2 Ɩya-ɩya 28

Yuda wogyu Ahasi

1 Ahasi e sere bugyu buu bugyu fɔ, ɛ̀ ba bɩkyan dikpilin, gɛ e di bugyu Isareli bɩkyan fwo-kooron. Ɛn tɛrɛma wotu Dafidi wade-mɛlɛ. Ɛn mɛ ade-kpara Yahwe, wo Wurubwarɛ bʋnʋn. 2 Ɛ tɛrɛma Isareli begyu boo-isele, gɛ ɛ ka gɩwɔrɔnyan ɛ yalɩ ɛ mɛ ekpen Baali bàà tɩ̀ sʋma wɔ. 3 E kuma olifwi Ben-Hinom dɩtagba daanɩ, gɛ ɛ ka wo bebi-teni gba ɛ tɛ gekuma gii gedi. Ɛ mɛ ade-kyʋnlɛ anlɛ gɛtɛ bɩfɩɩ gɛtɛ Yahwe e berema e ye Isareli bete bɔɔ bʋnʋn fɔ bɛ mɛ fɔ. 4 Ɛɛ tɛ gedi, gɛ ee kuma olifwi asʋmakʋn, ma adenbi yii koro, ma oyon-kusuu-kamasɛ wʋʋ gatɩn.

5 Gɛlɛ wuu koro Yahwe, wɔ Wurubwarɛ e tiri wɔ ɛ tɛ Aram wogyu, gɛ Aram bete be di Ahasi wo koro. Be gye wɔ bɛnɩ kpekpesi gɛ bɛ ka bɛ bɛ da Damasiko.

Yahwe e biri ɛ yɛ Isareli wogyu e di Ahasi wo koro, gɛ e wolo wɔ bɩtà bʋʋ bɛtàlɛ kpekpesi. 6 Duwi-kɩlɩn daanɩ fɔ, Remaliya wobi Peka e wolo bɩtà bʋʋ bɛtàlɛ asepekyi kooron (120,000) Yuda anɩ, yema Yuda bɛnɩ be kere Yahwe, bootu ɛbɛ boo Wurubwarɛ fɔ bɛ ya. 7 Isareli bɩtà bʋʋtàlɛ gɛtɛ bee kpèlè Sikri fɔ na wolo Ahasi wobi Maaseyiya, ma Asrikam gɛtɛ è di ɛndɩrɛbi digyu-kpaara fɔ daanɩ fɔ, ma Elikana gɛtɛ è di egyu wɔmalɛ fɔ. 8 Ma gɛtɛ Yuda bete bè di Isareli bete bɔɔ bɛ fʋrɩ gba fɔ, Isareli bete fɔ be gye bɔɔsɔ ɛbɛ ma boo bebi asepekyi fwo (200,000), gɛ be kpila baanyan bɛ fɩya, gɛ be tola yɩ bɛ da Samariya.

9 Mɔ Wurubwarɛ wɔtabʋrʋlɛ Odedi fɔ ɛ sa dʋkɔbɛ, gɛ e ye e tuma bɩtà bʋʋ bɛtàlɛ gɛtɛ be biri bɛɛ ba Samariya fɔ, gɛ ɛ dɔ̀ bɛ alan, << Yahwe, yiitu ɛbɛ boo Wurubwarɛ fɔ ɛ ka owurufa Yuda bete boo koro gɛ ɛ yɛ yɩ i di boo koro. Mɔ ɩ mɛ ɩ kààrà gɛ i wolo bɛ omiri-kpen waanɩ. 10 Gɛ nkele ii len gɛtɛ yàà ka Yuda ma Yerusalem beteni ma bɔɔ bɛnanɩ ɩ mɛ yɩɩ bɛdɩ. Ɩɩn nyɩ̀ alɛ ɛyɩ mɔ ɩ mɛ Yahwe, yii Wurubwarɛ fɔ ade-kpen? 11 Nʋn ma kʋn! Birima aawɔlɔn ɛbɛ nyabɛ gɛtɛ a gye fɔ san, nka gɛlɛ fɔ Yahwe wowurufa-dɩrɛ waà ba aa koro.

12 Yehohanan wobi Asariya, ma Mesilemoti wobi Berekiya, ma Salum wobi Yehisikiya, ma Hadayi wobi Amasa gɛtɛ bè di Efrayim bɛndɩrɛbi fɔ mɔ ben yera bɩtà bʋʋ bɛtàlɛ fɔ baade mɛlɛ fɔ. 13 Gɛ bɛ dɔ̀ bɛ alan, <<Ɩ kara ka bɛnɩ gɛtɛ i gye lɛ ɩ ba nfan, nka gɛlɛ fɔ, Yahwe wowurufa waà ba tii koro. Ii len yàà biri ka ade-kpen-fon ɩ bɛ̀ fɩya ma ɛyɩ gɛtɛ tɩ̀ wɛrɛ mɛ fɔ? Yema taade-kpen ɩ wɛrɛ sɔ, gɛ wowurufa-dɩrɛ wʋ wɛrɛ tɔ wʋ̀ gyaga Isareli wo koro.>>

14 Okoro bɩtà bʋʋ bɛtàlɛ fɔ be kere bɛnɩ gɛtɛ be gye fɔ, ma anyan gɛtɛ be kpila fɔ bɛ ya bɛndɩrɛbi ma dikpi fɔ powu bɔɔ bʋnʋn dʋkɔ. 15 Ɛwʋ gɛ bɛnɩ bɛnaa gɛtɛ be kpèlè baayere fɔ bɛ ba bʋnʋn, gɛ be tiri ayan gɛtɛ bɩtà bʋʋ bɛtàlɛ fɔ be kpila be ye akpa fɔ yaanɩ fɔ be tin ɛbɛ gɛtɛ bɛ̀ san dibolon-kwaa fɔ. Bɛ tɛ bɛ ayan, ma anataga, ma anyandilɛ, ma butu, gɛ bɛ sa baakʋn gɩfa. Gɛ bɛ ka ɛbɛ gɛtɛ bɛ yɔlɔ baanɩ fɔ powu bɛ gyaga akpɔŋɔ-tɩtɩɩ yii koro, gɛ be birima ɛbɛ gɛtɛ be gye fɔ powu bɛ ma sɩ̀ Yeriko, aben yii ditele gɛtɛ dɩ̀ sa Yuda gɛtʋnkwaa gaanɩ fɔ daanɩ. Gɛ Isareli bete fɔ be biri bɛ da Samariya.

16 Ɔkʋna wʋtɔkɔ fɔ, egyu-dɩrɛ Ahasi ɛ fɔ Asyriya wogyu alɛ ɛ̀ɛ̀ kpà wɔ. 17 Yema Edom bete be biri bɛ ma kpà ma Yuda bete, gɛ be gye bɛ bɩtà bɛ da.

18 Fɔ Filisiti bete bɛ ma kpà ma atele gɛtɛ ɩ̀ sa odon wʋʋ bɩsɩrɩ ma Yuda Negebi gɩlan fɔ. Be gye Beti-Semesi, ma Ayalon, ma Gederoti, ma Soko watele, ma Timina, ma Gimiso fɩya ma yaatelebi gɛtɛ i silin yɩ i tuma fɔ. 19 Gɛ Yahwe ɛ warama Yuda gatɩn egyu-dɩrɛ Ahasi wo koro. Yema ɛ yɛ bɛnɩ bɛ mɛ duyu-kɛma daade Yuda, gɛ en di nʋnkwarɩ tɛ Yahwe.

20 Gɛtɛ Asiriya wogyu Tigilati-Pileseri e be gyu Ahasi wakʋn gɛtɛ ɛ̀ɛ̀ kpà wɔ fɔ, ɛ yɛ e len wɔ gɛ ade. 21 Okoro Ahasi ɛ ka sɩka-sɩya e ye Yahwe Dikwo-dɩrɛ daanɩ, ma digyu-kpaara fɔ daanɩ, ma wɔ bɛndɩrɛ baakpaara yaanɩ, gɛ ɛ ka yɩ ɛ tɛ Asiriya wogyu, mɔ ɛwʋ wʋʋn kpà wɔ.

22 Ma gɛtɛ ade ɩ ba egyu-dɩrɛ Ahasi wo koro gba fɔ, ɛwʋ gba gɛ en di nʋnkwarɩ tɛ Yahwe. 23 Ɛ tɛ Aram bete gɛtɛ be di boo koro akpa yaanɩ fɔ boo bekpen gedi, yema ɛɛ dɔ̀ alan, <<Aram wogyu bekpen na kpà bɛ, nan tɛ bɛ gedi fɔ, bàà kpà nmɩ mɔ.>> Mɔ ɛwʋ gba na ka gyerebi-dɩrɛ na mɔma ɛwɔ ma Isareli gɩfɩɩ powu.

24 Ahasi ɛ kʋla anyɩmɩnyan kperen-kperen gɛtɛ ɩ̀ sa Wurubwarɛ Dikwo-dɩrɛ fɔ daanɩ, gɛ e sila-sila yɩ. Ɛ tan Yahwe Dikwo-dɩrɛ diitunu fɔ, gɛ e sere gedi gaatɛkʋn Yerusalem wo-isele powu yaanɩ 25 Gɛ e sere asʋmakʋn Yuda ditele-kamasɛ daanɩ fɔ bàà tì tɛ bekpen gekuma gedi, nyawʋ wʋ sa Yahwe, wotu ɛbɛ boo Wurubwarɛ fɔ owurufa.

26 Bɛ ŋwara ade-kurumakyɛɛ gɛtɛ Ahasi ɛ mɛ wo bugyu buu gedi gaanɩ powu, ye digyegeye ma sere ɔkʋna bɛ sa Yuda ma Isareli begyu-dɩrɛ boo koro gaade yɩɩ gɩkpa-dɩrɛ fɔ gaanɩ. 27 Ahasi e ku, gɛ be lò wɔ Yerusalem ditele, mɔ ben lò wɔ begyu bɔɔ bɩsan baanɩ. Gɛ wobi Hesekiya e di bugyu e sere wɔ gɩsɩrɩ.