2 Ɩya-ɩya 36

1 Ɛwʋ gɛ bɛnɩ fɔ bɛ ka Yosiya wobi Yehowahasi bɛ sɩ̀ bugyu Yerusalem anɩ be sere wote gɩsɩrɩ.

Yuda wogyu Yehowahasi

2 Ɔkʋna gɛtɛ Yehowahasi e di bugyu fɔ, ɛ̀ ba bɩkyan dikpilin. E di bugyu Yerusalem bebon besiyee. 3 Egyipiti wogyu Neko ɛ tɔ̀là wɔ bugyu e ye Yerusalem anɩ gɛ ɛ nyɩ Yuda e le sɩka-fututu bekotoku akpilin ton (100), fɩya ma sɩka-sɩya kotoku ɛkɩ. 4 Gɛ Egyipiti wogyu ɛ ka Yehowahasi wonobi Eliyakim ɛ sɩ bugyu ɛ tɛ Yuda ma Yerusalem gɛ e foma Eliyakim diyere ɛ mɛ Yehoyiyakim. Mɔ Egyipiti wogyu Neko ɛ ka Eliyakim wɔdɩrɛ Yehowasi ɛ da Egyipiti.

Yuda wogyu Yehoyiyakim

5 Ɔkʋna gɛtɛ Yehoyiyakim e di bugyu fɔ, ɛ̀ ba bɩkyan dikpilin ma ton. E di bugyu Yerusalem bɩkyan fwo ɛkɩ. Ɛ mɛ ade-kpen Yahwe, wo Wurubwarɛ bʋnʋn. 6 Babilon wogyu Nebukadinesa ɛ ta bɩtà ma Yuda gɛ e gye Yehoyiyakim bɩtà, ɛ ka agbarɩgbarɩ ɛ ban wɔ ɛ da Babilon. 7 Nebukadinesa ɛ nɩ ka anyan powu gɛtɛ ɩ̀ sa Yahwe dikwo-dɩrɛ fɔ daanɩ fɔ ɛ da Babilon gɛ ɛ ka yɩ ɛ sɩ wo digyu-kpara daanɩ.

8 Ade-kurumakyɛɛ gɛtɛ Yehoyiyakim ɛ mɛ wo bugyu buu gedi baanɩ, ade-kyʋnlɛ gɛtɛ ɛ mɛ ma ɛyɩ powu gɛtɛ be we kadama wo koro fɔ, bɛ ŋwara yɩ bɛ sa Isareli begyu-dɩrɛ ma Yuda begyu-dɩrɛ bɔɔ gɩkpa-dɩrɛ fɔ gaanɩ. Gɛ wobi Yehoyiyakim e di bugyu e sere wɔ gɩsɩrɩ.

Yuda wogyu-dɩrɛ Yehoyiyakim

9 Ɔkʋna gɛtɛ Yehoyiyakin e e di bugyu fɔ, ɛ̀ ba bɩkyan fwo-nɩyɛ. Gɛ e di bugyu Yerusalem bebon besiyee ma awi fwo. Ɛ mɛ ade-kpen Yahwe bʋnʋn. 10 Ɛsʋn gɛnʋn gɩɩya waanɩ fɔ, egyu Nebukadinesa ɛ sa bɛ ma ka wɔ bɛ ba Babilon fɩya ma anyan gbagba gɛtɛ ɩ̀ sa Yahwe Dikwo-dɩrɛ daanɩ fɔ, gɛ ɛ sɩ̀ Yehoyiyakin wogbete Sedekiya bugyu ɛ tɛ Yuda ma Yerusalem.

Yuda wogyu Sedekiya

11 Ɔkʋna gɛtɛ Sedekiya e di bugyu fɔ, ɛ̀ ba bɩkyan dikpilin ma ɛkɩ, gɛ e di bugyu Yerusalem bɩkyan fwo ɛkɩ. 12 Ɛ mɛ ade-kpen Yahwe, wo Wurubwarɛ bʋnʋn gɛ ɛn warama wo koro tɛ Wurubwarɛ wɔtabʋrʋlɛ Yeremiya gɛtɛ ɛ tabʋrʋ Wurubwarɛ wade fɔ. 13 Ɛ nɩ tɔ e yela egyu Nebukadinesa wo koro gɛtɛ wʋ yɛ wɔ ɛ kan ntam wo Wurubwarɛ diyere daanɩ. Ɛ mɛ oturu-kɛma gɛ en foma ba Yahwe, Isareli wo Wurubwarɛ fɔ wakʋn. 14 Gɛ nkele mɔ, Yuda bɛndɩrɛbi, ma gedi gɩɩ bɛtɛlɛ ma bɛnɩ fɔ powu ben di nʋnkwarɩ. Bɛ tɛrɛma bɩfɩɩ gɛtɛ bi silin bɛ bu tuma fɔ baade karan-karan gɛtɛ bʋʋ mɛ fɔ, gɛ wʋ sa Yahwe Dikwo-dɩrɛ gɛtɛ ɛ mɛ fɩrɩnfɩrɩn Yerusalem anɩ fɔ dɩdɩɩ fɔ.

Yerusalem gɛnʋ̀n

15 Yahwe, bootu ɛbɛ boo Wurubwarɛ, ɛ dama wɔ bɛtabʋrʋlɛ boo koro ɛ tabʋrʋ ɛ tɛ bɛ disere dilen-dilen, yema ee we wɔ bɛnɩ boo gutunkoro ye wɔ gɛsarakʋn. 16 Mɔ bɛ mʋmwa Wurubwarɛ bɛtabʋrʋlɛ fɔ, bɛ gbɛlɩ wade fɔ gɛ bɛ sa bɛ dɩkpata ka ma ye gɛtɛ Yahwe wowurufa-dɩrɛ wʋ tɔ wɔ bɛnɩ boo koro gɛtɛ ɛkɩlɩn gba ɛn talɩ ye waanɩ. 17 Okoro Yahwe ɛ yɛ Babilon wogyu ɛ bɛ tà bɛ bɩtà gɛ e wolo bɔɔ bɛsaranyan-bi Dikwo-dɩrɛ fɔ daanɩ. Gɛ ɛsaranyan-bi oo, ɛsʋgʋgyan oo, ditenikwaa abɛɛ dɩnanɩkwaa oo, en kere bɛ ya. Yahwe e tiri bɛ powu ɛ tɛ Nebukadinesa. 18 E kpila anyan powu gɛtɛ ɩ̀ sa Wurubwarɛ Dikwo-dɩrɛ fɔ daanɩ, Dikwo-dɩrɛ fɔ daanyan gbagba ma egyu ma wɔ bɛndɩrɛbi boo koro gaanyan gbagba powu ɛ da Babilon. 19 Bɛ sa Yahwe Dikwo-dɩrɛ fɔ ɔtan, be gbena Yerusalem wɔ ɩpɔrɩ, be kuma agyu-kpara powu gɛ bɛ mɩna gɩnyan-kamasɛ gɛtɛ gì di gɩnyan gbaa fɔ.

20 Gɛ e gye ɛbɛ gɛtɛ be kuruma gɛ ben wolo bɛ fɔ bɩtà ɛ da Babilon. Gɛ bɛ mɛ bɛsʋmalɛ bɛ tɛ ɛwɔ ma wo bebi ma ye gɛtɛ Perisiya bugyu bu be yela. 21 Okoro ade gɛtɛ Yahwe ɛ dama wɔtabʋrʋlɛ Yeremiya wo koro ɛ dɔ̀ alan, << Gɛtʋnkwaa fɔ, gaà dʋrʋ tuntun bɩkyan akpilin asiyee ma fwo, gɛ gaà tuna gi ye duwi-tunalɛ dii gedi gaanɩ.>> fɔ ɩ ba waanɩ. 22 Perisiya wogyu Sirusi wo bugyu buu gedi wʋʋ gɩkyan-gyangbasɛlɛ gaanɩ fɔ, Yahwe ɛ yɛ gɛtɛ ade gɛtɛ ɛ dama wɔtabʋrʋlɛ Yeremiya wo koro ɛ dɔ̀ fɔ ɩ ba waanɩ. Ɛ kya Sirusi woturu gɛ ɛ tɛ ose gɛ ɛ dɔ̀ gɛtɛ bàà kalan wʋ kin-kin wo bugyu buu gedikʋn wʋʋkʋn-kamasɛ alan, 23 <<Perisiya wogyu Sirusi ɛɛ dɔ̀ alan, < Yahwe, gatala gii Wurubwarɛ ɛ ka gɛtʋnkwaa gii bugyu powu ɛ tɛ mɩ gɛ e tiri mɩ ɛ sɩ̀ gɛtɛ na sere dikwo-dɩrɛ n tɛ wɔ Yerusalem ma Yuda. Nkele ɛyɩ powu gɛtɛ ì di Wurubwarɛ bɛnɩ fɔ, ɩ san dʋkɔbɛ. Yahwe yii Wurubwarɛ ɛ fɩya ma ɛyɩ.>>