2 Ɩya-ɩya 4

Dikwo-dɩrɛ fɔ daanyɩmɩnyan

1 Egyu-dɩrɛ Solomon ɛ yɛ bɛ ka gɩwɔrɔnyan-sɩya bɛ mɛ gedi gɩɩ gɛtɛ̀kʋn. Gaabo ɩ̀ ba bɩsɩrɩ dikpilin ma fwo, gaayɛrɛ ɩ̀ ba bɩsɩrɩ dikpilin ma fwo, gɛ gaatɔ ɩ̀ ba bɩsɩrɩ fwo-ton. 2 Gɛ ɛ yɛ bɛ ka gɩwɔrɔnyan-sɩya bɛ wɔrɔ butu buu geto-sakʋn kulu-kulu-dɩrɛ gɛtɛ gaayɛrɛ ɩ̀ ba bɩsɩrɩ kwarankɩ ma ɔfan (7.5), gɛ waatɔ ɩ̀ ba bɩsɩrɩ kwarankɩ ma ɔfan (7.5), gɛ wuu gesilin-tuma gɩ̀ ba bɩsɩrɩ akpilin anyɔɔ ma ton (45). 3 Gɛ ɛ gbɛrɛ e tiri anlɛ bɛkwɔ boonundu ɩgba ɩnyɔɔ e silin butu buu geto-sakʋn fɔ giinyun waanɩ. Ɛ gbɛrɛ bɛkwɔ fwo ɛ sa gɩsɩrɩ gɩkɩ ma ɔfan-kamasɛ gaanɩ.

4 Gɛ butu buu geto-sakʋn fɔ gɩ̀ gyaga bɛkwɔ-teni fwo-bɛnyɔɔ gɛtɛ bɛ ka gɩwɔrɔnyan-sɩya bɛ mɛ fɔ boo koro. Besiyee bɔɔ bʋnʋn bù ten gatala gɩɩ gɩlan, gɛ besiyee bɔɔ bʋnʋn bù ten ofila wʋʋ gɛnʋ̀nkʋn wʋʋ gɩlan, gɛ besiyee bɔɔ bʋnʋn bù ten gatɩn gɩɩ gɩlan, gɛ besiyee bɔɔ bʋnʋn bù ten ofila wʋʋ gɛtàkʋn wʋʋ gɩlan. Butu buu geto-sakʋn fɔ gɩ̀ gyaga boo koro, gɛ bɔɔ bɩsɩrɩ bʋʋ gɩlan gama fɔ powu ì ten ma bɛwɔlɔn. 5 Wuutin wʋ̀ ba gulobi-kɩlɩn gaabo. E mirigiti wuunyun anlɛ kɔpʋ wonyun, abɛɛ anlɛ lili wafwɛ. Gɛ wuu to butu anlɛ bɛgarawa gbaa ɛkɩ (2,000).

6 Ɛ mɛ bɛtasa-dɩrɛ fwo gɛtɛ bee tì fere anyan gɛtɛ bɛɛ ka bɛ tɛ gekuma gii gedi fɔ baanɩ. Ɛ ka ton ɛ sɩ̀ gatɩn gɩɩ gɩlan, gɛ ɛ sɩ̀ ton gatala gɩɩ gɩlan. Mɔ butu gɛtɛ bʋ̀ sa butu buu geto-sakʋn-dɩrɛ-kulu-kulu fɔ gaanɩ fɔ bɩrɛ, bù sa tɛ gedi gɩɩ bɛtɛlɛ fɔ bàà fere koro.

7 Solomon ɛ mɛ sɩka-sɩya bɛkandɩya bɔɔ gɛgyagakʋn fwo anlɛ gɛtɛ be wùlà wɔ alɛ ɛ mɛ fɔ, gɛ ɛ ka bɛ e sere-sere Dikwo-dɩrɛ fɔ daanɩ. Bɛ ka ton be sere gatɩn gɩɩ gɩlan, gɛ ton-do mɔ bè sere gatala gɩɩ gɩlan.

8 Gɛ bɛ mɛ ɩkpʋlɔ fwo bɛ sɩ̀ Dikwo-dɩrɛ fɔ daanɩ. Bɛ ka ton bɛ sɩ̀ gatɩn gɩɩ gɩlan, gɛ ton do mɔ ɩ̀ dɔ gatala gɩɩ gɩlan. Gɛ e biri ɛ mɛ sɩka-sɩya bɛtasabi-ŋwanlɛ nkalan akpilin-ton (100).

9 Solomon ɛ mɛ gedi gɩɩ bɛtɛlɛ bɔɔ gɛsarakʋn dɩkpaara fɔ daanɩ, gɛ e biri ɛ mɛ dɩdɩrɛ dɩkɩ mɔ, gɛ ɛ ka gɩwɔrɔnyan-sɩya ɛ bɔlɩ ɩpʋnʋ fɔ. 10 Ɛ ka butu buu geto-sakʋn-dɩrɛ kulu-kulu fɔ ɛ sɩ̀ gatɩn gɩɩ gɩlan, ofila wʋʋ gɛtàkʋn wʋʋ gɩlan wuulogyi.

11 Gɛ e biri ɛ mɛ isun, ma bɛsɔfɩ, ma bɛtasabi-ŋwanlɛ nkalan.

Okoro Huram e werema gʋtʋn powu gɛtɛ Egyu-dɩrɛ Solomon ɛ tɛ wɔ alɛ ɛ mɛ Yahwe Dikwo-dɩrɛ daanɩ fɔ.

12 Anyan gɛtɛ ɛ mɛ fɔ n di bepila bɛnyɔɔ fɔ,

ma ayu gɛtɛ ɩ̀ gyaga bepila fɔ yii koro fɔ,

ma agbarɩ-gbarɩ gɛtɛ ɩ̀ kyaga ma bɛwɔlɔn, gɛ ɩɩ sa bɛtasa bɛnyɔɔ gɛtɛ bɛ̀ gyaga bepila fɔ boo koro ɔmɩrɩ fɔ,

13 ma pomegraniti wabi nkpɩn bʋnyɔɔ (400) gɛtɛ ɩ̀ kyaga ma butu buu geto-sakʋn-dɩrɛ fɔ ma bepila fɔ, gɛ ɩɩ sa tasa fɔ ɔmɩrɩ fɔ,

14 ma bɩsɩrɩ fɔ, ma bʋʋ bɛtasa fɔ,

15 ma butu buu geto-sakʋn-dɩrɛ fɔ, ma bɛkwɔ-teni fwo-bɛnyɔɔ-maralɛ gɛtɛ bɛ̀ sa wʋʋ gatɩn fɔ,

16 ma isun fɔ, ma bɛsɔfɩ fɔ, ma gɩnan gɩɩ bɩnyanɩ-dɩrɛ-dɩrɛ ma alobi fɔ, ma waanyan-kurumakyɛɛ.

Gɩwɔrɔnyan-sɩya-ŋalagɩlɛ gɛ Huram-Abi ɛ ka ɛ mɛ Yahwe Dikwo-dɩrɛ daanyan fɔ powu ɛ tɛ Egyu-dɩrɛ Solomon. 17 Egyu-dɩrɛ Solomon ɛ yɛ bɛ ka gɩwɔrɔnyan-sɩya-yalɩlɛ bɛ da bɛ sa atɩn-maralɛ yaanɩ, gɛ wu tiri gɛlɛ gaanyan nyayɩ Yodan wɔtalɩ gɛtɛ wʋ̀ sa Sukoti ma Saretan boo getite fɔ waanɩ. 18 Anyamanyan gɛtɛ Solomon ɛ mɛ fɔ ɩ̀ sɔ gʋsɔ, okoro ɛkɩ ɛn talɩ nyɩnla gɩwɔrɔnyan-sɩya fɔ gɩɩdʋrʋ wʋʋkʋna.

19 Gɛ Solomon ɛ nɩ̀ mɛ Yahwe Dikwo-dɩrɛ fɔ daanyan gɛtɛ ɩ̀ sa daanɩ fɔ powu.

Ɛyɩ n di sɩka-sɩya gedi gɩɩ gɛtɛ̀kʋn fɔ,

ma ɩkpʋlɔ gɛtɛ bɛɛ ka boroboro bɛ gyaga yii koro bɛ tɛ Yahwe gedi fɔ.

20 Ɛ ka sɩka-sɩya-kpara ɛ mɛ bɛkandɩya bɔɔ gɛgyagakʋn ma bɛkandɩya gɛtɛ wàà ŋmangɩ Ɔkʋn-dɩrɛ wʋʋkʋn-dɩrɛkʋn fɔ wʋʋ bʋnʋn anlɛ gɛtɛ be wùlà wɔ fɔ,

21 ma afwɛ fɔ, ma bɛkandɩya fɔ, bɛkandɩya fɔ, ma baayenkpen yɩɩ gɛsakʋn fɔ, gɛtɛ bɛ ka sɩka-sɩya bɛ mɛ yɩ fɔ,

22 ma sɩka-sɩya-kpara wo-imini-tiiralɛ kandɩya wayenkpen, ma bɛtasabi-ŋwanlɛ, ma bɩtɩyɛ, ma olifwi wʋʋ bɛtasabi, ma sɩka-sɩya-kpara, ma sɩka-sɩya wɔ-ɩpʋnʋ tɛ Dikwo-dɩrɛ fɔ, gɛtɛ ɛyɩ n di Ɔkʋn-dɩrɛ wʋʋkʋn-dɩrɛkʋn fɔ wʋʋpʋnʋ, ma Dikwo-dɩrɛ fɔ dii getumakʋn gɩɩpʋnʋ fɔ.