʋtʋn fɔ, ma miinfonte Dafidi, aate wadawʋ yɩɩ gʋtʋn gɩɩ bɛmɛlɛ fɔ.

15 Okoro miinfonte, yɛ afɩnaa, ma amɔrɔ, ma olife bʋnɔ, ma wayɩn bʋkan gɛtɛ a dɔ̀ a sɩ̀ alɛ aà tɛ tɩ fɔ yàà kya tɩ gʋlɔ. 16 Fɔ taà kebi seda wo-iyon powu gɛtɛ aa len fɔ ti ye Lebano, fɔ tàà ban ɛyɩ powu tɩ gyaga abatalɩ yii koro tɩ tɩyɛma ma ɛpʋ bàà ka bɛ mɔma wɔ̀ Yopa, fɔ aà talɩ a to yɩ a san Yerusalem.>>

Bɛ kya Dikwo-dɩrɛ fɔ dii gesere

17 Solomon ɛ yɛ bɛ kalan besela powu gɛtɛ bɛ̀ sa Isareli gɛtʋnkwaa gii koro anlɛ gɛtɛ wote Dafidi ɛ tɩ̀ mɛ fɔ. Besela fɔ powu bɛ ba asepekyi kwarankɩ ma ɩgbaa kooron ma nkpɩn nɩyɛ (153,600). 18 Solomon e tiri baanɩ bɛnɩ asepekyi asiyee ma ɩgbaa-ton (70,000) gɛtɛ bàà mɛ anyan yii betolalɛ, gɛ e tiri bɛnɩ asepekyi anaa (80,000) gɛtɛ bàà mɛ ataa yɩɩ bɛkpalɩlɛ idon yii koro, gɛ bɛndɩrɛ gɛtɛ bɛɛ nya gʋtʋn fɔ gii koro mɔ bɛ̀ ba gbaa ma nkpɩn nɩyɛ (3,600).